Jesu yi lɛ́ngbɔ̌ ɖée bu do doló
(Matye 18.12-14)
15
1 Tokwácántɔ́ susu kpó nyladǒnɔ ɖevo e kpó, ye omɛ kpó sɛkpɔ Jesu nádo ɖotú i. 2 Falizi e kpó sɛ́nkplɔ́nmɛtɔ́ e kpó cɛ hunhlun mɔ nɔ lɔ́ fáan: «Dǎwe éxe kɛ́-alɔyí nyladǒnɔ e mɔ́ gɔ̌ ɖúnú xɛ́ ye!»3 Jesu doló éxe ná ye fáan: 4 «Ényí omɛ ɖé lo mi mɛ ɖó lɛ́ngbɔ̌ kanwekoó (100) jǎn ɖékpo mɔ bu sɔn ye mɛ, bé é ma ná jo kanwefɔtɔnnukun-ɛnɛ ɖée kpo e do amaɖutɛn mɔ́ nya din ɖée bu lɔ́ káká mɔ́ do mɔ́ ɛ wɛ? 5 Ényí é mɔ́ ɛ, xomɛ hǔn i jǎn é mɔ́ zǐ i dǒ abɔ́ étɔn e ji. 6 É lɛkɔnya sínmɛ, mɔ ylɔ hɔntɔn étɔn e kpó omɛ ɖée ló osín kpágo étɔn e kpó mɔ lɔ ná ye fáan: “Mi jayá xɛ o, ná un mɔ tɔ lɛ́ngbɔ̌ ɖée bu lɔ́!” 7 Ná lɔ na mi: “Kínɖékpolɔ́ ayájijɛ ná ɖe lo olɔ́nmɛ ná nyladǒnɔ kúnɖékpo ɖée lɛnvɔjɔ hǔgán dǒdónɔ kanwefɔtɔnnukun-ɛnɛ ɖée ma ɖo hudǒ lɛnvɔ̌jɔ tɔn.”»
Jesu yi abɔgankwá ɖée bu do doló
8 Jesu gɔ doló ɖevo fáan: «Ényí náwe ɖé ɖó abɔgankwá awó, mɔ ga hɛn ɖékpo bu, bé é ma ná ta myɔ́gbǎn, mɔ́ tunxɔmɛza nádo din abɔgankwá lɔ́ kpódǒ sɔxwixwe kpó káká ní do mɔ ɛ wɛ́? 9 Ényí é mɔ́ ɛ, é kplí hɔntɔn étɔn e kpó omɛ ɖée ló osín kpágo étɔn e kpó mɔ́ lɔ na ye fáan: “Mi jayá xɛ o, ná un mɔ abɔgankwá tɔ ɖée bu lɔ́!” 10 Un nɔ lɔ́ ná mi fáan: kínɖékpolɔ́ wɛnzagun Mawu tɔn e jǎyá ɖó ényí nyladǒnɔ ɖékpo lɛ́nvɔjɔ.»
Jesu yi ovǐ ɖuvanɔ ɖé do doló
11 Jesu gɔ lɔ fáan: «Dǎwe ɖé ɖo ovǐ xlunhwǎn awe. 12 Ovǐ xlunhwǎn kpɛyí lɔ́ lɔ ná otɔ́ étɔn fáan: “Otɔ́ tɔ, yi ogǔ ɖée wá tɔ na o!” Jǎn otɔ́ lɔ́ mɔ ma adɔkun étɔn ná ovǐ awe lɔ́ e. 13 Azǎn vǔɖe godo, ovǐ xlunhwǎn kpɛyí lɔ́ sa ogǔ étɔn kpó, mɔ bɛ okwá lɔ́ mɔ nya oto dindɛn ɖé mɛ, xíɖée é zan ogbɛ gblěwa tɔn lé mɔ bɛ okwá lɔ́ títɛkpóe zan dǒ akpamɛ. 14 Kín é do zan okwá lɔ́ títɛkpóe kpó, xovɛ̌ ɖaxó ɖe tɔn ló oto lɔ́ mɛ, ovǐ xlunhwǎn énɛ́ mɔ cɛ oya ji. 15 É gbɔ mɔ nya mɔ dǎwe otolɔ́mɛnu ɖékpo ɖé nádo wazɔ̌n ní i, jǎn dǎwe lɔ́ mɔ dǔ i hlan ogle étɔn mɛ, ní do kpenukún ohan e go. 16 É jlǔ i nádo ɖu nududu ɖée ohan lɔ́ e ɖú do gbɔxovɛ̌, amɔ̌ omɛ ɖé ma yí ní i. 17 É wa gɔ̌ byɔ éɖe mɛ mɔ lɛnnukpɔn fáan: “Azɔ̌nwatɔ́ susu yi é ló tɔ otɔ́ de, nuɖuɖu mɔ́ kpe ye mɔ́ lán, nyɔ wé nɔ kú xovɛ̌ kú ló xítɔ! 18 Un ná tite mɔ́ gɔ nya tɔ otɔ́ de, mɔ́ lɔ ní i fáan: Otɔ́ tɔ! Un wa nyladǒ dǒ Mawu mɔ gɔ wa nyladǒ dǒ ayɔ. 19 Un ma gɔ jɛxɛ́ fáan o ní ylɔ o jan ovǐ tɛ ba. Enɛ́wútu, yi o zan ɖi ɖékpo lo tɛ azɔ̌nwatɔ́ e mɛ.” 20 É gɔ fɔn mɔ ɖedǒ otɔ́ étɔn xwɛ. É gbɛkpo ló oxí dindɛn, otɔ́ étɔn mɔ mɔ́ ɛ hlan, jǎn onú étɔn mɔ wa lɛ́blánú ní i. É hɔnwezun mɔ nya kpí i, é kplasíkɔ ní i mɔ kisi ní i. 21 Ovǐ lɔ́ lɔ ní i fáan: “Tɔ otɔ́! Un wa nyladǒ dǒ Mawu mɔ gɔ wa nyladǒ dǒ ayɔ. Un ma gɔ jɛxɛ́ fáan o ní ylɔ o jan ovǐ tɛ ba.” 22 Amɔ̌, otɔ́ lɔ́ lɔ ná mɛsɛntɔ́ étɔn e fáan: “Mi yawú mɔ nya ze tewu ɖée jɔwunhwankpɛ hǔgán títɛkpóe mɔ do ní i, mi mɔ do alɔkɛ́ do alɔvǐ ní i, mɔ do afɔkpa do afɔ ní i. 23 Mi nya ze oni ɖée dojǔ ganji lɔ́ wa, mɔ hǔ i. Mi wa mí ní ɖunú mɔ jayá, 24 ná ovǐ tɔ ɖée mi nɔ mɔ́ éxe, ɖi omɛ ɖée ko ku ɖá mɔ gɔwa ogbɛ, é ko bu ɖá jǎn mɔ gɔ wa mɔ́ ɛ.” Ye mɔ cɛ oxweɖu.
25 Lo sáa énɛ́ mɛ, ovǐ xlunhwǎn mɛxó lɔ́ ló glemɛ. Kín é do gɔwazě mɔ nɔ sɛ́kpɔ́ sínmɛ, é se fáan, ye nɔ xónú mɔ nɔ ɖúwe. 26 É ylɔ mɛsɛntɔ́ otɔ́ étɔn tɔn ɖékpo mɔ kansí i fáan: “Amú é nɔ jɔ̌ ló sínmɛ?” 27 Mɛsɛntɔ́ lɔ́ gblɔn ní i fáan: “Tɛ nɔyí yi é gɔ tɛ otɔ́ mɔ zɔn oni ɖée dojǔ ganji lɔ́ hu, ná éyɔ zɔn jijɔxo mɛ do gɔ wútu.” 28 Ovǐ xlunhwǎn mɛxó lɔ́ gblexomɛ mɔ gbɛ fáan yelɔ́ ma ná byɔ sínmɛ. Otɔ́ étɔn tɔn jɛgě nádo vɛ ɛ ní do byɔ sínmɛ. 29 Amɔ̌ ovǐ mɛxó lɔ́ gblɔn ná otɔ́ étɔn fáan: “Kpɔn! Sɔn oxwe kplankplan we gbɔ̌n yi un nɔ sɛ́n ɛ. Un ma gɔ vɛtoli ná ogbeɖiɖe tɛ e ɖékpékpé kpɔn. Gancó, o ma na o ogbɔ̌vǔ ɖékpo tata gbeɖe nádo ɖuxwe kpó tɔ hɔntɔn e kpó. 30 Amɔ̌, kín ovǐ tɛ énɛ́, ɖée ze adɔkun tɛ do nya ɖugbɛ kpódǒ nyɔsi agalɛtɔ́ e kpó do lɛkɔwa tíi, o zɔn oni ɖée dojǔ ganji hu dǒ takún étɔn mɛ!” 31 Otɔ́ lɔ́ gblɔn ní i fáan: “Ovǐ tɔ! Ayɔ, o ló kpɔ́ kpó nyɔ kpó tɛgbɛ, onú ɖée un ɖo títɛkpóe, tɛ nɛ. 32 Amɔ̌, oxwe jǎn mí ná ɖu mɔ́ jayá ná nɔyí tɛ ɖée ɖi omɛ ɖée ko ku ɖá gɔ gɔwa ogbɛ, é ko bu ɖá jǎn mɔ gɔ wa mɔ́ ɛ.”»