Zace mɔ hwlɛngǎn
19
1 Jesu byɔ Jeliko mɔ nɔ gbɔ̌n otoxo lɔ́ mɛ fɛ́. 2 Dǎwe ɖé gǎ ló otoxo lɔ́ mɛ, ye mɔ́ ylɔ́ ɛ jǎn Zace, omɛ ɖée bayí ogǎn tokwácántɔ́ e tɔn mɔ gɔ bayí adɔkunnɔ. 3 É nɔ dǐn ná mɔ omɛ ɖée wá Jesu lɔ́ amɔ̌ é ma singan mɔ ɛ, ɖó gbɛtɔ́ su wútu, éyɔ gɔ bayí gbɛtɔ́ gwlí. 4 É dowezun nya nukɔn mɔ xɛ atín ɖée ye ylɔ́ jǎn sikomɔɔ ji, nádo singǎn mɔ Jesu ɖée ɖo ná gbɔn xínɛ́tɔ́ fɛ. 5 Kín Jesu do jɛ xínɛ́tɔ́, é jlɔkɔkpɔn aga mɔ lɔ ná Zace fáan: «Zace! Yawú jɛte, ná é jɛ fáan un ní nɔ tɛ sínmɛ lo égbě.» 6 Zace gɔ yawú jɛte mɔ kɛ-alɔyi Jesu kpódǒ xomɛhunhun kpó. 7 Kín omɛ e do mɔ jan ítɔ́, ye omɛ kpó cɛ hunhlún mɔ nɔ lɔ́ fáan: «Dǎwe éxe nya jɛ gbɛtɔ́ nyladǒnɔ ɖé xwɛ.» 8 Amɔ̌ Zace nɔte ló Oklunɔ Jesu nukɔn mɔ lɔ ní i fáan: «Oklunɔ! Un ná na mado-awe tɔ adɔkun e tɔn wamamɔnɔ e, ényí fáan un ko tafú omɛ ɖé mɔ yi onú ɖe lo é si ɖá, un ná gɔ onú lɔ́ sín donu ɛnɛ jo na omɛ lɔ́.» 9 Jesu lɔ ní i fáan: «Lo égbě, Mawu hwlɛn hwɛndo éxe gan, ɖó dǎwe éxe jɔsɔ́n Ablaxamu sín okúnkan mɛ kpógba. 10 Ná Ovǐ Gbɛtɔ́ tɔn wa nádo din mɔ́ gɔ hwlɛn ye omɛ ɖée bu e gan.»Jesu doló dǒ síkakwá e go
(Matye 25.14-30)
11 Kín omɛ e do nɔ ɖótó oxó énɛ́ e, Jesu gɔ doló ɖevo ná ye ɖó é ko sɛkpɔ Jeluzalɛmu toxomɛ wútu jǎn ye mɔ nɔ lɛ́n fáan Axɔ́lúɖu Mawu tɔn ná sɔ-awúxlɛ haɖékpolɔ́. 12 Enɛ́wútu, Jesu lɔ ná ye fáan: «Dǎwe nukúnɖéji ɖé yí é fɛwungɔ oto dindɛn ɖé mɛ ná ye ní do yí i do ɖo axɔ́lú jǎn lo énɛ́godo, é mɔ́ lɛkɔ. 13 Hwɛ̌kpó é nádo sɔn, é ylɔ awó ló mɛsɛntɔ́ étɔn e mɛ, mɔ ma síkakwá ɖékpe-ɖékpe ná ye mɔ lɔ ná ye fáan: “Mi yi do wajɔ̌ káká jɛ sáa ɖée mɛ un ná lɛkɔ le”. 14 Amɔ̌ oto étɔn mɛnu e gbɛwán ní i jǎn ye mɔ ɖe omɛ e dǒ godo ní i nádo nya lɔ na omɛ ɖée ná yí i do ɖo axɔ́lú lɔ́ fáan: “Mí ma jlo fáan dǎwe énɛ́ ní ɖu axɔ́lú na mí.”
15 Kín ye do yi i do ɖo axɔ́lú, é wa lɛkɔnya oto étɔn mɛ. É ylɔ mɛsɛntɔ́ ɖée é ma okwá ná e, nádo nyɔ ale ɖée ye ɖu. 16 Mɛsɛntɔ́ tíntán wa mɔ lɔ fáan: “Ogǎn! Síkakwá tɛ ji síkakwá awó!” 17 É lɔ ná mɛsɛntɔ́ lɔ́ fáan: “É jɔwun ganji, mɛsɛntɔ́ jɔwǔn yi é wɛ́ ɛ, ɖó o nɔ gbeji ló onú vǔɖe mɛ wútu. Un yi i do ɖo ogǎn dǒ otoxo awó ji!” 18 Mɛsɛntɔ́ awetɔ́ wa mɔ lɔ fáan: “Ogǎn! Tɛ síkakwá ji síkakwá atɔ́n.” 19 É lɔ ní i fáan: “Ayɔ tete lɔsú, un yi i do ɖo ogǎn dǒ otoxo atɔ́n ji!” 20 Mɛsɛntɔ́ ɖevo gɔ wa mɔ lɔ fáan: “Ogǎn! Tɛ síkakwá we! Un sín i dǒ dǔku ɖé mɛ mɔ ze sɛɖo. 21 Ná un nɔ ɖíbú nɛ́ ɛ wútu, ɖó gbɛtɔ́ fifyɛtɔ́ ɖe yí é wɛ́ ɛ, jǎn onú ɖée o ma ze jla yi o zě, o mɔ́ gɔ̌ gbɛ̌n onú ɖée o ma do.” 22 Axɔ́lú lɔ́ gblɔn ní i fáan: “Mɛsɛntɔ́ gbǐgblé! Oxó tɛ e yí un ná yi do ɖɔhwɛ de. O nyɔ́ fáan gbɛtɔ́ fifyɛtɔ́ ɖe yi é wá o, jǎn onú ɖée ma zejlǎ yí mɔ́ nɛ un yí mɔ́ gbɛ̌n onú ɖée ma do. 23 Amúwútu o ma ze tɔ okwá do kwásɛɖótɛn ɖé jǎn ényí un wa lɛkɔ, mɔ̌ do mɔtɛn yi okwá lɔ́ kpódǒ okwávǐ étɔn e kpó wɛ́?” 24 Enɛ́godo, ogǎn lɔ́ lɔ ná omɛ ɖée ló xínɛ́tɔ́ e fáan: “Mi yi síkakwá lɔ́ sɔn é si, mɔ ze na omɛ ɖée ɖo awó.” 25 Omɛ ɖée ló xílɔ́ e lɔ ní i fáan: “Ogǎn! Éyɔ ka ko ɖo síkakwá awó ma!” 26 É gblɔn ná ye fáan: “Ná lɔ́ na mi: ná omɛ ɖée ko ɖo onú ɖe yi ye ná na dogɔ, amɔ̌ ná omɛ ɖée ma ɖo ɖé, ye ná gɔ yi onú vǔɖe ɖée é ɖo lɔ́ sɔn é si. 27 Hlan tɔ kɛntɔ́ ɖée ma jlo fáan un ní ɖu-axɔ́lú na ye e, mi kplan ye wa xítɔ mɔ gbogba na ye lo tɔ nukunmɛ.”»
Jesu byɔ Jeluzalɛmu
(Matye 21.1-11/ Maaki 11.1-11/ Jaan 12.12-19)
28 Lo oxó énɛ́ e sín godo, Jesu jɛnukɔn ná otogun lɔ́ mɔ ɖedǒ Jeluzalɛmu toxomɛ. 29 Kín Jesu do sɛkpɔ gletoxo Bɛtifaje tɔn kpó Betani tɔn kpó ló osó ɖée ye ylɔ́ jǎn osó ɖée ji olívitín e lé sín akpá, é do núkplɔ́ntɔ́ étɔn awe hlan 30 mɔ lɔ ná ye fáan: «Mi nya gletoxo ɖée kpannukɔn mi mɛ! Ényí mi byɔ́ gletoxo lɔ́ mɛ, mi ná mɔ osɔ́ kɛ́tɛ́kɛ́tɛ́vǔ ɖékpo lo sinsin, ɖée ji omɛ ɖé ma xɛ kpɔn, mi tún i mɔ dɔn ɛ wa. 31 Ényí omɛ ɖé kánse mi fáan: “Amúwútu mi do nɔ tún i?” Mi gblɔn na omɛ lɔ́ fáan: “Oklunɔ ɖo hudǒ étɔn.”»
32 Omɛ ɖée Jesu do hlan lɔ́ e nya mɔ mɔ onú lɔ́ e ɖikín é lɔ ná ye jan. 33 Kín ye do nɔ tún osɔ́ kɛ́tɛ́kɛ́tɛ́vǔ lɔ́, omɛ ɖée tɔn wá osɔ́ kɛ́tɛ́kɛ́tɛ́ lɔ́ e kanse ye fáan: «Amúwútu mi do nɔ tún osɔ́ kɛ́tɛ́kɛ́tɛ́vǔ lɔ́?»
34 Yě gblɔn fáan: «Ná Oklunɔ ɖo hudǒ étɔn wútu.» 35 Yě kplan osɔ́ kɛ́tɛ́kɛ́tɛ́vǔ lɔ́ wa ná Jesu mɔ tɛ awu yetɔn e dǒ é ji mɔ ze Jesu sin-awán dǒ é ji. 36 Kín Jesu do nɔ sɔ́n, gbɛtɔ́ e nɔ tɛ́ awu yetɔn e dǒ alixo ji. 37 É ko sɛkpɔ Jeluzalɛmu, mɔ nɔ jɛ̌te sɔ́n osó ɖée ji olívitín e lé, xomɛ ɖaxó ɖe hun núkplɔ́ntɔ́ kplankplan ɖée xodǐ i e, ye mɔ cɛ gigo kpa ná Mawu kpódǒ ogbe lélé ɖe kpó ná nújyawú ɖée ye ko mɔ títɛkpóe wútu. 38 Ye nɔ lɔ́ fáan: «Ná Mawu ní dona axɔ́lú lɔ́ ɖée wazě ló Oklunɔ Mawu sín nyíkɔ mɛ! Huhwɛ̌ ní ɖe lo olɔ́nmɛ, ná gigo ní mɔ nyi Mawu tɔn lo olɔ́nmɛ!»
39 Falizi ɖɛhwlɛn ɖée ló otogun lɔ́ mɛ e lɔ ná Jesu fáan: «Mɛkplɔ́ntɔ́! Ɖegbe na tɛ núkplɔ́ntɔ́ e ná ye ní nɔ-abwɛ́!»
40 É gblɔn ná ye fáan: «Ná lɔ na mi: ényí yelɛ dɛ̌ nɔ-abwɛ́, osé e ná do-axó!»
Jesu vi-avǐ ná Jeluzalɛmu tɔn wútu
41 Kín Jesu do sɛkpɔ Jeluzalɛmu mɔ mɔ otoxo lɔ́ hlan, é vi-avǐ dǒ takún étɔn mɛ 42 mɔ lɔ fáan: «Có, Jeluzalɛmunu e! Ényí byɛ tete lɔsú ko nyɔ onú ɖée ná hɛn huhwɛ̌ wa na mi lo égbě nɛ! Amɔ̌ lo tíi, onú lɔ́ nyi zǐzé bɛ dǒ mi. 43 Ojlɛ̌ lɔ́ ná wa kɛntɔ́ mitɔn e mɔ́ ɖo adǒ ɖaxó lɛdǒ otoxo mitɔn, mɔ́ xalɛdǐ i, mɔ́ glɔn mi lo awakpá títɛkpóe mɛ. 44 Ye ná va byɛ kpó otoxo mitɔn kpéte kpó sudǒ, gbɛ̌ osín ɖe ma ná gɔ kpo lo ote, ná mi ma nyɔ́ ojlɛ̌ ɖée mɛ Mawu wa byɛ de nádo hwlɛn mi gan le wútu.»
Jesu nya ajɔ̌watɔ́ e sɔ́n osín Mawu tɔn mɛ
(Matye 21.12-17/ Maaki 11.15-19/ Jaan 2.13-22)
45 Jesu byɔ osín Mawu tɔn mɛ mɔ cɛ núsatɔ́ e nya. 46 É lɔ ná ye fáan: «Yě ko kan fáan: “Osín tɔ, osín oɖɛ tɔn é ná nyi”. Amɔ̌ byɛ ga yí i do bayí bibɛtɛn ajogǎn e tɔn!»