Xɛ́ acɛ Jesu tɔn tɔnsɔ́n?
(Matye 21.23-27/ Maaki 11.27-33)
20
1 É wa jɛ̌ gbeɖékpo, sáa ɖée mɛ Jesu nɔ kplɔ́nnú otogun lɔ́ ló osín Mawu tɔn mɛ mɔ gɔ nɔ lá owɛnjɔwǔn Mawu tɔn lé, avɔ̌sántɔ́gǎn e, sɛ́nkplɔ́nmɛtɔ́ e kpó tomɛxó Juu togun tɔn e kpó wa ajiji. 2 Yě kansí i fáan: «Lɔ na mí, gbɔn acɛ ɖemú mɛ o nɔ wá onú éxe e lé, kayí amɛ́ wá omɛ ɖée na ɛ acɛ énɛ́ lɔ́?»3 Jesu gblɔn ná ye fáan: «Nyɔ tete kpógba, un ná kanxó ɖe se mi. Mi lɔ na o: 4 Amɛ́ yi é na acɛ Jaan ní do nɔ lɛmawusin na mɛ? Mawu nɛ ya kayí gbɛtɔ́ e?»
5 Yě cɛ núlɛnkpɔ́n dǒ oxókanse éxe go mɔ nɔ lɔ́ ló yeɖé cincín fáan: «Ényí byɛ́ gblɔn fáan: “Mawu yi é ní i acɛ lɔ́”, é ná kanse mí fáan: “Jǎn amúwútu byɛ ma yi Jaan se wɛ́?” 6 Amɔ̌ ényí mí gɔ̌ gblɔn fáan: “Gbɛtɔ́ e yi é ní i acɛ énɛ́”, otogun lɔ́ kpéte ná dlan osé do mí mɔ́ hu mí, ná ye ko yise fáan gbeyílɔtɔ́ Mawu tɔn ɖé wá Jaan.»
7 Ye gbɔ mɔ gblɔn fáan: «Byɛ́ ma nyɔ́ omɛ ɖée ní i acɛ énɛ́ kɔn.» 8 Jesu wa lɔ́ ná ye fáan: «Kínɖékpolɔ́, nyɔ tete lɔsú, un ma ló omɛ ɖée na o acɛ un do nɔ wá onú éxe e ná lɔ na mi kɔn.»
Jesu yi vɛɛnglekpɔtɔ́ hlɔnhutɔ́ e do doló
(Matye 21.33-46/ Maaki 12.1-2)
9 Enɛ́godo, Jesu gɔ doló éxe ná otogun e fáan: «Dǎwe ɖé do vɛɛntín dǒ ogle étɔn mɛ mɔ wa xáya ná vɛɛnglekpɔtɔ́ ɖɛhwlɛn mɔ tɔnhwɛn nya gbějízɔnlin ɖé ji ló oto ɖé mɛ ná ojlɛ̌ dindɛn. 10 Kín jigbɛnhwenu do do, dǎwe lɔ́ do ɖékpo lo mɛsɛntɔ́ étɔn e mɛ hlǎn vɛɛnglekpɔtɔ́ lɔ́ e de, ná ye ní do yi sínsɛ́n vɛɛn tɔn ɖée ɖo ná nyi étɔn hlǐn i. Amɔ̌ vɛɛnglekpɔtɔ́ énɛ́ e bɔnúɖoná mɛsɛntɔ́ lɔ́ mɔ nyá ɛ asígbǎ-alɔgbǎ. 11 Vɛɛnglenɔ lɔ́ do mɛsɛntɔ́ ɖevo hlan, amɔ̌ vɛɛnglekpɔtɔ́ énɛ́ e gɔ bɔnúɖoná éyɔ tete lɔsú kpógba, ye zǔn i mɔ gɔ nyá ɛ asígbǎ-alɔgbǎ. 12 Vɛɛnglenɔ énɛ́ gɔ do mɛsɛntɔ́ atɔntɔ́ hlan, yě gɔ gbleawú ní i mɔ gɔ nyá ɛ. 13 Lo sáa énɛ́ mɛ, vɛɛnglenɔ lɔ́ wa lɔ́ ló éɖe mɛ fáan: “Amú un ná bayí? Un ná gbɔ mɔ do ovǐ xlunhwǎn omɛ yíwánna tɔ hlan, vlavo ye ná ɖo sísí na éyɔ.” 14 Amɔ̌ kín vɛɛnglekpɔtɔ́ énɛ́ e do mɔ ovǐ xlunhwǎn lɔ́ wazě, yě lɔ ló yeɖé cincín fáan: “Éyɔ wá ogǔɖutɔ́ lɔ́, mí ní hǔ i, ná ogǔ lɔ́ ní do nyi mítɔn!” 15 Yě gɔ dɔ̌n ɛ tɔnsɔ́n vɛɛngle lɔ́ mɛ mɔ hǔ i.» Jesu kanse ye fáan: «Amú vɛɛnglenɔ lɔ́ ná zɔndo ye? 16 Éyɔ ná wa mɔ́ hu vɛɛnglekpɔtɔ́ énɛ́ e sudo mɔ́ wa zě vɛɛngle étɔn do alɔmɛ na omɛ ɖevo e.» Kín omɛ e do se oxó énɛ́ e, yě lɔ fáan: «Mawu ní ɖo lá!» 17 Amɔ̌ Jesu kpɔn ye mɔ kanse ye fáan: «Oxó éxe ɖée ye kan dǒ Owé Wíwé mɛ fáan:
“Osé ɖée go oxɔɖótɔ́ e gbɛkɔ,
wa lɛzun osé gǎngán oxɔgǒsúmɛtɔn.”
Amú lɔ kɔn oxó énɛ́ le?
18 Omɛ ɖékpékpé ɖée ná jɛ-awán jɛ osé énɛ́ ji ná gba hannyá jǎn omɛ ɖékpékpé ɖée ji osé énɛ́ ná flɛ jɛ, ná nyi lili kplɔ́kplɔ́.»
Jesu lɔ fáan é jɛ ná ye ní do su tokwá na Sezaa
(Matye 22.15-22/ Maaki 12.13-17)
19 Lo ojlɛ̌ énɛ́ ɖékpolɔ́ mɛ, avɔ̌sántɔ́gǎn e kpó sɛ́nkplɔ́nmɛtɔ́ e kpó nɔ dǐn ná wle Jesu, ná ye nyɔ́ fáan yelɛ xólɔ kɔn é lé gbɔn oló lɔ́ mɛ. Amɔ̌ ye nɔ ɖíbú ná otogun lɔ́. 20 Lo sáa énɛ́ mɛ, ye cɛ Jesu cɔ́. Ye wa dǒ omɛ ɖɛhwlɛn hlǐn i, omɛ énɛ́ e do xomɛvɔ yeɖé ɖi omɛ jɔwun. Omɛ énɛ́ e ɖo ná ɖomɔ ní i gbɔn oxókanse ɖé dali mɔ́ yixó lo nugbɛn ní i mɔ́ do mɔtɛn jǔ i na ogǎn ɖée ɖo acɛ kpó xúhlɔ̌n kpó dǒ otoxo lɔ́ ji. 21 Omɛ énɛ́ e lɔ fáan: «Mɛkplɔ́ntɔ́! Mí nyɔ́ fáan onú ɖée o lɔ́ kpó onú ɖée o kplɔ́nmɛ kpó títɛkpóe yi é sɔgbe. Gbɛ̌ o ma gɔ̌ xónukúntakún omɛ ɖé tɔn kpɔ́n, amɔ̌ o kplɔ́nmɛ alixo ɖée Mawu jlo ló núgbǒ kpíkpé ɖe mɛ. 22 Lɔ ná mí: Bé osɛ́n mítɔn nagbe mí, nádo nɔ su tokwá hlan Sezaa? Kayí mí ní gɔ su le?»
23 Amɔ̌ Jesu nyɔ́ fáan omɔ yi ye nɔ ɖó na yelɔ́ mɔ lɔ ná ye fáan: 24 «Mi do abɔgankwá Lɔmunu e tɔn ɖékpo xlɛ o. Amɛ́ tɔn wá oyɛɖiɖe kpó nyíkɔ ɖée ló é ji kpó?» Yě gblɔn fáan: «Sezaa tɔn nɛ.» 25 Jesu mɔ lɔ ná ye fáan: «Mi ze onú ɖée wá Sezaa tɔn jo na Sezaa, mɔ ze onú ɖée wá Mawu tɔn jo na Mawu.» 26 Ye ma kpe é go mɔ wlí i ló otogun lɔ́ sín nukɔn ɖó ye ma mɔ xócigblɔn ɖé ló oxó étɔn e mɛ. É gɔ̌ wa onu ɖe, oxógbingblɔn étɔn kpacá ye, jǎn ye mɔ gbɔ mɔ nɔ-abwɛ́.
Saɖusi e kanxose Jesu dǒ fɔnsɔ́nkú go?
(Matye 22.23-33/ Maaki 12.18-27)
27 Saɖusi e yi é lɔ́ fáan fɔ́nsɔ́nkú ma ɖé e. Omɛ ɖɛhwlɛn lo ye mɛ sɛwa Jesu de mɔ́ kansí i fáan: 28 «Mɛkplɔ́ntɔ́! Mɔyizi kan ná mí dǒ osɛ́nwéma mɛ fáan: “Ényí omɛ ɖé da osi mɔ ku gbɛ̌ é ma jivǐ, nɔyí xlunhwǎn étɔn ní sɔn osúkúsi lɔ́ mɔ dokún na omɛ ɖée kú lɔ́.” 29 Nɔyí xlunhwǎn cyanwe ɖɛhwlɛn gǎ ɖée, jǎn omɛ tíntán mɔ da osi mɔ ku gbɛ̌ é ma jivǐ. 30 Nɔyí xlunhwǎn awetɔ́ sɔn osúkúsi lɔ́ mɔ ku gbɛ̌ é ma jivǐ. 31 Nɔyí xlunhwǎn atɔntɔ́ gɔ sɔn osúkúsi lɔ́ mɔ gɔ ku gbɛ̌ é ma jivǐ. Kínɖékpolɔ́ é nya gbɔn kpó nɔyí nɔyí cyanwe lɔ́ e títɛkpóe kpó ɖó nɛ́, ɖée sɔn osúkúsi lɔ́ mɔ ku gbɛ̌ ye ma jivǐ ɖekpékpé. 32 Enɛ́godo, osi lɔ́ lɔsú wa kú kpógba. 33 Lo fɔ́nsɔ́nkú hwenu, amɛ́ sín osi nyɔnu lɔ́ ná nyi lo ye omɛ cyanwe lɔ́ e mɛ ɖó ye omɛ kpó yí é yí i do da nyɔnu.»
34 Jesu gblɔn ná ye fáan: «Ogbɛ éxe mɛ yí xlunhwǎn e dǎ osi, nyɔnu e mɔ́ ɖɔ́-osú lé. 35 Amɔ̌ ye omɛ ɖée Mawu mɔ fáan yě jɛxɛ́ fɔ́nsɔ́nkú e, ye mɔ́ nɔ ogbɛ ɖée wazě lɔ́ mɛ e ma dǎ osi, gbɛ̌ ye ma gɔ̌ ɖɔ́-osú. 36 Ye ma singǎn ku ba, ná yě jɔ wɛnzagun Mawu tɔn e wútu. Ye nyi ovǐ Mawu tɔn, ɖó Mawu fɔn ye sɔ́n kú wútu. 37 Mɔyizi tete lɔsú ko doxlɛ hězéhězé fáan omɛ kúkú e ná fɔnsɔnkú wa ogbɛ. Ɖó, lo núkinkan étɔn ɖée lɔxó dǒ otan núkanvǔ ɖée nɔ jǐmyɔ́ gbɛ̌ ma fyɔ tɔn go, é ylɔ Oklunɔ Mawu jan: “Mawu Ablaxamu tɔn, Mawu Izaki tɔn kpó Mawu Jakɔbu tɔn kpó.”» 38 Jesu gɔ lɔ fáan «Mawu ma wá Mawu omɛ kúkú e tɔn, amɔ̌ Mawu omɛ ɖée ló ogbɛ e tɔn nɛ, ɖó ye omɛ kpó yi é ló ogbɛ ná éyɔ.»
39 Sɛ́nkplɔ́nmɛtɔ́ ɖɛhwlɛn gblɔn fáan: «Mɛkplɔ́ntɔ́! O lɔxó ganji.»
40 Enɛ́godo, ye ma gɔ xaji mɔ gɔ kanxó ɖékpékpé sí i ba.
Bé Ovǐ axɔ́lú Davidi tɔn wá Klisti Hwlɛngǎntɔ́?
(Matye 22.41-46/ Maaki 12.35-37)
41 Jesu kanse ye fáan: «Namú ye singǎn lɔ gbɔn fáan Ovǐ Davidi tɔn yi é wá Klisti Hwlɛngǎntɔ́? 42 Ná Davidi tete lɔsú lɔ ló Ohanwéma mɛ fáan:
“Oklunɔ Mawu lɔ ná Oklunɔ tɔ fáan:
Wa sín-awán lo aɖusílɔ tɔ mɛ,
43 káká un ní do yi kɛntɔ́ tɛ e
do bayí tɛ afɔɖótɛn”.
44 Davidi tete lɔsú nɔ ylɔ́ ɛ jǎn Oklunɔ, namú é ná gbɔn do gɔ nyi ovǐ étɔn lo?»
Jesu na avase núkplɔ́ntɔ́ étɔn e dǒ sɛ́nkplɔ́nmɛtɔ́ e go
(Matye 23.1-36/ Maaki 12.38-40)
45 Kín otogun lɔ́ kpéte do nɔ ɖótó Jesu, é lɔ ná núkplɔ́ntɔ́ étɔn e fáan: 46 «Mi cɔ miɖé do sɛ́nkplɔ́nmɛtɔ́ e go ɖée ló dǐndánkpe kɔn kpó tewugbǒ gaa kpó, mɔ́ yíwánná fáan omɛ e ní nɔ ɖɔnúdo ye kpódǒ sísí kpó lo tokplítɛn e. Ye dǐn ná nɔ sin-awán lo otɛn nukúnɖéji e mɛ lo kpíkplítɛn e, mɔ́ dǐn ná nɔ sin-awán lo otɛn ɖée ɖo yɛyi mɛ lo xwenúɖuɖu tɛn e mɛ. 47 Ye glǎ jɛ̌ onú ɖée nyi osúkúsi e tɔn títɛkpóe ji cógancó ye mɔ́ ló oɖɛ gaa xo kɔn nádo doxlɛ lo omɛ títɛkpóe sín nukunmɛ fáan omɛ jɔwǔn yi é wá ye. Enɛ́wútu, Mawu ná dahwɛ na ye vǐvɛ́vǐvɛ́.»