Jesu na nuɖuɖu gbɛtɔ́ degbaɖé (4.000)
(Matye 15.32-39)
8
1 Lo azǎn énɛ́ e mɛ, agun ɖaxó ɖevo gɔ do. Ye ma gɔ ɖo nuɖuɖu ɖékpékpé ná ɖu. Jesu ylɔ núkplɔ́ntɔ́ étɔn e mɔ lɔ ná ye fáan: 2 «Lɛ́blánú omɛ éxe e tɔn nɔ wá o, ɖó sɔ́n azǎn atɔn we gbɔ̌n yi ye ló okpɔ́ kpódǒ nyɔ kpó gbɛ̌ ye ma ɖo onú ɖée ye ná ɖu. 3 Ényí ye ló xovɛ̌, mɔ ga ɖo ye hlan osín yetɔn e mɛ, agbɔ̌ ná kpe ye, ye mɔ́ yɔ lo alixo ji, ná omɛ ɖɛhwlɛn ló ye mɛ mɔ tɔnsɔ́n oxí dindɛn.» 4 Núkplɔ́ntɔ́ étɔn e gblɔn ní i fáan: «Xɛ́ mí na mɔ nuɖuɖu ɖée ná gɔgo na ye le lo gblǒlo mɛ xítɔ?» 5 Jesu kanse ye fáan: «Akla nɛmú mi ɖo?» Yě gblɔn fáan: «Cyanwe.»6 Jesu ɖegbe ná agun ɖaxó lɔ́, ye mɔ sin-awán ló ayígba. É yi akla cyanwe lɔ́ e, mɔ dokpɛ́ ná Mawu, é fɛn ye mɔ bɛ ná núkplɔ́ntɔ́ étɔn e ye ní do ma na omɛ e. Yě gɔ ma ná agun lɔ́. 7 Yě gɔ ɖo hweyí flínflín ɖɛhwlɛn e, Jesu mɔ dokpɛ́ ná Mawu, mɔ lɔ ná núkplɔ́ntɔ́ étɔn e fáan ye ní ma na agun lɔ́ kpógba. 8 Ye omɛ kpó ɖunú mɔ gɔgo ganji. Núkplɔ́ntɔ́ e gɔ bɛ ɖée kpo e kpli, oxa cyanwe mɔ gɔ. 9 Ye omɛ ɖée gǎ ló xínɛ́tɔ́ e nya gbɛtɔ́ degbaɖé (4.000) wunkɔtɔn. Enɛ́godo, Jesu ɖo ye hlǎn sínmɛ. 10 Haɖékpolɔ́, Jesu kpódǒ núkplɔ́ntɔ́ étɔn e kpó byɔ tɔjihǔn mɛ, mɔ nya ayígba Dalumanuta tɔn ji.
Falizi e byɔ oxlɛ̌ nújyawú tɔn ɖé Jesu
(Matye 16.1-4)
11 Falizi e wa Jesu de mɔ cɛ oxólɔ kpí i kpó. Nádo ɖo omɔ ní i, yě lɔ ní i fáan ní bayí oxlɛ̌ nújyawú tɔn ɖé sɔn olɔ́nmɛ. 12 Jesu gɔ zegbɔ ɖaxó ɖe mɔ lɔ fáan: «Amúwútu omɛ hweéxenutɔn e do ló oxlɛ̌ nújyawú tɔn byɔ́ kɔn? Núgbǒ un lɔ ná mi: Omɛ hweéxenutɔn e ma ló oxlɛ̌ ɖekpékpé ná mɔ kɔn!» 13 Enɛ́godo, é tɔnsɔ́n ye de mɔ gɔ byɔ tɔjihǔn mɛ nya agě awetɔ́ ji.
Nukúnnú mamɔjɛnúmɛ núkplɔ́ntɔ́ e tɔn
(Matye 16.5-12)
14 Núkplɔ́ntɔ́ Jesu tɔn e ma flin mɔ hɛn akla e, akla ɖékpo gě ye ɖo ló tɔjihǔn lɔ́ mɛ. 15 Sáa énɛ́ mɛ, Jesu lɔ ná ye vǐvɛ́vǐvɛ́ fáan: «Mi kpayi mɔ cɔ miɖé do otɔ́n Falizi e kpó ogǎn Eloɖu e tɔn kpó go.» 16 Oxó énɛ́ zɔn, núkplɔ́ntɔ́ e nɔ dɔ̌nnú ló yeɖé e cincín ná akla ɖée ye ma hɛn wútu.
17 Jesu mɔnukúnnújɛ oxó yetɔn mɛ, é mɔ kanse ye fáan: «Amúwútu mi do nɔ dɔ̌nnú ná akla ɖée mi ma hɛn wútu? Mi ma ko mɔnukúnnújɛ é mɛ wɛ? Ayixa mitɔn ma ko wle wɛ́ nɛ? Ayixa mitɔn syɛn sɔ ítɔ́ nɛ? 18 Nukún mitɔn ma mɔ́nú wɛ́ nɛ? Otó mitɔn ma sénú wɛ́ nɛ? Mi ma flín nú wɛ? 19 Kín un do yi akla atɔ́n do na nuɖuɖu gbɛtɔ́ degbaɖéfɔtɔ́n (5.000), oxa gǐgɔ́ akla ɖée kpo e tɔn nɛmú mi bɛ?» Yě gblɔn ní i fáan: «Wyawe.» 20 «Jǎn sáa ɖée mɛ un gɔ yi akla cyanwe do na nuɖuɖu gbɛtɔ́ degbaɖé (4.000) lé, oxa gǐgɔ́ akla ɖée kpo e tɔn nɛmú mi bɛ?» Yě gɔ gblɔn ní i fáan: «Cyanwe.» 21 Jesu lɔ ná ye fáan: «Bé mi ma ko mɔnukúnnújɛ é mɛ wɛ́?»
Jesu hun nukún ná nukúntɔ́nnɔ ɖé ló gletoxo Bɛtisayida tɔn mɛ
22 Jesu kpó núkplɔ́ntɔ́ étɔn e kpó wa nyá gletoxo ɖée ye ylɔ́ jǎn Bɛtisayida mɛ. Yě kplan dǎwe nukúntɔ́nnɔ ɖékpo wa Jesu de mɔ vɛ̌ ɛ fáan ní ɖoalɔ é go do gbɔ-awutu ní i. 23 Jesu hɛn nukúntɔ́nnɔ lɔ́ sín alɔ go, mɔ kplín i sɔ́n gletoxo lɔ́ mɛ. Enɛ́godo, é tun otán étɔn dǒ nukún ji ní i, mɔ bɛ alɔ dǒ é ji mɔ kansí i fáan: «Bé o mɔ onú ɖe?» 24 Dǎwe nukúntɔ́nnɔ lɔ́ kpɔnnú hlan mɔ lɔ fáan: «Un mɔ gbɛtɔ́ e, ye mɔ jɔ atín wunkɔtɔn, amɔ̌ ye nɔ zǐnzɔnlin.» 25 Jesu gɔ gɔ alɔ ze dǒ nukún ji ná nukúntɔ́nnɔ lɔ́, é mɔ mɔnú ganji. Awutu étɔn gbɔ jǎn é mɔ mɔnu tlíntlín. 26 Jesu lɔ ní i fáan: «Nya tɛ osínmɛ gbɛ̌ gɔ jɛ gletoxo lɔ́ mɛ hwɛ̌ le.»
Pyɛɛ lɔ fáan Jesu wá Klisti Hwlɛngǎntɔ́ lɔ́
(Matye 16.13-20/ Lwiki 9.18-21)
27 Enɛ́godo, Jesu kpó núkplɔ́ntɔ́ étɔn e kpó nya gletoxo ɖée sɛkpɔ otoxo Sezale Filipu tɔn e mɛ. Lo alixo ji, é kanse núkplɔ́ntɔ́ étɔn e fáan: «Amɛ́ gbɛtɔ́ e jǎn fáan un nyi?» 28 Yě gblɔn ní i fáan: «Omɛ ɖɛhwlɛn lɔ́ fáan Jaan mawusinlɛnamɛtɔ́ yi é wá ɛ. Omɛ ɖevo e lɔ́ fáan gbeyílɔtɔ́ Mawu tɔn Eli yi é wá ɛ. Omɛ ɖevo e gɔ̌ lɔ́ fáan o nyi ɖékpo ló gbeyílɔtɔ́ Mawu tɔn e mɛ.» 29 Jesu kanse ye fáan: «Lo byɛ de, amɛ́ un nyi mi mɔ́ lɔ́?» Pyɛɛ yixó mɔ lɔ fáan: «Ayɔ yi é wá Klisti Hwlɛngǎntɔ́ lɔ́.» 30 Jesu dosɛ́n ná ye vǐvɛ́vǐvɛ́ fáan ye ní gɔ lɔ omɛ ɖée yelɔ́ nyi na omɛ ɖé le.
Jesu la okú kpó fɔ́nsɔ́nkú étɔn kpó
(Matye 16.21-23/ Lwiki 9.22)
31 Jesu cɛ núkplɔ́n núkplɔ́ntɔ́ étɔn e fáan: «É jɛ fáan Ovǐ Gbɛtɔ́ tɔn ní mɔ awúfyɛsa susu jǎn tomɛxó e, avɔ̌sántɔ́gǎn e kpó sɛ́nkplɔ́nmɛtɔ́ e kpó mɔ gbɛ̌ ɛ jlǎ, ye ná hǔ i, é mɔ́ fɔn lo azǎn étɔn atɔntɔ́gbe.» 32 É nɔ lɔ́xó éxe ná ye gbawungba. Pyɛɛ wa kplín i jɛ kpá, mɔ cɛ hwɛgblě dǐ i. 33 Jesu lɛkɔkpɔn núkplɔ́ntɔ́ étɔn e mɔ wɔxɛ́ Pyɛɛ mɔ lɔ ní i fáan: «Tɔnsɔn godo na o, Satan, ná tɛ linlɛn e ma nyí linlɛn Mawu tɔn, amɔ̌ gbɛtɔ́ e tɔn nɛ.»
Namú ye xodǒ Jesu gbɔ̌n?
(Matye 16.24-28/ Lwiki 9.23-27)
34 Enɛ́godo, Jesu wa ylɔ́ agun ɖaxó lɔ́ kpó núkplɔ́ntɔ́ étɔn e kpó mɔ lɔ ná ye fáan: «Ényí omɛ ɖé jlǒ ná xodo o, omɛ lɔ́ ní gbɛkɔ éɖe go, mɔ ze satín étɔn mɔ xodo o. 35 Ná omɛ ɖékpékpé ɖée jlo ná hwlɛn ogbɛ éɖe tɔn gan ná hɛ̌n ɛ bu, amɔ̌ omɛ ɖékpékpé ɖée ná hɛn ogbɛ étɔn bu na nyɔ kpó Owɛnjɔwǔn tɔn kpó wútu, ná hwlɛ̌n ɛ gan. 36 Ná ale ɖemú é nyi ná gbɛtɔ́ nádo ɖu ale ayíhɔ̌ngbɛ lɔ́ kpéte tɔn ényí é hɛ̌n ogbɛ étɔn bu? 37 Amú gbɛtɔ́ singǎn na, é mɔ xɔkwá sɔ ogbɛ étɔn? 38 Ényí winnyá hǔ omɛ ɖé ná nyɔ kpó oxó tɔ e kpó tɔn wútu lo omɛ hweéxenutɔn e nukɔn, ɖée nyi ayɔɖetɔ́ kpó nyladǒnɔ kpó, winnyá ná hu Ovǐ Gbɛtɔ́ tɔn lɔsú kpógba na omɛ énɛ́ lɔ́ tɔn sáa ɖée mɛ é ná wa kpó wɛnzagun wíwé e kpó lo gigo Otɔ́ étɔn tɔn mɛ le.»