Jesu gbɔ-awutu ná dǎwe ɖé ló gbɔjɛ̌zǎn Juu e tɔn gbe
14
1 Egɔwajɔ̌, lo gbɔjɛ̌zǎn Juu e tɔn ɖé gbe, Jesu byɔ ogǎn Falizi e tɔn ɖékpo sín sínmɛ nádo ɖunú. Ye omɛ ɖée ló xínɛ́ e ga nɔ cɔ́ ɛ. 2 Dǎwe ɖée nɔ jɛ̌ awutu jǐjí tɔn ɖé ló nukɔn Jesu tɔn. 3 Jesu yixó mɔ kanse sɛ́nkplɔ́nmɛtɔ́ e kpó Falizi e kpó fáan: «Bé osɛ́n mítɔn nagbe fáan ye ní gbɔ-awutu na omɛ lo gbɔjɛ̌zǎngbe kayí é ma nagbe?»4 Amɔ̌ ye ma kɛbɛ́. Jesu ɖoalɔ awutunɔ lɔ́ go mɔ gbɔ-awutu ní i, mɔ lɔ ní i fáan ní sɔn. 5 Enɛ́godo, é wa kánse ye fáan: «Amɛ́ ló mi mɛ, ényí ovǐ étɔn kayí oni étɔn flɛ́ jɛ dotɔmɛ, ma ná domɔ́ ní i haɖékpoe mɔ́ ɖi i tɔn jɛgě ényí é dɛ̌ nyi gbɔjɛ̌zǎngbe?»
6 Ye ma gɔ singan gblɔn onú ɖekpékpé dǒ oxókanse énɛ́ go.
Mi gɔ hwlɛn otɛn nukɔntɔn le
7 Jesu mɔ fáan omɛ ɖée ye ylɔ wa kpí i kpó e nɔ sín-awán ló otɛn nukɔn tɔn e mɛ, é mɔ doló éxe ná ye fáan: 8 «Ényí omɛ ɖé ylɔ́ ɛ ná o ní do nya ɖunú lo alɔwléhunxwɛ tɛn mɛ, gɔ nya sin-awán lo otɛn nukɔn tɔn mɛ le; vlavo é gɔ ylɔ omɛjɔmɛ ɖée hugán ayɔ ɖé, 9 ojlɛ̌ énɛ́ mɛ éyɔ ɖée ylɔ ɛ mɔ gɔ ylɔ omɛjɔmɛ énɛ́ ní gbǎ wa lɔ́ nɛ ɛ fáan: “Tite mɔ na otɛn dǎwe éxe.” Sáa énɛ́ mɛ ayɔ ná fɔn kpódǒ winnyá kpó mɔ nya sin-awán lo otɛn godo tɔn mɛ. 10 Amɔ̌ ényí ye ylɔ ɛ, nɔ sin-awán lo otɛn godo tɔn mɛ, jǎn sáa ɖée mɛ omɛ ɖée ylɔ ɛ lɔ́ ná wa, é ní do lɔ nɛ fáan: “Tɔ hɔntɔn, sɛwa nukɔn.” Enɛ́ ná na ɛ yɛyi lo omɛ ɖée kpó ayɔ kpó ná lo nuɖuɖukákɔn títɛkpóe de. 11 Ná omɛ ɖékpékpé ɖée ze éɖe dǒ aga, Mawu ná zǐ i hwe, amɔ̌ omɛ ɖékpékpé ɖée ná ze éɖe hwe, Mawu ná zǐ i do aga.»
12 Jesu gɔ lɔ ná omɛ ɖée ylɔ́ ɛ wa lɔ́ fáan: «Ényí o ná ylɔ omɛ e ye ní do wa ɖú hwemɛnúɖuɖu kayí hwedǒnúɖuɖu, gɔ ylɔ hɔntɔn tɛ e, nɔyí tɛ e, hɛ̌nnumɛ tɛ e kayí adɔkunnɔ ɖée ló tɛ sínkpágo e le; ná yelɛ hɛ̌n ye mɔ́ ylɔ ɛ, énɛ́ mɔ́ nyi axɔ́súsú onú ɖée o na ye tɔn. 13 Amɔ̌ ényí o ɖá xwenúɖuɖu ɖé, ylɔ wamamɔnɔ e, kpotɛnnɔ e, afɔkponɔ e kpó nukúntɔ́nnɔ e kpó. 14 Ayɔ ná gɔ nyi nújɔwunnánɔ, ná yelɛ ma ɖo onú ɖée ye nádo su-axɔ́ étɔn na ɛ. Mawu ná su-axɔ́ étɔn ɛ lo azǎn ɖée gbe é ná fɔn dǒdónɔ e sɔn okú le.»
Jesu yi omɛ ɖée ye ylɔ wa oxwenúɖuɖu kɔn e do lɔxó
(Matye 22.1-10)
15 Omɛ ɖékpo ló ye omɛ ɖée nɔ ɖúnú xɛ́ Jesu e mɛ, jǎn kín é do se oxó énɛ́ e, é lɔ na Jesu fáan: «Nújɔwunnánɔ wá omɛ ɖée ná ɖunú lo Axɔ́lúɖu Mawu tɔn mɛ!» 16 Jesu gblɔn ní i fáan: «Dǎwe ɖé wleawú na oxwenúɖuɖu ɖaxó ɖe, é mɔ ylɔ gbɛtɔ́ susu. 17 Kín ogan ɖée ye nádo ɖunú do xo, é do mɛsɛntɔ́ étɔn hlan nádo nya lɔ na omɛ ɖée é ylɔ ɖá e fáan: “Lo tíi, mi wa, onú títɛkpóe ko sɔgbe!” 18 Amɔ̌ omɛ ɖée ye ylɔ lɔ́ e, ye omɛ kpó do ogbe ɖékpolɔ́ mɔ vɛ ɛ fáan ye ma singǎn wa. Omɛ tíntán lɔ ná mɛsɛntɔ́ lɔ́ fáan: “Un cɛcɛ xɔ ayígba ɖékpo, mɔ ɖo ná nya kpɔn. Un vɛ ɛ, gɔ gblexomɛ le.” 19 Omɛ ɖevo lɔ fáan: “Un cɛcɛ xɔ oni awó nádo lɛgle jǎn mɔ gɔ jlo ná nya tɛn azɔ̌n wiwa yetɔn kpɔn. Un vɛ ɛ, gɔ gblexomɛ le.”. 20 Omɛ ɖevo gɔ lɔ fáan: “Un cɛcɛ kplan nyɔnu, énɛ́wútu un ma singǎn wa.” 21 Mɛsɛntɔ́ lɔ́ mɔ lɛkɔwa ɖógbe onú énɛ́ e tɔn ná ogǎn étɔn. Sáa énɛ́ mɛ, lo xomɛgblě ogǎn lɔ́ tɔn mɛ, é lɔ ná mɛsɛntɔ́ étɔn lɔ́ fáan: “Yawú nya tokplítɛn e kpó alixo otoxo lɔ́ tɔn e kpó ji, mɔ kplan wamamɔnɔ e, kpotɛnnɔ e, nukúntɔ́nnɔ e kpó afɔkponɔ e kpó wa xítɔ.” 22 Lo ojlɛ̌ vǔɖe godo, mɛsɛntɔ́ lɔ́ lɛkɔwa mɔ lɔ fáan: “Oklunɔ, un ko bayí onú ɖée o zɔn o, gancó otɛnmɛ mɔ gbɛkpo.” 23 Sáa énɛ́ mɛ, oklunɔ lɔ́ lɔ ná mɛsɛntɔ́ étɔn fáan: “Nya gbɔn alixoflǐ e kpó osín kpágo e kpó mɔ hɛn gbɛtɔ́ e gǎnnu-gǎnnu ná ye ní gɔ tɔ sínmɛ.” 24 Un nɔ lɔ́ ná mi fáan: omɛ ɖée un ko ylɔ jɛ nukɔn ɖá e, ɖékpo yetɔn ma ló nuɖuɖu tɔ ná ɖɔ́kpɔn kɔn!»
Namú ye singǎn xodo Jesu gbɔn?
(Matye 10.37-38)
25 Gbeɖékpo, agun ɖaxó e nɔ xódǒ Jesu. Jesu gɔ lɛkɔ kpannukɔn ye mɔ lɔ ná ye fáan: 26 «Ényí omɛ ɖé jlǒ ná xodo o gbɛ̌ é ma yiwánna o hugán otɔ́ étɔn, onɔ étɔn, osi étɔn, ovǐ étɔn e, nɔyí xlunhwǎn étɔn e, nɔyí nyɔsi étɔn e, káká jɛ ogbɛ éyɔ tete lɔsú tɔn ji wɛ́, omɛ énɛ́ ma singǎn nyi tɔ núkplɔ́ntɔ́. 27 Omɛ ɖékpékpé ɖée ma ná ze satín étɔn mɔ́ xodo o, ma singǎn nyi tɔ núkplɔ́ntɔ́. 28 Ná amɛ́ é ló mi mɛ, ényí é jlǒ ná gba kpetlézin ɖé, é ma ná sin-awán hwɛ̌ mɔ lɛn nɛmú ɖée é ná zan mɔ́ do kpɔn fáan bé yelɔ́ ɖo okwá ɖée ná fo oxɔ lɔ́ ya? 29 Ényí é ma nyí ítɔ́, ényí é dǒ oxɔ lɔ́ do gbɛ̌ é ma kpe é go mɔ fo wɛ́, omɛ ɖée ná wa mɔ́ ɛ e títɛkpóe ná cɛ i cánko, 30 mɔ́ lɔ fáan: “Mi kpɔn, dǎwe ɖé we do oxɔdo gbɛ̌ é ma kpe é go mɔ gba kpó!” 31 Kayí axɔ́lú ɖemú é ɖée, jǎn kín é do fɛwungɔ ná nya kpe xɛ axɔ́lú ɖevo lo ahwan nukɔn, ma ná sin-awán hwɛ̌ mɔ gɔ kpɔn fáan bé yelɔ́ ɖo xúhlɔ̌n nádo singǎn yi ahwanfuntɔ́ degbawe-fɔwó (10.000) do kpe xɛ axɔ́lú ɖée hɛn ahwanfuntɔ́ dɔkpo ɖékpo (20.000) do wazě ná wá kpí i wɛ? 32 Ényí é mɔ́ fáan yelɔ́ ma singǎn kpe é go wɛ́, sáa ɖée mɛ axɔ́lú awetɔ́ lɔ́ gbɛ̌ ló oxí dindɛn lé, é ná do omɛ hlin i, nádo lɔxó kpí i kpó ná huhwɛ̌ ní do ɖe. 33 Kínɖékpolɔ́, ényí omɛ ɖé ló mi mɛ gbɛ̌ omɛ énɛ́ ma gbɛkɔ onú ɖée é ɖo títɛkpóe go wɛ́, omɛ énɛ́ ma singǎn nyi tɔ núkplɔ́ntɔ́.»
Xwlakɔ́ ɖée hɛn otɔ́n étɔn bu
(Matye 5.13/ Maaki 9.50)