Jesu gbɔ-awutu ná dǎwe alɔkúnánɔ ɖé ló gbɔjɛ̌zǎngbe
(Matye 12.9-14/ Lwiki 6.6-11)
3
1 Jesu lɛkɔnya kpíkplítɛn yetɔn mɛ jǎn dǎwe ɖée alɔ ɖékpo ku ná ɖe mɔ́ ló xínɛ́tɔ́. 2 Ye omɛ ɖée ló xínɛ́ e nɔ kpɔ́n fáan bé Jesu ná gbɔ-awutu na dǎwe lɔ́ lo gbɔjɛ̌zǎngbe nɛ ya, ɖó ye nɔ dǐn onú ɖée ye ná do dohwɛ ɛ wútu. 3 Jesu lɔ ná alɔkúnánɔ lɔ́ fáan: «Fɔntite mɔ wa jɛ̌ cincín xítɔ!» 4 É mɔ wa kánse ye omɛ ɖée kpo e fáan: «Lo gbɔjɛ̌zǎngbe, amú osɛ́n mítɔn nagbe fáan ye ní bayí? Ye ní wa onú jɔwǔn kayí ye ní wa onú gbǐgblé? Ye ní hwlɛn gbɛtɔ́ gan kayí ye ní hǔ i?» Amɔ̌ ye ma kɛbɛ́. 5 Jesu kpɔn ye omɛ títɛkpóe ji lɛdo kpó xomɛgblě kpó, awú kú i na ayixa sínsyɛ́n yetɔn wútu, é mɔ lɔ ná dǎwe lɔ́ fáan: «Dlɛn tɛ alɔ!» É gɔ dlɛn alɔ lɔ́, alɔ lɔ́ mɔ jɛ gǎngán.6 Falizi e tɔn jɛgě sɔ́n kpíkplítɛn yetɔn lɔ́ mɛ jǎn lo afɔɖékpolɔ́ji, ye mɔ nya kpli kpó otoxólɔgbɛ̌ ogǎn Eloɖu tɔn kpó nádo kan ayixa ɖée ye ná do hu Jesu.
Gbɛtɔ́ e doahwan wa Jesu de
(Matye 4.25; 12.15-16/ Lwiki 6.17-19)
7 Jesu tɔnsɔ́n yemɛ kpódǒ núkplɔ́ntɔ́ étɔn e kpó mɔ nya otɔ Galile tɔn tó. Omɛ susu mɔ xodǐ i, omɛ énɛ́ e tɔnsɔ́n agbegbe Galile kpó agbegbe Juɖe tɔn kpó mɛ, 8 kpó otoxo Jeluzalɛmu tɔn kpó, agbegbe Idume tɔn, Jɔɔɖani tɔgodo kpó sɔ́n xíɖée lɛdǒ Tili kpó Sidɔn kpó mɛ, yě se linlin onú títɛkpóe ɖée wa kɔn é ɖé e tɔn, mɔ wa é de. 9 Jesu lɔ ná núkplɔ́ntɔ́ étɔn e fáan ye ní wleawú tɔjihǔn ɖékpo tɔn jlǎ na yelɔ́ ná agun lɔ́ ní gbǎ wa cɔ́n ɛ wútu. 10 Ná awutu ɖée é nɔ gbɔ̌ ná omɛ e zɔn, ye omɛ títɛkpóe ɖée nɔ jɛ̌ awutu mɔ nɔ dlǐdǒ é ji nádo ɖoalɔ é go. 11 Kín gbigbɔ mawé e do mɔ́ ɛ, yě litakún-awán ní i kpódǒ axó kpó fáan: «Ovǐ Mawu tɔn yi é wá ɛ!» 12 Amɔ̌ Jesu dosɛ́n ná ye vǐvɛ́vǐvɛ́ fáan ye ní gɔ lɔ omɛ ɖée yelɔ́ nyi na omɛ ɖé ní se le.
Jesu ɖe mɛɖóhlan wyawe e
(Matye 10.1-4/ Lwiki 6.12-16)
13 Énɛ́godo, Jesu wa xɛ́ osó ji mɔ ylɔ omɛ ɖée jlǔ i e, ye mɔ wa é de. 14 É ɖe gbɛtɔ́ wyawe sɔ́n yemɛ, mɔ sunyíkɔ ná ye jan mɛɖóhlan. É ɖe ye ná ye ní do nɔ nɔ okpɔ́ kpí i kpó, mɔ́ do nɔ do ye hlan owɛnjɔwǔn lá gbě, 15 mɔ́ gɔ na ye acɛ ná ye ní do nɔ nya gbigbɔ mawé e jɛgě. 16 Ye omɛ wyawe ɖée Jesu can e wé: Simɔɔ, omɛ ɖée é sunyíkɔ ná jan Pyɛɛ, 17 Jaki kpó nɔyí étɔn Jaan kpó ɖée wá ovǐ xlunhwǎn Zebeɖe tɔn e, Jesu mɔ sunyíkɔ ná ye jan Bwanɛɛgɛsi, takúnɖená étɔn bayí “osovǐ”. 18 Andle, Filipu, Baatelemi, Matye, Tomaa, Jaki ovǐ xlunhwǎn Alufe tɔn, Taɖee, Simɔɔ omɛ ɖée xókan ná jlokokojijɛ oto étɔn tɔn, 19 kpó Juɖasi Isikalyɔti kpó, omɛ ɖée ná wa sá Jesu.
Jesu sín hɛ̌nnumɛ e wa nádo kplín i
20 Jesu lɛkɔnya osínmɛ jǎn agun ɖaxó ɖe mɔ gɔ kpli káká éyɔ kpó núkplɔ́ntɔ́ étɔn e kpó ma gɔ singǎn ɖunú. 21 Kín hɛ̌nnumɛ étɔn e do se onú ɖée nɔ jɔ̌, ye wa nádo wlí i ná ye lɛn fáan ayixa étɔn ko fɛ.
Jesu lɔxó dǒ ohwɛ ɖée ye dǔ i go
(Matye 12.22-32/ Lwiki 11.14-23; 12.10)
22 Sɛ́nkplɔ́nmɛtɔ́ ɖée tɔnsɔ́n Jeluzalɛmu e nɔ lɔ́ fáan: «Bɛɛzebuli, gbigbɔ mawé e sín ogǎn yi é ló Jesu mɛ, jǎn lo xúhlɔ̌n étɔn mɛ yí Jesu nyá gbigbɔ mawé e jɛ̌gě lé.» 23 Jesu ylɔ ye mɔ doló éxe ná ye fáan: «Namú Satan singǎn nya Satan jɛgě gbɔn? 24 Ényí axɔ́lúɖuto ɖé klánsɔtakún éɖe, axɔ́lúɖuto énɛ́ ma ná nɔte dɛn. 25 Ényí hwɛndo ɖé klánsɔtakún éɖe, hwɛndo énɛ́ ma ná nɔte dɛn. 26 Kínɖékpolɔ́, ényí Satan fɔn do éɖe ji mɔ klan, é ma ná nɔte dɛn, bé étɔn kɔn nɛ́. 27 Omɛ ɖékpékpé ma singǎn nya osín xúhlɔ̌nnɔ ɖé tɔn mɛ mɔ nya kplɔ adɔkun étɔn e, afido é blá ɛ hwɛ̌ jɛnukɔn, sáa énɛ́ mɛ é ná kplɔ adɔkun étɔn títɛkpóe.
28 Núgbǒ un lɔ ná mi, nyladǒ ɖée gbɛtɔ́ e ko gbɛ wa kpó onú ɖée ye ko nylajan e dǒ Mawu go kpó, títɛkpóe yi Mawu ná jona ye. 29 Amɔ̌, omɛ ɖée ná nylanújan do Gbigbɔ Wíwé go ma ná mɔ jona nyladǒ tɔn yi kpɔngbeɖe, nyladǒ énɛ́ ná nɔ okɔ ní i kákádonya.»
30 Jesu lɔxó jan ítɔ́ ɖó omɛ e nɔ jǎn fáan gbigbɔ mawé ɖe yi é nɔ zǎn ɛ wútu.
Amɛ́ e wá hɛ̌nnumɛ núgbǒ Jesu tɔn?
(Matye 12.46-50/ Lwiki 8.19-21)
31 Onɔ Jesu tɔn kpó nɔyí étɔn e kpó wa nɔtɛn lɔ́ mɛ, yě nɔ hɔnto mɔ dowɛn hlǎn Jesu fáan ní wa. 32 Agun lɔ́ sin-awán lɛdǐ i, ye mɔ wa lɔ́ ní i fáan: «Kpɔn! Tɛ onɔ, tɛ nɔyí xlunhwǎn kpó tɛ nɔyí nyɔsi e kpó ló hɔnto mɔ nɔ dǐn i.» 33 É gblɔn ná ye fáan: «Amɛ́ e wá onɔ tɔ kpó nɔyí tɔ e kpó?» 34 É nyi nukúnkpɔn omɛ ɖée sin-awán lɛdǐ i e mɔ lɔ fáan: «Onɔ tɔ kpó nɔyí tɔ e kpó we. 35 Omɛ ɖékpékpé ɖée wá ojlǒ Mawu tɔn, omɛ énɛ́ yi é wá tɔ nɔyí xlunhwǎn, tɔ nɔyí nyɔsi, kpó tɔ onɔ kpó.»