Jesu gbɔ-awutu ná dǎwe asákú-awakúnɔ ɖé
(Matye 9.1-8/ Lwiki 5.17-26)
2
1 Azǎn vǔɖe godo, Jesu lɛkɔnya otoxo Kapɛɛnawumi tɔn mɛ. Omɛ e se fáan é ló osínmɛ. 2 Gbɛtɔ́ susu wa kplí dǒ osín lɔ́ mɛ, otɛn mɔ jan káká nya hɔnto. Jesu nɔ lɔ́ Mawuxó ná ye. 3 Omɛ ɖɛhwlɛn wa é de jǎn xlunhwǎn ɛnɛ lo ye mɛ mɔ hɛn dǎwe asákú-awakúnɔ ɖé wa é de. 4 Kín ye ma do singan ze dǎwe lɔ́ dǒ nukɔn Jesu tɔn ná agun lɔ́ tɔn wútu, yě gbɔ mɔ ɖe nuvo ɖé gbɔn aga ná oxɔ ɖée mɛ Jesu lé, mɔ ze asákú-awakúnɔ lɔ́ kpódǒ adɔ̌zan ɖée ji é fin-awán dǒ kpó gbɔn xílɔ́ káká wa Jesu de. 5 Kín Jesu do mɔ yíse yetɔn, é lɔ ná asákú-awakúnɔ lɔ́ fáan: «Ovǐ tɔ, yě jo tɛ nyladǒ e nɛ.» 6 Sɛ́nkplɔ́nmɛtɔ́ ɖɛhwlɛn ɖée ló awánsínsín ló xílɔ́ nɔ lɔ́ ló ayixa yeɖé e tɔn mɛ fáan: 7 «Namú dǎwe éxe singǎn jan onú énɛ́ wunkɔtɔn gbɔn? É nɔ nylánújǎn dǒ Mawu go. Amɛ́ singǎn jo nyladǒ na mɛ zɛ Mawu có gě go?» 8 Kín Jesu do mɔ tlóló fáan ye nɔ lɛ́n onú énɛ́ wunkɔtɔn ló yeɖé mɛ, é lɔ ná ye fáan: «Amúwútu mi do nɔ ɖó linlɛn énɛ́ wunkɔtɔn e ló ayixa mitɔn e mɛ? 9 Ɖemú é bɔ-awú hǔgán ɖé, ényí ye lɔ́ ná asákú-awakúnɔ fáan: “Yě jo tɛ nyladǒ e nɛ” kayí “Fɔntite, ze adɔ̌zan tɛ mɔ zinzɔnlin”? 10 Tíi, un jlo fáan mi ní nyɔ fáan Ovǐ Gbɛtɔ́ tɔn ɖo acɛ nádo jo nyladǒ na omɛ lo ayígba ji.» Kín é do jan ítɔ́, é lɔ ná dǎwe asákú-awakúnɔ lɔ́ fáan: 11 «Un ɖegbe nɛ, fɔntite, ze adɔ̌zan tɛ mɔ nya tɛ osínmɛ!» 12 Lo afɔɖékpolɔ́ji, dǎwe lɔ́ tite mɔ ze adɔ̌zan étɔn mɔ zinzɔnlin mɔ tɔn jɛgě ló ye omɛ títɛkpóe sín nukún mɛ. E kpacá ye omɛ kpó susu, ye mɔ gɔ cɛ gigo kpa ná Mawu mɔ nɔ lɔ́ fáan: «Mí ma mɔ onú éxe wunkɔtɔn kpɔn!» Jesu ylɔ Levi
(Matye 9.9-13/ Lwiki 5.27-32)
13 Jesu gɔ lɛkɔnya otɔ Galile tɔn tó. Omɛ susu mɔ nɔ wá é de, é mɔ nɔ kplɔ́nnú ye. 14 Kín Jesu do nɔ fɛ́, é mɔ Levi, ovǐ xlunhwǎn Alufe tɔn ló awánsínsín ló tokwácántɛn. É lɔ ní i fáan: «Xodo o!» É gɔ fɔntite, mɔ xodǐ i. 15 Enɛ́godo, Jesu nɔ ɖúnú ló osín Levi tɔn mɛ jǎn tokwácántɔ́ e kpó nyladǒnɔ e kpó, kpó núkplɔ́ntɔ́ étɔn e kpó mɔ nɔ ɖúnú xɛ́ ɛ, ɖó ye omɛ susu yi é xodǐ i wútu. 16 Kín sɛ́nkplɔ́nmɛtɔ́ ɖée ló ogbɛ̌ Falizi e tɔn mɛ do mɔ fáan Jesu nɔ ɖúnú xɛ́ tokwácántɔ́ e kpó nyladǒnɔ e kpó, yě kanse núkplɔ́ntɔ́ étɔn e fáan: «Amúwútu é do nɔ ɖúnú xɛ́ tokwácántɔ́ e kpó nyladǒnɔ e kpó?» 17 Kín Jesu do se ítɔ́, é lɔ ná ye fáan: «É ma nyí omɛ ɖée ló ganji e yi é ɖo hudǒ awutugbɔnamɛtɔ́ tɔn kɔn, amɔ̌ omɛ ɖée nɔ jɛ̌ awutu e. Un ma wa nádo ylɔ dǒdónɔ e kɔn, amɔ̌ nyladǒnɔ e.»
Jesu lɔxó dǒ nugbɛnbíblá go
(Matye 9.14-17/ Lwiki 5.33-39)
18 Gbeɖékpo, núkplɔ́ntɔ́ Jaan tɔn e kpó Falizi e kpó nɔ blánugbɛn. Yě wa kanse Jesu fáan: «Amúwútu núkplɔ́ntɔ́ Jaan tɔn e kpó núkplɔ́ntɔ́ Falizi e tɔn kpó blánugbɛn gbɛ̌ núkplɔ́ntɔ́ ayɔ tɔn e ma blánugbɛn wɛ́? 19 Jesu gblɔn ná ye fáan: «Bé osisúnɔ sín hɔntɔn e singǎn blanugbɛn ényí osisúnɔ gbɛ̌ lo okpɔ́ xɛ́ ye? Ojlɛ̌ ɖée mɛ osisúnɔ gbɛ̌ ló okpɔ́ xɛ́ ye lé, ye ma singǎn blanugbɛn. 20 Amɔ̌ é ná wa jɔ̌, ye mɔ́ ze osisúnɔ lɔ́ sɔn ye de, lo azǎn énɛ́ gbe, ye ná blanugbɛn.
21 Omɛ ɖé ma yí avɔnnugbɛn yɔ́yɔ́ dǒ kpá avɔn xóxó sú kɔn, é ma nyi ítɔ́, avɔnnugbɛn yɔ́yɔ́ sín xúhlɔ̌n ná hugán xúhlɔ̌n avɔn xóxó tɔn jǎn vǔnvún lɔ́ mɔ lo é ji jɛ kɔn. 22 Kínɖékpolɔ́, omɛ ɖé ma kɔ́n vɛɛn yɔ́yɔ́ dǒ ayúkpo xóxó mɛ kɔn, é ma nyi ítɔ́, vɛɛn lɔ́ ná hɛn ayúkpo xóxó lɔ́ la jǎn vɛɛn kpó ayúkpo kpó mɔ́ gu mɛ. Enɛ́wútu, ye kɔ́n vɛɛn yɔ́yɔ́ dǒ ayúkpo yɔ́yɔ́ mɛ.»
Jesu lɔxó dǒ gbɔjɛ̌zǎn ji
(Matye 12.1-8/ Lwiki 6.1-5)
23 É wa jɛ̌ gbɔjɛ̌zǎn Juu e tɔn gbe ló gbeɖékpo, Jesu kpó núkplɔ́ntɔ́ étɔn e kpó gbɔn jikúngle ɖé mɛ fɛwanyá jǎn núkplɔ́ntɔ́ étɔn e mɔ cɛ jikún vǔɖe ya. 24 Falizi e lɔ hlǐn i fáan: «Kpɔn! Amúwútu tɛ núkplɔ́ntɔ́ e nɔ wá onú ɖée osɛ́n gbɛ fáan omɛ ɖé ma ná bayí lo gbɔjɛ̌zǎngbe?»
25 Jesu gblɔn ná ye fáan: «Bé byɛ ma xlɛ kpɔngbeɖe onú ɖée axɔ́lú Davidi bayí ló ojlɛ̌ ɖée mɛ xovɛ̌ nɔ hǔ i lé, éyɔ kpó omɛ ɖée xodǐ i e kpɔ́ wɛ? 26 Kín é byɔ osín Mawu tɔn mɛ ɖó lo avɔ̌sántɔ́ ɖaxó Abyataa sín hwenu, mɔ ɖu akla avɔ̌sínsán tɔn ɖée é ma jɛ omɛ ɖevo ní ɖu, afido avɔ̌sántɔ́ e có gě. É mɔ gɔ na akla avɔ̌sínsán tɔn lɔ́ omɛ ɖée kpí i kpó ló kpɔ́ e ɖu kpógba.»