Jesu ylɔ núkplɔ́ntɔ́ tíntán e
(Matye 4.18-22/ Maaki 1.16-20)
5
1 Gbeɖékpo, Jesu ló Jenezalɛtitɔ tó, omɛ susu mɔ nɔ fínnyɔ́ ɛ lɛ́dǒ nádo se oxó Mawu tɔn. 2 É mɔ tɔjihǔn awe ló otɔ lɔ́ tó, ɖée mɛ hweyíhutɔ́ e jɛte sɔ́n nádo klɔ oɖɔ yetɔn e. 3 É byɔ tɔjihǔn ɖékpo mɛ, tɔjihǔn énɛ́ bayí tɔjihǔn Simɔɔ tɔn, mɔ vɛ̌ ɛ fáan ní sɛ tɔjihǔn lɔ́ dɛn do agě ji vǔɖe. Enɛ́godo, é sin-awán ló tɔjihǔn lɔ́ mɛ, mɔ nɔ kplɔ́nnú omɛ susu lɔ́ e.4 Kín Jesu do lɔxó kpó, é lɔ ná Simɔɔ fáan: «Sɛ tɔjihǔn lɔ́ nya xíɖée otɔ lɔ́ sisó lé. Enɛ́godo, ayɔ kpó hǎgbɛ́ tɛ e kpó mi mɔ dlan oɖɔ mitɔn e nádo wle hweyí.» 5 Simɔɔ gblɔn ní i fáan: «Ogǎn! Mí ko jɛtuklá ló zǎnmɛ káká gbɛ̌ mí ma mɔ hweyí ɖékpékpé wle. Amɔ̌, lo tɛ ogbeɖiɖe mɛ, un ná dlan oɖɔ lɔ́ e.»
6 Kín ye do dlan oɖɔ lɔ́ e, yě wle hweyí susu káká oɖɔ yetɔn e mɔ cɛ tíntlɛ́n. 7 Yě bayí alɔ ná hǎgbɛ́ yetɔn ɖée ló tɔjihǔn awetɔ́ mɛ e, ye ní do gɔalɔ na ye. Yě wa, ye omɛ títɛkpóe mɔ bɛ hweyí lɔ́ e dǒ tɔjihǔn awe lɔ́ e mɛ, tɔjihǔn awe lɔ́ e mɔ gɔ káká mɔ ɖibla syɔ dǒ otɔ lɔ́ mɛ. 8 Kín Simɔɔ Pyɛɛ do mɔ onújijɔ lɔ́, é jɛkoli dǒ afɔkɔ ná Jesu mɔ jan fáan: «Oklunɔ! Sɛ jɛ lá na nyɔ, ná gbɛtɔ́ nyladǒnɔ yi é wá o!»
9 Ná obú ɖaxó ɖe jɛ Simɔɔ Pyɛɛ ji, éyɔ kpódǒ omɛ ɖée kpí i kpó ló kpɔ́ e kpó, ná hweyí susu ɖée ye wle wútu. 10 Kín jǎn é gɔ dobú ná Jaki kpó Jaan ovǐ Zebeɖe tɔn kpó ɖó nɛ́, ye omɛ ɖée bayí hǎgbɛ́ Simɔɔ tɔn e. Amɔ̌ Jesu lɔ ná Simɔɔ fáan: «Gɔ ɖibú le! Bɛsɔn égbě, gbɛtɔ́ e yi o ná nɔ hɛn wa na o!»
11 Enɛ́godo, yě gɔ tɔjihǔn yetɔn e wa agě ji, mɔ jo onú títɛkpóe do mɔ xodǒ Jesu.
Jesu gbɔ-awutu ná kpozɔnjɛtɔ́ ɖe
(Matye 8.1-4/ Maaki 1.40-45)
12 Jesu ló otoxo lɔ́ e ɖékpo mɛ, jǎn dǎwe ɖée kpozɔn gɔ agbasa ná ɖe mɔ wa xwétɔn. Kín é do mɔ Jesu, é cyɔn nukunmɛ étɔn awán mɔ vɛ̌ ɛ fáan: «Oklunɔ, ényí é jlo é, mɔ gbɔ-awutu na o.»
13 Jesu dlɛn alɔ étɔn, mɔ ɖoalɔ é go mɔ jan fáan: «Un jlo, awutu tɛ ní gbɔ». Afɔɖékpolɔ́ji, dǎwe lɔ́ sín awutu mɔ gbɔ. 14 Enɛ́godo, Jesu do osɛ́n na dǎwe lɔ́ fáan: «Gɔ lɔxó ɖe na omɛ ɖé le. Amɔ̌, nya do aɖé xlɛ avɔ̌sántɔ́ Mawu tɔn, mɔ na núníná tɛ lɛwé tɔn ɖikín osɛ́n Mɔyizi tɔn ko lɔ ɖó, énɛ́ mɔ́ doxlɛ omɛ títɛkpóe fáan tɛ awutu gbɔ núgbǒ.»
15 Linlin Jesu tɔn gɔ nɔ gbǎkpé dogɔ, omɛ e mɔ do ahwan hoo mɔ wa é de nádo se oxó étɔn mɔ́ gɔ do mɔ kpɔ́ngbɔ na awutu yetɔn e. 16 Amɔ̌ Jesu wa tɔ́nsɔ́n ye de, mɔ nya nɔtɛn ɖée omɛ ɖé ma le, mɔ xoɖɛ.
Jesu gbɔ-awutu ná dǎwe asákú-awakúnɔ ɖé
(Matye 9.1-8/ Maaki 2.1-12)
17 Gbeɖékpo, Jesu nɔ kplɔ́nnú gbɛtɔ́ e. Falizi e kpó sɛ́nkplɔ́nmɛtɔ́ e kpó ɖée wa sɔ́n otoxo Jeluzalɛmu tɔn mɛ kpódǒ gletoxo ɖée ló agbegbe Galile kpó Juɖe tɔn kpó e mɛ ló awánsínsín ló xílɔ́. Xúhlɔ̌n Oklunɔ Mawu tɔn ló kpɔ́ kpó Jesu kpó, mɔ́ hɛ̌n ɛ gbɔ̌-awutu ná gbɛtɔ́ e. 18 Gbɛtɔ́ e hɛn dǎwe asákú-awakúnɔ ɖé wa ló adɔ̌zan ji. Ye nɔ dǐn ná zǐ i byɔ oxɔ ɖée mɛ Jesu lé nádo zǐ i do nukɔn étɔn. 19 Kín ye ma do mɔ alixo ɖée ye ná zǐ i gbɔn do byɔ oxɔ lɔ́ mɛ, ná agun ɖaxó lɔ́ tɔn wútu, yě gbɔ mɔ ɖe nuvo ɖé ló oxɔ lɔ́ ji aga, mɔ ze awutunɔ lɔ́ gbɔn nuvo lɔ́ mɛ dǒ adɔ̌zan étɔn ji, dǒ cincín agun lɔ́ tɔn lo nukɔn Jesu tɔn. 20 Kín Jesu do mɔ yíse yetɔn, é lɔ ná awutunɔ lɔ́ fáan: «Tɔ hɔntɔn, yě jo tɛ nyladǒ e nɛ.» 21 Sɛ́nkplɔ́nmɛtɔ́ e kpó Falizi e kpó cɛ linlɛn fáan: «Gbɛtɔ́ alɔkpa ɖemú wá éxe, ɖée nɔ nylánújǎn dǒ Mawu go? Omɛ ɖé ma singǎn jo nyladǒ na mɛ afido Mawu có gě!» 22 Amɔ̌ Jesu nyɔ́ linlɛn yetɔn e mɔ lɔ ná ye fáan: «Amúwútu mi do nɔ lɛ́nnú éxe wunkɔ e ló ayixa mitɔn e mɛ? 23 Ényí ye jǎn “Yě jo tɛ nyladǒ e nɛ” kayí “Fɔn mɔ zinzɔnlin”, ɖemú é bɔ-awú hǔgan ɖé? 24 Lo tíi, un jlo fáan mi ní nyɔ fáan Ovǐ Gbɛtɔ́ tɔn ɖo acɛ ló ayígbaji nádo jo nyladǒ na mɛ.» É mɔ wa lɔ́ ná asákú-awakúnɔ lɔ́ fáan: «Un ɖegbe ná ɛ, fɔntite mɔ ze tɛ adɔ̌zan mɔ nya tɛ sínmɛ!» 25 Lo afɔɖékpolɔ́ji, awutunɔ énɛ́ fɔntite ló nukún yetɔn mɛ, é ze adɔ̌zan étɔn mɔ ɖedǒ sínmɛ mɔ nɔ kpágigo ná Mawu. 26 É kpacá ye omɛ kpó, ye mɔ nɔ kpá gigo ná Mawu kpódǒ obúɖisí ɖaxó ɖe kpó mɔ nɔ lɔ́ fáan: «Mí mɔ núdabla e ló égbě!»
Jesu ylɔ Levi fáan ní xodo yelɔ́
(Matye 9.9-13/ Maaki 2.13-17)
27 Enɛ́godo, Jesu tɔn mɔ mɔ tokwácántɔ́ ɖée nyí aLevi ló awánsínsín ló tokwácántɛn. É lɔ ní i fáan: «Xodo o!» 28 Lévi jo onú títɛkpóe do mɔ fɔn xodǐ i. 29 É bayí jonɔnuɖuɖu ɖaxó ɖe ná Jesu ló osín étɔn mɛ. Tokwácántɔ́ susu kpó omɛ ɖevo e kpó ló nuɖuɖukákɔn kpó ye kpó. 30 Falizi e kpó sɛ́nkplɔ́nmɛtɔ́ e kpó nɔ hunhlǔn mɔ nɔ kánsé núkplɔ́ntɔ́ Jesu tɔn e fáan: «Amúwútu mi nɔ ɖúnú mɔ nɔ nú ahan xɛ́ tokwácántɔ́ e kpódǒ nyladǒnɔ e kpó?» 31 Jesu yixó mɔ lɔ ná ye fáan: «Awutunɔ e yi é ɖo hudǒ awutugbɔnamɛtɔ́ tɔn. Omɛ ɖée ló gǎngán e ma ɖo hudǒ étɔn kɔn. 32 Un ma wa nádo ylɔ dǒdónɔ e gba, amɔ̌ un wa nádo ylɔ nyladǒnɔ e ná ye ní do lɛnvɔjɔ.»
Jesu lɔxó dǒ nugbɛnbíblá ji
(Matye 9.14-17/ Maaki 2.18-22)
33 Falizi e lɔ ná Jesu fáan: «Núkplɔ́ntɔ́ Jaan tɔn e kpó núkplɔ́ntɔ́ mitɔn e kpó blánugbɛn gbɔzan-gbɔzan mɔ́ gɔ̌ xóɖɛ, amɔ̌ núkplɔ́ntɔ́ ayɔ tɔn e ɖú mɔ gɔ̌ nú.» 34 Jesu gblɔn ná ye fáan: «Bé mi singan hɛn jonɔ alɔwléhunxwɛ tɔn e blanugbɛn lo sáa ɖée mɛ osisúnɔ gbɛ̌ ló kpɔ́ kpó ye kpó? 35 Amɔ̌ azǎn e wazě ye mɔ ze osisúnɔ sɔn ye de, azǎn énɛ́ e gbe ye ná blanugbɛn.» 36 Jesu gɔ doló ɖe ná ye fáan: «Omɛ ɖé ma tlɛ́n avɔn sɔ́n avɔn yɔ́yɔ́ go do kpá avɔn xóxó sú kɔn; é ma nyi ítɔ́, ye ná tlɛn avɔn yɔ́yɔ́ lɔ́, gbɛ̌ avɔnnugbɛn yɔ́yɔ́ lɔ́ ma ná sɔgbe do avɔn xóxó lɔ́ go. 37 Omɛ ɖé ma gɔ̌ kɔ́n vɛɛn yɔ́yɔ́ dǒ ayúkpo xóxó e mɛ kɔn; é ma nyi ítɔ́, vɛɛn yɔ́yɔ́ lɔ́ ná hɛn ayúkpo lɔ́ e wu, vɛɛn yɔ́yɔ́ lɔ́ mɔ kun-awǎn dǒ kɔ́mɛ jǎn ayúkpo lɔ́ e mɔ gu mɛ. 38 Enɛ́wútu ayúkpo yɔ́yɔ́ e mɛ yi ye ɖó ná kɔn vɛɛn yɔ́yɔ́ do. 39 Omɛ ɖékpékpé ɖée nu vɛɛn xóxó ma gɔ̌ ɖíke nú vɛɛn yɔ́yɔ́ ba ná é ná jan fáan: “Vɛɛn xóxó jɔwun hǔgán ɛ!”»