Jesu lɔ fáan ye ná gba osín Mawu tɔn lɔ́ kɔn-awán
(Matye 24.1-2/ Lwiki 21.5-6)
13
1 Kín Jesu do nɔ tɔ́nsɔ́n osín Mawu tɔn mɛ, núkplɔ́ntɔ́ étɔn ɖékpo lɔ ní i fáan: «Mɛkplɔ́ntɔ́! Kpɔn osé jɔwun-jɔwǔn énɛ́ e, mɔ kpɔn oxɔ ɖaxó énɛ́ e!» 2 Jesu gblɔn ní i fáan: «O nɔ mɔ́ oxɔ ɖaxó énɛ́ e? Osé ɖée ye do gba, ɖé ma ló ná kpo kɔn, títɛkpóe ye ná gbahannyá.»Jesu lɔxó dǒ onú nylakan ɖée ná wa jɔ̌ e ji
(Matye 24.3-14/ Lwiki 21.7-19)
3 Jesu sin-awán ló osó ɖée ji olívitín e lé ji, kpannukɔn osín Mawu tɔn. Pyɛɛ, Jaki, Jaan kpó Andle kpó nya mɔ́ ɛ ló vo, mɔ kansí i fáan: 4 «Lɔ na mí: Gběwúngbe onú énɛ́ e ná jɔ le? Jǎn oxlɛ̌ nújyawú tɔn ɖemú é ná doxlɛ fáan onú énɛ́ títɛkpóe ló ná jɔ kɔn?»
5 Jesu cɛ lilɔ ná ye fáan: «Mi kpayi, omɛ ɖé ní gɔ hɛn mi bu le. 6 Omɛ susu ná wa lo tɔ nyíkɔ mɛ mɔ́ lɔ fáan: “Nyɔ yi é wá Klisti Hwlɛngǎntɔ́ lɔ́!” Jǎn ye mɔ́ hɛn omɛ susu bu alixo. 7 Sáa ɖée mɛ mi ná se fáan ahwan wazě kayí ye nɔ lɔ́ ahwan xó, ayixa mitɔn ní gɔ gbado le, ná onú nɛ mɔ ɖo ná jɔ, amɔ̌ é ma ko wá okpodǒ kɔn. 8 Otogun ɖé ná fɔn do otogun ɖé ji, axɔ́lúɖuto ɖé mɔ́ fɔn do ɖé ji. Ayígba hwinhwan ná ɖe lo oxí ɖɛhwlɛn, xovɛ̌ mɔ tɔn. Onú jijɔ énɛ́ e ná nyi zǐzéjlɛ do bíbɛ́ awúvɛ̌ ajidonu tɔn go.
9 Mi nɔ acéji. Ná ye ná ze mi jo lo hwɛɖɔtɛn Juu tɔn e, ye mɔ́ xo mi lo kpíkplítɛn yetɔn e. Otogǎn e kpó axɔ́lú e kpó sín nukɔn ye ná dɔn mi gbɔn na tɔ nyíkɔ tɔn wútu, mi ná nyi tɔ kunnuɖetɔ́ lo nukɔn yetɔn. 10 Amɔ̌, é jɛ fáan ye ní la owɛnjɔwǔn na akɔta títɛkpóe hwɛ̌ jɛnukɔn. 11 Sáa ɖée mɛ ye ná hɛn mi fɛwungɔ ohwɛ nukɔn le nádo ze mi jo, mi gɔ ɖibú na onú ɖée mi ná lɔ le, amɔ̌ oxó ɖée Mawu ná ze do ayixa mitɔn mɛ lo ojlɛ̌ énɛ́ mɛ, yí i mi ní lɔ. Ɖó, é ma wá byɛ yi é ló oxó ná lɔ kɔn, amɔ̌ Gbigbɔ Wíwé. 12 Nɔyí ná jo nɔyí étɔn, ye mɔ́ hǔ i, otɔ́ mɔ́ jo ovǐ étɔn jǎn ye mɔ́ hǔ i. Ovǐ e mɔ́ fɔngǔ do mɛjitɔ́ yetɔn e ji mɔ́ zɔn ye mɔ́ dakúhwɛ na ye. 13 Omɛ títɛkpóe ná gbɛwánná mi ná tɔ nyíkɔ tɔn wútu. Amɔ̌, omɛ ɖée ná nyi tenɔglinɔ káká nya fífó, ye ná hwlɛn omɛ énɛ́ gan.»
Jesu lɔxó dǒ nukúnbibya ɖaxó ɖée ná wa jɔ e ji
(Matye 24.15-28/ Lwiki 21.20-24)
14 «Sáa ɖée mɛ mi ná mɔ onúxyɔwú ɖée hɛ̌nnúgblě lɔ́ ló otɛn ɖée mɛ é ma ɖo ná le, ná owéxlɛtɔ́ lɔ́ ní mɔnukúnnújɛ é mɛ ganji! Sáa énɛ́ mɛ, omɛ ɖée ná lo agbegbe Juɖe tɔn mɛ e ní hɔn nya osó e mɛ. 15 Omɛ ɖée ná lo oxɔtakún ní gɔ jɛte nádo byɔ xɔmɛ do yi onu ɖe le. 16 Omɛ ɖée ná lo glemɛ ní gɔ gɔ nya sínmɛ nádo ze awugbǒ étɔn le! 17 Númajɔwunnánɔ wá nyɔnu ɖée ná lo oxo kpó nyɔnu ɖée ná lo anɔ́ná ovǐ kɔn lo azǎn énɛ́ e gbe! 18 Mi xoɖɛ ná onú énɛ́ ní gɔ jɔ lo avivɔhwenu le. 19 Ná, lo azǎn énɛ́ e mɛ, nukúnbibya ɖaxó ɖée ma ko jɔ kpɔn sɔ́n bíbɛ́mɛ ayíhɔ̌n éxe ɖée Mawu da tɔn káká jɛ tíi, ná ɖe e, gbɛ̌ onú énɛ́ wunkɔtɔn ma ná gɔ jɔ kpɔngbeɖe. 20 Ényí Oklunɔ Mawu ma hwe azǎn énɛ́ e kpo wɛ́, omɛ ɖékpékpé ma ná mɔ hwlɛngǎn. Amɔ̌, é ɖe azǎn énɛ́ e kpo ná omɛ ɖée é ko can dǒvo e wútu.
21 Ényí omɛ ɖé lɔ́ na mi fáan: “Kpɔn, Klisti Hwlɛngǎntɔ́ wé ló xítɔ”! kayí, “Kpɔn, é ló xínɛ́!”, mi gɔ yí i se le. 22 Ná Klisti lalonɔ e kpó gbeyílɔtɔ́ lalonɔ e kpó ná tɔnwa mɔ́ bayí oxlɛ̌ nújyawú tɔn e kpó onú kpácá mɛ e kpó. Ényí é vǐ bibayí, ye ná hɛn omɛ ɖée Mawu can dǒvo e bu alixo.
23 Byɛ, mi nɔ acéji ná un ko lɔ onú títɛkpóe ná mi jɛnukɔn.»
Ovǐ gbɛtɔ́ tɔn ná lɛkɔwa
(Matye 24.29-31/ Lwiki 21.25-28)
24 «Amɔ̌ lo azǎn énɛ́ lɔ́ e gbe, lo nukúnbibya énɛ́ lɔ́ sín godo, ohwe ná dozinvlu, osun ma ná gɔ na hǐnhɔ́n étɔn ba, 25 osunvǐ e ná flɛ sɔn agaxomɛ jǎn xúhlɔ̌n ɖée ló olɔ́nmɛ e mɔ́ sisɔ́. 26 Lo sáa énɛ́ mɛ, ye ná mɔ Ovǐ gbɛtɔ́ tɔn, sɔn aslɔ e mɛ wazě lo gɔflǎ xúhlɔ̌n kpó gigo étɔn kpó mɛ. 27 É ná do wɛnzagun e hlan nádo kpli omɛ ɖée é can e sɔn ayíhɔ̌n gǒsú ɛnɛ e mɛ, sɔn oxí ɖée ayígba fodǒ kákájɛ oxí ɖée agaxomɛ fodǒ kpó.»
Jesu yi votín do kplɔnnúmɛ
(Matye 24.32-35/ Lwiki 21.29-33)
28 «Mi yi kplɔ́n sɔn oló votín tɔn mɛ: sáa ɖée mɛ ala étɔn e jɛ̌ yɔ́yɔ́ lé, ama étɔn e mɔ cɛ kíkɔ́, mi nyɔ́ fáan alúnlun sɛkpɔ. 29 Kínɖékpolɔ́, byɛ tete lɔsú, sáa ɖée mɛ mi ná mɔ onú énɛ́ e sín jijɔ le, mi nyɔ fáan Ovǐ gbɛtɔ́ tɔn ko sɛkpɔ mɔ́ ló ohɔnji ná mi. 30 Oxó núgbǒ un nɔ lɔ́ ná mi: Omɛ hweéxenutɔn e ma ná juwanyá hwɛ̌kpó onú énɛ́ títɛkpóe ní do jɔ. 31 Olɔ́n kpó ayígba kpó ná juwanyá amɔ̌ oxó tɔ e ma ná juwanyá gbeɖe.»
Omɛ ɖé ma nyɔ́ azǎn ɖée gbe Ovǐ Gbɛtɔ́ tɔn ná lɛkɔwa le
(Matye 24.36-44)
32 «Omɛ ɖékpékpé ma nyɔ́ azǎn lɔ́ kayí ogan lɔ́, wɛnzagun ɖée ló olɔ́nmɛ lɔsú e ma nyɔ́, Ovǐ lɔsú ma nyɔ́ afido Otɔ́ có gě yi é nyɔ́. 33 Mi nɔ ayixa ji, mɔ nɔ nukle ná mi ma nyɔ́ sáa ɖée mɛ ojlɛ̌ lɔ́ ná wa le. 34 É jɔ dǎwe ɖée tɔnhwɛn mɔ jo osín étɔn dǒ alɔmɛ na mɛsɛntɔ́ étɔn e mɔ ma azɔ̌n mɛtɔn-mɛtɔn ná ye mɔ ɖegbe ná ohɔnjinɔtɔ́ fáan ní nɔ nukle. 35 Mi mɔ nɔ nukle, ná mi ma nyɔ́ ojlɛ̌ ɖée mɛ osíntɔ́ lɔ́ ná wa le, ényí hwedǒ nɛ kayí zǎngbodǒ-awe mɛ, kayí ojlɛ̌ ɖée mɛ koklo dǒsé lé, kayí lo klɛmɛ. 36 Osíntɔ́ ní gbǎ wa lo ajiji mɛ mɔ́ mɔ mi lo amlɔmɛ. 37 Onú ɖée lɔ kɔn un lé ná mi, omɛ títɛkpóe un nɔ lɔ́ ná fáan mi ní nɔ nukle.»