Jiji Jesu tɔn
(Matye 1.18-25)
2
1 Lo ojlɛ̌ énɛ́ mɛ, axɔ́lúgǎn Lɔmu tɔn ɖée ye ylɔ́ jǎn Ogusti ɖegbe ná ye ní xlɛ gbɛtɔ́ ɖée ló axɔ́lúɖuto ɖaxó Lɔmu tɔn mɛ. 2 Yě bayí mɛxixlɛ tíntán énɛ́ ló sáa ɖée mɛ Kiliniwusi nyi ogǎn ló agbegbe Sili tɔn mɛ lé. 3 Omɛ ɖékpe-ɖékpe nya do nyíkɔ étɔn wéma mɛ ló otoxo étɔn titi mɛ. 4 Jozɛfu lɔsú tɔnsɔ́n otoxo Nazalɛti tɔn mɛ, ló agbegbe Galile tɔn mɛ mɔ nya otoxo Bɛtelexɛmu tɔn mɛ ló agbegbe Juɖe tɔn mɛ, xíɖée ye ji axɔ́lú Davidi lé ná okúnkan Davidi tɔn mɛ Jozɛfu jɔsɔ́n wútu, 5 nádo nya do nyíkɔ étɔn wéma mɛ kpó nyíkɔ Mali tɔn kpó, osi mɔdoalixo étɔn ɖée ló adɔgo. 6 Bɛtelexɛmu lɔ́ yi ye lé ovǐjizǎn Mali tɔn mɔ kpe. 7 É mɔ ji ovǐ xlunhwǎn kplɔ́nji étɔn tɔn. É bú i dǒ avɔn mɛ, mɔ tɛ́ ɛ dǒ onúɖuto kannyi tɔn ɖé mɛ, ná tɛnmɛ ma ɖée ná ye ló jonɔyítɛn wútu.Wɛnzagun Mawu tɔn ɖékpo wa lá jiji Jesu tɔn ná lɛ́ngbɔ̌nyitɔ́ e
8 Lo agbegbe énɛ́ ɖékpolɔ́ ji, lɛ́ngbɔ̌nyitɔ́ ɖɛhwlɛn ló zǎnnukle ló glemɛ do nɔ cɔ́ lɛ́ngbɔ̌kpá yetɔn e. 9 Wɛnzagun Oklunɔ Mawu tɔn ɖé tɔn dǒ ye ji, jǎn gigo Mawu tɔn mɔ hɔnwun lɛdǒ ye, obú ɖaxó ɖe mɔ jɛ ye ji. 10 Amɔ̌ wɛnzagun lɔ́ lɔ hlǎn ye fáan: «Mi gɔ ɖibú le! Ná un hɛn owɛnjɔwǔn ɖe wa ná mi, ɖée ná nyi xomɛhunhun ɖaxó ná otogun Mawu tɔn títɛkpóe. 11 Egběxe, lo otoxo Davidi tɔn mɛ, yě ji hwlɛngǎntɔ́ ɖékpo ná mi, ɖée nyí Klisti, Oklunɔ lɔ́. 12 Oxlɛ̌ ɖée mi nádo nyɔ́ ɛ wé: mi ná mɔ ovǐyɛyɛ̌ ɖée ye bu avɔn do mɔ tɛ́ ɛ dǒ onúɖuto kannyi tɔn mɛ.» 13 Lo afɔɖékpolɔ́ji, wɛnzagun Mawu tɔn susu tɔnsɔ́n olɔ́nmɛ mɔ wa gɔ̌ná wɛnzagun ɖée wa dǒ owɛn lɔ́, ye mɔ nɔ kpágigo ná Mawu fáan:
14 «Gigo na Mawu lo olɔ́n aga,
huhwɛ̌ lo ayígbaji ná omɛ ɖée é yiwánná e!»
Lɛ́ngbɔ̌nyitɔ́ e nya kpɔn ovǐ ɖée ye ji lɔ́ ló Bɛtelexɛmu
15 Kín wɛnzagun e do lɛkɔ sɔ́n lɛ́ngbɔ̌nyitɔ́ e de mɔ gɔ nya olɔ́nmɛ, lɛ́ngbɔ̌nyitɔ́ lɔ́ e nɔ lɔ́ hlǎn yenɔzo fáan: «Mi gbɔ mí ní nya káká Bɛtelexɛmu toxomɛ mɔ nya kpɔn onú ɖée jɔ, onú ɖée Oklunɔ Mawu mítɔn hɛn mí nyɔ.»
16 Yě zɔn awúyíyáji mɔ nya, mɔ mɔ Mali kpó Jozɛfu kpó, mɔ gɔ mɔ ovǐyɛyɛ̌ lɔ́ ɖée ye ze tɛ dǒ onúɖuto kannyi tɔn mɛ. 17 Kín ye do mɔ ovǐyɛyɛ̌ lɔ́, yě lɔ onú ɖée wɛnzagun lɔ́ lɔ dǒ é go. 18 Oxó ɖée lɛ́ngbɔ̌nyitɔ́ e nɔ lɔ́ kpacá omɛ títɛkpóe ɖée se oxó lɔ́ e. 19 Amɔ̌, Mali yixó énɛ́ e kpó hɛn dǒ ayixa étɔn mɛ mɔ nɔ lɛ́nnúkpɔ́n susu dǒ ye ji. 20 Enɛ́godo, lɛ́ngbɔ̌nyitɔ́ e lɛkɔ mɔ nɔ ná gigo Mawu, mɔ nɔ kpá ɛ, ná onú ɖée ye se kpó ɖée ye mɔ kpó wútu, ná onú énɛ́ títɛkpóe sɔgbe ɖó kín wɛnzagun lɔ́ lɔ ná ye jɛnukɔn ɖó.
Yě ɖo nyíkɔ ná Jesu
21 Kín ovǐ lɔ́ do ɖo azǎn cyantɔn, ye gboada ní i mɔ ylɔ́ ɛ jan Jesu, nyíkɔ lɔ́ wá ɖée wɛnzagun ko lɔ jɛnukɔn ná Mali hwɛ̌kpó é do mɔxo étɔn.
Ye do Jesu xlɛ ló osín Mawu tɔn mɛ
22 Enɛ́godo, kín ojlɛ̌ ɖée Jozɛfu kpó Mali kpó nádo bayí núwiwa lɛwé tɔn ɖikín osɛ́n Mɔyizi tɔn byɔ jan lɔ́ do kpe, yě hɛn ovǐ lɔ́ wa Jeluzalɛmu toxomɛ nádo du i xlɛ Oklunɔ Mawu. 23 Ná yě ko kan dǒ osɛ́n Oklunɔ Mawu tɔn mɛ fáan: «Yě ɖo ná ɖe ovǐ xlunhwǎn kplɔ́nji tɔn títɛkpóe dovo na Oklunɔ Mawu.» 24 Jozɛfu kpó Mali kpó mɔ gɔ ɖo ná yi agɔnxwlě awe kayí ahwannɛ́nvǔ awe do san-avɔ̌ ɖikín osɛ́n Oklunɔ Mawu tɔn byɔ ɖó.
Simɛwɔn lɔxó dǒ Jesu ji
25 Dǎwe ɖé ló Jeluzalɛmu toxomɛ ló sáa lɔ́ mɛ, ye mɔ́ ylɔ́ ɛ jǎn Simɛwɔn. É nyi dǒdónɔ mɔ́ gɔ̌ ɖó sísí ná Mawu. É nɔ nɔ́tekpɔ́n avǐɖegbɔnamɛtɔ́ Izlayɛli tɔn, Gbigbɔ Wíwé mɔ́ gɔ̌ ló é ji. 26 Mawu ko doxlɛ ɛ gbɔn Gbigbɔ Wíwé dali fáan é ma ná ku ma mɔ na nukún Klisti hwlɛngǎntɔ́ ɖée Oklunɔ Mawu ná ɖo hlan lɔ́. 27 Gbigbɔ Wíwé gɔ hɛn Simɛwɔn wa osín Mawu tɔn mɛ ló sáa ɖée mɛ mɛjitɔ́ Jesu tɔn e hɛn Jesu wa nádo bayí hlan dali étɔn onú ɖée osɛ́n byɔ fáan ye ní bayí ní i. 28 Simɛwɔn kɛ-alɔyi ovǐyɛyɛ̌ lɔ́ dǒ awa étɔn e mɛ, mɔ dokpɛ́ ná Mawu fáan:
29 «Lo tíi, Oklunɔ!
Jo tɛ mɛsɛntɔ́ do, ná ní nya gbɔjɛ lo huhwɛ̌ mɛ,
lo kín o ko lɔ ɖó.
30 Ná nukún tɔ e ko mɔ hwlɛngǎn tɛ,
31 hwlɛngǎn ɖée o ko wleawú étɔn jlǎ ló gbɛtɔ́ títɛkpóe nukɔn.
32 Énɛ́ wá hǐnhɔ́n ɖée ná do e xlɛ akɔta títɛkpóe,
é mɔ́ nyi gigo na Izlayɛli, otogun tɛ.»
33 Onú ɖée Simɛwɔn nɔ lɔ́ dǒ ovǐ lɔ́ go títɛkpóe kpacá otɔ́ kpó onɔ ovǐ lɔ́ tɔn kpó. 34 Simɛwɔn xoɖɛ dǒ ye ji, mɔ lɔ ná Mali onɔ Jesu tɔn fáan: «Ná ovǐ éxe tɔn wútu, gbɛtɔ́ susu ná jɛ-awán kayí ná gɔ fɔn nɔte lo ayígba Izlayɛli tɔn ji. Ovǐ lɔ́ ná nyi oxlɛ̌ Mawu tɔn ɖé, gbɛtɔ́ e mɔ́ sɔtakún i. 35 Lo sáa énɛ́ mɛ, ye ná nyɔ linlɛn ɖée bɛ dǒ ayixa gbɛtɔ́ susu tɔn mɛ, jǎn ayɔ Mali, awúvɛ̌ ná lun tɛ alíndɔ̌n tɔn ɖi ojǐ nugbɛn awenɔ wunkɔ.»
Ana gbeyílɔtɔ́ Mawu tɔn dokpɛ́ ná Mawu
36 Nyɔnu gbeyílɔtɔ́ Mawu tɔn ɖé ló xínɛ́, ye mɔ́ ylɔ́ ɛ jǎn Ana, ovǐ nyɔsi Fanuwɛli tɔn, ɖée jɔsɔ́n akɔta Azɛ́ɛ tɔn mɛ. Oxwe étɔn gɔ nya nukɔn susu. Kín é do nya sunfin, oxwe cyanwe godo, osú étɔn ku mɔ jǔ i do. 37 Enɛ́godo, é nyi osúkúsi ma ɖɔsú ɖevo káká do ɖo oxwe kanwenukun-ɛnɛ. É ma sɛ́tɛn sɔ́n osín Mawu tɔn mɛ, mɔ́ yí nugbɛnbíblá kpó oɖɛxixo kpó dǒ sɛ́n Mawu ló ozǎn kpó kle kpó. 38 Lo kín nyɔnu énɛ́ wa jɛ̌ dǒ ojlɛ̌ dǐdóxlɛ Jesu tɔn mɛ, é cɛ gigo kpa ná Mawu, mɔ nɔ lɔ́xó ovǐ lɔ́ tɔn ná omɛ ɖée nɔ ɖónukún hwlɛngǎn Jeluzalɛmu tɔn títɛkpóe.
Jozɛfu kpó Mali kpó lɛkɔnya Nazalɛti toxomɛ
39 Kín mɛjitɔ́ Jesu tɔn e do bayí onú títɛkpóe ɖée osɛ́n Oklunɔ Mawu tɔn byɔ, yě lɛkɔnya agbegbe Galile tɔn ji, ló Nazalɛti otoxo yetɔn mɛ. 40 Ovǐ lɔ́ nɔ hwɛ̌n mɔ nɔ mɔ́ xúhlɔ̌n mɔ gɔ gɔ ná núnyínyɔ́, jɔmyɔ Mawu tɔn mɔ́ ló é ji.
Jesu, oxwewyawemɛvǐ wa osín Mawu tɔn mɛ ló Jeluzalɛmu
41 Lo xweji-xweji, mɛjitɔ́ Jesu tɔn e nyá Jeluzalɛmu ná oxwe juwafɛ́ tɔn. 42 Kín Jesu do ɖo oxwe wyawe, mɛjitɔ́ étɔn e nya Jeluzalɛmu kpí i kpó ɖi owalɔ oxwe lɔ́ tɔn. 43 Oxwe lɔ́ sín fífó godo, ye wle osín lixo. Lo ojlɛ̌ énɛ́ mɛ, Jesu kpo ló Jeluzalɛmu gbɛ̌ mɛjitɔ́ étɔn e ma nyɔ́. 44 Yě vɛdo fáan Jesu kpo ló hǎgbɛ́ ɖée kpó ye kpó zɔn e mɛ wazě sín, ye mɔ ko zinzɔnlin klekle ɖékpo hwɛ̌kpó do wa cɛ́ i dǐnkpé gbɔn omɛ yetɔn e kpó omɛnyínyɔ́ yetɔn e kpó mɛ. 45 Kín ye ma do mɔ́ ɛ, yě lɛkɔnya Jeluzalɛmu mɔ gbɛkpo nɔ dǐn i. 46 Azǎn atɔntɔ́gbe, yě wa mɔ́ ɛ ló osín Mawu tɔn mɛ, ló awánsínsín ló sɛ́nkplɔ́nmɛtɔ́ e sín cincín. É nɔ ɖótó ye, mɔ nɔ kánxósé ye. 47 Avǒvo omɛ títɛkpóe ɖée nɔ sé oxó núnyínyɔ́ tɔn kpó gblɔndǒ étɔn e kpó. 48 Kín mɛjitɔ́ étɔn e do wa mɔ́ ɛ, é dabla dǒ ye, onɔ étɔn mɔ nɔ kánsí-i fáan: «Ovǐ tɔ, amúwútu o do bayí ítɔ́ ná mí? Kpɔn! Nyɔ kpó tɛ otɔ́ kpó nɔ dǐn i kpé kpó ayixagbadǒ kpó.» 49 É gblɔn ná ye fáan: «Amúwútu mi nɔ dǐn o? Mi ma nyɔ́ fáan un ɖo ná lo osín Otɔ́ tɔ tɔn mɛ wɛ?» 50 Amɔ̌, mɛjitɔ́ étɔn e ma mɔnukúnnújɛ oxó énɛ́ ɖée é lɔ ná ye mɛ. 51 É tite, mɔ xodǒ ye do wa nyá Nazalɛti. É sétónú ná ye. Onɔ étɔn hɛn onú ɖée jɔ lɔ́ títɛkpóe dǒ ayixa étɔn mɛ. 52 Jesu nɔ hwɛ̌n, núnyínyɔ́ étɔn mɔ nɔ jɛ̌ é ji. Mawu yiwán ní i, gbɛtɔ́ e mɔ gɔ yiwán ní i.