Jesu byɔ Jeluzalɛmu toxomɛ
(Matye 21.1-11/ Lwiki 19.28-40/ Jaan 12.12-19)
11
1 Sáa ɖée mɛ Jesu kpó núkplɔ́ntɔ́ étɔn e kpó sɛkpɔ Jeluzalɛmu toxomɛ lé, ma dɛn dǒ gletoxo Bɛtifaje tɔn kpó Betani tɔn kpó mɛ, ló osó ɖée ji olívitín e lé kɛ́, Jesu do núkplɔ́ntɔ́ étɔn awe hlan mɔ lɔ ná ye fáan: 2 «Mi nya gletoxo ɖée ló nukɔn ná mi mɛ. Ényí mi byɔ́ é mɛ tlóló, mi ná mɔ osɔ́ kɛ́tɛ́kɛ́tɛ́vǔ ɖe lo sinsin, ɖée ji omɛ ɖé ma ko xɛ kpɔngbeɖe. Mi tún i mɔ hɛ̌n ɛ wa. 3 Ényí omɛ ɖé kánse mi fáan: “Amúwútu mi do nɔ bǎyí ítɔ́?” Mi gblɔn ní i fáan: “Oklunɔ ɖo hudǒ étɔn amɔ̌ é ná gɔ gɔ̌ ɛ hlan lo madɛnmɛ.”»4 Yě gɔ nya mɔ mɔ osɔ́ kɛ́tɛ́kɛ́tɛ́vǔ ɖe ló sinsin ló ohɔn ɖé to ló alixokpá, ye mɔ tún i. 5 Omɛ ɖɛhwlɛn ló omɛ ɖée ló xínɛ́tɔ́ e mɛ mɔ kanse ye fáan: «Jijɔxo! Amú bayí kɔn mi le? Amúwútu mi do nɔ tún osɔ́ kɛ́tɛ́kɛ́tɛ́vǔ lɔ́?» 6 Yě gblɔn ná omɛ lɔ́ e ɖikín Jesu lɔ ná ye ɖó, ye mɔ jo ye do. 7 Yě hɛn osɔ́ kɛ́tɛ́kɛ́tɛ́vǔ lɔ́ wa ná Jesu, mɔ tɛ awugbǒ yetɔn e dǒ é ji, Jesu mɔ sin-awán ló é ji. 8 Omɛ susu gɔ tɛ awugbǒ yetɔn e dǒ alixo ji. Omɛ ɖevo e tɛ atínla ɖée ye san ló glemɛ e dǒ alixo ji. 9 Ye omɛ ɖée nɔ zǐnzɔnlin ló nukɔn ná Jesu kpó ye omɛ ɖée ló godo ní i e kpó nɔ dǒ-axó fáan:
«Ozána!
Dǒnánɔ yi é wá omɛ ɖée wazě ló nyíkɔ Oklunɔ tɔn mɛ!
10 Dǒnánɔ ná Axɔ́lúɖu ɖée wazě, Axɔ́lúɖu Davidi otɔ́ mítɔn tɔn!
Ozána lo olɔ́nmɛ aga!»
11 Jesu wa Jeluzalɛmu mɔ byɔ osín Mawu tɔn mɛ. Kín é do kpɔn onú títɛkpóe ji lɛdo godo, é tɔn nya Betani kpó núkplɔ́ntɔ́ étɔn wyawe e kpó ná awán nɔ cɔ́n wútu.
Jesu xoɖɛ dǒ votín ɖe
(Matye 21.18-19)
12 Lo owunkɛngbe étɔn, kín Jesu kpó núkplɔ́ntɔ́ étɔn e kpó do tɔnsɔ́n Betani, xovɛ̌ hu Jesu. 13 É mɔ votín ɖée ɖo ama ganji ɖé hlan, mɔ nya nádo kpɔn fáan bé yelɔ́ ná mɔ sínsɛ́n ɖe lo é ji ya. Amɔ̌, kín é do sɛkpɔ atín lɔ́, ama ɖóɖó yi é mɔ ló é ji ɖó é ma nyí ojlɛ̌ ɖée mɛ ye gbɛ̌n ovosínsɛ́n lé wútu. 14 Jesu lɔ ná atín lɔ́ fáan: «Omɛ ɖé ma gɔ̌ ló sínsɛ́n tɛ ná ɖu kɔn kpɔngbeɖe ba.» Núkplɔ́ntɔ́ étɔn e mɔ se oxó énɛ́ lɔ́.
Jesu nya núsatɔ́ e sɔ́n osín Mawu tɔn mɛ
(Matye 21.12-17/ Lwiki 19.45-48/ Jaan 2.13-22)
15 Enɛ́godo, Jesu kpó núkplɔ́ntɔ́ étɔn e kpó lɛkɔwa Jeluzalɛmu. Kín Jesu do byɔ osín Mawu tɔn mɛ, é cɛ núsatɔ́ kpó núxɔtɔ́ ɖée ló xínɛ́tɔ́ e kpó nya, é bli távo okwáɖyɔtɔ́ e tɔn kpó ojǎn akpwéxɛsatɔ́ e tɔn kpó kɔndǒ-awán. 16 É ma gɔ ɖikée ná omɛ ɖé ní ze onú ɖekpékpé gbɔn osín Mawu tɔn lɔ́ mɛ fɛ. 17 É mɔ cɛ núkplɔ́n ye fáan: «Bé ye ma ko kan dǒ Mawuxó mɛ fáan:
“Tɔ osín ná nyi osín oɖɛxixo tɔn na otogun títɛkpóe wɛ?”
Amɔ̌, byɛ, mi wa yí i do bayí bibɛtɛn ajogǎn e tɔn.»
18 Avɔ̌sántɔ́gǎn e kpó sɛ́nkplɔ́nmɛtɔ́ e kpó se onú ɖée jɔ lɔ́ mɔ cɛ ayixa kan nádo hǔ i sudo, ye nɔ ɖíbú ní i ná núkplɔ́nmɛ étɔn jɛ é ji ná otogun lɔ́ kpéte. 19 Kín é do jɛ hwedǒ, Jesu kpó núkplɔ́ntɔ́ étɔn e kpó tɔnsɔ́n otoxo lɔ́ mɛ.
Jesu yi votín ɖée é xoɖɛ dǒ do kplɔ́nnúmɛ dǒ yíse ji
(Matye 21.20-22)
20 Lo owunkɛngbe étɔn, kín Jesu kpó núkplɔ́ntɔ́ étɔn e kpó do nɔ fɛ́ ló klɛmɛ, yě mɔ fáan votín ɖée Jesu xoɖɛ dǒ lɔ́ fyɔ kákánya aɖɔdo. 21 Pyɛɛ flin onú ɖée jɔ lɔ́ mɔ lɔ ná Jesu fáan: «Mɛkplɔ́ntɔ́! Kpɔn, votín ɖée o xoɖɛ dǒ lɔ́ fyɔ!» 22 Jesu gblɔn ná ye fáan: «Mi ɖo yíse lo Mawu mɛ! 23 Núgbǒ un nɔ lɔ́ ná mi, ényí omɛ ɖé lɔ́ na oso éxe fáan: “Sun sɔn xítɔ mɔ nya jɛ oxu mɛ,” ényí omɛ lɔ́ ma xokpɔn lo ayixa étɔn mɛ, mɔ yise fáan onú ɖée yelɔ́ lɔ ná wa cicɛmɛ, onú lɔ́ ná wa cicɛmɛ. 24 Enɛ́wútu, un nɔ lɔ́ ná mi fáan: Onú ɖekpékpé ɖée mi ná byɔ lo oɖɛ mɛ, mi yíse fáan yelɔ́ ko mɔ yi, Mawu mɔ gɔ na mi. 25 Sáa ɖée mɛ mi ná lo ote mɔ́ lo oɖɛxo kɔn, mi mɔ flin fáan yelɔ́ ló okɛn mɛ kpódǒ omɛ ɖé kpó, mi jo ní i ná Otɔ́ mitɔn ɖée ló olɔ́nmɛ ní do jo onúciwa mitɔn e na mi kpógba. 26 a[Amɔ̌, ényí mi ma jo ní i, Otɔ́ mitɔn ɖée ló olɔ́nmɛ ma ná jo nyladǒ mitɔn e na mi.]»
Amɛ́ yi é na acɛ Jesu?
(Matye 21.23-27/ Lwiki 20.1-8)
27 Jesu kpó núkplɔ́ntɔ́ étɔn e kpó lɛkɔnya Jeluzalɛmu toxomɛ. Sáa ɖée mɛ Jesu nɔ nyá mɔ nɔ gɔ̌ gbɔ̌n osín Mawu tɔn mɛ lé, avɔ̌sántɔ́gǎn e, sɛ́nkplɔ́nmɛtɔ́ e kpó tomɛxó Juu togun e tɔn kpó wa é de. 28 Yě kansí i fáan: «Acɛ ɖemú mɛ o nɔ bayí onú éxe e le? Kayí amɛ́ yi é ná ɛ acɛ nádo bayí onú énɛ́ e?» 29 Jesu gblɔn ná ye fáan: «Un ná kan oxókún ɖékpo se mi, ényí mi ná o gblɔndǒ, un ná lɔ acɛ ɖée mɛ un nɔ wá onú énɛ́ e lé na mi. 30 Bé Mawu de yí mawusinlilɛnamɛ Jaan tɔn tɔnsɔ́n ya? Kayí gbɛtɔ́ e de? Mi gblɔn na o!»
31 Yě cɛ lilɔ ló yeɖé cincín fáan: «Ényí mí jǎn: “Sɔn Mawu de”, é ná lɔ fáan: “Amúwútu mi ma yi i se wɛ́?” 32 Amɔ̌, ényí mí gɔ̌ gblɔn fáan: “Sɔn gbɛtɔ́ e de”...» Ye nɔ ɖíbú ná agun ɖaxó lɔ́, ná gbɛtɔ́ títɛkpóe nɔ lɛ́n fáan Jaan wá gbeyílɔtɔ́ Mawu tɔn núgbǒ. 33 Enɛ́wútu, yě gbɔ mɔ gblɔn ná Jesu fáan: «Mí ma mɔdoná.» Jesu lɔ ná ye fáan: «Nyɔ tete lɔsú, un ma ló acɛ ɖée mɛ un nɔ́ wa onú énɛ́ e lé ná lɔ ná mi kɔn.»