Jaan mawusinlɛnamɛtɔ́ byɔ sɔ́n gbɛtɔ́ e sí fáan ye ní lɛnvɔjɔ
(Matye 3.1-12/ Maaki 1.1-8/ Jaan 1.19-28)
3
1 Lo oxwe fɔtɔntɔ́ axɔ́lúɖu Tibɛɛ ɖée nyi axɔ́lúgǎn Lɔmu tɔn mɛ, Pɔnsu Pilati mɔ nyi ogǎn agbegbe Juɖe tɔn, Eloɖu mɔ nyi ogǎn agbegbe Galile tɔn, Filipu nɔyí Eloɖu tɔn mɔ nyi ogǎn agbegbe Itule tɔn kpó agbegbe Tlakonitidi tɔn kpó, Lizaniyasi mɔ nyi ogǎn agbegbe Abilɛni tɔn, 2 lo avɔ̌sántɔ́ ɖaxó Ana kpó Kayifu kpó sín hwenu, yi Mawu lɔxó ná Jaan ovǐ xlunhwǎn Zakali tɔn ló danklóji. 3 Jaan gbɔn agbegbe ɖée lɛdǒ otɔ Jɔɔɖani tɔn kpéte mɛ, mɔ nɔ lɔ́ hlǎn gbɛtɔ́ e fáan: «Mi lɛnvɔjɔ! Mi wa ná ye ní lɛmawusin na mi, Mawu mɔ jo nyladǒ mitɔn e na mi.»4 Lo kín Ezayi, gbeyílɔtɔ́ Mawu tɔn ko kan ɖó dǒ wéma étɔn mɛ fáan:
«Omɛ ɖé nɔ dǒ-axó ló danklóji fáan:
Mi wleawú na alixo Oklunɔ tɔn,
Mi jlɔ alixoflǐ étɔn e.
5 Dogbamɛ títɛkpóe ná nyi súsú,
Osó kpó osóvǔ títɛkpóe kpó ná nyi títɛ́;
Alixo gbǐngbán e ná nyi jǐjlɔ́,
alixo gbǐgblé e ná nyi jijlaɖó.
6 Omɛ títɛkpóe mɔ́ gɔ mɔ hwlɛngǎn Mawu tɔn.»
7 Lo sáa lɔ́ mɛ, Jaan lɔ ná agun ɖaxó ɖée wa éde ní do lɛmawusin na ye fáan: «Byɛ okún amakpwe tɔn e! Amɛ́ yi é na avase mi nádo hɔn na xomɛgblě Mawu tɔn ɖée wazě? 8 Enɛ́wútu, mi zan walɔ jɔwǔn ɖée doxlɛ fáan mi lɛnvɔjɔ núgbǒ, gbɛ̌ mi gɔ nɔ lɔ lo miɖé mɛ le fáan: “Otɔ́gbǒ mítɔn wá Ablaxamu!” Ɖó, un lɔ ná mi fáan: Mawu hɛ̌n é mɔ́ ɖyɔ osé éxe e lɛzun ovǐ e na Ablaxamu. 9 Asyɔ́vǐ kó ló gbesisɔmɛ nádo san atín e sɔn aɖɔdo. Atín ɖékpékpé ɖée ma na sínsɛ́n jɔwǔn, ye ná sán ɛ mɔ́ zǐ i dlan myɔ́ mɛ.»
10 Agun ɖaxó lɔ́ e kanse Jaan fáan: «Amú mí singan bayí?» 11 É gblɔn ná ye fáan: «Ná omɛ ɖée ɖo awu awe ní na ɖékpo omɛ ɖée ma ɖo ɖékpékpé, kínɖékpolɔ́ omɛ ɖée ɖo nuɖuɖu ní na omɛ ɖée ma ɖo ɖé.»
12 Tokwácántɔ́ e lɔsú wa Jaan de ní do lɛmawusin na ye kpógba, ye mɔ kansí i fáan: «Mɛkplɔ́ntɔ́! Amú é jɛ byɛ́ ní bayí?» 13 Jaan mɔ gblɔn ná ye fáan: «Mi gɔ yi hǔgan tokwá ɖée osɛ́n ɖegbe ná ye ní nɔ su le.»
14 Ahwanzɔ̌nwatɔ́ e lɔsú kansí i fáan: «Jǎn byɛ́ lo, amú mí ɖo ná bayí?» É mɔ gblɔn ná ye fáan: «Mi gɔ yi okwá lo omɛ ɖé sí gǎnnu-gǎnnu le, kayí mi gɔ ɖo lalo do okɔ ná omɛ ɖé do yi okwá lo ési le, amɔ̌ azɔ̌nkwá mitɔn ní kpe mi.»
15 Kín agun lɔ́ dǒ ló nukúnɖíɖó mɛ, ye omɛ títɛkpóe gɔ nɔ kánsé ló ayixa yeɖé e tɔn mɛ fáan: «Bé é ma nyí Jaan yi é wá Klisti hwlɛngǎntɔ́ lɔ́ wɛ?» 16 Jaan gblɔn ná ye omɛ kpó fáan : «Nyɔ, un yi osin do nɔ lɛ́mawusin ná mi, amɔ̌ omɛ ɖée ɖo xúhlɔ̌n hugan o wazě, omɛ ɖée un ma tlɛ singǎn ɖo alɔ afɔkpakan étɔn go. Éyɔ ná yi Gbigbɔ Wíwé kpó myɔ́ kpó do lɛmawusin na mi. 17 É hɛn onúfúnú étɔn dǒ alɔmɛ nádo ɖe jikún do vo na onúyɔ mɔ́ bɛ jikún lɔ́ e do zǐnxɔ étɔn mɛ, amɔ̌ é ná fyɔ onúyɔ lɔ́ e do myɔ́ ɖée ma cí gbeɖe mɛ.»
18 Jaan nɔ lá owɛnjɔwǔn Mawu tɔn ná gbɛtɔ́ títɛkpóe kpó xomɛjlaɖóxó ɖevo e kpó.
Eloɖu wle Jaan su dǒ gankpámɛ
(Matye 14.3-4/ Maaki 6.17-18)
19 Jaan gblehwɛdǒ Eloɖu, ogǎn agbegbe Galile tɔn, ná é yi Eloɖyaɖu, nɔyía étɔn sín osi do bayí osi étɔn mɔ gɔ wa onú nylakan ɖevo e do gɔ. 20 Enɛ́godo, Eloɖu gɔ wa onú nylakan ɖevo ɖé do gɔ: é wle Jaan su dǒ gankpámɛ.
Jaan lɛmawusin ná Jesu
(Matye 3.13-17/ Maaki 1.9-11)
21 Kín otogun lɔ́ kpéte do lɛmawusin, Jesu lɔsú lɛmawusin kpógba. Kín Jesu do nɔ xóɖɛ, Olɔ́n hun, 22 Gbigbɔ Wíwé mɔ zɔn akpwéxɛ ɖé sín agbasa mɛ do jɛte dǒ é ji. Ogbe ɖé mɔ tɔnsɔ́n Olɔ́nmɛ mɔ nɔ jǎn fáan lɔ : «Ayɔ wá ovǐ xlunhwǎn omɛ yiwánna tɔ, ayɔ go xomɛ tɔ hun dǒ tlala!»
Jɔtɛnkúnkan Jesu tɔn
(Matye 1.1-17)
23 Oxwe gban wunkɔ yi Jesu ɖo do jɛ azɔ̌n étɔn wiwa ji. Kín gbɛtɔ́ e nɔ lɛ́n jǎn, ovǐ xlunhwǎn Jozɛfu tɔn yi é wá Jesu, Jozɛfu ɖée nyi ovǐ xlunhwǎn Xeli tɔn, 24 Xeli mɔ nyi ovǐ xlunhwǎn Matati tɔn. Matati mɔ nyi ovǐ xlunhwǎn Lévi tɔn, Lévi mɔ bayí ovǐ xlunhwǎn Mɛluci tɔn, Mɛluci mɔ nyi ovǐ xlunhwǎn Janayi tɔn, Janayi mɔ nyi ovǐ xlunhwǎn Jozɛfu tɔn. 25 Jozɛfu mɔ nyi ovǐ xlunhwǎn Matatyasi tɔn, Matatyasi mɔ nyi ovǐ xlunhwǎn Amɔsi tɔn, Amɔsi mɔ nyi ovǐ xlunhwǎn Nawumu tɔn, Nawumu mɔ nyi ovǐ xlunhwǎn Ɛsli tɔn, Ɛsli mɔ nyi ovǐ xlunhwǎn Nagayi tɔn. 26 Nagayi mɔ nyi ovǐ xlunhwǎn Maati tɔn, Maati mɔ nyi ovǐ xlunhwǎn Matatyasi tɔn, Matatyasi mɔ nyi ovǐ xlunhwǎn Semɛɛ́n tɔn, Semɛɛ́n mɔ nyi ovǐ xlunhwǎn Jozɛki tɔn, Jozɛki mɔ nyi ovǐ xlunhwǎn Joɖa tɔn. 27 Joɖa mɔ nyi ovǐ xlunhwǎn Joanani tɔn, Joanani mɔ nyi ovǐ xlunhwǎn Leza tɔn, Leza mɔ nyi ovǐ xlunhwǎn Zolobabɛli tɔn, Zolobabɛli mɔ nyi ovǐ xlunhwǎn Salatyɛli tɔn, Salatyɛli mɔ nyi ovǐ xlunhwǎn Nɛli tɔn. 28 Nɛli mɔ nyi ovǐ xlunhwǎn Mɛluci tɔn, Mɛluci mɔ nyi ovǐ xlunhwǎn Aɖi tɔn, Aɖi mɔ nyi ovǐ xlunhwǎn Kozamu tɔn, Kozamu mɔ nyi ovǐ xlunhwǎn Ɛlimadamu tɔn, Ɛlimadamu mɔ nyi ovǐ xlunhwǎn Ɛɛli tɔn. 29 Ɛɛli mɔ nyi ovǐ xlunhwǎn Jesu tɔn, Jesu mɔ nyi ovǐ xlunhwǎn Elyezɛɛ tɔn, Elyezɛɛ mɔ nyi ovǐ xlunhwǎn Jolimu tɔn, Jolimu mɔ nyi ovǐ xlunhwǎn Matati tɔn, Matati mɔ nyi ovǐ xlunhwǎn Lévi tɔn. 30 Lévi mɔ nyi ovǐ xlunhwǎn Simɛwɔn tɔn, Simɛwɔn mɔ nyi ovǐ xlunhwǎn Juɖa tɔn, Juɖa mɔ nyi ovǐ xlunhwǎn Jozɛfu tɔn, Jozɛfu mɔ nyi ovǐ xlunhwǎn Jonamu tɔn, Jonamu mɔ nyi ovǐ xlunhwǎn Elyakimu tɔn. 31 Elyakimu mɔ nyi ovǐ xlunhwǎn Melea tɔn, Melea mɔ nyi ovǐ xlunhwǎn Mɛna tɔn, Mɛna mɔ nyi ovǐ xlunhwǎn Matata tɔn, Matata mɔ nyi ovǐ xlunhwǎn Natan tɔn, Natan mɔ nyi ovǐ xlunhwǎn Davidi tɔn. 32 Davidi mɔ nyi ovǐ xlunhwǎn Jɛseb tɔn, Jɛse mɔ nyi ovǐ xlunhwǎn Jobɛɖi tɔn, Jobɛɖi mɔ nyi ovǐ xlunhwǎn Boozi tɔn, Boozi mɔ nyi ovǐ xlunhwǎn Salimɔ tɔn, Salimɔ mɔ nyi ovǐ xlunhwǎn Naasɔn tɔn. 33 Naasɔn mɔ nyi ovǐ xlunhwǎn Aminadabu tɔn, Aminadabu mɔ nyi ovǐ xlunhwǎn Adiminu tɔn, Adiminu mɔ nyi ovǐ xlunhwǎn Aani tɔn, Aani mɔ nyi ovǐ xlunhwǎn Ɛslɔni tɔn, Ɛslɔni mɔ nyi ovǐ xlunhwǎn Falɛsi tɔn, Falɛsi mɔ nyi ovǐ xlunhwǎn Juɖa tɔn. 34 Juɖa mɔ nyi ovǐ xlunhwǎn Jakɔbu tɔn, Jakɔbu mɔ nyi ovǐ xlunhwǎn Izaki tɔn, Izaki mɔ nyi ovǐ xlunhwǎn Ablaxamu tɔn, Ablaxamu mɔ nyi ovǐ xlunhwǎn Tala tɔn, Tala mɔ nyi ovǐ xlunhwǎn Nacɔɔ tɔn. 35 Nacɔɔ mɔ nyi ovǐ xlunhwǎn Selucu tɔn, Selucu mɔ nyi ovǐ xlunhwǎn Lago tɔn, Lago mɔ nyi ovǐ xlunhwǎn Falɛki tɔn, Falɛki mɔ nyi ovǐ xlunhwǎn Ebɛɛ tɔn, Ebɛɛ mɔ nyi ovǐ xlunhwǎn Sala tɔn. 36 Sala mɔ nyi ovǐ xlunhwǎn Kayinamu tɔn, Kayinamu mɔ nyi ovǐ xlunhwǎn Aafasaɖi tɔn, Aafasaɖi mɔ nyi ovǐ xlunhwǎn Sɛmu tɔn, Sɛmu mɔ nyi ovǐ xlunhwǎn Nɔwe tɔn, Nɔwe mɔ nyi ovǐ xlunhwǎn Lamɛcu tɔn. 37 Lamɛcu mɔ nyi ovǐ xlunhwǎn Matusala tɔn, Matusala mɔ nyi ovǐ xlunhwǎn Enɔki tɔn, Enɔki mɔ nyi ovǐ xlunhwǎn Jalɛɖi tɔn, Jalɛɖi mɔ nyi ovǐ xlunhwǎn Maleleɛli tɔn, Maleleɛli mɔ nyi ovǐ xlunhwǎn Kayinamu tɔn. 38 Kayinamu mɔ nyi ovǐ xlunhwǎn Enɔsi tɔn, Enɔsi mɔ nyi ovǐ xlunhwǎn Sɛti tɔn, Sɛti mɔ nyi ovǐ xlunhwǎn Adamu tɔn, Adamu mɔ nyi ovǐ xlunhwǎn Mawu tɔn.