Jesu nɔ kplɔ́n oɖɛxixo núkplɔ́ntɔ́ étɔn e
(Matye 6.9-13; 7.7-11)
11
1 Gbeɖékpo, Jesu nɔ xóɖɛ ló xiɖe. Kín é do xoɖɛ étɔn kpó, ɖékpo lo núkplɔ́ntɔ́ étɔn e mɛ lɔ ní i fáan: «Oklunɔ, kplɔn mí kín ye xóɖɛ gbɔ̌n ɖikín Jaan Mawusinlɛnamɛtɔ́ kplɔn núkplɔ́ntɔ́ étɔn e ɖó.» 2 É lɔ ná ye fáan: «Ényí mi ló oɖɛxo kɔn, mi nɔ jan fáan:“Otɔ́ mítɔn,
Ná gbɛtɔ́ títɛkpóe ní nyɔ fáan wíwé wá tɛ nyíkɔ,
Axɔ́lúɖu tɛ ní wa!
3 Na mí égbězɛn-égbězɛn nuɖuɖu ɖée sín hudǒ mí ɖo.
4 Jo nyladǒ mítɔn e na mí,
Ná byɛ́tete lɔsú e jǒ ná omɛ ɖékpékpé ɖée wanyla dǒ mí e.
Gɔ ɖikée mí ní jɛ tɛ́nkpɔ́n mɛ le!”»
Omɛ ɖée byɔ, ná mɔ yi
(Matye 7.7-11; 15.22-28/ Lwiki 18.1-8)
5 Jesu gɔ lɔ ná núkplɔ́ntɔ́ e fáan: «Ényí omɛ ɖé ló mi mɛ mɔ ɖo hɔntɔn ɖé, jǎn mɔ nya é de ló zǎngbodǒ-awe mɛ mɔ lɔ ní i fáan: “Hɔntɔn tɔ! Nya akla atɔn na o, 6 ná omɛ ɖékpo lo tɔ hɔntɔn e mɛ ló gbějízɔnlinji mɔ jɛ tɔ de, gbɛ̌ un ma ɖo onú ɖe nádo yi jonɔ étɔn”. 7 Hɔntɔn lɔ́ mɔ nɔ xɔmɛ mɔ gblɔn ní i fáan: “Gɔ do tuklá o le! Mí ko su ohɔn, nyɔ kpó tɔ vikɛvú e kpó bo ko fin-awán. Un ma singǎn fɔn mɔ yi akla nɛ!” 8 Un nɔ lɔ́ ná mi fáan, ényí éyɔ ma tlɛ jlo ná fɔn mɔ́ yi akla lɔ́ e ní i ná é nyi hɔntɔn étɔn wútu wɛ́, é ná gbɛ fɔn na tukládǒmɛ makpote hɔntɔn lɔ́ tɔn wútu, mɔ́ ní i onú ɖée sín hudǒ é ɖo títɛkpóe.
9 Enɛ́wútu, un nɔ lɔ́ ná mi fáan: mi byɔ, ye ná na mi! Mi din, mi mɔ́ mɔ! Mi xuxú ohɔn, ye ná hǔn i na mi. 10 Ná omɛ ɖékpékpé ɖée byɔ, ná mɔ yi, omɛ ɖée din, ná mɔ, omɛ ɖée xuxú ohɔn, ye ná hǔn i ní i. 11 [Vǐtɔ́ ɖemú é ɖée ló mi mɛ, ovǐ étɔn mɔ́ byɔ ɛ akla, é mɔ́ ze osé do alɔ mɛ ní i?]a Kayí ovǐ lɔ́ mɔ́ byɔ hweyí, é mɔ ze odan ní i? 12 Kayí ényí é byɔ́ ɛ azin; é mɔ́ ze hɔnklékle do así ní i? 13 Ényí byɛ, ɖée nyi omɛ nylakan nyɔ́ onú jɔwǔn mɔ́ ná ovǐ mitɔn e, nɛmú nɛmú Otɔ́ Olɔ́n tɔn ma ná na Gbigbɔ Wíwé ye omɛ ɖée nɔ byɔ́ ɛ e ɖó wɛ́?»
Omɛ e lɔ fáan xúhlɔ̌n Bɛɛzebuli tɔn Jesu nɔ zǎn
(Matye 12.22-30/ Maaki 3.20-27)
14 Gbeɖékpo, Jesu nya gbigbɔ mawé wunbɔkpɛntɔn sɔ́n dǎwe ɖé mɛ. Kín gbigbɔ mawé lɔ́ do tɔnsɔ́n é mɛ kpó godo, dǎwe wunbɔkpɛnnɔ lɔ́ mɔ cɛ xólɔ, é mɔ kpacá agun ɖée ló xílɔ́. 15 Amɔ̌, omɛ ɖɛhwlɛn ló yemɛ mɔ nɔ lɔ́ fáan: «Bɛɛzebuli, ogǎn gbigbɔ mawé e tɔn sín xúhlɔ̌n mɛ yi é nɔ nyá gbigbɔ mawé e tɔ́n lé.»
16 Omɛ ɖevo e, nádo xwle Jesu kpɔn, gɔ byɔ ɛ fáan ní bayí oxlɛ̌ nújyawú tɔn ɖé nádo doxlɛ fáan Mawu de yi acɛ étɔn tɔnsɔ́n.
17 Amɔ̌, Jesu ɖée nyɔ́ linlɛn yetɔn e lɔ ná ye fáan: «Axɔ́lúɖuto ɖékpékpé ɖée klansɔtakún éɖe nyi vivasúdo, osín étɔn e gɔ̌ hɔ̌ ɖé jɛ ɖé ji. 18 Ényí Satan klánsɔtakún é ɖe, namú axɔ́lúɖu étɔn ná nɔte dɛn lo? Ɖó, byɛ nɔ lɔ́ fáan Bɛɛzebuli sín acɛ mɛ un nɔ nyá gbigbɔ mawé e tɔ́n lé. 19 Bé ényí fáan Bɛɛzebuli sín acɛ un zǎn dǒ nyá gbigbɔ mawé e tɔ́n jɛ̌gě, omɛ mitɔn e, amɛ́ sín acɛ mɛ yelɛ nyá gbigbɔ mawé e tɔ́n lé? Enɛ́wútu, yelɛ tete yi é ná nyi hwɛɖɔtɔ́ mitɔn. 20 Amɔ̌, ényí fáan gbɔn xúhlɔ̌n Mawu tɔn mɛ un nyá gbigbɔ mawé e jɛ̌gě lé, bé Axɔ́lúɖu Mawu tɔn wa káká byɛ de.
21 Ényí dǎwe xúhlɔ̌nnɔ ɖée ɖo ahwanfunnú ganji ló osín étɔn cɔ́ kɔn, onú ɖe ma jɛ̌ adɔkun étɔn e ji. 22 Amɔ̌, ényí omɛ ɖée ɖo xúhlɔ̌n hugán ɛ wá, mɔ ɖu lo é ji, omɛ énɛ́ ná bɛ ahwanfunnú ɖée go éyɔ gboadɔ dǒ títɛkpóe sɔn éyɔ sí, mɔ́ nya ma onú ɖée é bɛ títɛkpóe na omɛ e.
23 Omɛ ɖée ma ló kpɔ́ kpó nyɔ kpó, sɔtakún o, kínɖékpolɔ́, omɛ ɖée ma bɛkpli kpó nyɔ kpó nɔ vǔnvúnkpé.»
Kín gbigbɔ mawé lɛ́kɔwá gbɛtɔ́ mɛ gbɔ̌n
(Matye 12.43-45)
24 «Ényí gbigbɔ mawé ɖe tɔ́nsɔn omɛ ɖé mɛ, gbigbɔ mawé lɔ́ ló dǐndánkpe kɔn gbɔn oxí xúxú e dǒ ló gbɔjɛ̌tɛn dǐn kɔn. Ényí é ma mɔ xiɖe wɛ́, é lɔ́ ló éɖe mɛ fáan: “Un ná lɛkɔnya tɔ nɔtɛn ɖée un tɔnsɔ́n lá.” 25 Ényí é lɛ́kɔwa nɔtɛn lɔ́ mɛ, é mɔ́ fáan yě ko za é mɛ mɔ jla ɛ ɖo ganji. 26 Tíi, é nyá kplán gbigbɔ cyanwe ɖevo e wá, ɖée gɔ nyla hugán éyɔ. Ye zɔ̌nkpɔ́ wá mɔ́ byɔ́ omɛ lɔ́ mɛ, mɔ́ ɖótɛn dǒ xínɛ́, jǎn ninɔmɛ godotɔn omɛ lɔ́ tɔn mɔ́ gɔ̌ nylá hǔgán tíntán tɔn.»
Nújɔwunnánɔ wá omɛ ɖée xódǒ oxó Mawu tɔn
27 Sáa ɖée mɛ Jesu nɔ lɔxó énɛ́ lé, náwe ɖé zegbe dǒ aga ló agun lɔ́ cincín mɔ nɔ lɔ́ ní i fáan: «Nújɔwunnánɔ yi é wá adɔ ɖée hɛn ɛ kpó anɔ́ ɖée o nɔ kpó!»
28 Amɔ̌ Jesu gblɔn ní i fáan: «Ehěo! É wá onú ɖe omɛ ɖée ɖótó Oxó Mawu tɔn mɔ́ gɔ̌ zǐngbɔ̌n é ji yi é wá nújɔwunnánɔ.»
Jesu gblɔn oxó ná omɛ ɖée nɔ byɔ́ oxlɛ̌ nújyawú tɔn ɖé sɔ́n é si e
(Matye 12.38-42)
29 Kín agun e dǒ nɔ kplí lɛ́dǒ Jesu, é cɛ xólɔ fáan: «Omɛ nylakan wá omɛ hweéxenutɔn e! Ye nɔ byɔ́ oxlɛ̌ nújyawú tɔn ɖé, amɔ̌ ye ma ló oxlɛ̌ ɖe ná mɔ kɔn zɛ oxlɛ̌ Jonasi tɔn go. 30 Ná kín Jonasi nyi oxlɛ̌ ɖe ná Ninivi toxomɛnu e ɖó, kínɖékpolɔ́ Ovǐ gbɛtɔ́ tɔn ná nyi oxlɛ̌ na omɛ hweéxenutɔn e ɖó nɛ́. 31 Lo hwɛdǎzǎngbe, axɔ́si Oxuwaji tɔn ná fɔntite kpannukɔn omɛ hweéxenutɔn e mɔ́ dahwɛ na ye, ná é wa sɔ́n oto dindɛn mɛ nádo ɖotó núnyínyɔ́xó axɔ́lú Salomɔɔ tɔn. Yí gǎ we, omɛ ɖée hugán Axɔ́lú Salomɔɔ ló xítɔ. 32 Lo hwɛdǎzǎngbe, Ninivi toxomɛnu e ná fɔntite kpannukɔn omɛ hweéxenutɔn e mɔ́ dahwɛ na ye, ná Ninivi toxomɛnu e lɛnvɔjɔ kín ye do se Mawuxólilɔ Jonasi tɔn. Yí gǎ we, omɛ ɖée hugán Jonasi ló xítɔ.»
Nukún wá hǐnhɔ́n agbasa tɔn
(Matye 5.15; 6.22-23)
33 «Omɛ ɖé ma tá myɔ́gbǎn mɔ́ zě bɛ́ kayí mɔ́ cɔ́n onú dǒ kɔn, amɔ̌ ye zi i dǒ onú ji ná omɛ ɖée nɔ byɔ osínmɛ e ní do mɔ hǐnhɔ́n. 34 Nukún tɛ wá myɔ́gbǎn agbasa tɛ tɔn. Ényí nukún tɛ ló ganji, agbasa tɛ kpéte ná lo hǐnhɔ́n mɛ. Amɔ̌, ényí fáan tɛ nukún ma ló ganji wɛ́, agbasa tɛ tete lɔsú ná lo zinvlu mɛ. 35 Enɛ́wútu, kpayi, ná hǐnhɔ́n ɖée ló ayɔ mɛ ní gɔ nyi zinvlu le. 36 Ényí agbasa tɛ kpéte ló hǐnhɔ́n mɛ, gbɛ̌ akpá étɔn ɖé ma ló zinvlumɛ wɛ́, éyɔ ná lo hǐnhɔ́n mɛ ɖikín myɔ́gbǎn ná hǐnhɔ́n étɔn ɛ ló.»
Jesu gblehwɛdǒ sɛ́nkplɔ́nmɛtɔ́ e kpó Falizi e kpó
(Matye 23.1-36/ Maaki 12.38-40)
37 Kín Jesu do lɔxó énɛ́ e kpó godo, Falizi ɖé ylɔ́ ɛ fáan ní wa ɖúnú lo osín yelɔ́ tɔn mɛ. Jesu byɔ osín lɔ́ mɛ, mɔ sin-awán ló nuɖuɖukákɔn. 38 É kpacá Falizi lɔ́ kín é do mɔ fáan Jesu ma klɔ alɔb hwɛ̌kpó do cɛ núɖu ɖikín é ko nyi zǐnzán yetɔn ɖó. 39 Amɔ̌ Oklunɔ Jesu lɔ ní i fáan: «Byɛ Falizi e we tíi núgbǒ! Mi klɔ́ godo sinnuká kpó núɖugbǎn kpó tɔn, amɔ̌ oxo mitɔn mɛ e gɔ na ajo kpó dǎnúwiwa kpó. 40 Byɛ núlúnɔ e! Bé Mawu ɖée bayí godo onú e tɔn jǎn ma nɛ gɔ bayí xomɛ yetɔn wɛ? 41 Mi kukú gbɔ mɔ na onú ɖée ló sinnuká kpó núɖugbǎn mitɔn e mɛ kpó hlan wamamɔnɔ e. Gbɔn énɛ́ dali, onú títɛkpóe mɔ́ nyi wíwé na mi.»
42 «Númajɔwunnánɔ wá byɛ Falizi e! Ɖó mi ná hlǎn Mawu mádoawó ama owánflíflínɔ manti kpó hlu kpó tɔn, kpó mádoawó omá alɔkpa-alɔkpa e tɔn kpó, mi mɔ́ gǎ dǒvɔ̌ná dǒdowiwa kpó owán-yíyí ɖó hlan Mawu kpó. Onú énɛ́ e mi ga ɖo ná bayí ma gbɛkɔ onú ɖée kpo e go.»
43 «Númajɔwunnánɔ wá byɛ Falizi e! Ná mi yíwánná awánsíntɛn ɖée jɛ nukún ji e ló kpíkplítɛn e, mi mɔ́ gɔ̌ yíwánná ná ye ní ɖɔnúdo mi lo tokplítɛn e.»
44 «Númajɔwunnánɔ wá mi! Ná mi jɔ oyɔdo ɖée ma ɖo oxlɛ̌ ɖe, ye mɔ́ gbɔ̌n ye ji ló manywɛ mɛ.»
45 Sɛ́nkplɔ́nmɛtɔ́ ɖékpo yixó mɔ lɔ ná Jesu fáan: «Mɛkplɔ́ntɔ́! Ényí o ló oxó éxe wunkɔtɔn e lɔ kɔn, o nɔ zǔn byɛ́tete kpógba nɛ́ mɔ́!»
46 Jesu gblɔn ní i fáan: «Númajɔwunnánɔ wá byɛtete kpógba, byɛ sɛ́nkplɔ́nmɛtɔ́ e! Ná mi dǒagban mavǐhinhɛn e dǒ okɔji ná gbɛtɔ́ e, gbɛ̌ mi ma dɛ̌ ɖó alɔyí mitɔn ɖékpo tata ye go nádo gɔalɔ na ye.
47 Númajɔwunnánɔ wá mi! Ná mi bǎyí oyɔdo jɔwun-jɔwǔn e ná gbeyílɔtɔ́ Mawu tɔn e gancó otɔ́gbǒ mitɔn e yi é ga hu ye. 48 Lo énɛ́ wiwa mɛ, mi nɔ ɖékunnu fáan mi sɔgbexɛ́ onú ɖée otɔ́gbǒ mitɔn e bayí ná ye hu gbeyílɔtɔ́ Mawu tɔn e jǎn byɛ mɔ́ bǎyí oyɔdo yetɔn e. 49 Enɛ́wútu, Mawu, lo núnyínyɔ́ étɔn mɛ lɔ fáan: “Un ná do gbeyílɔtɔ́ e kpó mɛɖóhlan e kpó hlan ye, ye ná hu omɛ ɖɛhwlɛn lo ye mɛ, mɔ́ doyaná omɛ ɖɛhwlɛn”. 50 Énɛ́ tɔn wútu, Mawu ná byɔ axɔ́ omɛhweéxenutɔn e, ohun gbeyílɔtɔ́ Mawu tɔn títɛkpóe tɔn ɖée otɔ́gbǒ yetɔn e kɔndǒ-awán sɔ́n bíbɛ́mɛ ayíhɔ̌n tɔn gbɔ̌n, 51 bɛsɔn ohun Abɛli tɔn ji káká do wa jɛ̌ ohun gbeyílɔtɔ́ Zakali ɖée ye hu ló osín Mawu tɔn mɛ ló cincín avɔ̌sántɛn kpó oxí wíwé tɔn kpó ji. Ɛɛn, un nɔ lɔ́ ná mi, Mawu ná byɔ axɔ́ étɔn omɛhweéxenutɔn e.
52 Númajɔwunnánɔ wá byɛ sɛ́nkplɔ́nmɛtɔ́ e! Ná mi zě hɔnhungan ɖée hǔn núnyínyɔ́ sín ohɔn. Byɛtete e, mi ma byɔ́ é mɛ, jǎn mi mɔ́ gɔ̌ glɔ̌n alixo ná ye omɛ ɖée jlǒ ná byɔ é mɛ e.»