Osú kpó osi kpó ma ɖo ná gbɛ yeɖé
(Matye 19.1-12/ Lwiki 16.18)
10
1 Enɛ́godo, Jesu tɔnsɔ́n xínɛ́ mɔ nya agbegbe Juɖe tɔn mɛ ló otɔ Jɔɔɖani tɔn sín godo. Omɛ e do ahwan mɔ gɔ xodǐ i, é mɔ cɛ núkplɔ́n ye lo kín é kó bayí gbɔ̌n. 2 Falizi e dɔnsɛkpɔ́ ɛ mɔ jlo ná ɖomɔ ní i. Yě kansí i fáan: «Bé osɛ́n mítɔn nagbe fáan xlunhwǎn ní gbɛ osi étɔn?» 3 Jesu yixó mɔ kanse ye fáan: «Amú Mɔyizi jan fáan mi ní bayí?» 4 Yě gblɔn ní i fáan: «Mɔyizi nagbe fáan ényí ye hɛ̌n, ye mɔ́ kanwe nyɔnu gbǐgbɛ́ tɔn, mɔ nya nyɔnu lɔ́.» 5 Jesu lɔ ná ye fáan: «Ayixasínsyɛ́n mitɔn yi é zɔn Mɔyizi gbɔ mɔ kan osɛ́n énɛ́ ná mi. 6 Amɔ̌ lo bíbɛ́mɛ ayíhɔ̌ngbɛ lɔ́ tɔn, Mawu da xlunhwǎn kpó nyɔsi kpó. 7 “Enɛ́wútu, xlunhwǎn ná jo otɔ́ étɔn kpó onɔ étɔn kpó do mɔ́ sɛbɔdo osi étɔn go, 8 jǎn ye omɛ awe lɔ́ e mɔ́ lɛzun agbasalan ɖékpo.” Enɛ́, ye ma ná gɔ nyi omɛ awe ba, yě lɛzun agbasalan ɖékpo gě. 9 Enɛ́wútu, gbɛtɔ́ ní gɔ klan onú ɖée Mawu kɔndǒkpɔ́ le.»10 Kín ye do lɛkɔnya osín mɛ, núkplɔ́ntɔ́ e gɔ gɔ oxó ɖékpolɔ́ kanse Jesu. 11 É gblɔn ná ye fáan: «Omɛ ɖékpékpé ɖée ná gbɛ osi étɔn mɔ́ nya da ɖevo, é ɖeayɔ jɛ agɔ dǒ osi tíntán lɔ́. 12 Kínɖékpolɔ́, ényí nyɔsi ɖé gɔ̌ gbɛ osú étɔn mɔ nya ɖɔsú ɖevo, é ɖeayɔ.»
Jesu doná vikɛvú e
(Matye 19.13-15/ Lwiki 18.15-17)
13 Omɛ e kplan vikɛvú e wa Jesu de ná é ní do ɖoalɔ ye ji, amɔ̌ núkplɔ́ntɔ́ étɔn e nɔ gblǎ omɛ lɔ́ e. 14 Kín Jesu do mɔ jan ítɔ́, é gblexomɛ dǒ núkplɔ́ntɔ́ étɔn e go mɔ lɔ ná ye fáan: «Mi jo vikɛvú e do ye ní wa tɔ de, mi gɔ glɔn alixo na ye le, ná omɛ ɖée ɖi vikɛvú e wunkɔ tɔn wá axɔ́lúɖu Mawu tɔn. 15 Ná má lɔ núgbǒ na mi, omɛ ɖée ma yi axɔ́lúɖu Mawu tɔn ɖi vikɛvú wunkɔ, ma singǎn byɔ é mɛ.» 16 Kín é do jan ítɔ́ godo, é bɛ vikɛvú lɔ́ e dǒ awa étɔn e mɛ, mɔ ɖoalɔ ye ji, mɔ doná ye.
Ɖɛkpɛvǔ adɔkunnɔ ɖé kanxóse Jesu
(Matye 19.16-30/ Lwiki 18.18-30)
17 Jesu wle alixo mɔ nɔ sɔ́n jǎn dǎwe ɖé mɔ dowezun wa mɔ́ ɛ, mɔ jɛkoli dǒ nukɔn étɔn mɔ kansí i fáan: «Mɛkplɔ́ntɔ́ jɔwǔn, amú un ɖo ná bayí mɔ do mɔ ogbɛ̌ maɖókpodǒ?» 18 Jesu gblɔn ní i fáan: «Amúwútu o do nɔ ylɔ́ o jǎn omɛ jɔwǔn? Omɛ ɖékpékpé ma nyí omɛ jɔwǔn zɛ Mawu cógě go. 19 O nyɔ́ osɛ́n e: “O ma ɖo ná hu mɛ, o ma ɖo ná ɖeayɔ, o ma ɖo ná jɛ ajo, o ma ɖo ná ɖekunnu agɔ, o ma ɖo ná blumɛ, ó ɖo ná na sísí tɛ otɔ́ kpó tɛ onɔ kpó.”» 20 Dǎwe lɔ́ gblɔn ní i fáan: «Mɛkplɔ́ntɔ́, sɔ́n ɖɛkpɛmɛ tɔ gbɔ̌n yi un nɔ nyí osɛ́n énɛ́ títɛkpóe.»
21 Jesu kpɔ́n ɛ kpódǒ owányíyí kpó mɔ lɔ́ ní i fáan: «Onú ɖékpo gě yi é hwe dǒ e: nya, mɔ sa onú ɖée o ɖo títɛkpóe, mɔ ma okwá étɔn na wamamɔnɔ e, sáa énɛ́ mɛ o ná ɖo adɔkun lo olɔ́nmɛ. Enɛ́godo, wa mɔ xodo o.» 22 Amɔ̌ kín dǎwe éxe do se oxó énɛ́, é nylɔnukunmɛ mɔ tɔnsɔ́n xínɛ́ kpódǒ awúblá kpó ná é ɖo adɔkun susu wútu.
23 Jesu kpɔn núkplɔ́ntɔ́ étɔn ɖée lɛdǐ i e mɔ lɔ ná ye fáan: «É ná syɛn na omɛ ɖée ɖo adɔkun e nádo byɔ axɔ́lúɖu Mawu tɔn mɛ!» 24 Oxó énɛ́ e kpacá núkplɔ́ntɔ́ e. Jesu gɔ yixó mɔ lɔ ná ye fáan: «Ovǐ tɔ e, é syɛn ná ye ní do byɔ Axɔ́lúɖu Mawu tɔn mɛ. 25 É ná bɔ-awú na osɔ́kpóawenɔ nádo gbɔn wínnyɛ́ nuvo mɛ hugán adɔkunnɔ nádo byɔ Axɔ́lúɖu Mawu tɔn mɛ.» 26 Kín núkplɔ́ntɔ́ e do se ítɔ́, é gɔ kpacá ye dogɔ, jǎn ye mɔ kanse yeɖé e fáan: «Amɛ́ gǎ ló hwlɛngǎn lɔ́ ná mɔ kɔn lo?» 27 Jesu kpɔn ye mɔ lɔ ná ye fáan: «Gbɛtɔ́ e yi onú énɛ́ glo, é ma glo Mawu, ɖó Mawu kpe onú kpókpó go.»
28 Pyɛɛ ga yixó mɔ lɔ ní i fáan: «Byɛ wé, mí jo onú títɛkpóe do mɔ nɔ xódǒ e.» 29 Jesu gblɔn ní i fáan: «Núgbǒ un lɔ ná mi: Ényí omɛ ɖé jǒ osín étɔn do, kayí nɔyí xlunhwǎn étɔn e, nɔyí nyɔsi étɔn e, kayí onɔ étɔn, kayí otɔ́ étɔn, kayí ovǐ étɔn e, kayí ogle étɔn e do ná nyɔ kpó owɛnjɔwǔn lɔ́ tɔn kpó wútu, 30 omɛ énɛ́ ná mɔ yi lo tíi, lo ogbɛ̌ éxe mɛ, osín e, nɔyí xlunhwǎn e, nɔyí nyɔsi e, onɔ e, ovǐ e, ogle e tɔn ítɔ́ wunkɔtɔn donu kanwekoó kpódǒ oyasánamɛ kpó. Amɔ̌ lo ayíhɔ̌n ɖée wazě mɛ, é ná mɔ ogbɛ maɖókpodǒ yi. 31 Gbɛtɔ́ susu ɖée nyi nukɔntɔ́ ná wa lɛzun godotɔ́ jǎn omɛ ɖée nyi godotɔ́ e mɔ́ lɛzun nukɔntɔ́.»
Jesu la jɔ atɔntɔ́ fáan yelɔ́ ná ku mɔ gɔ fɔnsɔnkú
(Matye 20.17-19/ Lwiki 18.31-34)
32 Jesu kpó núkplɔ́ntɔ́ étɔn e kpó ló alixo ji fɛwungɔ Jeluzalɛmu toxomɛ. Jesu nɔ sɔ́n ló nukɔn ná ye. Núkplɔ́ntɔ́ e sín ayixa gbado jǎn omɛ ɖée xodo ye e mɔ bɛbú. Jesu gɔ ylɔ mɛɖóhlan wyawe e dǒ éɖe de mɔ cɛ oxó lɔ dǒ onú ɖée wazě ná wa jɔ do é go lo madɛnmɛ fáan: 33 «Yíwe! Mí fɛwungɔ Jeluzalɛmu, jǎn ye mɔ́ ze Ovǐ Gbɛtɔ́ tɔn jo na avɔ̌sántɔ́gǎn e kpó sɛ́nkplɔ́nmɛtɔ́ e kpó, ye ná dakúhwɛ ní i mɔ́ jǔ i na omɛ ɖée ma nyi Juu e. 34 Ye ná vlɛ̌ ɛ ko mɔ́ tuntán do é go mɔ́ yi olanbá do xú i. Ye ná hǔ i jǎn azǎn atɔn godo, é ná fɔnsɔnkú.»
Jaki kpó Jaan kpó byɔnú Jesu
(Matye 20.20-28)
35 Ovǐ xlunhwǎn Zebeɖe tɔn e, Jaki kpó Jaan kpó wa Jesu de mɔ nɔ lɔ́ ní i fáan: «Mɛkplɔ́ntɔ́, byɛ́ jlo fáan o ní bayí onú ɖée mí na byɔ ɛ na mí.» 36 É kanse ye fáan: «Amú mi jlo fáan ná bayí na mi?» 37 Yě gblɔn fáan: «Sáa ɖée mɛ o ná lo gigo tɛ mɛ le, ɖikée ná mí ní sin-awán lo akpá nɛ, omɛ ɖékpo lo aɖusílɔ tɛ mɛ, omɛ awetɔ́ lo amyɔlɔ tɛ mɛ.» 38 Amɔ̌ Jesu lɔ ná ye fáan: «Mi ma nyɔ́ onú ɖée byɔ́ kɔn mi lé. Bé byɛ singǎn nu sɔn kɔ́fu ɖée un ná nu mɛ, kayí mɔ́ lɛmawusin ɖée ye ná lɛ na o?» 39 Yě yigbe ní i fáan: «Mí singǎn!» Jesu lɔ ná ye fáan: «Kɔ́fu ɖée nyɔ ná nu, mi ná nu mɔ gɔ lɛmawusin ɖée ye ná lɛ na o, 40 amɔ̌, na awánsínsín lo aɖusílɔ kayí lo amyɔlɔ tɔ mɛ, é ma nyí nyɔ tɔn nádo na kɔn, ná omɛ ɖée Mawu wleawú étɔn jlǎ ná e tɔn wá otɛn énɛ́ e.»
41 Kín mɛɖóhlan awó ɖée kpo e do se ítɔ́, yě gblexomɛ dǒ Jaki kpó Jaan kpó go. 42 Jesu ylɔ ye omɛ títɛkpóe kpli mɔ lɔ ná ye fáan: «Mi nyɔ́ fáan omɛ ɖée ye ylɔ́ jǎn otogǎn ló ayígbaji xítɔ, acɛ yi ye kpá na otovǐ yetɔn e, omɛ ɖaxó-ɖaxó yetɔn e gɔ̌ zǎn xúhlɔ̌n dǒ ye ji zɛ̌jlɛ̌go. 43 Amɔ̌ onú ma ɖo ná nya gbɔn ítɔ́ lo byɛ sín cincín kɔn. Omɛ ɖékpékpé ɖée jlo ná nyi ogǎn lo byɛ mɛ, omɛ lɔ́ ní nyi mɛsɛntɔ́ mitɔn. 44 Omɛ ɖée gɔ jlo ná nyi nukɔntɔ́ lo mi mɛ, omɛ lɔ́ ní nyi kannumɔ na omɛ títɛkpóe. 45 Ná Ovǐ Gbɛtɔ́ tɔn ma wa ná ye ní do sɛ́n ɛ kɔn, amɔ̌ é wa nádo sɛn mɛ, mɔ́ gɔ ze ogbɛ étɔn do xɔgbɛ na gbɛtɔ́ susu.»
Jesu hun nukún ná Baatimɛ
(Matye 20.29-34/ Lwiki 18.35-43)
46 Jesu kpó núkplɔ́ntɔ́ étɔn e kpó jɛ Jeliko toxomɛ. Kín ye do nɔ tɔ́nsɔ́n otoxo lɔ́ mɛ mɔ nɔ sɔ́n kpódǒ agun ɖaxó ɖe kpó, nukúntɔ́nnɔ ɖée nyí Baatimɛ, ovǐ xlunhwǎn Timɛ tɔn, sin-awán ló alixotó mɔ nɔ byɔ́nú. 47 Kín é do se fáan Jesu Nazalɛti tɔn wazě, é cɛ axódǒ fáan: «Ovǐ Davidi tɔn, walɛ́blánú na o!» 48 Gbɛtɔ́ susu nɔ gblǎ ɛ ná é ní do nɔ-abwɛ́, amɔ̌ é gbɛkpo nɔ dǒ-axó gǎngán dogɔ fáan: «Ovǐ Davidi tɔn, walɛ́blánú na o!»
49 Jesu nɔte mɔ lɔ fáan: «Mi ylɔ́ ɛ wa.» Yě ylɔ nukúntɔ́nnɔ lɔ́ mɔ lɔ ní i fáan: «Gboadɔ, fɔntite! É nɔ ylɔ́ ɛ!» 50 Nukúntɔ́nnɔ lɔ́ ze awugbǒ étɔn dlǎn mɔ hlɔntite mɔ nya Jesu de. 51 Jesu kansí i fáan: «Amú o jlo fáan ná bayí nɛ?» Nukúntɔ́nnɔ lɔ́ gblɔn fáan: «Mɛkplɔ́ntɔ́, bayí ná ma mɔnukúnnú!» 52 Jesu lɔ ní i fáan: «Nya, yíse tɛ hwlɛn ɛ gan.» Afɔɖékpolɔ́ji, é mɔnukúnnú mɔ xodǒ Jesu.