Owé Owɛnjɔwǔn Jesu tɔn ɖée Lwiki kan
1
1 Gbɛtɔ́ susu tɛnkpɔn nádo kan otan onú ɖée jɔ ló cincín mítɔn e tɔn. 2 Yě ɖogbe onú lɔ́ e tɔn ná mí pɛ́pɛ́ ɖikín omɛ ɖée yi nukún yetɔn e do mɔ ló bíbɛ́mɛ lɔ ná mí ɖó, omɛ énɛ́ e mɔ gɔ wa lɛ́zun Mawuxó lá tɔ́. 3 Enɛ́wútu, nyɔ tete wa dǐndona tlíntlín onú énɛ́ lɔ́ títɛkpóe sɔ́n odo, é mɔ jlo o fáan ná kan hlan ɛ, tɔ mɛjɔmɛ Teofilu, onú ɖée jɔ lɔ́ e ɖé bɔ do ɖé go, 4 ná o ní do nyɔ kpinkpɛn onúkplɔ́nmɛ ɖée ye kplɔn ɛ tɔn.Wɛnzagun Mawu tɔn wa dǒ owɛn Zakali
5 Sáa ɖée mɛ Eloɖu nyi axɔ́lú ná Juɖea lé, avɔ̌sántɔ́ Mawu tɔn ɖé ɖée, ye mɔ́ ylɔ́ ɛ jǎn Zakali. É nyi ɖékpo ló gbɛ̌takún avɔ̌sántɔ́ Mawu tɔn Abiya tɔn mɛ. É we sín osi ɖée ye ylɔ́ jǎn Elizabɛti tɔnsɔ́n okúnkan avɔ̌sántɔ́ ɖaxó Aalɔn tɔn mɛ. 6 Ye omɛ awe lɔ́ e nyi dǒdónɔ ló Mawu nukɔn, ye mɔ́ zǐngbɔ̌n osɛ́n kpó ogbeɖiɖe Oklunɔ Mawu tɔn e kpó ji ma ɖo hwɛgblědo. 7 Amɔ̌, ye ma ji ovǐ ɖe, ɖó Elizabɛti nyi wɛnsinɔ wútu, ye omɛ awe lɔ́ e sín oxwe sɛ nya nukɔn.
8 É wa jɛ̌ gbeɖékpo, Zakali mɔ nɔ wá avɔ̌sántɔ́zɔ̌n étɔn ló Mawu sín nukɔn, ɖó gbɛ̌takún ɖée mɛ é lé sín azǎn yi é kpe. 9 Ɖi zǐnzán avɔ̌sántɔ́ e tɔn, yě xoakɔ mɔ ɖe Zakali ní do byɔ oxí wíwé lo osín Oklunɔ Mawu tɔn mɛ mɔ́ do fyɔ zǔya. 10 Otogun lɔ́ kpéte kpli ló agǎxo mɔ nɔ xóɖɛ ló oganxixo ɖée mɛ ye nɔ fyɔ́ zǔya lɔ́ lé. 11 Wɛnzagun Oklunɔ Mawu tɔn ɖé gɔ tɔn dǒ Zakali ji, mɔ nɔte ló aɖusílɔ avɔ̌sántɛn ɖée ji ye fyɔ́ zǔya lé. 12 Kín Zakali do mɔ́ ɛ, ayixa étɔn gbado, obú mɔ jɛ é ji. 13 Amɔ̌, Wɛnzagun lɔ́ lɔ ní-i fáan: «Zakali! Gɔ ɖibú le! Ná Mawu se oɖɛgbe tɛ. Tɛ osi Elizabɛti ná ji ovǐ xlunhwǎn ɖékpo na-ɛ, o mɔ́ ɖo nyíkɔ na ovǐ lɔ́ jan Jaan. 14 É ná nyi xomɛhunhun kpó ayájijɛ kpó na-ɛ, omɛ susu mɔ́ gɔ jayá na jiji étɔn wútu. 15 Ná é ná klo lo Oklunɔ Mawu nukɔn. É ma na nu vɛɛn kayí ahan sínsyɛ́n ɖekpékpé. Gbigbɔ Wíwé ná gɔ gɔ éyɔ mɛ sɔn onɔ étɔn sín oxo mɛ. 16 É ná hɛn Izlayɛlivǐ susu gɔwa Oklunɔ Mawu yetɔn de. 17 É mɔ́ zinzɔnlin lo Mawu nukɔn kpódǒ gbigbɔ kpó xúhlɔ̌n ɖée Mawu na gbeyílɔtɔ́ Eli kpó, mɔ́ do gbɔhwɛ na otɔ́ kpó ovǐ kpó. É ná gɔkɔ ná tolivɛtɔ́ e, ye mɔ́ ɖo núnyínyɔ́ dǒdónɔ e tɔn, nádo wleawú otogun ɖée sɔgbe tɔn hlan Oklunɔ.»
18 Zakali gɔ kanse wɛnzagun lɔ́ fáan: «Amú é na doxlɛ o fáan onú énɛ́ e ná nyi jijɔ? Un ko kponyɔ́xó, tɔ osi tete lɔsú sín oxwe gɔ sɛ nya nukɔn.»
19 Wɛnzagun lɔ́ gɔ gblɔn ní-i fáan: «Nyɔ Gabliyɛli nɛ, nyɔ yi é nɔ́te ló Mawu nukɔn mɔ́ yí lizɔ̌n ní-i. Mawu do o hlan, nádo lɔxó na-ɛ mɔ́ do hɛn owɛnjɔwǔn éxe wa na-ɛ. 20 Amɔ̌, ná o ma yi oxó tɔ e se wútu, o ná lɛzun wunbɔkpɛn, gbɛ̌ o ma na lɔxó kákájɛ ojlɛ̌ ɖée mɛ onú ɖée un lɔ na-ɛ nádo wa cicɛmɛ. Oxó énɛ́ e ɖée un lɔ ná wa cicɛmɛ lo sáa étɔn mɛ.»
21 Lo ojlɛ̌ énɛ́ mɛ, otogun lɔ́ nɔ nɔ́tekpɔ́n Zakali, kín é dɛn ló oxí wíwé lɔ́ ɖó mɔ nɔ kpácá ye. 22 Kín é do tɔnjɛgě sɔ́n oxí wíwé lɔ́, é ma gɔ singan lɔxó hlan ye ba. Ye gɔ mɔ nukúnnújɛ é mɛ fáan, númimɔ ɖé é mɔ yi ló oxí wíwé lɔ́. É mɔ gbɔ mɔ yi alɔ do bayí oxlɛ̌ ná ye, mɔ gbɔ dǒ wunbɔkpɛn.
23 Kín Zakali do fo azɔ̌n étɔn ló osín Mawu tɔn mɛ, é lɛkɔnya é xwɛ. 24 Lo ojlɛ̌ vǔɖe sín godo, é we sín osi Elizabɛti mɔxo, mɔ gɔ ze éɖe bɛ ná osun atɔ́n, mɔ́ lɔ́ ló éɖe mɛ fáan: 25 «Onú ɖée Oklunɔ Mawu bayí ná o wé: É hunnukúnkpɔn o lo tíi, mɔ ɖe onú ɖée nɔ nyí winnyá ná o ló gbɛtɔ́ e sín nukunmɛ sɛ.»
Wɛnzagun Mawu tɔn ɖé wa lá jiji Jesu tɔn ná Mali
26 Sáa ɖée mɛ adɔgo Elizabɛti tɔn nɔ ɖó osun tlékpo lé, Mawu do wɛnzagun Gabliyɛli hlǎn otoxo Nazalɛti tɔn mɛ ló agbegbe Galile tɔn ji, 27 hlǎn ahwlivǔ ɖée ló gbeji ye mɔ́ ylɔ́-ɛ jǎn Mali, é mɔ nyi osi mɔdoalixo ná dǎwe ɖée tɔnsɔ́n kúnkan axɔ́lú Davidi tɔn mɛ, ye mɔ́ ylɔ́ nyíkɔ étɔn jǎn Jozɛfu. 28 Wɛnzagun lɔ́ nya Mali de ló osín étɔn mɛ, mɔ lɔ ní-i fáan: «Un ɖɔnúdǒ é, Mali! Ó mɔ nukún jɔwǔn ɖaxó ɖe yi sɔ́n Mawu de, Oklunɔ Mawu ló kpɔ́ kpó ayɔ kpó.»
29 Kín Mali do se oxó énɛ́, ayixa étɔn gbado, é mɔ nɔ kánsé éɖe fáan: «Núɖɔdǒmɛ alɔkpa ɖemú gǎ wá éxe?» 30 Wɛnzagun lɔ́ mɔ gblɔn ní-i fáan: «Gɔ ɖibú le, Mali, ná ó mɔ jɔmyɔ sɔ́n Mawu de. 31 Lo ojlɛ̌ vǔɖe mɛ, o ná mɔxo mɔ ji ovǐ xlunhwǎn ɖékpo, o mɔ́ ɖo nyíkɔ ní-i jan Jesu. 32 É ná nyi ɖaxó, ye mɔ́ nɔ ylɔ-ɛ jan Ovǐ Mawu Ajalɔ́nnɔ tɔn. Oklunɔ Mawu ná yí i do ɖo axɔ́lú ɖi é we sín otɔ́gbǒ Davidi, 33 é ná ɖu axɔ́lú lo otogun Izlayɛli tɔn ji kákádonya, axɔ́lúɖu étɔn ma ná ɖo okpodǒ.»
34 Mali kanse wɛnzagun lɔ́ fáan: «Namú onú éxe ná jɔ jan ɖó nyɔ ma nyɔ xlunhwǎn kpɔn?» 35 Wɛnzagun lɔ́ gɔ gblɔn ní-i fáan: «Gbigbɔ Wíwé ná wa tɛ ji, xúhlɔ̌n Mawu Ajalɔ́nnɔ tɔn ná cɔn oyɛ étɔn do tɛ ji. Enɛ́wútu, ovǐ ɖée o ná ji ná nyi omɛ wíwé, ye mɔ́ ylɔ́ ɛ jan Ovǐ Mawu tɔn. 36 Kpɔn, Elizabɛti tɛ hɛ̌nnumɛ tete lɔsú mɔxo ovǐ xlunhwǎn ɖe tɔn ló nyɔ́xó étɔn mɛ, mɔ́ ló é we sín osun tlékpotɔ́ mɛ, éyɔ ɖée ye ylɔ́ jǎn wɛnsinɔ. 37 Ná onú ɖe ma glo wiwa ná Mawu!» 38 Mali gɔ gblɔn ní i fáan: «Mɛsɛntɔ́ Oklunɔ Mawu tɔn yi é wá nyɔ; ná onú ɖée o lɔ ná o e, ní nyi wiwa ɖikín o lɔ ɖó.» Wɛnzagun lɔ́ mɔ tɔnsɔ́n é de.
Mali wa dlǎ Elizabɛti kpɔn
39 Ojlɛ̌ vǔɖe godo, Mali zɔn fyákpaji mɔ nya otoxo ɖé mɛ, otoxo énɛ́ ló agbegbe Juɖe tɔn mɛ, xíɖée osó e lé. 40 É byɔ osín Zakali tɔn mɛ mɔ ɖɔnúdǒ Elizabɛti. 41 Kín Elizabɛti do se núɖɔdǒmɛ Mali tɔn, ovǐ lɔ́ hwango ló adɔgo étɔn mɛ. Elizabɛti gɔ gɔ ná Gbigbɔ Wíwé. 42 É mɔ dǒ-axó kpódǒ ogbe lélé ɖe kpó fáan: «Dǒnánɔ yi é wá ayɔ ló nyɔnu títɛkpóe mɛ, dǒnánɔ yi é wá ovǐ ɖée ló tɛ oxo mɛ. 43 Amɛ́ é wá nyɔ ná onɔ Oklunɔ tɔ tɔn ní do wa tɔ de? 44 Mɔ kpɔn, kín un do se tɛ núɖɔdǒmɛ, ovǐ ɖée ló tɔ oxo mɛ lɔ́ hwango kpódǒ ayájijɛ kpó. 45 Nújɔwunnánɔ yi é wá-ɛ, ayɔ ɖée yise fáan onú ɖée Oklunɔ Mawu lɔ ná wa cicɛmɛ!»
Ohanjiji Mali tɔn hlan Mawu
46 Mali gɔ jan fáan:
«Tɔ alíndɔ̌n nɔ kpá Oklunɔ Mawu,
47 Gbigbɔ tɔ gɔ gɔ ná ayájɛ ló Mawu tɔ hwlɛngǎntɔ́ mɛ!
48 Ná é yi nukúnjɔwǔn étɔn do kpɔn nyɔ mɛsɛntɔ́ étɔn ɖée ma nyi onú ɖe.
Ɛɛn, bɛsɔn tíi kákádonya, omɛ títɛkpóe ná nɔ ylɔ o jan nújɔwunnánɔ,
49 Ná Mawu núkpókpójikpétɔ́ ko wa onú ɖaxó-ɖaxó e ná o.
Wíwé wá nyíkɔ étɔn!
50 Xomɛjɔwǔn étɔn gbloada sɔ́n hwɛndo ɖé do jɛ hwɛndo ɖé mɛ ló omɛ ɖée ɖíbúsí-i e ji.
51 É jlɛ onú ɖaxó-ɖaxó e kpódǒ xúhlɔ̌n étɔn kpó;
É gba goyítɔ́ e do,
52 É bli xúhlɔ̌nnɔ e sɛ sɔ́n ofin yetɔn e ji,
mɔ ze omɛ ɖée zě yeɖé hwe e dǒ aga!
53 É yi onú jɔwǔn e do kpekɔná xovɛ̌tɔ́nɔ e,
Mɔ nya adɔkunnɔ e asígbǎ-alɔgbǎ.
54 É wa gɔ̌alɔ ná otogun Izlayɛli tɔn, mɛsɛntɔ́ étɔn;
É ma wɔnji nádo do xomɛjɔwǔn étɔn xlɛ,
55 Ɖikín é lɔ ná otɔ́gbǒ mítɔn e ɖó,
ná Ablaxamu kpódǒ okúnkan étɔn e kpó kákádonya.»
56 Mali gɔ nɔ Elizabɛti de ná osun atɔn wunkɔ, mɔ lɛkɔnya osín étɔn mɛ.
Jiji Jaan tɔn
57 Ovǐjihwenu Elizabɛti tɔn kpe, é mɔ ji ovǐ xlunhwǎn ɖékpo. 58 Kɔ́mɛnu étɔn e kpó hɛ̌nnumɛ étɔn e kpó se fáan Oklunɔ Mawu do xomɛjɔwǔn ɖaxó étɔn xlɛ́ ɛ, ye mɔ gɔ jayá xɛ́ ɛ. 59 Kín ovǐ lɔ́ do ɖo azǎn cyantɔn, yě wa nádo gboada ní-i. Yě jlo ná ylɔ́-ɛ jan Zakali, nyíkɔ otɔ́ étɔn tɔn. 60 Amɔ̌, onɔ étɔn yixó mɔ lɔ ná ye fáan: «Ehěo! Jaan ovǐ lɔ́ ná nyi.»
61 Ye mɔ gblɔn ní-i fáan: «Omɛ ɖé ma gǎ nyí ítɔ́ ló tɛ hɛ̌nnumɛ nɛ́!» 62 Yě yi alɔ do kanse otɔ́ lɔ́ fáan: «Namú o jlo fáan ovǐ lɔ́ ní nyi?» 63 Zakali byɔ onú ɖée ji ye kán owé dǒ, mɔ kan fáan: «Nyíkɔ étɔn wá Jaan.» É mɔ gɔ kpacá ye omɛ kpó. 64 Lo afɔɖékpolɔ́ji, nugbɛn Zakali tɔn hun, oɖɛ́ étɔn mɔ tunkan, é mɔ cɛ oxó lɔ, mɔ cɛ gigo kpa ná Mawu. 65 Obú jɛ kɔ́mɛnu yetɔn títɛkpóe ji; omɛ e mɔ nɔ lɔ́ onú ɖée jɔ lɔ́ títɛkpóe ló osóyígba Juɖe tɔn kpéte mɛ. 66 Omɛ ɖée se onú lɔ́ e hɛn dǒ ayixa yetɔn mɛ mɔ́ kánsé yeɖé fáan: «Amú ovǐ éxe wazě ná wa nyí?».
Núgbǒ, xúhlɔ̌n Oklunɔ Mawu tɔn ló kpɔ́ kpó ovǐvǔ lɔ́ kpó.
Zakali kpa xomɛjɔwǔn Mawu tɔn
67 Gbigbɔ Wíwé gɔflǎ Zakali otɔ́ ovǐ lɔ́ tɔn mɛ, é mɔ cɛ oxó ɖée Mawu lɔ ní-i lɔ fáan:
68 «Kpikpa hlan Oklunɔ, Mawu Izlayɛli tɔn!
Ɖó é wa gɔ̌alɔ ná otogun étɔn mɔ tún-i dǒte.
69 É ɖo hwlɛngǎntɔ́ xúhlɔ̌nnɔ ɖé hlǎn mí sɔ́n okúnkan axɔ́lú Davidi mɛsɛntɔ́ étɔn tɔn mɛ.
70 Onú énɛ́ wá onú ɖée é ko lɔ xóxó gbɔn gbeyílɔtɔ́ wíwé étɔn e dali.
71 É dokpa fáan: Yelɔ́ ná hwlɛn mí gan sɔn kɛntɔ́ mítɔn e sí,
mɔ́ ɖe mí sɔn alɔ omɛ ɖée gbɛwánná mí títɛkpóe tɔn mɛ.
72 É do xomɛjɔwǔn étɔn xlɛ otɔ́gbǒ mítɔn e, mɔ flin alɛnu wíwé étɔn.
73 Ná Mawu ko dokpa ná otɔ́gbǒ mítɔn Ablaxamu fáan,
74 yelɔ́ ná hwlɛn mí sɔn alɔ kɛntɔ́ mítɔn e tɔn mɛ,
ná mí ní do sɛ́n ɛ ma ɖibú;
75 Énɛ́, mí ní do nyi wíwé kpódǒ dǒdónɔ kpó lo gbɛzǎn mítɔn títɛkpóe mɛ.
76 Ovǐ tɔ, ye ná ylɔ ayɔ jan gbeyílɔtɔ́ Mawu Ajalɔ́nnɔ tɔn,
ná o ná zinzɔnlin lo Oklunɔ nukɔn,
nádo wleawú na alixo étɔn e,
77 nádo hɛn wa núnyínyɔ́ mɛ na otogun étɔn fáan,
Mawu ná wa hwlɛn ɛ gan gbɔn joná nyladǒ étɔn e dali.
78 Ná éxe wá sínsɛ́n xomɛjɔwǔn sisósisó Mawu mítɔn tɔn;
é ná hɛn hǐnhɔ́n ɖe sɔn Olɔ́n ta do mí ji,
hǐnhɔ́n ɖée ná jɔ hǐnhɔ́n ohwezizɛ tɔn wunkɔ.
79 Hǐnhɔ́n énɛ́ ná ta do omɛ ɖée ló zinvlu kpó oyɛ okú tɔn mɛ kpó e ji,
mɔ gɔkɔ na afɔ mítɔn e do alixo huhwɛ̌ tɔn ji.»
80 Jaan ovǐvǔ lɔ́ nɔ hwɛ̌n, gbigbɔ étɔn mɔ nɔ mɔ́ xúhlɔ̌n yí. É nɔ danklóji kákájɛ azǎn ɖée gbe é do éɖe xlɛ Izlayɛlivǐ e lé.