Lɛ́gba tɛn Jesu kpɔn
(Matye 4.1-11/ Maaki 1.12-13)
4
1 Enɛ́godo, Jesu tɔnsɔ́n Jɔɔɖanitɔ tó. Gbigbɔ Wíwé gɔ é mɛ mɔ hɛ̌n ɛ nya danklóji, 2 xíɖée lɛ́gba tɛ́n ɛ kpɔn lé ná azǎn kanɖé. É ma ɖunú ɖekpékpé ló azǎn énɛ́ e mɛ, amɔ̌ lo azǎn lɔ́ e sín godo, xovɛ̌ hǔ i. 3 Tíi, lɛ́gba mɔ lɔ ní i fáan: «Ényí Ovǐ Mawu tɔn o nyi núgbǒ, ɖegbe na osé éxe ní lɛzun akla!» 4 Jesu gblɔn ní i fáan: «Yě kan dǒ Oxó Mawu tɔn mɛ fáan: “É ma wá akla có gě gbɛtɔ́ ná ɖu mɔ́ do nɔ ogbɛ.”»5 Lɛ́gba gɔ kplan Jesu nya aga hwínnáhwínná, mɔ do axɔ́lúɖuto ayígba tɔn títɛkpóe xlɛ ɛ ló nukúnxwixwe ɖékpo mɛ, 6 mɔ lɔ ní i fáan: «Un ná na ɛ acɛ títɛkpóe kpó gigo axɔ́lúɖuto éxe e tɔn kpó, ɖó nyɔ yi ye ze dǒ alɔmɛ ná, un mɔ́ ná omɛ ɖékpékpé ɖée jlo o. 7 Enɛ́wútu, ényí o lítakún-awán na o, onú énɛ́ títɛkpóe mɔ́ nyi tɛ.» 8 Jesu mɔ gblɔn ní i fáan: «Yě kan dǒ Oxó Mawu tɔn mɛ fáan: “Ó ɖo ná nɔ litakún-awán na Oklunɔ Mawu tɛ, éyɔ ɖékpo gě o ɖo ná nɔ sɛn.”»
9 Enɛ́godo, lɛ́gba kplan Jesu nya otoxo Jeluzalɛmu tɔn mɛ, é zǐ i dǒ ahɔnmɛ osín Mawu tɔn tɔn mɔ lɔ ní i fáan: «Ényí Ovǐ Mawu tɔn yi é wá ɛ, flɛ sɔn xítɔ jɛ odo, 10 ná yě kan dǒ Oxó Mawu tɔn mɛ fáan: “Ná ayɔ tɔn wútu, Mawu ná ɖegbe na wɛnzagun étɔn e, ná ye ní do kpenukún do tɛ go. 11 Ye mɔ́ gɔ ze e do alɔ yetɔn e mɛ ná o ní gba wa gbǎ-afɔ do osé ɖe go.” » 12 Jesu gblɔn ní i fáan: «Ye kan dǒ Oxó Mawu tɔn mɛ fáan: “O ma ɖo ná tɛn Oklunɔ Mawu tɛ kpɔn.”» 13 Kín lɛ́gba do tɛn Jesu kpɔn gbɔn alɔkpa títɛkpóe mɛ kpó godo, é hɔn jɛ olá ní i kákájɛ ojlɛ̌ ɖevo mɛ.
Jesu bɛ azɔ̌n étɔn wiwa ló agbegbe Galile tɔn mɛ
(Matye 4.12-17/ Maaki 1.14-15)
14 Jesu gɔ lɛkɔnya agbegbe Galile tɔn mɛ kpó xúhlɔ̌n Gbigbɔ Wíwé tɔn kpó, linlin étɔn nɔ gbǎkpé gbɔn agbegbe lɔ́ kpéte mɛ. 15 É nɔ kplɔ́nnú omɛ e ló kpíkplítɛn Juu e tɔn, jǎn omɛ títɛkpóe mɔ nɔ kpágigo ní i.
Nazalɛtinu e gbɛ Jesu
(Matye 13.53-58/ Maaki 6.1-6)
16 Jesu nya Nazalɛti xíɖée é hwɛn lé. Ɖi walɔ étɔn, é byɔ kpíkplítɛn Juu e tɔn ló gbɔjɛ̌zǎn yetɔn gbe. É fɔntite nádo xlɛ Oxó Mawu tɔn. 17 Yě ze wéma Ezayi, gbeyílɔtɔ́ Mawu tɔn tɔn ní i. Kín é do hun wéma lɔ́, é mɔ xíɖée ye kan dǒ fáan:
18 «Gbigbɔ Oklunɔ Mawu tɔn ló okpɔ́ kpódǒ nyɔ kpó.
Ná é ɖe o,
nádo la owɛnjɔwǔn na wamamɔnɔ e.
É do o hlan nádo la túndote na gantɔ́ e,
kpó nukúnnúmimɔ na nukúntɔ́nnɔ e,
nádo hwlɛn ye omɛ ɖée ye nɔ dǒyaná e gan.
19 Nádo la oxwe ɖée Oklunɔ Mawu ná do jɔmyɔ étɔn xlɛ le.»
20 Enɛ́godo, Jesu su wéma lɔ́ mɔ gɔ̌ ɛ jo ná mɛsɛntɔ́ lɔ́ mɔ sin-awán. Ye omɛ ɖée ló kpíkplítɛn lɔ́ títɛkpóe mɔ bɔnukúnɖo ní i. 21 É mɔ cɛ lilɔ ná ye fáan: «Azǎn égbě tɔn gbe, Oxó Mawu tɔn éxe ɖée mi se nyi cicɛ.» 22 Omɛ títɛkpóe nɔ ɖékunnu ní i jǎn oxó jɔmyɔ tɔn ɖée nɔ tɔ́nsɔ́n nugbɛn ní i e mɔ nɔ kpácá ye jǎn ye mɔ nɔ lɔ́ fáan: «Bé ovǐ Jozɛfu tɔn ma wá énɛ́ wɛ?» 23 Jesu lɔ ná ye fáan: «Un nyɔ́ ganji fáan mi ná wa dǒló éxe na o fáan: “Awutugbɔnamɛtɔ́, gbɔ-awutu na ayɔ ɖé!” Mi mɔ́ gɔ lɔ na o fáan: “Onú kplankplan ɖée mí se fáan o jlɛ ló Kapɛɛnawumi, jlɛ onú énɛ́ e wunkɔtɔn lo xítɔ lo tɛ otoxo mɛ!”» 24 É gɔ lɔ ná ye fáan: «Núgbǒ un nɔ lɔ́ na mi: Gbeyílɔtɔ́ Mawu tɔn ɖé ma nyí alɔkɛyí ló oto étɔn mɛ. 25 Núgbǒ un nɔ lɔ́ ná mi: Osúkúsi susu yi é ló Izlayɛli ló ojlɛ̌ Eli gbeyílɔtɔ́ Mawu tɔn tɔn mɛ. Lo ojlɛ̌ énɛ́ mɛ, jǒkún nɔ ma ja ná oxwe atɔn osun tlékpo, xovɛ̌ ɖaxó ɖe mɔ tɔn mɔ kpe oto lɔ́ kpéte mɛ. 26 Cógancó, Mawu ma do Eli hlǎn omɛ ɖékpékpé de ló osúkúsi énɛ́ e mɛ gba, afido hlǎn osúkúsi ɖékpo ɖée lo otoxo Salɛputa tɔn mɛ, lo agbegbe Sidɔn tɔn mɛ. 27 Okpozɔnjɛtɔ́ susu yi é ló Izlayɛli ló ojlɛ̌ Elize gbeyílɔtɔ́ Mawu tɔn tɔn mɛ, cógancó Mawu ma gbɔ-awutu ná omɛ ɖékpékpé ló ye mɛ gba, afido Naama, Silinu lɔ́.»
28 Xomɛgblě ɖaxó byɔ ye omɛ ɖée ló kpíkplítɛn lɔ́ mɛ kín ye do se oxó énɛ́ e. 29 Ye omɛ títɛkpóe fɔntite mɔ nya Jesu sɔ́n otoxo lɔ́ mɛ. Ye mɔ dɔn ɛ káká nya osóji aga xíɖée ye ɖo otoxo yetɔn dǒ, mɔ jlo ná sisɛ́ ɛ do dodomɛ. 30 Amɔ̌ Jesu gbɔn cincín yetɔn fɛ mɔ sɔn.
Jesu nya gbigbɔ mawé sɔ́n dǎwe ɖé mɛ
31 Jesu nya otoxo Kapɛɛnawumi tɔn mɛ, ló agbegbe Galile tɔn mɛ, mɔ nɔ kplɔ́nnú omɛ e ló gbɔjɛ̌zǎn Juu e tɔn gbe. 32 Núkplɔ́nmɛ étɔn kpacá omɛ ɖée nɔ ɖótó oxó étɔn e, ná é lɔ́xó kpódǒ acɛ kpó. 33 Dǎwe ɖé gǎ ló kpíkplítɛn Juu e tɔn lɔ́ mɛ, jǎn gbigbɔ mawé mɔ nɔ dǒtuklá ɛ. Dǎwe énɛ́ cɛ axódǒ kpó ogbe lélé kpó fáan: 34 «Cóó! Jesu Nazalɛti tɔn, amú byɛ́ kpó ayɔ kpó ga kpe dǒ? Ó wa nádo vakún mítɔn sudo nɛ? Un nyɔ́ omɛ alɔkpa ɖée o nyi ganji: Ayɔ yi é wá omɛ Wíwé ɖée Mawu do hlan!»
35 Jesu ɖegbe dǒ gbigbɔ mawé lɔ́ kpódǒ acɛ kpó fáan: «Nɔ-abwɛ́, mɔ tɔnsɔn dǎwe éxe mɛ!» Gbigbɔ mawé lɔ́ ze dǎwe éxe flɛn dǒ kɔ́mɛ ló nukún omɛ títɛkpóe tɔn mɛ, mɔ tɔnsɔ́n é mɛ ma wa onú nylakan ɖé dǐ i. 36 É kpacá ye omɛ títɛkpóe, ye mɔ nɔ kánsé yeɖé e fáan: «Oxó alɔkpa ɖemú wá éxe? É ɖégbe dǒ gbigbɔ mawé e kpódǒ acɛ kpó xúhlɔ̌n kpó ye mɔ́ tɔ́nsɔ́n omɛ e mɛ.» 37 Linlin Jesu tɔn nɔ gbǎkpé gbɔ̌n oxí títɛkpóe ló agbegbe lɔ́ ji.
Jesu gbɔ-awutu ná gbɛtɔ́ susu
(Matye 8.14-17/ Maaki 1.29-34)
38 Kín Jesu do tɔnsɔ́n kpíkplítɛn Juu e tɔn lɔ́, é byɔ Simɔɔ sín sínmɛ. Avivɔhǎ sínsyɛ́n ɖe cɔn Simɔɔ sín osinɔ, ye mɔ vɛ Jesu fáan ní wa gbɔ̌-awutu ní i. 39 Jesu dɛ dǒ awutunɔ lɔ́ ji, mɔ ɖegbe vǐvɛ́vǐvɛ́ dǒ avivɔhǎ lɔ́ é mɔ jǔ i do. Afɔɖékpolɔ́ji, náwe lɔ́ fɔn mɔ cɛ jonɔ yetɔn yí. 40 Kín ohwe do nyaxɔ, ye omɛ títɛkpóe ɖée ɖo awutunɔ tɛnmɛtɛnmɛ e cɛ ye bɛ́ wa Jesu de. Jesu ze alɔ dǒ ɖékpe-ɖékpe yetɔn ji mɔ gbɔ-awutu ná ye. 41 Gbigbɔ mawé e gɔ tɔnsɔ́n gbɛtɔ́ susu mɛ kpódǒ axó kpó fáan: «Ovǐ Mawu tɔn yi é wa ayɔ!» Amɔ̌ Jesu ɖegbe dǒ ye vǐvɛ́vǐvɛ́, gbɛ̌ é ma ɖikee ye ní lɔxó, ná ye nyɔ́ fáan Jesu wá Klisti hwlɛngǎntɔ́ lɔ́.
Jesu la owɛnjɔwǔn ló kpíkplítɛn Juu tɔn e
42 Kín owun do kɛn, Jesu tɔn mɔ nya xíɖée omɛ ɖé ma lé. Gbɛtɔ́ susu cɛ i dǐn kpe káká mɔ wa é de. Yě jlo ná hɛ̌n ɛ dote ní gba wa tɔ́nsɔn ye de. 43 Amɔ̌ Jesu lɔ ná ye fáan: «É jɛ fáan un ní la owɛnjɔwǔn Axɔ́lúɖu Mawu tɔn na otoxo ɖevo e kpógba, ná énɛ́wútu Mawu do do o hlan.» 44 É mɔ gɔ cɛ owɛnjɔwǔn lá gbɔn kpíkplítɛn aJuɖe tɔn e mɛ.