Ogǎn e blanúlɔ dǒ Jesu go
(Matye 26.1-5/ Lwiki 22.1-2/ Jaan 11.45-53)
14
1 Oxwe Juwafɛ́ tɔn kpó aklamaɖotɔ́n tɔn kpó kpo azǎn awe. Avɔ̌sántɔ́gǎn e kpó sɛ́nkplɔ́nmɛtɔ́ e kpó nɔ kán ayixa ɖée ye ná do doyɛ Jesu do wlí i, mɔ́ hǔ i. 2 Ná ye nɔ lɔ́ ló yeɖé cincín fáan: «Mí ma ná wlí i lo oxwe lɔ́ zǎngbe kɔn ná agun lɔ́ ní gbǎ wa fɔ́ngǔ.»Náwe ɖé kɔn lɔ́fínɖa dǒ takún ná Jesu
(Matye 26.6-13/ Jaan 12.1-8)
3 Jesu ló Betani toxomɛ, ló osín Simɔɔ kpozɔnjɛtɔ́ tɔn mɛ. Sáa ɖée mɛ é ló nuɖuɖukákɔn lé, náwe ɖé hɛn lɔ́fínɖa owánjɔwǔnnɔ ɖée vɛkwá dǒ ogo jɔwun-jɔwǔn ɖe mɛ, ogo ɖée ye yi osé hwankpɛnɔ ɖée ye ylɔ́ jǎn alubatlu do bayí. Náwe énɛ́ xlokɔ ná ogo lɔ́ mɔ kɔn lɔ́fínɖa lɔ́ dǒ takún ná Jesu. Ama ɖée ye ylɔ́ jǎn naaɖi yi ye do bayí lɔ́fínɖa lɔ́. 4 Onú énɛ́ gblexomɛ ná omɛ ɖɛhwlɛn ló ye mɛ jǎn ye mɔ nɔ lɔ́ ló yeɖé cincín fáan: «Amúwútu ye nɔ yí lɔ́fínɖa éxe do nɔ lélé? 5 Ye ná ko sá ɛ hugán abɔgankwá fɔɖékanwekoó mɔ́ ma okwá lɔ́ na wamamɔnɔ e!» Ye mɔ jɛhǎ glǐ dǒ náwe lɔ́ ji. 6 Amɔ̌ Jesu lɔ ná ye fáan: «Mi jǔ i do. Amúwútu mi do nɔ dǒtuklá ɛ? Onú jɔwǔn wá onú ɖée é bayí ná o. 7 Ná wamamɔnɔ e ló mi mɛ tɛgbɛ, jǎn ényí é jlo mi lo sáa ɖékpékpé mɛ, mi hɛ̌n mi mɔ́ wa onú jɔwǔn na ye. Amɔ̌ nyɔ, un ma ló mi de ná nɔ kɔn kákádonya. 8 Náwe lɔ́ ko bayí onú ɖée go é kpe. É sa lɔ́fínɖa ná tɔ agbasa, mɔ wleawú ní i hwɛ̌kpó ye ní do zǐ i do oyɔdomɛ. 9 Oxó núgbǒ yi un nɔ lɔ́ ná mi: xíɖekpékpé ɖée ye ná la owɛnjɔwǔn gbɔn lo ayíhɔ̌ngbɛ lɔ́ kpéte mɛ, ye ná lɔxó onú ɖée náwe éxe bayí lo oxí énɛ́ e kpógba, nádo flín i.»
Juɖasi Isikalyɔti nɔ dǐn kín é ná jo Jesu na avɔ̌sántɔ́gǎn gbɔn
(Matye 26.14-16/ Lwiki 22.3-6)
10 Juɖasi Isikalyɔti, ɖékpo lo mɛɖóhlan wyawe e mɛ nya mɔ avɔ̌sántɔ́gǎn e nádo jo Jesu na ye. 11 Kín avɔ̌sántɔ́gǎn e do se ítɔ́, xomɛ hun ye, ye mɔ dokpa okwá tɔn ní i. Juɖasi cɛ ojlɛ̌ ɖée bɔ-awú dǐn nádo ze Jesu jo.
Jesu ɖu Juwafɛ́xwe xɛ́ mɛɖóhlan étɔn e
(Matye 26.17-25/ Lwiki 22.7-14, 21-23/ Jaan 13.21-30)
12 Lo azǎn tíntán oxwe aklamaɖotɔ́n tɔn gbe, azǎn ɖée gbe ye hǔ lɛ́ngbɔ̌vǔ e dǒ sán-avɔ̌ nádo ɖu Juwafɛ́xwe, núkplɔ́ntɔ́ Jesu tɔn e kansí i fáan: «Xɛ́ o jlo fáan mí ní wleawú oxwe Juwafɛ́ tɔn le?»
13 Sáa énɛ́ mɛ Jesu do núkplɔ́ntɔ́ étɔn awe hlan mɔ lɔ ná ye fáan: «Mi nya otoxo mɛ, mi ná kpe dǎwe ɖée hɛn osin dǒ otɔzɛ̌n mɛ. Mi xodǐ i. 14 É ná byɔ osín ɖe mɛ, mi lɔ na osíntɔ́ lɔ́ fáan: “Mɛkplɔ́ntɔ́ nɔ kánsé fáan: Xɛ́ oxɔ ɖée mɛ un ná ɖu Juwafɛ́xwe kpódǒ núkplɔ́ntɔ́ tɔ e kpó lé?” 15 É ná gɔ do oxɔ ɖaxó ɖe xlɛ mi lo aga, ɖée ye ko jlaɖo é mɔ sɔgbe. Xínɛ́ yi mi ná wleawú oxwe lɔ́ tɔn do.» 16 Núkplɔ́ntɔ́ e tɔn nya toxomɛ. Yě mɔ kín Jesu lɔ ná ye ɖó jǎn ye mɔ wleawú Juwafɛ́xwe lɔ́ tɔn.
17 Kín é do jɛ hwedǒ, Jesu wa kpó mɛɖóhlan wyawe e kpó. 18 Sáa ɖée mɛ ye nɔ ɖúnú ló nuɖuɖukákɔn lé, Jesu lɔ fáan: «Núgbǒ un lɔ ná mi: omɛ ɖékpo lo mi omɛ ɖée nɔ ɖúnú xɛ́ o e mɛ, ná ze o jo.» 19 Awú gɔ ku mɛɖóhlan e tlala, jǎn ye mɔ cɛ oxó kanse Jesu, omɛ ɖé bɔdo omɛ ɖé go fáan: «E ma wá nyɔ nɛ́, kayí?» 20 Jesu gblɔn ná ye fáan: «Ɖékpo lo mi omɛ wyawe e mɛ, ɖée nɔ dǒalɔ agbǎn ɖékpolɔ́ mɛ kpódǒ nyɔ kpó nɛ. 21 Ná Ovǐ gbɛtɔ́ tɔn ná ku ɖikín Owé wíwé lɔ ɖó. Amɔ̌ númajɔwunnánɔ wá dǎwe énɛ́, ɖée sín alɔmɛ ye ná zǐ i jo gbɔn. É ná kpɔnte na omɛ énɛ́ ényí é ma jɔ wa ogbɛ mɛ!»
Jesu ɖo tenúɖuɖu awán
(Matye 26.26-30/ Lwiki 22.14-20/ 1Kɔlɛntinu ě 11.23-25)
22 Lo nuɖuɖu hwenu, Jesu yi akla, é dokpɛ́ ná Mawu, mɔ fɛ́n ɛ, mɔ yí i ná núkplɔ́ntɔ́ étɔn e; mɔ lɔ fáan: «Mi yi, éxe wá agbasa tɔ.» 23 Enɛ́godo, é ze kɔ́fu ɖée mɛ vɛɛn lé ɖékpo mɔ dokpɛ́ ná Mawu, mɔ yi ná ye, ye omɛ kpó mɔ nú i. 24 É lɔ ná ye fáan: «Éxe, ohun tɔ nɛ; ohun alɛnu Mawu tɔn ɖée ye kɔndǒ-awán ná omɛ susu tɔn wútu. 25 Ná ma lɔ núgbǒ na mi: Un ma ná gɔ nu sɔn sínsɛ́n vɛɛntín tɔn mɛ gbeɖe ba kákájɛ azǎn ɖée gbe un ná nu vɛɛn yɔ́yɔ́ lo Axɔ́lúɖu Mawu tɔn mɛ le.»
26 Yě ji ohan oxwe lɔ́ tɔn e mɔ ɖedǒ osó ɖée ji olívitín e lé ji.
Jesu lɔ fáan Pyɛɛ ná gbɛ yelɔ́
(Matye 26.31-35/ Lwiki 22.31-34/ Jaan 13.36-38)
27 Jesu lɔ ná núkplɔ́ntɔ́ étɔn e fáan: «Mi omɛ kpó, mi ná wa hɔ̌n mɔ́ jo o do, ná ye ko kan dǒ Owé Wíwé mɛ fáan:
“Un ná flɛnnú do lɛ́ngbɔ̌xɔ́tɔ́,
jǎn lɛ́ngbɔ̌ e mɔ gbado gbɔn awa títɛkpóe mɛ”.»
28 Jesu gɔ lɔ fáan: «Amɔ̌, lo fɔ́nsɔ́nkú tɔ godo, un ná jɛnukɔn na mi nya Galile.» 29 Pyɛɛ lɔ ní i fáan: «Ényí omɛ ɖée kpo títɛkpóe dɛɛ hɔn mɔ jo é do, nyɔ, un ma ná jo é do kɔn!» 30 Jesu gblɔn ní i fáan: «Núgbǒ un nɔ lɔ́ ná ɛ: Ayɔ, lo égběxe, lo ozǎn éxe ɖékpolɔ́ mɛ, hwɛ̌kpó koklo nádo dosé jɔ awe, o ná ko gbɛ o jɔ atɔn.»
31 Amɔ̌ Pyɛɛ gɔ gɔ lɔ vǐvɛ́vǐvɛ́ fáan: «Ékpɛn é dɛɛ ɖu fáan un ní ku kpódǒ ayɔ kpó, un ma ló ayɔ ná gbɛ kɔn!» Núkplɔ́ntɔ́ ɖée kpo e gɔ jan onú ɖékpolɔ́.
Jesu xoɖɛ ló Jɛtisemani
(Matye 26.36-46/ Lwiki 22.39-46)
32 Jesu kpó núkplɔ́ntɔ́ étɔn e kpó nya nɔtɛn ɖée ye ylɔ́ jǎn Jɛtisemani mɛ. Jesu lɔ ná núkplɔ́ntɔ́ étɔn e fáan: «Mi sin-awán lo xítɔ, ná nya xoɖɛ mɔ wa.» 33 É kplan Pyɛɛ, Jaki kpódǒ Jaan kpó. Obú ɖaxó ɖe jɛ Jesu ji jǎn ayixa étɔn mɔ gbado. 34 É lɔ ná ye fáan: «Alíndɔ̌n tɔ ló awúblá mɛ káká jɛ okúdonu. Mi nɔ xítɔ, mɔ nɔ nukle.» 35 É sɛ nya nukɔn vǔɖe mɔ hɔ dǒ ayígba mɔ byɔ Mawu fáan, ényí é singǎn vi bibayí, ní mɔ hɛn ojlɛ̌ awúfyɛsa tɔn éxe dɛn do lá na yelɔ́. 36 É nɔ lɔ́ fáan: «Otɔ́ e! Ayɔ kpe onú kpókpó go. Hɛn kɔ́fu awúfyɛsa tɔn éxe dɛn do lá na o. Amɔ̌, é ma nyí onú ɖée nyɔ jlo gba, amɔ̌ ojlǒ tɛ.»
37 Enɛ́godo, Jesu gɔwa núkplɔ́ntɔ́ atɔn e de mɔ mɔ ye nɔ dɔ̌-amlɔ. É lɔ ná Pyɛɛ fáan: «Simɔɔ, amlɔ dɔ̌ kɔn o lé? O ma ɖo xúhlɔ̌n nádo nɔ nukle na ganxixo ɖékpo tata wɛ? 38 Mi nɔ nukle mɔ xoɖɛ ná mi ní gbǎ wa jɛ̌ tɛ́nkpɔ́n mɛ. Gbigbɔ jlo, amɔ̌ agbasa nyi maɖogǎnnɔ.» 39 É gɔ sɛ nya lá mɔ gɔ oɖɛ ɖékpolɔ́ xo. 40 Enɛ́godo, é lɛkɔwa núkplɔ́ntɔ́ étɔn e de mɔ mɔ ye nɔ dɔ̌-amlɔ, ná nukún ye omɛ kpó tɔn ko kpɛn gbɛ̌ ye ma gɔ̌ nyɔ́ onú ɖée ye ná lɔ ní i ba. 41 Kín é do lɛkɔwa jɔ atɔntɔ́, é lɔ ná ye fáan: «Mi gbɛkpo nɔ dɔ̌-amlɔ mɔ nɔ gbɔjɛ nɛ? É kpe! Ogan lɔ́ xo! Tíi, ye ná jo Ovǐ Gbɛtɔ́ tɔn do alɔ nyladǒnɔ e tɔn mɛ! 42 Mi fɔntite, mí ní nya! Omɛ ɖée nɔ zě o jo lɔ́ ko sɛkpɔ!»
Yě wle Jesu
(Matye 26.47-56/ Lwiki 22.47-53/ Jaan 18.3-12)
43 Afɔɖékpolɔ́ji, Jesu gbɛkpo nɔ lɔ́xó jǎn Juɖasi, ɖée nyi ɖékpo ló mɛɖóhlan wyawe e mɛ mɔ wa kpó agun ɖaxó ɖe kpó, ɖée hɛn ojǐ nugbɛn awenɔ kpó okpo kpó. Avɔ̌sántɔ́gǎn e, sɛ́nkplɔ́nmɛtɔ́ e kpó tomɛxó e kpó yi é do ye hlan. 44 Juɖasi ɖée sa Jesu lɔ́ ko na oxlɛ̌ ɖe omɛ énɛ́ e fáan: «Omɛ ɖée un ná kisi ná lɔ́, omɛ lɔ́ nɛ! Mi wlí i mɔ kplín i sɔn, mɔ hɛ̌n ɛ syɛ́nsyɛ́n.» 45 Kín Juɖasi do jɛ xínɛ́, é sɛkpɔ Jesu mɔ lɔ ní i fáan: Mɛkplɔ́ntɔ́!» Enɛ́godo, é kisi ní i. 46 Omɛ ɖée kpo e ɖoalɔ Jesu ji mɔ wlí i. 47 Amɔ̌, omɛ ɖékpo lo omɛ ɖée ló xínɛ́ e mɛ, ze ojǐ nugbɛn awenɔ étɔn, mɔ flɛn dǒ mɛsɛntɔ́ avɔ̌sántɔ́ ɖaxó tɔn, mɔ san otó étɔn flɛ. 48 Jesu lɔ ná ye fáan: «Bé ajogǎn ɖe wá o, mi do doahwan wa mɔ hɛn ojǐ nugbɛn awenɔ kpó okpo kpó nádo wle o? 49 Égbězɛn-égbězɛn yi un ló cincín mitɔn ló osín Mawu tɔn mɛ mɔ́ dǒ ló núkplɔ́nmɛ kɔn, mi ma ga wle o nɛ. Amɔ̌, onú éxe e nɔ jɔ̌, ná onú ɖée ye kan dǒ Owé Wíwé mɛ ní do wa cicɛmɛ.» 50 Núkplɔ́ntɔ́ étɔn títɛkpóe jǔ i do mɔ hɔn. 51 Ɖɛkpɛvǔ ɖe nɔ xodǒ Jesu, mɔ do avɔn ɖékpo gě. Yě xokan nádo wle éyɔ tete, 52 amɔ̌ é ɖe avɔn étɔn dlǎn mɔ dowezun omɛ́jɔgbe.
Yě kplan Jesu nya ogbɛ̌ hwɛjikpɔ́ntɔ́ ɖaxó Juu e tɔn nukɔn
(Matye 26.57-68/ Lwiki 22.54-55, 63-71/ Jaan 18.13-14, 19-24)
53 Yě kplan Jesu nya avɔ̌sántɔ́ ɖaxó sín sínmɛ, xíɖée avɔ̌sántɔ́gǎn e, tomɛxó e kpó sɛ́nkplɔ́nmɛtɔ́ títɛkpóe kpó kpli dǒ. 54 Pyɛɛ ló lá nɔ xódǒ Jesu káká nya agǎxo avɔ̌sántɔ́ ɖaxó lɔ́ tɔn ji. Xínɛ́, é sin-awán ló mɛsɛntɔ́ e de mɔ nɔ xú myɔ́.
55 Avɔ̌sántɔ́gǎn e kpó ogbɛ̌ hwɛjikpɔ́ntɔ́ ɖaxó Juu tɔn títɛkpóe kpó nɔ dǐn ná sa oxó ɖe do okɔ na Jesu nádo dakúhwɛ ní i, amɔ̌ ye ma mɔ oxó ɖekpékpé. 56 Gbɛtɔ́ susu nɔ ɖékunnu agɔ dǒ Jesu go, gbɛ̌ kunnu lɔ́ e ɖékpékpé ma xɔ-alixo. 57 Sáa énɛ́ mɛ, omɛ ɖɛhwlɛn fɔntite mɔ ɖekunnu agɔ éxe do é go fáan: 58 «Mí se kín é do lɔ fáan: “Un ná hɔ osín Mawu tɔn ɖée alɔ gbɛtɔ́ e tɔn gba éxe, jǎn lo azǎn atɔn mɛ, un ná gba osín Mawu tɔn ɖevo ɖée alɔ gbɛtɔ́ tɔn ma gbǎ.”» 59 Amɔ̌, lo kunnuɖiɖe énɛ́ e lɔsú mɛ, ogbe ma ló kpɔ́ ná ye.
60 Avɔ̌sántɔ́ ɖaxó lɔ́ fɔntite ló agun lɔ́ sín cincín, mɔ kanse Jesu fáan: «O ma ɖo onu ɖe ná gblɔn do oxó ɖée kunnuɖetɔ́ énɛ́ e nɔ lɔ́ dǒ tɛ go wɛ?» 61 Amɔ̌ Jesu nɔ-abwɛ́, é ma gblɔnxó ɖe. Avɔ̌sántɔ́ ɖaxó gɔ gɔ kansí i fáan: «Bé ayɔ wá Klisti Hwlɛngǎntɔ́, Ovǐ Mawu dǒnánɔ tɔn?» 62 Jesu gblɔn fáan: «Ɛɛn! Yi un nyi!
Jǎn mi ná mɔ Ovǐ Gbɛtɔ́ tɔn
sin-awán lo aɖusílɔ Mawu xúhlɔ̌nnɔ tɔn mɛ,
mi ná gɔ mɔ́ ɛ wazě lo aslɔ olɔ́n tɔn e mɛ.
63 Avɔ̌sántɔ́ ɖaxó lɔ́ tlɛn awu éɖe tɔn mɔ lɔ fáan: «Mí ma gɔ ɖo hudǒ kunnuɖetɔ́ e tɔn ba! 64 Mi se kín é nylanújan dǒ Mawu go ɖó? Namú mi lɛn jan?» Ye omɛ kpó mɔ dakúhwɛ ná Jesu. 65 Omɛ ɖɛhwlɛn cɛ otán tún dǒ Jesu go, mɔ gɔ bla nukunmɛ ní i. Yě bɔ akotokún ɖo ní i mɔ kansí i fáan: «Amɛ́ é flɛnnú dǒ e? Kpa omɛ lɔ́ na mí!» Mɛsɛntɔ́ e mɔ dɔn Jesu mɔ cɛ tómɛ xo ní i.
Pyɛɛ gbɛ Jesu jlǎ
(Matye 26.69-75/ Lwiki 22.54-62/ Jaan 18.15-18, 25-27)
66 Pyɛɛ gbɛkpo ló odo ló agǎxo, jǎn avɔ̌sántɔ́ ɖaxó sín mɛsɛntɔ́ nyɔsi ɖékpo mɔ wa. 67 É mɔ fáan, Pyɛɛ nɔ xú myɔ́, é kpɔ́n ɛ tlíntlín mɔ lɔ ní i fáan: «Ayɔ tete lɔsú, o xódǒ Jesu Nazalɛtinu lɔ́!» 68 Pyɛɛ ga gbɛ mɔ lɔ fáan: «Un ma nyɔ́ ɛ gbɛ̌ un ma mɔnukúnnújɛ onú ɖée lɔ kɔn o lé mɛ.» Kín é do jan ítɔ́, é ɖedǒ hɔngbǒji. a[Koklo mɔ dosé.] 69 Amɔ̌ mɛsɛntɔ́ nyɔsi lɔ́ mɔ́ ɛ mɔ gɔ cɛ lilɔ ná omɛ ɖée ló xínɛ́ e fáan: «Dǎwe éxe nyi ɖékpo ló ye mɛ!» 70 Amɔ̌ Pyɛɛ gɔ gbɛ jɔ awetɔ́. É nɔ zaan, omɛ ɖée ló xínɛ́ e gɔ lɔ ná Pyɛɛ fáan: «Omɛ étɔn yi é wá ɛ dandan ɖó Galilenu yí é wá ayɔ tete lɔsú.» 71 Amɔ̌, Pyɛɛ do-axó fáan: «Ényí fáan lalo ɖó kɔn un lé, ná Mawu ní ɖo obá na o! Un xwle fáan un ma nyɔ́ dǎwe ɖée xólɔ kɔn mi lé!» 72 Lo afɔɖékpolɔ́ji, koklo dosé jɔ awetɔ́, Pyɛɛ mɔ flin oxó ɖée Jesu ko lɔ ní i fáan: «Hwɛ̌kpó koklo ná do dosé jɔ awe, ayɔ ná ko gbɛ o jlǎ jɔ atɔn.» É lɛnnúkpɔn dǒ oxó énɛ́ ji mɔ sunwleavǐ.