Jesu yi núgokpɔ́ntɔ́ bíbítɔ́ ɖe do doló
16
1 Jesu lɔ ná núkplɔ́ntɔ́ étɔn e fáan: «Dǎwe adɔkunnɔ ɖé ɖo núgokpɔ́ntɔ́ ɖékpo jǎn ye mɔ nya jɛ ohwɛ núgokpɔ́ntɔ́ lɔ́ tɔn ní i fáan é nɔ vǔnvún adɔkun étɔn e kpé. 2 Adɔkunnɔ lɔ́ ylɔ núgokpɔ́ntɔ́ énɛ́ mɔ lɔ ní i fáan: “Amú wá onú ɖée un nɔ sé dǒ tɛ go énɛ́? Wa ɖógbe onú tɔ e tɔn na o, ná bɛsɔn égbě do, o ma singǎn gɔ nyi tɔ núgokpɔ́ntɔ́ ba!” 3 Sáa énɛ́ mɛ, núgokpɔ́ntɔ́ lɔ́ lɔ ló éɖe mɛ fáan: “Namú un ná bayí jan tíi lóo? Ná ogǎn tɔ gbɛ fáan un ma ná gɔ kpenukún do onú étɔn e go ba. Bé ogle yi un ná nya kpɔ tíi ya? Un ma ɖo xúhlɔ̌n étɔn nɛ́. Bé onú yi un ná nya byɔɖukpe tíi ya? Winnyá ná ka hu o ma. 4 Un ko nyɔ onú ɖée un ná bayí, jǎn sáa ɖée mɛ ogǎn tɔ ná nya o sɔn azɔ̌n núgokpɔ́ntɔ́ tɔn mɛ le, un ná do mɔ omɛ ɖée ná yi o do osín yetɔn mɛ e.” 5 É ylɔ omɛ ɖée ɖu-axɔ́ dǒ ogǎn étɔn ɖékpe-ɖékpe mɔ kanse omɛ tíntán fáan: “Axɔ́ nɛmú o ɖu dǒ ogǎn tɔ?” 6 Omɛ lɔ́ gblɔn ní i fáan: “Un ɖu ami gangbǎ kanwekoó (100) sín axɔ́.” Núgokpɔ́ntɔ́ lɔ́ gɔ lɔ ní i fáan: “Axɔ́ɖuwéma tɛ wé. Yawú, sin-awán mɔ kan gangbǎ kanɖeawó.” 7 Enɛ́godo, núgokpɔ́ntɔ́ lɔ́ gɔ kanse omɛ ɖevo fáan: “Jǎn ayɔ lo, axɔ́ nɛmú o ɖu?” Omɛ énɛ́ gblɔn ní i fáan: “Un ɖu jikún ati kanwekoó (100) sín axɔ́.” Núgokpɔ́ntɔ́ lɔ́ gɔ lɔ ní i fáan: “Axɔ́ɖuwéma tɛ wé. Kan jikún ati kanwe.” 8 Ogǎn lɔ́ gɔ ɖekunnu ná núgokpɔ́ntɔ́ mɛblutɔ́ énɛ́, ná é bayí onú e kpódǒ ayixa bíbí tɔn ɖé kpó wútu. Ná omɛ ayíhɔ̌n éxe mɛ tɔn e gɔ̌ bí ló yeɖé e cincín hǔgán omɛ ɖée nyi hǐnhɔ́n tɔn e.»9 Jesu gɔ lɔ fáan: «Un nɔ lɔ́ ná mi fáan: mi ní yi adɔkun ayíhɔ̌n éxe e mɛ tɔn, ɖée mi mɔ yi gbɔn mɛbublu dali do ji hɔntɔn xɛ omɛ e, ná gbeɖéegbe ye ná wa dɛ̌n do mi, hɔntɔn énɛ́ e ní do yi mi do nɔtɛn maɖókpodǒ e mɛ. 10 Omɛ ɖée nyi gbejinɔtɔ́ ló onú kpɛyí mɛ ná gɔ nyi gbejinɔtɔ́ lo onú ɖaxó mɛ kpógba. Omɛ ɖée nyi mɛblutɔ́ ló onú kpɛyí mɛ ná gɔ nyi mɛblutɔ́ lo onú ɖaxó mɛ kpógba. 11 Enɛ́wútu, ényí mi ma nyi gbejinɔtɔ́ lo adɔkun ayíhɔ̌n éxe e mɛ tɔn, ɖée mi mɔ yi gbɔn mɛbublu dali wɛ́, amɛ́ singǎn ze adɔkun jɔ adɔkun do alɔ mɛ na mi? 12 Ényí byɛ ma nyi gbejinɔtɔ́ lo onú omɛ ɖevo tɔn kɔn wɛ́, amɛ́ ná wazě onú ɖée wá mitɔn tete na mi?
13 Mɛsɛntɔ́ ɖe ma singǎn sɛn ogǎn awe dokpɔ́, ná é ná gbɛwánna ɖé mɔ yiwánna ɖé, kayí é ná tɛdo ɖé go mɔ́ dovɔ̌ na ɖé. Mi ma singǎn sɛn Mawu kpó okwá kpó zɛnzɛ̌n.»
Jesu na núkplɔ́nmɛ ɖɛhwlɛn omɛ e
(Matye 5.31-32; 11.12-13/ Maaki 10.11-12)
14 Kín Falizi e do se oxó énɛ́ e, yě cɛ Jesu cánko ná yelɛ yíwánná okwá wútu. 15 Jesu lɔ hlǎn ye fáan: «Byɛ, mi dǒ miɖé xlɛ́ ló gbɛtɔ́ e sín nukunmɛ ɖi dǒdónɔ e, amɔ̌ Mawu nyɔ́ ayixa mitɔn e. Onú ɖée nyi onú xɔkwá ló gbɛtɔ́ e de, núxyɔwú ɖe é nyi ló Mawu de.
16 Ojlɛ̌ osɛ́n Mɔyizi tɔn e kpó owé gbeyílɔtɔ́ Mawu tɔn e tɔn kpó nɔte káká wajɛ̌ Jaan mawusinlɛnamɛtɔ́ sín hwenu. Bɛsɔ́n sáa énɛ́ mɛ gbɔ̌n, ye nɔ lá owɛnjɔwǔn Axɔ́lúɖu Mawu tɔn tɔn ná gbɛtɔ́ e, jǎn omɛ ɖékpe-ɖékpe mɔ nɔ dǒgǎn nádo byɔ Axɔ́lúdu lɔ́ mɛ. 17 Amɔ̌ é kpɔnte ná olɔ́n kpó ayígba kpó nádo juwanyá hugán ná wékún kpɛyí ɖékpo tata ní do bu sɔn Osɛ́n lɔ́ mɛ.
18 Omɛ ɖékpékpé ɖée ná gbɛ osi étɔn mɔ́ da ɖevo, ɖeayɔ. Omɛ ɖékpékpé ɖée gɔ da nyɔnu ɖée osú étɔn gbɛ, gɔ ɖeayɔ.»
Jesu yi adɔkunnɔ kpó gbɛ̌dǒnánɔ Lazaa kpó do doló
19 «Dǎwe adɔkunnɔ ɖé ɖée, mɔ́ dǒ avɔn okwávǐvɛ́nu jɔwun-jɔwǔn e. É ló ogbɛɖu kɔn mɔ́ ló onú jɔwun-jɔwǔn e ɖu kɔn ló ojlɛ̌ títɛkpóe mɛ. 20 Dǎwe gbɛ̌dǒnánɔ ɖé gɔ̌ ɖée kpógba, ye ylɔ́ ɛ jǎn Lazaa, agandǎn mɔ gɔ agbasa ní i lɛdo kpe. É nɔ́ awánfínfín ló dǎwe adɔkunnɔ énɛ́ sín hɔngbǒji. 21 É jlǔ i ná do nɔ ɖu jǐjá nuɖuɖu ɖée flɛ́ sɔ́n nuɖuɖutávo adɔkunnɔ lɔ́ tɔn ji. Ɖée gɔ hugán ítɔ́ yi e wá fáan, avǔn e wá mɔ́ ɖíɖɔ́ agandǎn étɔn e mɛ. 22 Egɔwajɔ̌, gbɛ̌dǒnánɔ lɔ́ mɔ ku jǎn wɛnzagun Mawu tɔn e mɔ zǐ i dǒ Ablaxamu de. Adɔkunnɔ lɔ́ tete lɔsú gɔ wa kú, ye mɔ ɖí i. 23 Lo okútomɛ, adɔkunnɔ éxe nɔ mɔ́ awúfyɛsa susu, é jlɔkɔkpɔn aga mɔ mɔ Ablaxamu hlan, Lazaa mɔ́ ló é de. 24 É do-axó fáan: “Otɔ́ Ablaxamu, walɛ́blánú na o mɔ do Lazaa hlan, ní nylɔ obɛ́nugbɛn alɔyí étɔn tɔn do osinmɛ, mɔ wa kún do oɖɛ́ ji na o ná oɖɛ́ tɔ ní do mɔ mimyɔ, ná un nɔ mɔ́ awúfyɛsa gbǎwú ló myɔ́ éxe mɛ.” 25 Amɔ̌ Ablaxamu gblɔn ní i fáan: “Ovǐ tɔ! Flin fáan o ko mɔ jɔwǔn e yi ló ogbɛ hwenu tɛ jǎn Lazaa éyɔ, oya éyɔ ji. Amɔ̌ lo tíi, éyɔ ló mimyɔ mɛ ló xítɔ, ayɔ mɔ́ ló awúfyɛsa mɛ.” 26 Dogɔna énɛ́, odogbǒ ɖaxó ɖe ko klan byɛ́ kpó byɛ kpó dǒ vovo gbɛ̌ omɛ ɖée jlo ná tɔnsɔn xítɔ nya mi de ma singǎn, kínɖékpolɔ́ omɛ ɖé ma singǎn tɔnsɔn xímɔ́ wa byɛ́ de. 27 Adɔkunnɔ lɔ́ wa lɔ́ fáan: “Otɔ́, jaale mɔ do Lazaa hlan tɔ otɔ́ sín osínmɛ, 28 xíɖée un ɖo nɔyí atɔ́n lé, ná Lazaa ní nya na avase ye, yelɛ tete ní gbǎ wa wá otɛn awúfyɛsa tɔn éxe mɛ.” 29 Ablaxamu gblɔn ní i fáan: “Onú ɖée Mɔyizi kpó gbeyílɔtɔ́ Mawu tɔn e kpó e kan e ló xímɔ́ ná ye. Ye ní nɔ zingbɔn ye ji.” 30 Adɔkunnɔ lɔ́ gɔ lɔ fáan: “Ehěo, Otɔ́ Ablaxamu! Ényí omɛ ɖé tɔ́nsɔn omɛ kúkú e mɛ mɔ nya mɔ ye, ye ná lɛnvɔjɔ.” 31 Ablaxamu gblɔn ní i fáan: “Ényí ye ma xodo onú ɖée Mɔyizi kpó gbeyílɔtɔ́ Mawu tɔn e kpó kan wɛ́, jǎn omɛ ɖé mɔ dɛ fɔnsɔ́n omɛ kúkú e mɛ nya ye de, ye ma ná yise.”»