Jesu yi osúkúsi ɖé kpó hwɛɖɔtɔ́ ɖe kpó do doló
18
1 Enɛ́godo, Jesu doló éxe ná núkplɔ́ntɔ́ étɔn e nádo doxlɛ ye fáan yě ɖo ná nɔ xoɖɛ lo ojlɛ̌ kpókpó mɛ gbɛ̌ agbɔ̌ ma ɖo ná kpe ye gbeɖe. 2 É lɔ ná ye fáan: «Dǎwe hwɛɖɔtɔ́ ɖe ɖée ló otoxo ɖé mɛ. É ma ɖíbúsí Mawu gbɛ̌ é ma gɔ̌ ɖó sísí ná gbɛtɔ́ ɖekpékpé. 3 Lo otoxo énɛ́ ɖékpolɔ́ mɛ, osúkúsi ɖé ɖée, mɔ́ wá mɔ́ hwɛɖɔtɔ́ énɛ́ gbɔzan-gbɔzan mɔ́ lɔ́ ní i fáan: “Ɖɔhwɛ jǐjlɔ́ do ɖe o sɔn tɔ kɛntɔ́ sí!” 4 Ná ojlɛ̌ susu, hwɛɖɔtɔ́ lɔ́ gbɛ̌, amɔ̌ é wa lɔ́ ló éɖe mɛ fáan: “Un ma ɖíbúsí Mawu gbɛ̌ ma gɔ̌ ɖó sísí ná omɛ ɖékpékpé. 5 Amɔ̌ kín osúkúsi éxe nɔ dǒtuklá o ló, un ná gbɔ mɔ́ ɖɔhwɛ jǐjlɔ́ ní i, é ma nyi ítɔ́ é mɔ́ gbɛkpo lo wíwá kɔn káká mɔ́ wa hɛ̌n agbɔ̌kpe o.”»6 Enɛ́godo, Oklunɔ Jesu gɔ lɔ fáan: «Mi se oxó ɖée dǎwe hwɛɖɔtɔ́ mawadǒdónɔ énɛ́ lɔ ganji! 7 Bé Mawu ma ná wa dǒdó hlan étɔnnɔ e lo ojlɛ̌ ɖée mɛ yelɛ nɔ dǒ-axó ylɔ́ ɛ ló ozǎn kpó kle kpó wɛ? Bé é ná dɛn nádo gɔalɔ na ye nɛ? 8 Un nɔ lɔ́ ná mi fáan: É ná wa dǒdó na ye bléwún. Amɔ̌, ojlɛ̌ ɖée mɛ Ovǐ Gbɛtɔ́ tɔn ná lɛkɔwa le, bé é ná mɔ yíse lo ayígba ji?»
Jesu yi Falizi ɖé kpó tokwácántɔ́ ɖe kpó do doló
9 Jesu gɔ doló éxe hlǎn ye omɛ ɖée ylɔ́ yeɖé e jǎn dǒdónɔ mɔ́ gǎ gbɛwánná gbɛtɔ́ ɖée kpo e fáan: 10 «Dǎwe awe nya osín Mawu tɔn mɛ nádo xoɖɛ. Omɛ ɖékpo bayí Falizi, omɛ awetɔ́ mɔ bayí tokwácántɔ́. 11 Falizi lɔ́ tite mɔ nɔ xóɖɛ ló éɖe mɛ fáan: “Mawu tɔ! Un dokpɛ́ nɛ fáan un ma jɔ gbɛtɔ́ ɖée kpo e, ɖée wá ajotɔ́ e, núnylakanwatɔ́ e, ayɔɖetɔ́ e wunkɔtɔn. Un gɔ dokpɛ́ nɛ ɛ fáan un ma jɔ tokwácántɔ́ éxe wunkɔtɔn. 12 Un blánugbɛn jɔ awe ló osɛ ɖékpo mɛ, un gɔ̌ ná mádoawó ale onú tɔ títɛkpóe tɔn.” 13 Tokwácántɔ́ lɔ́ nɔte ló olá ma dɛ jlo ná jlɔkɔkpɔn agaxomɛ tete lɔsú gbɔ̌n, amɔ̌ nádo doxlɛ fáan é yigbe nyladǒ étɔn e tɔn, é flɛn-alɔ dǒ akɔ́nnugbɛn mɔ nɔ lɔ́ fáan: “Có! Mawu tɔ, nyladǒnɔ yi é wá nyɔ, walɛ́blánú na o.”» 14 Jesu gɔ lɔ fáan: «Ná lɔ na mi: Mawu yi tokwácántɔ́ énɛ́ ɖi dǒdónɔ, é mɔ lɛkɔnya osín étɔn mɛ, amɔ̌ Mawu ma yi Falizi énɛ́ ɖi dǒdónɔ kɔn. Ná omɛ ɖékpékpé ɖée ze éɖe dǒ aga, Mawu na zǐ i hwe, omɛ ɖée ga ze éɖe hwe, Mawu ná zǐ i do aga.»
Jesu fáan ye ní bɛ ovǐvǔ e wa yelɔ́ de
(Matye 19.13-15/ Maaki 10.13-16)
15 Gbɛtɔ́ e gɔ bɛ ovǐ ɖée ló anɔ́nugbɛn e tete lɔsú kpógba wa Jesu de ní do mɔtɛn ɖoalɔ ye ji. Kín núkplɔ́ntɔ́ Jesu tɔn e do mɔ jan ítɔ́, ye gɔ cɛ adǎn wa dǒ ye ji. 16 Amɔ̌ Jesu lɔ fáan ye ní bɛ ovǐvǔ lɔ́ e wa mɔ lɔ fáan: «Mi jo vikɛvú e do ye ní wa tɔ de, mi gɔ glɔn alixo na ye le, ná omɛ ɖée jɔ yelɛ wunkɔ tɔn wá Axɔ́lúɖu Mawu tɔn. 17 Un ná lɔ núgbǒ na mi: omɛ ɖée ma kɛ-alɔyi Axɔ́lúɖu Mawu tɔn ɖi vikɛvú wunkɔ ma ná byɔ é mɛ.»
Dǎwe adɔkunnɔ ɖé wa kánxóse Jesu
(Matye 19.16-30/ Maaki 10.17-31)
18 Ogǎn Juu tɔn ɖé kanxóse Jesu fáan: «Mɛkplɔ́ntɔ́ jɔwǔn! Amú un ɖo ná bayí nádo ɖugǔ ogbɛ maɖokpodǒ tɔn?»
19 Jesu gblɔn ní i fáan: «Amúwútu o do ylɔ o jan omɛ jɔwǔn? Omɛ jɔwǔn ɖe ma ɖé e, afido Mawu có gě. 20 O nyɔ́ osɛ́n e: O ma ɖo ná ɖeayɔ. O ma ɖo ná humɛ. O ma ɖo ná jɛ-ajo. O ma ɖo ná ɖekunnu agɔ. Ó ɖo ná nɔ si tɛ otɔ́ kpó tɛ onɔ kpó.»
21 Dǎwe lɔ́ gblɔn fáan: «Sɔn ɖɛkpɛmɛ hwenu tɔ gbɔ̌n yi un ko nɔ nyí osɛ́n énɛ́ títɛkpóe.»
22 Kín Jesu do se ítɔ́, é lɔ ní i fáan: «É gbɛ hwe onú ɖékpo nɛ ɛ: nya sa onú ɖée o ɖo e títɛkpóe mɔ ma okwá étɔn na wamamɔnɔ e, sáa énɛ́ mɛ o ná ɖo adɔkun lo olɔ́nmɛ. Enɛ́godo, wa mɔ xodo o.»
23 Amɔ̌ kín dǎwe lɔ́ do se oxó énɛ́, awúblá ɛ tawun, ná adɔkunnɔ ɖaxó éyɔ nyi wútu. 24 Kín Jesu do mɔ fáan awúblá ɛ, é lɔ fáan: «É ná syɛn na ye omɛ ɖée nyi adɔkunnɔ e nádo byɔ Axɔ́lúɖu Mawu tɔn mɛ! 25 Núgbǒ! É bɔ-awú ná osɔ́kpóawenɔ nádo gbɔn wínnyɛ́ nuvomɛ luntɔn hugán adɔkunnɔ nádo byɔ Axɔ́lúɖu Mawu tɔn mɛ.»
26 Ye omɛ ɖée nɔ ɖótó Jesu e nɔ jǎn fáan: «Ényí é nyí ítɔ́, amɛ́ singǎn mɔ hwlɛngǎn?» 27 Jesu gblɔn fáan: «Onú ɖée glo gbɛtɔ́ ma glo Mawu.» 28 Lo ojlɛ̌ énɛ́ mɛ Pyɛɛ gɔ lɔ ná Jesu fáan: «Yíwe, byɛ́, mí jo onú ɖée mí ɖo e do mɔ nɔ xódǒ ayɔ.»
29 Jesu gblɔn ná ye fáan: «Núgbǒ yi un nɔ lɔ ná mi: omɛ ɖée jo osín étɔn do, kayí osi étɔn, nɔyí étɔn e, mɛjitɔ́ étɔn e, ovǐ étɔn e do, ná Axɔ́lúɖu Mawu tɔn wútu, 30 Mawu ná ní i onú énɛ́ e donu nɛmú ɖe lo ogbɛ éxe mɛ, mɔ gɔ ní i ogbɛ maɖokpodǒ lo ogbɛ ɖée wazě mɛ.»
Jesu la okú kpó fɔ́nsɔ́nkú étɔn kpó jɔ atɔntɔ́
(Matye 20.17-19/ Maaki 10.32-34)
31 Jesu kplan núkplɔ́ntɔ́ étɔn wyawe e jɛ olá mɔ lɔ ná ye fáan: «Yíwe, mí fɛwungɔ Jeluzalɛmu toxomɛ jǎn onú ɖée gbeyílɔtɔ́ Mawu tɔn e ko kan dǒ Ovǐ Gbɛtɔ́ tɔn go títɛkpóe ná wa cicɛmɛ. 32 Ná ye ná jǔ i na omɛ ɖée ma wá Juu e. Ye ná vlɛ ɛ ko, ye ná doya ní i mɔ́ tun otán do é go. 33 Ye ná yi olanbá do xú i. Enɛ́godo ye mɔ́ hǔ i. Azǎn étɔn atɔntɔ́gbe é mɔ́ fɔnsɔnkú.»
34 Amɔ̌, núkplɔ́ntɔ́ e ma mɔnukúnnú jɛ oxó énɛ́ e ɖékpékpé mɛ, oxó lɔ́ e budo dǒ ye. Ye ma gɔ̌ nyɔ́ takúnɖená oxó énɛ́ e tɔn kpó takúnɖená onú ɖée Jesu nɔ lɔ́ e tɔn kpó.
Jesu hun nukún ná nukúntɔ́nnɔ ɖé ló Jeliko toxomɛ
(Matye 20.29-34/ Maaki 10.46-52)
35 Jesu sɛkpɔ otoxo ɖée ye ylɔ́ jǎn Jeliko mɛ. Nukúntɔ́nnɔ ɖé gǎ ló awánsínsín ló alixotó mɔ nɔ byɔ́nú. 36 Kín é do se fáan omɛ susu nɔ fɛ́, é kan onú ɖée nɔ jɔ̌ se. 37 Ye gɔ lɔ ní i fáan Jesu Nazalɛti toxomɛnu yi é nɔ fɛ́.
38 É do-axó fáan: «Jesu Ovǐ Davidi tɔn e, walɛ́blánú na o!»
39 Ye omɛ ɖée nɔ sɔ́n ló nukɔn Jesu tɔn e gɔ cɛ wiwɔ xɛ́ ɛ ná éyɔ ní do nɔ-abwɛ́. Amɔ̌ nukúntɔ́nnɔ énɛ́ gɔ nɔ dǒ-axó gǎngán dogɔ fáan: «Ovǐ Davidi tɔn e, walɛ́blánú na o!»
40 Jesu nɔte mɔ ɖegbe fáan, ye ní kplín i wa na yelɔ́. Kín ye do hɛn nukúntɔ́nnɔ lɔ́ sɛkpɔ Jesu, Jesu kansí i fáan: 41 «Amú o jlo fáan ná bayí nɛ?» É gblɔn ní i fáan: «Oklunɔ! Bayí ná má gɔ nukúnnú mɔ!»