Jesu lɔxó dǒ nyladǒ kpó jona nyladǒ kpó go
(Matye 18.6-7, 21-22/ Maaki 9.42)
17
1 Jesu lɔ ná núkplɔ́ntɔ́ étɔn e fáan: «Onú ɖée ná hɛn gbɛtɔ́ wanyladǒ ma ná gɔn ma wá, amɔ̌ númajɔwunnánɔ wá omɛ ɖée ji é ná gbɔn do wa! 2 É ná kpɔnte na omɛ énɛ́ fáan ye ní sin osé ɖaxó ɖékpo do okɔ ní i mɔ zǐ i dlǎn oxumɛ hugán fáan éyɔ ní hɛn ɖékpo lo vikɛvú éxe e mɛ wanyladǒ. 3 Mi nɔ acéji!Ényí tɛ nɔyí wányladǒ de e, gbɛxó ní i, ényí é lɛ́nvɔjɔ, mɔ jo ní i. 4 Ényí é wányladǒ jɔ cyanwe de e lo gbeɖékpo, mɔ gɔ gɔwa tɛ de jɔ cyanwe fáan: “Un lɛnvɔjɔ”, mɔ jo ní i.»
Xúhlɔ̌n yíse tɔn
5 Mɛɖóhlan e lɔ ná Jesu fáan: «Oklunɔ! Do yíse yíse ji na mí!» 6 Oklunɔ gblɔn ná ye fáan: «Ényí yíse mitɔn hwě ɖi atínkún flínflín ɖé wunkɔ, mi ná lɔ na atín éxe fáan: “Hɔn aɖɔ na aɖé mɔ nya tun aɖé te do oxumɛ”, é mɔ́ gɔ se mitɔn.»
Azɔ̌n ɖée mɛsɛntɔ́ ɖo ná wa
7 «Amɛ́ ló byɛ mɛ, é mɔ ɖo mɛsɛntɔ́ ɖe, ɖée kpɔ́gle kayí ɖée cɔ́ kannyi ní i, jǎn sáa ɖée mɛ é gɔ sɔ́n glemɛ lé, ná jlin i fáan: “Mɛsɛntɔ́! Yawú wa sín-awán mɔ ɖunú”? 8 Bé é ma ná lɔ na mɛsɛntɔ́ lɔ́ fáan: “Ɖa onú ɖée un ná ɖu na o mɔ blagbajǎ nádo sɛn o káká un ní do ɖu mɔ nu, énɛ́godo, ayɔ tete mɔ́ ɖu mɔ́ nu wɛ”?. 9 Bé ogǎn lɔ́ ná ɖɔnúdo mɛsɛntɔ́ étɔn, ɖó éyɔ wazɔ̌n ɖée é zɔn ɛ e kpó? 10 Kínɖékpolɔ́, byɛ tete kpógba, ényí mi wázɔ̌n ɖée Mawu zɔn mi e kpó, mi nɔ jan fáan: “Mɛsɛntɔ́ tata yi é wa mí, azɔ̌n ɖée mí ɖo ná wa yi mí wa.”»
Jesu gbɔ-awutu ná kpozɔnjɛtɔ́ awó
11 Jesu ló alixo ji fɛwungɔ Jeluzalɛmu toxomɛ. É gbɔn dogbǒ ɖée ló agbegbe Samali kpó Galile tɔn kpó cincín. 12 Sáa ɖée mɛ é nɔ byɔ́ gletoxo ɖé mɛ lé, kpozɔnjɛtɔ́ awó wa kpǐ i mɔ nɔte ló olá 13 mɔ zegbenyaga fáan: «Jesu, ogǎn! Walɛ́blánú na mí!»
14 Kín Jesu do mɔ ye, é lɔ ná ye fáan: «Mi nya do miɖé xlɛ avɔ̌sántɔ́ Mawu tɔn e.» Kín ye do ze alixo fɛwungɔ, ye mɔ kpɔ́ngbɔ yi. 15 Ɖékpo lo yemɛ, kín é do mɔ fáan yelɔ́ jɛ gǎngán, é lɛkɔwa mɔ nɔ kpá gigo ná Mawu kpódǒ ogbe lélé kpó. 16 É cyɔn nukunmɛ do ló afɔkɔ ná Jesu mɔ nɔ dǒkpɛ́ ní i. Dǎwe énɛ́, Samalinu nɛ.
17 Sáa énɛ́ mɛ, Jesu yixó mɔ lɔ fáan: «Bé é ma nyi omɛ awó lɔ́ e títɛkpóe yi é mɔ kpɔ́ngbɔ yi wɛ? Jǎn omɛ cyɛnnɛ ɖée kpo e lo, xɛ́ ye lé? 18 Bé omɛ ɖékpékpé ma gɔ̌ ló yemɛ mɔ́ lɛkɔwa kpá gigo na Mawu zɛ jonɔ éxe có gě go wɛ?»
19 Jesu lɔ ná dǎwe Samalinu lɔ́ fáan: «Fɔntite mɔ nya! Tɛ yíse hwlɛn ɛ gan!»
Axɔ́lúɖu Mawu tɔn ló cincín mitɔn
(Matye 24.23-28, 37-41)
20 Falizi e kanse Jesu fáan: «Gběwúngbe axɔ́lúɖu Mawu tɔn ná wa?» Jesu gblɔn ná ye fáan: «Axɔ́lúɖu Mawu tɔn ma ná wa ye mɔ́ mɔ kpódǒ nukún kpó. 21 Ye ma ná wa jǎn: “Mi kpɔn, yíwe ló xítɔ!” Kayí “yínɛ ló xímɔ́tɔ́!”. Ná mi ɖo ná nyɔ fáan Axɔ́lúɖu Mawu tɔn ló cincín mitɔn!»
Gběwúngbe Ovǐ gbɛtɔ́ tɔn ná wa?
22 Enɛ́godo, Jesu lɔ ná núkplɔ́ntɔ́ e fáan: «Ojlɛ̌ lɔ́ ná wa, mi mɔ́ jlo ná mɔ Ovǐ Gbɛtɔ́ tɔn na azǎn ɖékpo tata gbɛ̌ mi ma ná mɔ́ ɛ. 23 Ye ná lɔ na mi fáan: “Yíwe ló xítɔ” kayí “Yínɛ́ ló xímɔ́!”. Amɔ̌, mi gɔ nya le, gbɛ̌ mi gɔ xodo ye le.» 24 Kpó fáan, kín abi gbǒdlǎn mɔ́ sɛ́ mlamla ló agaxomɛ sɔ́n awa ɖe ji dojɛ awa ɖevo ji ɖó, ítɔ́ é ná nya gbɔn na Ovǐ Gbɛtɔ́ tɔn lo azǎn étɔn gbe. 25 Amɔ̌, é jɛ fáan, éyɔ ní mɔ awúfyɛsa susu hwɛ̌ jɛnukɔn, jǎn gbɛtɔ́ hweéxenutɔn e mɔ́ gbɛ̌ ɛ jla. 26 Onú ɖée jɔ ló Nɔwe sín hwenu, yi wunkɔ yi é ná jɔ lo Ovǐ gbɛtɔ́ tɔn sín hwenu. 27 Gbɛtɔ́ e nɔ ɖúnú, mɔ nɔ nú ahan, xlunhwǎn e mɔ nɔ kplán nyɔnu, nyɔsi e mɔ nɔ nyá sunfinkɔ́ kákájɛ azǎn ɖée gbe Nɔwe byɔ tɔjihǔn ɖaxó lɔ́ mɛ lé. Sáa lɔ́ mɛ, osin gɔfla mɔ va omɛ énɛ́ e títɛkpóe sudo. 28 Onú ɖée jɔ ló Lɔti sín hwenu yi é ná gɔ jɔ: lo Lɔti sín hwenu, gbɛtɔ́ e nɔ ɖúnú mɔ nɔ nú ahan, ye nɔ xɔ́ mɔ nɔ sá, ye nɔ dǒ jinɔkún mɔ gɔ nɔ gbǎ oxɔ. 29 Amɔ̌, azǎn ɖée gbe Lɔti tɔnsɔ́n Sodɔmu toxomɛ, Mawu zɔn myɔ́ kpó hwemí kpó mɔ ja sɔ́n agaxomɛ ɖí jǒkún mɔ va ye omɛ kpó sudo. 30 Kínɖékpolɔ́ é ná gɔ jɔ gbɔn lo azǎn ɖée gbe Ovǐ Gbɛtɔ́ tɔn ná do éɖe xlɛ le.
31 Lo azǎn énɛ́ lɔ́ gbe, omɛ ɖée ná lo oxɔtakún mɔ ga ɖo onú étɔn e lo oxɔmɛ, ní gɔ jɛte nádo bɛ ye le. Kínɖékpolɔ́, omɛ ɖée ná gɔ lo glemɛ ní gɔ lɛkɔwa osín mɛ le. 32 Mi flin onú ɖée jɔ dǒ osi Lɔti tɔn go. 33 Omɛ ɖée ná din ná hwlɛn ogbɛ éɖe tɔn gan, ná hɛ̌n ɛ bu, amɔ̌ omɛ ɖée na hɛn ogbɛ éɖe tɔn bu ná hwlɛ̌n ɛ gan. 34 Un nɔ lɔ́ ná mi fáan, lo ozǎnto ɖékpo énɛ́ mɛ, omɛ awe ná lo adɔ̌zan ɖékpolɔ́ ji, ye mɔ́ ze omɛ ɖékpo mɔ́ jo omɛ awetɔ́ do. 35 Nyɔsi awe ná lo onú li kɔn lo okpɔ́ lo osé ji, ye mɔ́ ze omɛ ɖékpo mɔ́ jo omɛ awetɔ́ do. 36 [Xlunhwǎn awe ná lo glemɛ, ye mɔ́ ze omɛ ɖékpo mɔ jo omɛ awetɔ́ do.]a
37 Núkplɔ́ntɔ́ e yixó mɔ kansí i fáan: «Oklunɔ! Xɛ́ onú énɛ́ e ná ga jɔ le?» Jesu gblɔn ná ye fáan: «Xíɖée onú kúkú ná le, xínɛ́tɔ́ oxɛ aklasú e ná kpli do kpógba.»