Jesu do ye omɛ wyawe e hlan
(Matye 10.5-15/ Maaki 6.7-13)
9
1 Jesu kpli mɛɖóhlan wyawe e, mɔ na ye xúhlɔ̌n kpó acɛ kpó nádo nya gbigbɔ mawé títɛkpóe mɔ́ gɔ gbɔ-awutu na awutunɔ e. 2 Enɛ́godo, é do ye hlan nádo la Axɔ́lúɖu Mawu tɔn mɔ gɔ gbɔ-awutu na awutunɔ e. 3 É lɔ ná ye fáan: «Mi gɔ hɛn onú ɖekpékpé na gbějízɔnlin lɔ́ le: alɔnukpo nɛ ya, kayí adɔ̌kpo, kayí nuɖuɖu, kayí okwá, gbɛ̌ omɛ ɖé ní gɔ hɛn awu ní kpe awe le. 4 Osín ɖékpékpé ɖée mɛ mi ná byɔ ye mɔ kɛ-alɔyi mi, mi nɔ xínɛ́ kákájɛ sáa ɖée mɛ mi ná tɔnsɔn otoxo lɔ́ mɛ le. 5 Ényí ye ma ga kɛ-alɔyi mi wɛ́, mi tɔnsɔn otoxo lɔ́ mɛ mɔ xuxú afɔkɔ́ mitɔn e, énɛ́ ná doxlɛ fáan ye cinú bayí.» 6 Mɛɖóhlan lɔ́ e nya mɔ nɔ gbɔ̌n gletoxo e mɛ. Ye nɔ lá owɛnjɔwǔn mɔ nɔ gbɔ̌-awutu ná awutunɔ e ló xíkpókpó.Ogǎn Eloɖu Antipasi nɔ gbǎdo ná omɛ alɔkpa ɖée Jesu nyi
(Matye 14.1-12/ Maaki 6.14-29)
7 Lo sáa lɔ́ mɛ, Eloɖu ogǎn agbegbe Galile tɔn se onú ɖée nɔ jɔ lɔ́ títɛkpóe, gbɛ̌ é ma nyɔ kín é ná bayí jan. Ná omɛ ɖɛhwlɛn nɔ lɔ́ fáan: «Jaan mawusinlɛnamɛtɔ́ yi é fɔnsɔ́nkú.»
8 Omɛ ɖevo e gɔ nɔ lɔ́ fáan: «Gbeyílɔtɔ́ Mawu tɔn Eli yi é sɔ-awúxlɛ!» Omɛ ɖevo e ítɔ́ gɔ nɔ lɔ́ fáan: «Ɖékpo lo gbeyílɔtɔ́ xóxó Mawu tɔn e mɛ yi é fɔnsɔ́nkú.»
9 Amɔ̌ Eloɖu lɔ ló éɖe mɛ fáan: «Un ko zɔn ye mɔ gbo takún ná Jaan. Gbɛtɔ́ ɖemú wá éxe, ɖée go un nɔ sé onú éxe wunkɔtɔn e dǒ?» É gɔ nɔ dǐn ná mɔ Jesu.
Jesu na nuɖuɖu gbɛtɔ́ susu
(Matye 14.13-21/ Maaki 6.30-44/ Jaan 6.1-14)
10 Kín mɛɖóhlan e do lɛkɔ, yě lɔ onú ɖée ye bayí títɛkpóe ná Jesu. É gɔ kplan ye jɛ lá ló otoxo ɖée ye ylɔ́ jǎn Bɛtisayida sín awaji. 11 Amɔ̌, kín agun lɔ́ do se ítɔ́, yě xodǒ Jesu. Jesu kɛ-alɔyi ye, mɔ lɔxó Axɔ́lúɖu Mawu tɔn ná ye mɔ gɔ gbɔ-awutu ná omɛ ɖée ɖo hudǒ kpɔ́ngbɔ tɔn e.
12 Kín ohwe do nɔ nyaxɔ, mɛɖóhlan wyawe lɔ́ e sɛwa Jesu de mɔ lɔ ní i fáan: «Ɖo agun lɔ́ hlan gletoxo kpó gbetato ɖée lɛdǒ xitɔ títɛkpóe mɛ nádo nya din nuɖuɖu kpó adɔ̌tɛn kpó, ná oxí jɛvɔ̌ ɖe mí le ló xitɔ.»
13 Amɔ̌ Jesu lɔ ná ye fáan: «Byɛ tete, mi na nuɖuɖu ye!» Yě gɔ gblɔn ná Jesu fáan: «Mí ma ɖo hugán akla atɔ́n kpódǒ hweyí awe kpó. Kayí, byɛ́tete ní nya xɔ nuɖuɖu na gbɛtɔ́ kplankplan éxe e nɛ ya?»
14 Xlunhwǎn ná ɖibla nya ɖegbaɖéfɔtɔ́n (5.000) wunkɔ yi é ló otɛn lɔ́ mɛ. Jesu lɔ ná núkplɔ́ntɔ́ étɔn e fáan: «Mi ɖo tɛn na ye, ná ye ní sin-awán gbɛtɔ́ kanɖeawó-kanɖeawó.» 15 Núkplɔ́ntɔ́ lɔ́ e bayí ɖikín Jesu lɔ ɖó mɔ ɖo otɛnmɛ ná agun lɔ́ títɛkpóe. 16 Jesu yi akla atɔ́n lɔ́ kpó hweyí awe lɔ́ e kpó. É jlɔkɔkpɔn aga, mɔ dokpɛ́ ná Mawu ná nuɖuɖu lɔ́ e tɔn wútu. Enɛ́godo, é fɛn ye mɔ bɛ ná núkplɔ́ntɔ́ étɔn e ná ye nído ma ná agun lɔ́. 17 Ye omɛ títɛkpóe ɖunú mɔ gɔgo, ye mɔ gɔ bɛ ɖée kpo e gɔ oxa wyawe.
Pyɛɛ lɔ fáan Jesu yi é wá Klisti Hwlɛngǎntɔ́ lɔ́
(Matye 16.13-19/ Maaki 8.27-29)
18 Gbeɖékpo, Jesu jɛ lá mɔ nɔ xóɖɛ, núkplɔ́ntɔ́ étɔn e mɔ́ ló é de. É kanse ye fáan: «Amɛ́ omɛ e lɔ́ fáan un nyi?»
19 Ye gblɔn ní i fáan: «Omɛ ɖɛhwlɛn lɔ́ fáan Jaan Mawusinlɛnamɛtɔ́ yi é wá ayɔ, omɛ ɖevo e lɔ́ fáan gbeyílɔtɔ́ Mawu tɔn Eli yi é wá ɛ, omɛ ɖevo ítɔ́ lɔ́ fáan ɖékpo lo gbeyílɔtɔ́ Mawu tɔn xóxótɔn e mɛ yi é fɔnsɔ́nkú.» 20 Jesu kanse ye fáan: «Lo byɛ de, amɛ́ un nyi?» Pyɛɛ gblɔn fáan: «Klisti Hwlɛngǎntɔ́ ɖée Mawu do hlan yi é wá ɛ.»
21 Jesu dosɛ́n ná ye vǐvɛ́vǐvɛ́ fáan ye ní gɔ lɔ omɛ ɖée yelɔ́ nyi na omɛ ɖé le.
Jesu lɔxó dǒ okú kpó fɔnsɔnkú étɔn kpó ji
(Matye 16.20-28/ Maaki 8.30–9.1)
22 Jesu gɔ lɔ deji fáan: «É jɛ fáan Ovǐ gbɛtɔ́ tɔn ní jiya susu, jǎn tomɛxó e, avɔ̌sántɔ́gǎn e kpó sɛ́nkplɔ́nmɛtɔ́ e kpó mɔ gbɛ ɛ jla. Omɛ e ná hǔ i, é mɔ́ fɔnsɔnkú lo azǎn atɔntɔ́ gbe.» 23 Enɛ́godo, Jesu lɔ ná ye omɛ kpó fáan: «Ényí omɛ ɖé jlo ná xodo o, omɛ lɔ́ ní gbɛkɔ éɖe go, mɔ ze satín étɔn égbězɛn-égbězɛn mɔ xodo o. 24 Ná omɛ ɖékpékpé ɖée jlo ná hwlɛn ogbɛ éɖe tɔn gan ná hɛ̌n ɛ bu. Amɔ̌, omɛ ɖékpékpé ɖée ná hɛn ogbɛ éɖe tɔn bu ná nyɔ tɔn wútu ná hwlɛ̌n ɛ gan. 25 Ényí omɛ ɖé ɖó adɔkun títɛkpóe gbɛmɛ xítɔ tɔn mɔ ga hɛn ogbɛ éɖe tɔn bu kayí mɔ hɛn ogbɛ éɖe tɔn gble, ale ɖemú é le mɛ ní i? 26 Ényí omɛ ɖé kúwinnyá na nyɔ kpó oxó tɔ e tɔn kpó wútu, Ovǐ gbɛtɔ́ tɔn ná kuwinnyá omɛ lɔ́ tɔn kpógba lo sáa ɖée mɛ é ná wa lo gigo étɔn mɛ le, lo gigo Otɔ́ tɔn kpó wɛnzagun wíwé e tɔn kpó mɛ le. 27 Núgbǒ un lɔ na mi, lo omɛ ɖée ló xítɔ e mɛ, omɛ ɖɛhwlɛn ma ná ku hwɛ̌kpó do mɔ Axɔ́lúɖu Mawu tɔn.»
Mɔyizi kpó Eli kpó lɔxó xɛ́ Jesu ló osó ji
(Matye 17.1-8/ Maaki 9.2-8)
28 Azǎn cyantɔn wunkɔ wa nyá kín Jesu do lɔxó énɛ́ e godo, é kplan Pyɛɛ, Jaan kpódǒ Jaki kpó mɔ xɛ osóji nádo xoɖɛ. 29 Sáa ɖée mɛ é nɔ xóɖɛ le, nukunmɛ étɔn ɖyɔwunmɛ jǎn awu étɔn mɔ lɛzun wéwé sísɛ́ mlámlá ɖe. 30 Afɔɖékpolɔ́ji, omɛ awe ɖɛhwlɛn cɛ xólɔ xɛ́ Jesu: Yelɛ wá Mɔyizi kpó Eli kpó, 31 ɖée sɔ-awúxlɛ ló gigo Mawu tɔn mɛ. Ye nɔ lɔ́xó dǒ kín Jesu ná ɖotakúnna azɔ̌n étɔn ɖo gbɔn okú étɔn dali lo otoxo Jeluzalɛmu tɔn mɛ. 32 Pyɛɛ kpó hǎgbɛ́ étɔn e kpó nɔ dɔ̌-amlɔ sisósisó. Amɔ̌ kín ye do fɔn, yě mɔ gigo Jesu tɔn kpó omɛ awe ɖée ló é de e kpó. 33 Kín omɛ awe énɛ́ e do nɔ klán sɔ́n Jesu de, Pyɛɛ lɔ ná Jesu fáan: «Mɛkplɔ́ntɔ́! É jɔwun ná xítɔ ɖée mí lé. Mí ní ɖo goxɔ atɔn: ɖékpo na ayɔ, ɖékpo na Mɔyizi, ɖékpo na Eli.» É ma nyɔ́ onú ɖée lɔ kɔn é lé.
34 Ojlɛ̌ ɖée mɛ é nɔ lɔ́ onú énɛ́ e le, aslɔ ɖé wa mɔ cyɔn ye. Obú jɛ núkplɔ́ntɔ́ lɔ́ e ji kín ye do mɔ fáan aslɔ lɔ́ nɔ cyɔn ye ji. 35 Ogbe ɖé tɔnsɔ́n aslɔ lɔ́ mɛ mɔ nɔ jǎn fáan: «Omɛ éxe wá Ovǐ tɔ, omɛ ɖée un ɖe, mi nɔ se oxó étɔn!»
36 Kín ye do se ogbe lɔ́ kpó godo, Jesu có gě yi é kpo ló xílɔ́. Núkplɔ́ntɔ́ e nɔ-abwɛ́, ye ma lɔ onú ɖée ye mɔ lɔ́ e ná omɛ ɖékpékpé ló ojlɛ̌ lɔ́ mɛ.
Jesu gbɔ-awutu ná ovǐ gbigbɔ mawénɔ ɖé
(Matye 17.14-18/ Maaki 9.14-27)
37 Lo owunkɛngbe étɔn, kín Jesu kpó núkplɔ́ntɔ́ étɔn atɔn e kpó do jɛte sɔ́n osóji wazě, omɛ susu do ahwan mɔ wa kpí i. 38 Yíwe! Dǎwe ɖé do-axó sɔ́n omɛ lɔ́ e mɛ fáan: «Mɛkplɔ́ntɔ́! Un vɛ ɛ, nyinukúnkpɔn tɔ ovǐ xlunhwǎn, ovǐ tɔ kúnɖékpo lɔ́! 39 É wá jɔ̌, gbigbɔ ɖé mɔ́ wli i, é mɔ́ do-axó ajiji, gbigbɔ lɔ́ mɔ hunhún i kpó adǎn kpó, é mɔ́ tún fútúfutu sɔ́n nugbɛn. É dǒya ní i gbɛ̌ é ma gɔ̌ fá é dǒ jǔ i dǒ. 40 Un vɛ tɛ núkplɔ́ntɔ́ e, ye ní do nya gbigbɔ lɔ́ sɔn ovǐ lɔ́ mɛ, gbɛ̌ ye ma kpe é go.»
41 Jesu lɔ fáan: «Byɛ gbɛtɔ́ nylakan yísemaɖótɔ́ e mi! Káká jɛ ojlɛ̌ ɖemú mɛ un ná nɔ okpɔ́ kpó mi kpó? Káká jɛ ojlɛ̌ ɖemú mɛ byɛ ná nɔ okɔ ji na o jɛ?» Jesu wa lɔ́ ná ovǐtɔ́ lɔ́ fáan: «Kplan tɛ ovǐ wa xítɔ!»
42 Kín ovǐ lɔ́ do wazě, gbigbɔ mawé lɔ́ flɛ́n ɛ dǒ-awán mɔ hunhún i kpó adǎn kpó. Amɔ̌ Jesu ɖegbedǒ gbigbɔ mawé lɔ́ kpó adǎn kpó. É hɛn awutu gbɔ ná ovǐ lɔ́ mɔ gɔ ɛ jo ná otɔ́ étɔn. 43 Awúji ye omɛ kpó dǒ kiklo Mawu tɔn go.
Jesu gɔ xólɔ dǒ okú étɔn ji
(Matye 17.22-23/ Maaki 9.30-32)
Kín onú ɖée Jesu nɔ wá e gbɛkpo nɔ kpácá omɛ kpó, Jesu lɔ ná núkplɔ́ntɔ́ étɔn e fáan: 44 «Mi ɖotó ganji onú ɖée un jlo ná lɔ na mi: Ye ná jo Ovǐ gbɛtɔ́ tɔn do alɔmɛ na gbɛtɔ́ e.»
45 Amɔ̌ núkplɔ́ntɔ́ e ma mɔnukúnnújɛ oxó énɛ́ mɛ, ɖó takúnɖená oxó lɔ́ tɔn nyi bibɛ dǒ ye ná ye ní gba mɔnukúnnújɛ é mɛ. Ye mɔ gɔ nɔ ɖíbú nádo kanse Jesu.
Amɛ́ yi é wá ɖaxó?
(Matye 18.1-5/ Maaki 9.33-37)
46 Onúdindɔn ɖé fɔn ló núkplɔ́ntɔ́ e cincín nádo nyɔ omɛ ɖée wá ɖaxó ló yemɛ. 47 Jesu mɔnújɛ ayixa yetɔn mɛ. É ze ovǐ kpɛyí ɖékpo dǒ akpá éɖe tɔn 48 mɔ nɔ lɔ́ ná ye fáan: «Omɛ ɖékpékpé ɖée kɛ-alɔyi ovǐ kpɛyí éxe ná nyíkɔ tɔ tɔn wútu, nyɔ yi é kɛ-alɔyi, omɛ ɖékpékpé ɖée ga kɛ-alɔyi nyɔ, kɛ-alɔyi omɛ ɖée do o hlan. Ná omɛ ɖée nyi kpɛyí kpéte ló mi omɛ kpó mɛ, omɛ énɛ́ yi é wá ɖaxó.»
Omɛ ɖée ma sɔtakún mi, omɛ mitɔn nɛ
49 Jaan yixó mɔ lɔ ná Jesu fáan: «Ogǎn! Mí mɔ dǎwe ɖé, ɖée nɔ nyá gbigbɔ mawé e jɛgě ló tɛ nyíkɔ mɛ, mí mɔ jlo ná glɔn-alixo ní i ná é ma nɔ xódǒ ayɔ kpó byɛ́ kpó wútu.» 50 Amɔ̌ Jesu gblɔn ná ye fáan: «Mi gɔ glɔn-alixo ní i le, ɖó omɛ ɖée ma sɔtakún mi, omɛ mitɔn nɛ!»
Gletoxo Samali tɔn ɖékpo ɖé ma yi Jesu
51 Kín ojlɛ̌ ɖée Mawu nádo ze Jesu sɔn ayíhɔ̌nmɛ do nɔ sɛ́kpɔ́, Jesu yi gbetakún nádo nya otoxo Jeluzalɛmu tɔn mɛ kpódǒ akɔ́nkpinkpan kpó. 52 É do owɛndǒtɔ́ e hlǎn jɛnukɔn. Omɛ lɔ́ e ze alixo mɔ byɔ gletoxo Samali tɔn ɖé mɛ nádo wleawú na wíwá étɔn. 53 Amɔ̌, gletoxo lɔ́ mɛnu e ma jlo ná kɛ-alɔ yi i, ná é sɔkɔ Jeluzalɛmu wútu. 54 Kín núkplɔ́ntɔ́ étɔn, Jaki kpó Jaan kpó do mɔ jan ítɔ́, yě lɔ ná Jesu fáan: «Oklunɔ! Bé o jlo fáan mí ní ɖegbe ná myɔ́ ní jɛte sɔn aga mɔ fyɔ ye?» 55 Jesu lɛkpannukɔn ye mɔ wɔ xɛ́ ye. 56 Ye gɔ wle-alixo kpanta gletoxo ɖevo mɛ.
Namú ye ná xodo Jesu gbɔn?
(Matye 8.19-22)
57 Sáa ɖée mɛ Jesu kpó núkplɔ́ntɔ́ étɔn e kpó ló alixo ji mɔ nɔ sɔ́n lé, omɛ ɖé lɔ ná Jesu fáan: «Oklunɔ! Un ná xodo é nya xiɖekpékpé ɖée o ná nya.» 58 Jesu lɔ ní i fáan: «Wɔ̌túkpwɛ e ɖo adɔ̌do, oxɛ e mɔ ɖo adɔ̌, amɔ̌ Ovǐ gbɛtɔ́ tɔn ma ɖo xíɖée é ná gbɔjɛ le.»
59 Jesu lɔ na omɛ ɖevo fáan: «Xodo o!» Omɛ lɔ́ gblɔn ní i fáan: «Oklunɔ! Ɖikee ná má nya ɖi tɔ otɔ́ hwɛ̌!»
60 Amɔ̌ Jesu lɔ ní i fáan: «Jo ocɔ e do ná ye ní ɖi ocɔ yetɔn e; amɔ̌ ayɔ, nya la Axɔ́lúɖu Mawu tɔn!»
61 Omɛ ɖevo lɔ ní i fáan: «Oklunɔ! Un ná xodo é amɔ̌, jɛnukɔn, ɖikee ná má nya lɔ ná tɔ hɛ̌nnumɛ e hwɛ̌ fáan: “Ná nya mɔ wa!”»
62 Jesu lɔ ní i fáan: «Omɛ ɖékpékpé ɖée nɔ kpɔ́gle mɔ gɔ lɛkɔkpɔn godo ma jɛxɛ́ Axɔ́lúɖu Mawu tɔn!»