9
1 Jesu gɔ lɔ ná ye fáan: «Núgbǒ un lɔ ná mi, omɛ ɖɛhwlɛn ló mimɛ xítɔ gbɛ̌ ye ma ná ku hwɛ̌kpó do mɔ Axɔ́lúɖu Mawu tɔn sín wíwá kpódǒ xúhlɔ̌n kpó.»Pyɛɛ, Jaki kpó Jaan kpó mɔ Jesu ló gigo étɔn mɛ
(Matye 17.1-13/ Lwiki 9.28-36)
2 Azǎn tlékpo godo, Jesu kplan Pyɛɛ, Jaki kpódǒ Jaan kpó jɛ vo ló osó ɖaxó ɖe ji. Ninɔmɛ étɔn mɔ ɖyɔ ló nukɔn yetɔn. 3 Awu étɔn e we tété mɔ nɔ sɛ́ mlámlá gbɛ̌ omɛ ɖékpékpé lo ayígba ji ma singǎn bayí avɔn ɖé é mɔ́ we sɔ ítɔ́. 4 Gbeyílɔtɔ́ Mawu tɔn Eli kpó Mɔyizi kpó sɔ-awúxlɛ ye mɔ nɔ lɔ́xó xɛ́ Jesu. 5 Pyɛɛ yixó mɔ lɔ ná Jesu fáan: «Mɛkplɔ́ntɔ́! É jɔwun ná xítɔ ɖée mí lé. Gbɔ mí ní gba goxɔ atɔn: ɖékpo na ayɔ, ɖékpo na Mɔyizi, ɖékpo na Eli.» 6 É jan ítɔ́ ná é ma nyɔ́ onú ɖée é ná lɔ ɖó obú ɖaxó ɖe jɛ ye ji wútu. 7 Aslɔ ɖé wa mɔ wa cɔ́n ye ji, ogbe ɖé tɔnsɔ́n aslɔ lɔ́ mɛ mɔ lɔ fáan: «Ovǐ tɔ vǐvɛ́ wá omɛ éxe, mi nɔ ɖotú i!» 8 Tlóló, núkplɔ́ntɔ́ e kpɔn lɛ́dǒ yetɔn gbɛ̌ ye ma gɔ mɔ omɛ ɖé ló ye de zɛ Jesu có gě go.
9 Kín ye do nɔ jɛ̌te sɔ́n osó lɔ́ ji, Jesu dosɛ́n ná ye fáan: «Mi gɔ lɔ onú ɖée mi mɔ énɛ́ e na omɛ ɖékpékpé le káká Ovǐ Gbɛtɔ́ tɔn nádo fɔnsɔn ocɔ e mɛ.» 10 Yě zingbɔn osɛ́n énɛ́ lɔ́ ji mɔ́ kánsé yenɔzo fáan: “Amú fɔ́nsɔ́nkú sɔn ocɔ e mɛ nyi?”
11 Núkplɔ́ntɔ́ e wa kánse Jesu fáan: «Amúwútu sɛ́nkplɔ́nmɛtɔ́ e lɔ́ fáan Eli yi é ɖo ná wa hwɛ̌ jɛnukɔn?» 12 Jesu gblɔn ná ye fáan: «Núgbǒ nɛ, Eli ɖo ná wa hwɛ̌ jɛnukɔn mɔ́ gɔ onú títɛkpóe to. Amɔ̌, amúwútu Owé Wíwé do lɔ fáan Ovǐ Gbɛtɔ́ tɔn ná mɔ awúfyɛsa tawun, ye mɔ́ gbɛwán ní i? 13 Yíwe! Ná ma lɔ núgbǒ na mi, Eli ko wa, gbɛtɔ́ e mɔ ko bayí onú ɖée jlo ye títɛkpóe ní i, ɖikín ye ko kan dǒ dali étɔn ɖó.»
Jesu gbɔ-awutu ná ovǐ gbigbɔ mawénɔ ɖé
(Matye 17.14-21/ Lwiki 9.37-43)
14 Kín Jesu kpó núkplɔ́ntɔ́ étɔn atɔn e kpó do lɛkɔwa núkplɔ́ntɔ́ étɔn ɖée kpo e de, yě mɔ agun ɖaxó ɖe lɛdǒ núkplɔ́ntɔ́ lɔ́ e kpó sɛ́nkplɔ́nmɛtɔ́ ɖée nɔ dɔ̌nnú xɛ́ ye kpó. 15 Kín agun ɖaxó lɔ́ do mɔ Jesu hlan, é kpacá ye, ye mɔ dowezun mɔ wa ɖɔ́núdǐ i. 16 Jesu kanse núkplɔ́ntɔ́ étɔn e fáan: «Amú dɔn kɔn byɛ lé kpódǒ ye kpó?» 17 Omɛ ɖé gblɔn ní i ló agun lɔ́ mɛ fáan: «Mɛkplɔ́ntɔ́! Un hɛn ovǐ xlunhwǎn tɔ wa tɛ de, ná gbigbɔ wunbɔkpɛn tɔn yi é nɔ dǒtuklá ɛ wútu. 18 Oxí ɖekpékpé ɖée gbigbɔ lɔ́ wlí i lé, é flɛ́n ɛ dǎ, ovǐ lɔ́ mɔ́ tún fútúfutu, mɔ́ ɖú aɖúkúnkun, mɔ́ syɛ́n gannyi. Un vɛ tɛ núkplɔ́ntɔ́ e fáan ye ní nya gbigbɔ mawé lɔ́ jɛgě gbɛ̌ ye ma kpe é go.» 19 Jesu gblɔn ná ye fáan: «Byɛ omɛ hweéxenutɔn yísemaɖótɔ́ e mi! Káká jɛ ojlɛ̌ ɖemú mɛ nyɔ ná nɔ mi de jɛ? Káká jɛ ojlɛ̌ ɖemú mɛ ná ɖoakɔ́n na mi jɛ? Mi kplan ovǐ lɔ́ wa ná o.» 20 Yě kplan ovǐ lɔ́ wa ní i. Kín gbigbɔ mawé lɔ́ do mɔ Jesu tlóló, é hunhún ovǐ lɔ́ gǎngán, mɔ flɛ́n ɛ dǎ, éyɔ mɔ cɛ bibli mɔ nɔ tún fútúfutu. 21 Jesu kanse otɔ́ lɔ́ fáan: «Sɔn ojlɛ̌ ɖemú mɛ gbɔ̌n onú lɔ́ nɔ wá ovǐ lɔ́ le?» Otɔ́ lɔ́ gblɔn fáan: «Sɔn ovǔhwenu étɔn gbɔ̌n nɛ. 22 Gbigbɔ lɔ́ zǐ i dlǎn myɔ́ mɛ kayí osin mɛ gbɔzan-gbɔzan nádo mɔtɛn do hǔ i. Amɔ̌, ényí o singǎn wa onu ɖe, walɛ́blánú na mí mɔ gɔalɔ na mí.» 23 Jesu lɔ ní i fáan: «“Ényí o singǎn wa onu ɖe yi o jan.” Onú kpókpó vi bibayí ná omɛ ɖée yise.» 24 Tlóló, otɔ́ ovǐ lɔ́ tɔn do-axó mɔ lɔ fáan: «Un yise! Wa alɔgɔ̌ na tɔ yísemakpégan!»
25 Kín Jesu do mɔ fáan omɛ susu do ahwan wazě, é wɔxɛ́ gbigbɔ mawé lɔ́ kpó adǎn kpó fáan: «Gbigbɔ mawé tókúnamɛtɔ́ kpó wunbɔkpɛn tɔn kpó, un ɖegbe do é, tɔnsɔn ovǐ éxe mɛ, gbɛ̌ gɔ gɔ byɔ é mɛ gbeɖe le!» 26 Gbigbɔ mawé lɔ́ do-axó mɔ hunhún ovǐ lɔ́ kpódǒ zingidǐ kpó, mɔ tɔnjɛgě sɔ́n é mɛ. Ovǐ lɔ́ gɔ jɔ omɛ ɖée ku, káká omɛ susu mɔ nɔ lɔ́ fáan: «É ku.» 27 Amɔ̌ Jesu hɛn alɔ go ní i mɔ zǐ i fɔn jǎn é mɔ fɔntite.
28 Kín Jesu do nya sínmɛ jǎn é mɔ kpo éyɔ kpó núkplɔ́ntɔ́ étɔn e có gě kpó, yě kansí i fáan: «Amúwútu byɛ́ ma kpe gbigbɔ mawé énɛ́ go mɔ nya jɛgě wɛ́?» 29 Jesu gblɔn ná ye fáan: «Gbigbɔ mawé énɛ́ wunkɔtɔn e, oɖɛ có gě yi é singǎn nya e jɛgě.»
Jesu gɔ gɔ lɔ fáan yelɔ́ ná ku mɔ gɔ fɔnsɔnkú
(Matye 17.22-23/ Lwiki 9.43-45)
30 Jesu kpó núkplɔ́ntɔ́ étɔn e kpó tɔnsɔ́n xínɛ́ mɔ gbɔn agbegbe Galile tɔn mɛ wa fɛ́. Jesu ma ga jlo ná omɛ ɖé ní nyɔ xíɖée é lé. 31 Ná é nɔ kplɔ́nnú núkplɔ́ntɔ́ étɔn e mɔ nɔ lɔ́ ná ye fáan: «Ye ná jo Ovǐ Gbɛtɔ́ tɔn do alɔ gbɛtɔ́ e tɔn mɛ. Ye ná hǔ i, lo azǎn étɔn atɔntɔ́gbe, é ná fɔnsɔnkú.» 32 Amɔ̌ núkplɔ́ntɔ́ e ma mɔnukúnnújɛ oxó énɛ́ mɛ, mɔ nɔ ɖíbú nádo kanxó sí i.
Amɛ́ yi é wá ɖaxó lɔ́?
(Matye 18.1-5/ Lwiki 9.46-48)
33 Jesu kpó núkplɔ́ntɔ́ étɔn e kpó wa Kapɛɛnawumi toxomɛ. Kín ye do jɛ osínmɛ, Jesu kanse ye fáan: «Amú go mi nɔ lɔxó dǒ ló alixo ji?» 34 Amɔ̌, ye ma kɛbɛ́, ná lo alixo ji, yě dɔnnú ló yeɖé cincín nádo nyɔ omɛ ɖée wá ɖaxó ló yemɛ. 35 Jesu sin-awán mɔ ylɔ mɛɖóhlan wyawe e mɔ lɔ ná ye fáan: «Ényí omɛ ɖé jlǒ ná nyi nukɔntɔ́, é ɖo ná nyi godotɔ́ omɛ títɛkpóe tɔn mɔ́ nyí mɛsɛntɔ́ omɛ kpó tɔn.» 36 É ze ovǐ kpɛyí ɖékpo mɔ zǐ i dǒ cincín yetɔn. Kín é do kplasí kɔ ní i kpó, é lɔ ná ye fáan: 37 «Omɛ ɖékpékpé ɖée kɛ-alɔyi ovǐvǔ éxe wunkɔ lo tɔ nyíkɔ mɛ, nyɔ yi omɛ énɛ́ kɛ-alɔyi. Omɛ ɖée ga kɛ-alɔyi o, é ma nyí nyɔ yi é kɛ-alɔyi amɔ̌ omɛ ɖée do o hlan yi é kɛ-alɔyi.»
Omɛ ɖée ma sɔtakún mí, omɛ mítɔn nɛ
38 Jaan lɔ ná Jesu fáan: «Mɛkplɔ́ntɔ́! Byɛ́ mɔ dǎwe ɖé, é mɔ nɔ nyá gbigbɔ mawé jɛ̌gě ló tɛ nyíkɔ mɛ, byɛ́ mɔ jlo ná glɔn alixo ní i ná é ma ló ogbɛ̌ mítɔn mɛ wútu.» 39 Amɔ̌ Jesu gblɔn ní i fáan: «Mi gɔ glɔn alixo ní i le ɖó omɛ ɖé ma ɖée mɔ́ wa nújyawú lo tɔ nyíkɔ mɛ, jǎn tlóló mɔ gɔ lɔ tɔ oxó nylakan. 40 Omɛ ɖée ma sɔtakún mí, omɛ mítɔn nɛ. 41 Omɛ ɖékpékpé ɖée na osin kɔ́fu ɖékpo byɛ nu, ná mi nyi Klisti Hwlɛngǎntɔ́ tɔn wútu, ma lɔ́ núgbǒ na mi, é ma ná gɔn ale étɔn ma mɔ.»
Amú é hɛ̌n gbɛtɔ́ tɔ́nsɔ́n yíse mɛ?
(Matye 18.6-9/ Lwiki 17.1-2)
42 «Omɛ ɖékpékpé ɖée ná hɛn alixo bu na ɖékpo lo vikɛvú ɖée yi o sé e mɛ, é kpɔnte ná omɛ énɛ́ fáan ye ní bla osé kpinkpɛn do okɔ ní i mɔ zǐ i dlǎn oxumɛ. 43 Ényí tɛ alɔ ná hɛn ɛ wanyladǒ, sán ɛ sɛ, ná é kpɔnte ná ɛ fáan o ní nyi alɔɖékponɔ do byɔ ogbɛ maɖokpodǒ mɛ hǔgán fáan o ní ɖo alɔ tɛ awe e mɔ byɔ Jexɛnu mɛ, ɖée wá myɔ́ ɖée ma ci kpɔngbeɖe. 44 a[Xínɛ́, owánvǔ e ma kú, gbɛ̌ myɔ́ lɔ́ ma gɔ̌ cí gbeɖe.] 45 Ényí tɛ afɔ ná hɛn ɛ wanyladǒ, sán ɛ sɛ, ná é kpɔnte fáan o ní nyi afɔɖékponɔ do byɔ ogbɛ maɖokpodǒ mɛ hǔgán fáan ye ní ze e dlǎn Jexɛnu mɛ kpódǒ afɔ tɛ awe e kpó. 46 b[Xínɛ́, owánvǔ e ma kú, gbɛ̌ myɔ́ lɔ́ ma gɔ̌ ci kpɔngbeɖe.] 47 Ényí tɛ nukún ná hɛn ɛ wanyladǒ, sún i sɛ, ná é kpɔnte ná ɛ fáan o ní nyi nukúnɖékponɔ do byɔ Axɔ́lúɖu Mawu tɔn mɛ hǔgán fáan ye ní ze e dlǎn kpódǒ nukún tɛ awe e kpó do Jexɛnu mɛ. 48 Xínɛ́tɔ́, owánvǔ e ma kú gbɛ̌ myɔ́ lɔ́ ma cí gbeɖe. 49 Ná myɔ́ wá xwlakɔ́ ɖée ye ná do na omɛ títɛkpóe. 50 Onú jɔwǔn yi é wá xwlakɔ́, amɔ̌ ényí xwlakɔ́ hɛ̌n otɔ́n étɔn bu, amú ye ná do gɔ otɔ́n lɔ́ wa ní i? Mi ní mɔ ɖo xwlakɔ́ lo miɖé mɛ, mi ní mɔ nɔ huhwɛ̌ mɛ xɛ minɔzo.»