Jesu yi vɛɛnglekpɔtɔ́ hlɔnhutɔ́ e do doló
(Matye 21.33-46/ Lwiki 20.9-19)
12
1 Enɛ́godo, Jesu doló do lɔxó ná ye fáan: «Dǎwe ɖé do vɛɛntín dǒ ogle étɔn mɛ mɔ dokpá lɛdǐ i. É kun odo ɖée mɛ ye fínnyɔ́ sínsɛ́n vɛɛn tɔn lé, mɔ gba oxɔ ɖée nya aga ɖé ná ye ní do cɔ vɛɛngle lɔ́. Enɛ́godo, é wa zě vɛɛngle énɛ́ xaya ná vɛɛnglekpɔtɔ́ ɖɛhwlɛn mɔ tɔnhwɛn nya gbějízɔnlin ɖé ji. 2 Kín jigbɛnhwenu do do, dǎwe lɔ́ do mɛsɛntɔ́ étɔn ɖékpo hlǎn vɛɛnglekpɔtɔ́ e de ná ye ní do yi vɛɛnsínsɛ́n ɖée nyi étɔn hlǐn i. 3 Amɔ̌ vɛɛnglekpɔtɔ́ lɔ́ e ɖealɔ yi mɛsɛntɔ́ lɔ́ mɔ bɔnúɖo ní i mɔ nyá ɛ asígbǎ-alɔgbǎ. 4 Vɛɛnglenɔ lɔ́ gɔ do mɛsɛntɔ́ ɖevo hlan. Yě flɛnnú dǒ takún ní i mɔ gɔ zǔn i. 5 É do mɛsɛntɔ́ ɖevo hlan ítɔ́, ye gɔ hǔ i. É gɔ do mɛsɛntɔ́ susu ɖevo e hlan, yě xo omɛ ɖɛhwlɛn mɔ hu omɛ ɖɛhwlɛn. 6 Ovǐ xlunhwǎn étɔn ɖée é yiwánná tawun có gě yi é kpo ló xínɛ́. É dǔ i hlan ye gbɔn godo mɔ lɛn ló ayixa éɖe tɔn mɛ fáan: “Ye ná si ovǐ xlunhwǎn tɔ.” 7 Amɔ̌ vɛɛnglekpɔtɔ́ lɔ́ e lɔ ló yeɖé cincín fáan: “Ovǐ ogǔɖutɔ́ lɔ́ we! Mi wa ná mí ní hǔ i jǎn vɛɛngle lɔ́ mɔ nyi mítɔn.” 8 Yě kpatá jɛ ovǐ lɔ́ ji mɔ hǔ i mɔ dɔn ocɔ étɔn sɔ́n vɛɛngle lɔ́ mɛ mɔ zǐ i dlǎn.»9 Jesu kanse ye fáan: «Amú vɛɛnglenɔ lɔ́ ná bayí? É ná wa mɔ́ hu vɛɛnglekpɔtɔ́ lɔ́ e mɔ ze vɛɛngle étɔn do alɔmɛ na omɛ ɖevo e. 10 Bé mi ma ko xlɛ oxógbe éxe e ló Mawuxó mɛ fáan:
“Osé ɖée oxɔɖótɔ́ e gbɛjlǎ,
yi é wa lɛzun osé gǎngán oxɔgǒsúmɛtɔn.
11 Oklunɔ Mawu yi é bayí onú énɛ́!
É gɔ nyi nújyawú ɖe ló nukún mítɔn mɛ!”»
12 Ogǎn Juu tɔn e nɔ kán ayixa ɖée ye nádo wle Jesu ná ye nyɔ́ fáan yelɛ xólɔ kɔn é lé gbɔn oló lɔ́ mɛ. Amɔ̌ ye nɔ ɖíbú ná agun ɖaxó lɔ́. Enɛ́wútu, yě jǔ i do mɔ sɔn.
Jesu lɔ fáan é jɛ ná ye ní do su tokwá na Sezaa
(Matye 22.15-22/ Lwiki 20.20-26)
13 Yě gɔ do Falizi ɖɛhwlɛn kpó otoxólɔgbɛ̌ ogǎn Eloɖu tɔn sín omɛ ɖɛhwlɛn kpó hlan Jesu nádo ɖo omɔ ní i gbɔn oxólilɔ étɔn e mɛ.
14 Yě wa mɔ lɔ ní i fáan: «Mɛkplɔ́ntɔ́, mí nyɔ́ fáan núgbǒlɔtɔ́ ɖe yi é wá ɛ gbɛ̌ o ma gɔ̌ ɖíbú ná omɛ ɖé; ná o ma xó nukúntakún omɛ ɖé tɔn kpɔ́n amɔ̌ o kplɔ́nmɛ alixo Mawu tɔn ló núgbǒ mɛ. Lɔ ná mí: Bé osɛ́n mítɔn nagbe mí, nádo nɔ su tokwá hlan Sezaa? Mí ní su ya kayí mí ní gɔ su le?»
15 Amɔ̌ Jesu mɔnukúnnújɛ yɛmɛnúwiwa yetɔn mɛ mɔ lɔ ná ye fáan: «Amúwútu mi do nɔ ɖó omɔ ná o? Mi ze abɔgankwá ɖékpo wa ná kpɔn.» 16 Yě ze abɔgankwá ɖékpo wa, Jesu mɔ kanse ye fáan: «Amɛ́ tɔn wá oyɛɖiɖe kpó núkinkan ɖée ló é ji kpó?» Yě gblɔn ní i fáan: «Sezaa tɔn nɛ.» 17 Jǎn Jesu mɔ lɔ ná ye fáan: «Mi ze onú ɖée wá Sezaa tɔn na Sezaa, mɔ ze onú ɖée wá Mawu tɔn na Mawu. Avo gɔ vo ye tawun dǒ Jesu go.»
Saɖusi e kanxóse Jesu dǒ fɔ́nsɔ́nkú go
(Matye 22.23-33/ Lwiki 20.27-40)
18 Enɛ́godo, Saɖusi ɖɛhwlɛn wa Jesu de. Yelɛ wá omɛ ɖée lɔ́ fáan fɔ́nsɔ́nkú ma ɖee. Yě kanxóse Jesu fáan: 19 «Mɛkplɔ́ntɔ́, Mɔyizi kan dǒ osɛ́nwéma mɛ ná mí fáan: “Ényí nɔyí xlunhwǎn omɛ ɖé tɔn kú mɔ jo osi do gbɛ̌ é ma jivǐ, ná nɔyí xlunhwǎn étɔn ní sɔn osúkúsi lɔ́ mɔ dokún na omɛ ɖée kú lɔ́.” 20 Nɔyí xlunhwǎn cyanwe ɖɛhwlɛn gǎ ɖee. Omɛ tíntán mɔnyɔnu mɔ ku gbɛ̌ é ma jivǐ. 21 Awetɔ́ sɔn nyɔnu lɔ́ mɔ ku gbɛ̌ é ma jivǐ ɖe, kínɖékpolɔ́ é gɔ jɔ gbɔn kpódǒ nɔyí xlunhwǎn atɔntɔ́ kpó ɖó nɛ, káká jɛ ye omɛ ɖée kpo e ji. 22 Omɛ ɖékpékpé lo ye omɛ cyanwe énɛ́ e mɛ ma jo ovǐ ɖe do. Enɛ́godo, nyɔnu lɔ́ tete mɔ wa kú. 23 Lo fɔ́nsɔ́nkú hwenu, ényí omɛ ɖée ku e fɔ́nsɔnkú, amɛ́ tɔn nyɔnu énɛ́ ná wa nyí lo ye mɛ, ɖó ye omɛ cyanwe lɔ́ e yí é yí i do mɔnyɔnu?»
24 Jesu gblɔn ná ye fáan: «Alixo bú kɔn mi lé. Bé mi gǎ nyɔ́ onú ɖée wútu nɛ? Ná mi ma nyɔ́ Oxó Mawu tɔn wútu, gbɛ̌ mi ma gɔ̌ nyɔ́ xúhlɔ̌n Mawu tɔn. 25 Ná sáa ɖée mɛ omɛ kúkú e ná fɔnsɔnkú le, omɛ ɖé ma ná mɔnyɔnu ba, gbɛ̌ omɛ ɖé ma ná ɖɔsú ba, amɔ̌ omɛ kpó ná jɔ wɛnzagun e lo olɔ́nmɛ. 26 Do gbɔn omɛ kúkú ɖée ná fɔnsɔnkú e tɔn dali, bé mi ma mɔ xlɛ ló wéma Mɔyizi tɔn mɛ, oxó ɖée Mawu lɔ ní i ló akpá ná núkanvǔ ɖée nɔ jǐmyɔ́ gbɛ̌ ma fyɔ tɔn fáan: “Nyɔ wá Mawu Ablaxamu tɔn, Mawu Izaki tɔn kpó Mawu Jakɔbu tɔn kpó!” 27 Mawu ma nyí Mawu omɛ kúkú e tɔn kɔn, Mawu omɛ ɖée ló ogbɛ e tɔn nɛ. Alixo mi bu kpéte.»
Jesu lɔxó dǒ osɛ́n ɖée ló takún ji na osɛ́n títɛkpóe go
(Matye 22.34-40/ Lwiki 10.25-28)
28 Sɛ́nkplɔ́nmɛtɔ́ ɖe nɔ sé oxó ɖée lɔ kɔn ye lé. Kín é do mɔ fáan Jesu gblɔn ná Saɖusi e ganji, é dɔnsɛkpɔ́ ɛ mɔ kansí i fáan: «Osɛ́n ɖemú wá osɛ́n ɖée ló takún ji ná osɛ́n títɛkpóe?» 29 Jesu gblɔn ní i fáan: «Osɛ́n ɖée ló takún ji lɔ́ we: “Izlayɛli, ɖotó! Oklunɔ Mawu mítɔn có gě wá Oklunɔ. 30 O ɖo ná yiwánna Oklunɔ Mawu tɛ kpódǒ ayixa tɛ kpéte kpó, kpódǒ alíndɔ̌n tɛ kpéte kpó, kpódǒ linlɛn tɛ kpéte kpó, kpódǒ xúhlɔ̌n tɛ kpéte kpó.” 31 Osɛ́n awetɔ́ we: “O ná yiwánna kɔ́mɛnu tɛ ɖi ayɔ tete lɔsú.” Osɛ́n ɖe ma gɔ hugán énɛ́ e.» 32 Sɛ́nkplɔ́nmɛtɔ́ lɔ́ lɔ ná Jesu fáan: «Mɛkplɔ́ntɔ́, é jɔwun ganji, oxó núgbǒ yi o lɔ. Mawu ɖékpo gě yi é ɖee, gbɛ̌ Mawu ɖevo ɖé ma ɖee zɛ éyɔ go. 33 Ná gbɛtɔ́ ɖo ná yiwánna Mawu kpódǒ ayixa étɔn kpéte kpó, kpódǒ linlɛn étɔn kpéte kpó, kpódǒ xúhlɔ̌n étɔn kpéte kpó mɔ́ gɔ yiwánna kɔ́mɛnu étɔn ɖi éyɔ tete lɔsú wunkɔtɔn; énɛ́ e xɔkwá hugán núníná mimɛ e kpódǒ avɔ̌sínsán títɛkpóe kpó.» 34 Jesu mɔ fáan sɛ́nkplɔ́nmɛtɔ́ lɔ́ na gblɔndǒ kpódǒ núnyínyɔ́ kpó mɔ lɔ ní i fáan: «O ma dɛn dǒ axɔ́lúɖu Mawu tɔn.» Enɛ́godo, omɛ ɖé ma gɔ xaji kanxó ɖe se Jesu ba.
Bé Ovǐ axɔ́lú Davidi tɔn wá Klisti Hwlɛngǎntɔ́?
(Matye 22.41-46/ Lwiki 20.41-44)
35 Kín Jesu do nɔ kplɔ́nnú omɛ e ló osín Mawu tɔn mɛ, é kanse fáan: «Namú sɛ́nkplɔ́nmɛtɔ́ e singǎn lɔ gbɔn fáan ovǐ Davidi tɔn yi é wá Klisti Hwlɛngǎntɔ́? 36 Ná Davidi lɔsú lɔ gbɔn Gbigbɔ Wíwé dali fáan:
“Oklunɔ Mawu lɔ ná Oklunɔ tɔ fáan:
Wa sín-awán lo aɖusílɔ tɔ mɛ,
káká un ní do bɛ kɛntɔ́ tɛ e do bayí tɛ afɔɖótɛn.”
37 Davidi tete lɔsú nɔ ylɔ́ ɛ jǎn: “Oklunɔ”, namú é ná gbɔn do gɔ nyi ovǐ étɔn lo?» Agun ɖaxó lɔ́ nɔ ɖótó Jesu kpódǒ awúvivi kpó.
Jesu na avase núkplɔ́ntɔ́ étɔn e dǒ sɛ́nkplɔ́nmɛtɔ́ e go
(Matye 23.1-36/ Lwiki 20.45-47)
38 Jesu nɔ lɔ́ ló núkplɔ́nmɛ étɔn mɛ fáan: «Mi cɔ miɖé do sɛ́nkplɔ́nmɛtɔ́ e go, ná onú ɖée vǐvi ná ye wá fáan ye ní lo dǐndánkpe kɔn kpó tewugbǒ gaa kpó, mɔ́ yíwánná fáan gbɛtɔ́ e ní nɔ ɖɔnúdo ye lo tokplítɛn e. 39 Ye dǐn ná nɔ sin-awán lo otɛn ɖée jɛ nukún ji e mɛ lo kpíkplítɛn yetɔn e, mɔ́ dǐn ná nɔ sín-awán lo otɛn ɖée ɖo yɛyi e mɛ lo xwenúɖuɖu tɛn mɛ e. 40 Ye glǎ jɛ̌ onú ɖée nyi osúkúsi e tɔn ji mɔ́ gɔ̌ ló oɖɛ gaa xo kɔn nádo jla omɛ jɔwǔn. Ye ná mɔ hwɛgblědo ɖée syɛngbe ɖaxó yi.»
Osúkúsi wamamɔnɔ ɖé na onú Mawu
41 Jesu sin-awán ló osín Mawu tɔn mɛ kpannukɔn núnínákpótín mɔ nɔ kpɔ́n kín omɛ e nɔ zě okwá dǒ é mɛ ɖó. Adɔkunnɔ susu nɔ yí okwá susu dǒ núnínákpótín lɔ́ mɛ. 42 Osúkúsi wamamɔnɔ ɖé wa mɔ yi gankwá flínflín awe dǒ é mɛ. 43 Jesu ylɔ núkplɔ́ntɔ́ étɔn e mɔ lɔ ná ye fáan: «Núgbǒ un nɔ lɔ́ ná mi: osúkúsi wamamɔnɔ éxe yi é na okwá dǒ núnínákpótín lɔ́ mɛ hugán omɛ ɖée kpo títɛkpóe. 44 Ná ye omɛ kpó na sɔ́n lánkan yetɔn mɛ, amɔ̌ éyɔ, lo ohɛ̌n étɔn mɛ, okwá títɛkpóe ɖée é ɖo nádo ɖunú mɔ́ do nɔ ogbɛ yi é na dǒ núnínákpótín lɔ́ mɛ.»