É jɛ fáan mi ní lɛnvɔjɔ
13
1 Lo sáa énɛ́ mɛ, omɛ ɖɛhwlɛn wa lɔ́ ná Jesu kín ogǎn Pilati zɔn ye mɔ hu Galilenu e ló ojlɛ̌ ɖée mɛ Galilenu énɛ́ e nɔ sán-avɔ̌ hlǎn Mawu le. 2 Jesu gblɔn ná ye fáan: «Bé mi lɛn fáan Galilenu énɛ́ e gɔ nyi nyladǒnɔ hugán Galilenu ɖée kpo e wútu ye do ku okú alɔkpa énɛ́ nɛ? 3 Ehěo, amɔ̌ un nɔ lɔ ná mi fáan ényí mi ma lɛnvɔjɔ, mi omɛ kpó yi é ná ku ɖikín ye ku ɖó. 4 Kayí gbɛtɔ́ fɔtɔnnukun-atɔn ɖée ji kpetlézin Silowe tɔn hɔ jɛ mɔ hu, mi lɛn fáan yelɛ nyi hwɛhutɔ́ hugán Jeluzalɛmu toxomɛnu ɖée kpo e nɛ? 5 Ehěo, un gbɛ ná mi. Amɔ̌ ényí mi ma lɛnvɔjɔ, mi omɛ kpó yi é ná ku ɖikín ye ku ɖó.»Jesu yi votín ɖe do doló
6 Jesu doló éxe fáan: «Dǎwe ɖé ɖo votín ɖe, ɖée é do dǒ vɛɛngle étɔn mɛ. É wa nádo gbɛn sínsɛ́n lo é ji, gbɛ̌ é ma mɔ ɖékpékpé. 7 É lɔ ná nukúnkpévɛɛnglegotɔ́ lɔ́ fáan: “Kpɔn! Sɔ́n oxwe atɔn we gbɔ̌n yi un nɔ wá xítɔ nádo mɔ sínsɛ́n ɖe gbɛn lo votín éxe ji gbɛ̌ ma gǎ mɔ́ ɖékpékpé. Sán ɛ dlǎn! Amúwútu é ná do lo ayígba zan kɔn do tata mɛ?” 8 Amɔ̌ nukúnkpévɛɛnglegotɔ́ lɔ́ gblɔn ní i fáan: “Ogǎn tɔ! Jǔ i do na oxwe éxe dogɔ. Un ná kun odo lɛdǐ i mɔ do ogbǒkɔ́ é mɛ. 9 Vlavo é ná wa ná sínsɛ́n lo ézɛn godo. Ényí é ma ga wa nyí ítɔ́, o mɔ́ sán ɛ dlǎn!”»
Jesu gbɔ-awutu ná náwe ɖé ló gbɔjɛ̌zǎn Juu e tɔn gbe
10 Jesu nɔ kplɔ́nnú omɛ e ló gbɔjɛ̌zǎn Juu e tɔn gbe ló kpíkplítɛn yetɔn ɖé mɛ. 11 Náwe ɖé ló xínɛ́tɔ́, omɛ ɖée gbigbɔ mawé ɖe hɛn lɛzun awutunɔ ló oxwe fɔtɔnnukun-atɔn we gbɔ̌n, é zɔ̌n cɔ́cɔ́ gbɛ̌ é ma singǎn jlɔ ɖékpékpé. 12 Kín Jesu do mɔ náwe lɔ́, é ylɔ́ ɛ mɔ lɔ ní i fáan: «Náwe! Tɛ awutu gbɔ!» 13 É ze alɔ étɔn dǒ náwe lɔ́ ji, tlóló náwe lɔ́ jlɔ mɔ cɛ gigokpa ná Mawu.
14 Amɔ̌, xomɛgble ogǎn kpíkplítɛn lɔ́ tɔn ɖó Jesu gbɔ-awutu ná omɛ ló gbɔjɛ̌zǎngbe wútu. É lɔ ná otogun lɔ́ fáan: «Azǎn tlékpo ye nádo wazɔ̌n. Ényí mi jlǒ ná mɔ azɔnhɛngbɔ, mi nɔ wa lo azǎn énɛ́ e gbe. Amɔ̌ ní gɔ nyi gbɔjɛ̌zǎngbe le!»
15 Oklunɔ Jesu gblɔn ní i fáan: «Yɛmɛnúwatɔ́ e mi! Bé ɖékpe-ɖékpe mitɔn ma tún oni kayí osɔ́kɛ́tɛ́kɛ́tɛ́ étɔn sɔ́n okpómɛ mɔ́ hɛ̌n nyá sinnutɛn ló gbɔjɛ̌zǎngbe wɛ? 16 Jǎn náwe éxe ga lo, kúnkan Ablaxamu tɔn ɖée Satan bla sɔ́n oxwe fɔtɔnnukun-atɔn we gbɔ̌n, bé é ma jɛ fáan ye ní tunkan ní i lo gbɔjɛ̌zǎngbe wɛ?»
17 Kín Jesu do gblɔn oxó énɛ́, winnyá ɖaxó ɖe hu kɛntɔ́ étɔn e amɔ̌ otogun lɔ́ kpéte nɔ jayá ná nújyawú ɖée Jesu nɔ wá títɛkpóe wútu.
Amú go ye singǎn jlɛ axɔ́lúɖu Mawu tɔn do?
(Matye 13.31-33/ Maaki 4.30-32)
18 Jesu lɔ fáan: «Amú Axɔ́lúɖu Mawu tɔn jɔ? Amú go un singǎn jlɛ ɛ do? 19 Ye singǎn jlɛ̌ ɛ do atínkún flínflín ɖe go, ɖée dǎwe ɖé ze mɔ do dǒ jikpá étɔn mɛ. É wu mɔ lɛzun atín ɖaxó, oxɛ e mɔ́ wá ɖó adɔ̌ yetɔn dǒ atínla étɔn e mɛ.»
20 Jesu gɔ lɔ fáan: «Amú go un singǎn jlɛ Axɔ́lúɖu Mawu tɔn do? 21 Ye singǎn jlɛ̌ ɛ do otɔ́n go, ɖée nyɔsi ɖé hlǔ dǒ yovolofín susu mɛ káká lofín nyinya lɔ́ kpéte dǒ fɔ́n.»
Mi gbɔn xɔnutonu bíbó mɛ
(Matye 7.13-14, 21-23)
22 Jesu wle alixo kpanta Jeluzalɛmu toxomɛ, mɔ nɔ kplɔ́nnú omɛ e gbɔn otoxo kpó gletoxo e kpó mɛ. 23 Omɛ ɖé kansí i fáan: «Oklunɔ! Bé gbɛtɔ́ vǔɖe yi jǎn é ná mɔ hwlɛngǎn?» É gblɔn ná ye fáan: 24 «Mi dogǎn nádo gbɔn xɔnutonu bíbó lɔ́. Ná un nɔ lɔ́ na mi fáan, omɛ susu ná din ná byɔ gbɛ̌ ye ma singǎn.
25 Sáa ɖée mɛ síntɔ́ ná fɔn mɔ́ su ohɔn, byɛ omɛ ɖée ló gbawungba e ná cɛ ohɔn xúxú mɔ́ lɔ fáan: “Oklunɔ! Hun ohɔn na mí”. É mɔ́ gblɔn na mi fáan: “Un ma nyɔ́ mi!” 26 Tíi, mi ná cɛ lilɔ fáan: “Byɛ́ ɖu mɔ nu xɛ́ ayɔ! O gɔ kplɔnnú omɛ e gbɔn alixo otoxo mítɔn e tɔn ji.” 27 Síntɔ́ lɔ́ mɔ gblɔn na mi fáan: “Un ma nyɔ́ mi, mi omɛ kpó, mi sɛ jɛ lá na o, byɛ azɔ̌n nylakanwatɔ́ e mi!” 28 Lo xínɛ́tɔ́ mi ná vi-avǐ mɔ́ ɖu aɖúkúnkun sáa ɖée mɛ mi ná mɔ Ablaxamu, Izaki, Jakɔbu kpó gbeyílɔtɔ́ Mawu tɔn títɛkpóe kpó lo Axɔ́lúɖu Mawu tɔn mɛ, jǎn ye mɔ́ ga nya byɛ jɛgě. 29 Gbɛtɔ́ e ná wa sɔ́n hwezɛtɛn, hwenyaxɔ, agěwaji kpó oxuwaji kpó mɔ́ sin-awán lo nuɖuɖukákɔn lo Axɔ́lúɖu Mawu tɔn mɛ. 30 Lo énɛ́ mɛ, ɖɛhwlɛn lo omɛ ɖée nyi godotɔ́ e mɛ ná wa lɛ́zun nukɔntɔ́ jǎn ɖɛhwlɛn lo omɛ ɖée nyi nukɔntɔ́ e mɛ mɔ́ wa lɛ́zun godotɔ́.»
Jesu ɖo lɛ́blánú hlan Jeluzalɛmunu e
(Matye 23.37-39)
31 Lo sáa énɛ́ mɛ, Falizi ɖěhwlɛn sɛwa Jesu de mɔ lɔ ní i fáan: «Ogǎn Eloɖu Antipasi jlo ná hu i, énɛ́wútu, tɔnsɔn xítɔ mɔ nya xiɖevo!» 32 Jesu gblɔn ná ye fáan: «Mi nya lɔ na dǎwe ayixa gɛ̌dɛ́gɛ̌dɛ́nɔ ɖi wɔ̌túkpwɛ énɛ́ fáan: “Un nɔ nyá gbigbɔ mawé e jɛ̌gě mɔ gɔ nɔ hɛ̌n awutu gbɔ̌ na gbɛtɔ́ e ló égbě kpó ézɛn kpó jǎn lo azǎn atɔntɔ́gbe, un ná fo tɔ azɔ̌n.” 33 Amɔ̌, é ló dandanmɛ fáan, un ní lo zɔnlinzin kɔn lo égbě, ézɛn kpó azǎn atɔntɔ́gbe kpó, ná é ma jɛ fáan gbeyílɔtɔ́ ɖe ní ku lo xiɖevo zɛ Jeluzalɛmu toxomɛ go.»
34 «Jeluzalɛmunu e! Jeluzalɛmunu e! Byɛ ɖée hǔ gbeyílɔtɔ́ Mawu tɔn e mɔ gɔ̌ dlǎn osé dǒ hǔ mɛɖóhlan Mawu tɔn e! Jɔ nɛmú un jlǒ ná bɛ mi kpli do nyɔɖé de ɖikín koklonɔ kplí ovǐ étɔn e dǒ awafún étɔn e glɔ ɖó, gbɛ̌ mi ma jlo! 35 Yíwe! Oklunɔ Mawu ná jo osín mitɔn do na mi. Amɔ̌, un nɔ lɔ́ na mi fáan: mi ma ló nyɔ ná mɔ kɔn ba kákájɛ sáa ɖée mɛ mi ná wa lɔ́ fáan: “Dǒnánɔ wá omɛ ɖée wazě lo nyíkɔ Oklunɔ tɔn mɛ!”»