Jesu do núkplɔ́ntɔ́ kanɖégbannukun-awe e hlǎn Oxó Mawu tɔn lá gbě
10
1 Enɛ́godo, Oklunɔ Jesu ɖe núkplɔ́ntɔ́ kanɖégbannukun-awea ɖevo e mɔ do awe-awe yetɔn e jɛnukɔn hlǎn otoxo títɛkpóe mɛ kpó oxí títɛkpóe ɖée Jesu tete lɔsú ɖo ná nya e kpó. 2 É lɔ ná ye fáan: «Oji lɔ́ jɛ mɔ su, amɔ̌ azɔ̌nwatɔ́ e ma su. Mi mɔ vɛ Oklunɔ jinɔkún lɔ́ tɔn ná ní do azɔ̌nwatɔ́ e hlan jinɔkúngle étɔn mɛ. 3 Mi nya! Yíwe un nɔ dǒ mi hlǎn ɖi lɛ́ngbɔ̌vǔ lo ohla e cincín. 4 Mi gɔ hɛn sɛ́wúngɛ́ le, gbɛ̌ mi gɔ hɛn adɔ̌kpo le, ékpɛn afɔkpa tete lɔsú; gbɛ̌ mi gɔ nɔte mɔ ɖɔnúdo omɛ ɖékpékpé lo alixo ji le. 5 Osín ɖekpékpé ɖée mɛ mi ná byɔ, mi lɔ jɛnukɔn fáan: “Jijɔxo ní nɔ kpó osín éxe kpó.” 6 Ényí gbɛtɔ́ jijɔxonɔ ɖé ló osín lɔ́ mɛ, jijɔxo mitɔn ná nɔ xɛ́ ɛ. Ényí é ma nyi ítɔ́, jijɔxo mitɔn mɔ lɛkɔwa mi de. 7 Mi mɔ nɔ osín énɛ́ mɛ, mi ɖu mɔ nu onú ɖée ye ná na mi, ná azɔ̌nwatɔ́ jɛxɛ́ azɔ̌nkwá étɔn. Mi gɔ tɔnsɔn osín ɖe mɛ jɛ osín ɖe mɛ le. 8 Otoxo ɖékpékpé ɖée mɛ mi ná byɔ jǎn ye mɔ kɛ-alɔyi mi, mi ɖu onú ɖée ye ná na mi. 9 Mi mɔ gbɔ-awutu na awutunɔ ɖée ló otoxo énɛ́ mɛ, mɔ lɔ na otoxo lɔ́ mɛnu e fáan: “Axɔ́lúɖu Mawu tɔn ko sɛkpɔ mi!” 10 Amɔ̌ otoxo ɖékpékpé ɖée mɛ mi ná byɔ gbɛ̌ ye ma ná kɛ-alɔyi mi wɛ́, mi tɔnjɛ alixogbǒ ji mɔ lɔ na ye fáan: 11 “Kákájɛ afínfín otoxo mitɔn tɔn ɖée xo dǒ afɔ mítɔn e go, mí hunhún i mɔ gɔ ɛ jo ná mi. Amɔ̌, mi nyɔ fáan Axɔ́lúɖu Mawu tɔn ko sɛkpɔ.” 12 Ná ma lɔ na mi: lo hwɛdǎzǎn Mawu tɔn gbe, otó ɖée ye ná dɔn na Sodɔmu toxo ná kpɔnte hugán otó ɖée ye ná dɔn na otoxo énɛ́ lɔ́.»Otoxo ɖée ma yi Jesu se e
(Matye 11.20-24)
13 «Dindɔn ná ayɔ otoxo Kolazɛn tɔn! Dindɔn ná ayɔ otoxo Bɛtisayida tɔn! Ná nújyawú ɖée Mawu wa ló mi de, ényí Tili kayí Sidɔn yi é wa onú énɛ́ e lé, ye ná ko bɛ akpo kpan, mɔ ko lɛ afín, mɔ do doxlɛ fáan ye ko lɛnvɔjɔ xóxó. 14 Enɛ́wútu, lo hwɛdǎzǎn Mawu tɔn gbe, otó ɖée ye ná dɔn na otoxo Tili kpó Sidɔn kpó tɔn ná kpɔnte hugán otó ɖée ye ná dɔn na byɛ. 15 Ayɔ otoxo Kapɛɛnawumi tɔn e! Bé o lɛn fáan Mawu ná ze e nya aga kákájɛ olɔ́nmɛ nɛ? Ehěo! Mawu ná gɔ ɛ do odo kákájɛ okútomɛ.»
16 Jesu gɔ lɔ ná núkplɔ́ntɔ́ étɔn e fáan: «Omɛ ɖée ɖotó mi, nyɔ yi é ɖotó! Omɛ ɖée gbɛ mi, nyɔ yi é gbɛ, omɛ ɖée ga gbɛ nyɔ gbɛ omɛ ɖée do o hlan.»
Núkplɔ́ntɔ́ kanɖégbannukun-awe e lɛkɔwa
17 Núkplɔ́ntɔ́ kanɖégbannukun-awe Jesu tɔn e lɛkɔwa kpódǒ xomɛhunhun kpó, mɔ nɔ lɔ́ ní i fáan: «Oklunɔ, gbigbɔ mawé e lɔsú kpógba sétónú ná mí, ényí mí ɖégbe do ye lo nyíkɔ tɛ mɛ!»
18 Jesu gblɔn ná ye fáan: «Un mɔ Satan flɛ sɔ́n olɔ́n ɖi abi. 19 Mi mɔ ɖotó: un na mi acɛ nádo zinzɔnlin gbɔn odan kpó hɔnklékle e kpó ji, mɔ́ ɖu lo xúhlɔ̌n kɛntɔ́ tɔn kpéte ji, gbɛ̌ onú ɖekpékpé ma singǎn wa onú nylakan ɖé do mi. 20 Gancó, mi gɔ jayá ná gbigbɔ mawé e sétónú ná mi wútu le, amɔ̌ mi ní jayá ná Mawu ko kan nyíkɔ mitɔn e dǒ olɔ́nmɛ.»
Jesu jayá
(Matye 11.25-27; 13.16-17)
21 Lo ojlɛ̌ ɖékpolɔ́ mɛ, Gbigbɔ Wíwé hɛn Jesu gɔ ná ayájijɛ é mɔ lɔ fáan: «Un dokpɛ́ ná ɛ, Otɔ́, Oklunɔ Olɔ́n kpó ayígba kpó tɔn fáan ayɔ ze onú éxe e sɛɖo dǒ núnyɔ́tɔ́ kpódǒ ayixaɖótɔ́ e kpó, mɔ ga du i xlɛ omɛ ɖée ɖi vikɛvú e. Ɛɛn Otɔ́, kín é jlo é ɖó nɛ. 22 Onú títɛkpóe yi tɔ Otɔ́ ze dǒ así ná o gbɛ̌ omɛ ɖékpékpé ma nyɔ́ omɛ ɖée wá Ovǐ afido Otɔ́, gbɛ̌ omɛ ɖékpékpé ma gɔ nyɔ́ omɛ ɖée wá Otɔ́ afido Ovǐ, kpó omɛ ɖée Ovǐ jlo ná ɖexlɛ e kpó.»
23 Enɛ́godo, Jesu lɛkpannukɔn núkplɔ́ntɔ́ étɔn e mɔ lɔ ná ye ɖóɖó e fáan: «Nújɔwunnánɔ wá ye omɛ ɖée nɔ mɔ́ onú ɖée mi nɔ mɔ́ e! 24 Ná má lɔ na mi: gbeyílɔtɔ́ Mawu tɔn susu kpó axɔ́lú susu kpó jlo ná mɔ onú ɖée mɔ kɔn mi lé gbɛ̌ ye ma mɔ, yě jlo ná se onú ɖée se kɔn mi lé gbɛ̌ ye ma se.»
Owán-yíyí ɖo hlan Mawu kpó mɛnɔzo kpó
(Matye 22.34-40/ Maaki 12.28-31)
25 Lo sáa lɔ́ mɛ, sɛ́nkplɔ́nmɛtɔ́ ɖe fɔntite nádo xwle Jesu kpɔn, é mɔ kansí i fáan: «Mɛkplɔ́ntɔ́! Amú un ɖo ná bayí do ɖugǔ ogbɛ maɖokpodǒ tɔn?» 26 Jesu gblɔn ní i fáan: «Amú ye kan dǒ osɛ́n wéma lɔ́ mɛ? Namú o mɔnukúnnújɛ é mɛ jan kín o do xlɛ?» 27 Dǎwe lɔ́ gblɔn ní i fáan: «Ó ɖo ná yiwánna Oklunɔ Mawu tɛ kpódǒ ayixa tɛ kpéte kpó, kpódǒ alíndɔ̌n tɛ kpéte kpó, kpódǒ xúhlɔ̌n tɛ kpéte kpó, kpódǒ linlɛn tɛ kpéte kpó, o mɔ́ gɔ yiwánna tɛ nɔzo ɖi ayɔ tete lɔsú.»
28 Jesu lɔ ní i fáan: «O gblɔn ganji, bayí jan ítɔ́, o mɔ nɔ ogbɛ.»
Otan Samalinu jɔwǔn tɔn
29 Amɔ̌ sɛ́nkplɔ́nmɛtɔ́ lɔ́, nádo mɔ hwɛhwínhwɛ́n ná éɖe, kanse Jesu fáan: «Jǎn amɛ́ yi é wá tɔ nɔzo?» 30 Jesu gblɔn fáan: «Dǎwe ɖé tɔnsɔ́n Jeluzalɛmu toxomɛ fɛwungɔ Jeliko toxomɛ, mɔ jɛ alɔ ajogǎn e tɔn mɛ. Yě bɛ onú étɔn títɛkpóe sɔ́n é si, mɔ xú i, mɔ jǔ i do okúdǎ-gbɛdǎ. 31 É wa jɔ̌, avɔ̌sántɔ́ Mawu tɔn ɖé mɔ nɔ gbɔ̌n alixo énɛ́ lɔ́ ji nɔ fɛ́, kín é do mɔ dǎwe lɔ́, é gbɔn lá ní i. 32 Kínɖékpolɔ́, lévikúnkan ɖé wa jɛ̌ xíɖékpolɔ́, é mɔ dǎwe lɔ́ mɔ gɔ gbɔn lá ní i kpógba. 33 Amɔ̌ dǎwe agbegbe Samali tɔn mɛnu ɖé, ɖée ló gbějízɔnlinji nɔ sɔ́n, wa jɛ̌ xínɛ́. É mɔ dǎwe lɔ́, jǎn é we sín nú mɔ wa lɛ́blánú ní i susu. 34 É dɔn sɛkpɔ́ ɛ, mɔ kɔn ami kpó vɛɛn kpó dǒ akpa étɔn e mɛ mɔ bla. Enɛ́godo, é zi i dǒ osɔ́ éɖe tɔn ji mɔ kplín i nya jonɔyítɛn ɖé, mɔ kpenukún é go. 35 Owunkɛngbe étɔn, dǎwe Samalinu lɔ́ yi abɔgankwá awe ná jonɔyítɛngǎn lɔ́ mɔ lɔ ní i fáan: “Kpenukún dǎwe éxe go, ényí o zǎn okwá ɖe dogɔ, na su i lo gigɔ tɔ hwenu.”»
36 Jesu gɔ lɔ fáan: «Lo omɛ atɔn énɛ́ e mɛ, amɛ́ o lɛn fáan é nyi nɔzo dǎwe énɛ́ ɖée jɛ ajogǎn e sín alɔmɛ tɔn?» 37 Sɛ́nkplɔ́nmɛtɔ́ lɔ́ gblɔn fáan: «Éyɔ omɛ ɖée walɛ́blánú ní i lɔ́ nɛ!» Jesu lɔ ní i fáan: «Nya, ayɔ tete lɔsú, nɔ bayí jan ítɔ́!»
Jesu ba jonɔ Maata kpó Mali kpó
38 Kín Jesu kpó núkplɔ́ntɔ́ étɔn e kpó do nɔ sɔ́n ló alixo ji, é byɔ gletoxo ɖé mɛ, jǎn nyɔnu ɖée nyíkɔ étɔn nyí Maata mɔ yí i dǒ osín étɔn mɛ. 39 É ɖo nɔyí nyɔsi ɖékpo ɖée ye ylɔ́ jǎn Mali. Mali sin-awán ló afɔ Oklunɔ Jesu tɔn kɛ́ mɔ nɔ ɖótó oxó étɔn. 40 Maata nɔ xókan susu onú ɖée é ná do yi jonɔ tɔn. É wa wá Jesu de mɔ lɔ́ ní i fáan: «Oklunɔ! Bé kín tɔ nɔyí nyɔsi jo azɔ̌n do ló okɔ ji ná nyɔ có ɖó, ma lɔ onú ɖékpékpé nɛ wɛ? Lɔ ní i fáan ní wa gɔ̌alɔ na o!»