Jesu fɔnsɔ́nkú
(Matye 28.1-10/ Maaki 16.1-8/ Jaan 20.1-10)
24
1 Lo awlɛnzǎngbe, lo klɛmɛ flifli, nyɔnu e wa oyɔdo lɔ́ kɔn mɔ hɛn núsísá owán jɔwun-jɔwǔnnɔ ɖée sín awú ye ko wle tɔn kpó wa. 2 Yě mɔ fáan yě ko bli osé ɖée cɔn oyɔdo lɔ́ sɛ dǒ kɛ́ɖékpo. 3 Yě gɔ byɔ oyɔdo lɔ́ mɛ gbɛ̌ ye ma mɔ ocɔ Oklunɔ Jesu tɔn. 4 Ye ma gɔ̌ nyɔ́ onú ɖée ye ná bayí jǎn tlóló, dǎwe awe ɖɛhwlɛn ɖée do awu sísɛ́ mɔ sɔ-awúxlɛ ló nukɔn yetɔn. 5 Obú jɛ nyɔnu lɔ́ e ji, ye mɔ dokɔdo. Dǎwe awe éxe e lɔ ná ye fáan: «Amúwútu mi nɔ dǐn omɛ ɖée ló ogbɛ ló omɛ kúkú e mɛ? 6 É ma gɔ̌ ló xítɔ, é ko fɔnsɔ́nkú. Mi flin oxó ɖée é lɔ ná mi kín é dǒ ló Galile, 7 é lɔ fáan: “Yě ɖo ná jo Ovǐ Gbɛtɔ́ tɔn na nyladǒnɔ e, ye mɔ́ xwí i do satín ji jǎn lo azǎn étɔn atɔntɔ́gbe, é ná fɔnsɔnkú.”»8 Sáa énɛ́ mɛ, yě wa flín oxó Jesu tɔn e. 9 Yě tɔnsɔ́n oyɔdo lɔ́ kɔn mɔ nya ɖogbe onú énɛ́ títɛkpóe tɔn ná mɛɖóhlan wlókpo e kpó omɛ ɖevo e kpó. 10 Nyɔnu lɔ́ e wá: Mali Magidala toxomɛnu, Jani kpó Mali onɔ Jaki tɔn kpó. Yelɛ kpó nyɔnu ɖevo ɖée ló kpɔ́ kpó ye kpó yi é ɖogbe onú lɔ́ e tɔn ná mɛɖóhlan e. 11 Amɔ̌, mɛɖóhlan e ylɔ oxó yetɔn e jan oxófúlɔ gbɛ̌ ye ma yi ye se. 12 Cógancó, Pyɛɛ fɔntite mɔ hɔnwezun nya oyɔdo lɔ́ kɔn. Kín é do jɛ xínɛ́, é wɛdǎ mɔ kpɔn é mɛ hlan, é ma gɔ mɔ onú ɖe hugan avɔn ɖée ye lilɛ́ dǒ ocɔ lɔ́ có gě. É wa lɛ́kɔnya osín étɔn mɛ, avovǔ i tlala dǒ onú ɖée jɔ lɔ́ go.
Jesu sɔ-awúxlɛ núkplɔ́ntɔ́ étɔn e ló alixo Emawusi tɔn ji
13 Lo azǎn ɖékpolɔ́ ji, núkplɔ́ntɔ́ Jesu tɔn awe fɛwungɔ Emawusi, gletoxo ɖée ló alijlɛ̌kan wyawe wunkɔ dǒ Jeluzalɛmu toxo. 14 Ye nɔ lɔ́xó xɛ́ yenɔzo dǒ onú ɖée jɔ títɛkpóe go. 15 Oxó énɛ́ e lɔ kɔn ye lé mɔ nɔ dɔ̌nnú ló yeɖé cincín, jǎn Jesu lɔsú mɔ dɔnsɛkpɔ ye mɔ cɛ xixodǒ ye. 16 Ye nɔ mɔ́ ɛ amɔ̌ onú ɖe cɔn nukún yetɔn ji gbɛ̌ ye ma nyɔ́ fáan éyɔ nɛ. 17 É kanse ye fáan: «Oxó ɖemú lɔ kɔn mi gǎ le ló alixo ji?» Yě gɔ nɔte mɔ́ ló awúblámɛ.
18 Omɛ ɖékpo lo yemɛ ɖée ye ylɔ́ jǎn Kleopasi gblɔn ní i fáan: «Bé ayɔ có gě wá jonɔ ɖée ló Jeluzalɛmu toxomɛ mɔ dɛn onú ɖée jɔ ló azǎn éxe e mɛ?» 19 É kanse ye fáan: «Amú é ga jɔ?» Yě gblɔn ní i fáan: «Onú ɖée jɔ gbɔn Jesu Nazalɛti toxomɛnu tɔn dali, omɛ ɖée nyi gbeyílɔtɔ́ xúhlɔ̌nnɔ Mawu tɔn ló oxógbe kpó owalɔ kpó mɛ ló Mawu kpó otogun lɔ́ kpéte kpó nukɔn, 20 jǎn avɔ̌sántɔ́gǎn kpó ogǎn mítɔn e kpó mɔ wa zǐ i jo, ye mɔ dakúhwɛ ní i mɔ xwí i dǒ satín ji. 21 Byɛ́ gǎ ló nukúnɖíɖó mɛ fáan éyɔ wá omɛ ɖée ná wa tún otogun Izlayɛli tɔn dote. Yíwe, onú wa jɔ̌ jan ítɔ́ sɔn azǎn atɔn we gbɔ̌n. 22 Nyɔnu ɖɛhwlɛn tɔnsɔ́n byɛ́tete lɔsú e mɛ mɔ gba ayixa do ná mí. Ye fɔnzǎngbǒ nya oyɔdo lɔ́ kɔn, 23 gbɛ̌ ye ma mɔ ocɔ Jesu tɔn. Yě gɔ lɛkɔwa fáan ye mɔ wɛnzagun e sɔ-awúxlɛ ye mɔ lɔ ná ye fáan Jesu ló ogbɛ. 24 Lo ye omɛ ɖée ló kpɔ́ kpó mí kpó e mɛ, omɛ ɖɛhwlɛn gɔ nya oyɔdo lɔ́ kɔn mɔ mɔ onú e ɖikín nyɔnu lɔ́ e ko lɔ ɖó, amɔ̌ ye ma mɔ Jesu.»
25 Tíi, Jesu lɔ ná ye fáan: «Gbɛtɔ́ wunvinɔ e mi! Namú kpósin é ná dɛn sɔ hwɛ̌kpó mi nádo yi onú kpókpó ɖée gbeyílɔtɔ́ Mawu tɔn e lɔ se?» 26 Bé é ma ló dandan mɛ fáan Klisti Hwlɛngǎntɔ́ lɔ́ ní jiya gbɔn ítɔ́ hwɛ̌kpó do byɔ gigo étɔn mɛ wɛ? 27 Tíi, é wa ná nukúnnúmɔjɛ onú mɛ ye dǒ onú ɖée ye ko kan hlan dali étɔn ló oxó Mawu tɔn mɛ, bɛsɔn owé Mɔyizi tɔn e ji kákájɛ owé gbeyílɔtɔ́ Mawu tɔn títɛkpóe mɛ.
28 Kín ye do sɛkpɔ gletoxo ɖée mɛ ye fɛwungɔ, Jesu bayí onú ɖi omɛ ɖée nɔ sɔ́n nyá nukɔn wunkɔtɔn. 29 Amɔ̌, yě hɛ̌n ɛ dǒte vǐvɛ́vǐvɛ́ fáan: «Nɔ mí de, ná awán ko nɔ cɔ́n!» É gɔ byɔ osínmɛ nádo nɔ okpɔ́ kpódǒ ye kpó. 30 Kín é dǒ ló nuɖuɖukákɔn kpódǒ ye kpó, é yi akla mɔ dokpɛ́ ná Mawu, é fɛ́n ɛ mɔ yi ná ye. 31 Lo sáa énɛ́ mɛ, nukún yetɔn e wa hǔn, ye mɔ nyɔ́ ɛ, amɔ̌ é bu sɔ́n nukɔn ná ye. 32 Yě wa cɛ́ oxó kanse yeɖé fáan: «Bé ayixa mítɔn e ma mɔ awúvivi ɖaxó kín é do nɔ lɔ́xó xɛ́ mí ló alixo ji kpó sáa ɖée mɛ é gɔ nɔ ɖétakúnná oxó Mawu tɔn ná mí wɛ?»
33 Lo oganxixo ɖékpolɔ́ mɛ, yě fɔntite mɔ lɛkɔnya Jeluzalɛmu toxomɛ mɔ mɔ núkplɔ́ntɔ́ wlókpo lɔ́ e kpli kpó hǎgbɛ́ yetɔn é kpó. 34 Ye omɛ kpó lɔ ná núkplɔ́ntɔ́ awe lɔ́ e fáan: «Núgbǒ nɛ! Oklunɔ Jesu fɔnsɔ́nkú! É do éɖe xlɛ Simɔɔ!»
35 Yelɛ tete lɔsú e wa cɛ́ onú ɖée jɔ kpó ye kpó ló alixo ji lɔ ná ye, kpó kín ye wa nyɔ́ fáan Jesu nɛ ló sáa ɖée mɛ é nɔ má akla ná ye lé.
Jesu do éɖe xlɛ núkplɔ́ntɔ́ étɔn e
(Matye 28.16-20/ Maaki 16.14-18/ Jaan 20.19-23/ Azɔ̌n-yiwa 1.6-8)
36 Kín ye do nɔ lɔ́xó, Jesu tete lɔsú sɔ-awúxlɛ ló ye cincín mɔ lɔ ná ye fáan: «Ná jijɔxo ní nɔ xɛ mi!»
37 Amɔ̌ obú kpó sisɔ́sisɔ́ kpó gɔ gɔ ye omɛ kpó mɛ ɖó ye vɛdo fáan obló ɖe yí ye nɔ mɔ́ nɛ sín. 38 É gɔ lɔ ná ye fáan: «Amúwútu ayixa mitɔn nɔ gbǎdǒ? Amúwútu mi do nɔ xónúkpɔ́n?» 39 Mi kpɔn tɔ alɔ kpó tɔ afɔ e kpó, nyɔ nɛ ganji! Mi ɖo alɔ tɔ go mɔ kpɔn, ná obló ɖe ma ɖo agbasalan kayí oxú gba, ɖikín mi nɔ mɔ́ fáan un ɖo ló.
40 Kín é do lɔ onú énɛ́ e, é do alɔ étɔn kpó afɔ étɔn e kpó xlɛ ye. 41 Avo gɔ vo núkplɔ́ntɔ́ e, xomɛ yetɔn mɔ gɔ hun gancó yě gbɛkpo mɔ nɔ xónúkpɔ́n. Tíi, Jesu wa kanse ye fáan: «Bé mi ɖo nuɖuɖu ɖé ló xítɔ?»
42 Yě wa zě hweyí hihi sínsán ɖékpo ní i. 43 É ze hweyí lɔ́ mɔ ɖu ló nukún yetɔn mɛ. 44 Enɛ́godo, é wa lɔ́ ná ye fáan: «Oxó ɖée un lɔ ná mi sáa ɖée mɛ un gbɛ̌ ló mi de lé we: “É jɛ fáan onúkpókpó ɖée ye ko kan hlan tɔ dali ló Osɛ́nwéma Mɔyizi tɔn mɛ e, lo Owé gbeyílɔtɔ́ Mawu tɔn mɛ e kpó ohanwéma e mɛ kpó ní wa cicɛmɛ”.»
45 Sáa lɔ́ mɛ, é hun ayixa yetɔn, ná ye ní do mɔnukúnnújɛ oxó Mawu tɔn mɛ, 46 é mɔ lɔ ná ye fáan: «Onú ɖée ye kan dǒ Oxó Mawu tɔn mɛ wé: “É jɛ fáan Klisti Hwlɛngǎntɔ́ ní jiya, é mɔ́ gɔ fɔnsɔnkú lo azǎn étɔn atɔntɔ́gbe. 47 Lo nyíkɔ étɔn mɛ, ye ná la Oxó Mawu tɔn ná otogun títɛkpóe bɛsɔn otoxo Jeluzalɛmu tɔn ji mɔ́ lɔ na ye fáan ye ní lɛnvɔjɔ Mawu mɔ́ jo nyladǒ yetɔn e na ye.” 48 Byɛ wá kunnuɖetɔ́ onú lɔ́ e tɔn. 49 Un ná do hlan mi, onú ɖée sín okpa tɔ Otɔ́ ko do na mi. Amɔ̌, mi nɔ otoxo lɔ́ mɛ kákájɛ sáa ɖée mɛ xúhlɔ̌n Mawu tɔn ná wa jɛ̌te do mi ji le.»
Jesu nya olɔ́n mɛ
(Maaki 16.19-20/ Azɔ̌n-yiwa 1.9-11)
50 Enɛ́godo, é kplan núkplɔ́ntɔ́ étɔn e sɔ́n Jeluzalɛmu toxomɛ káká sɛkpɔ gletoxo Betani tɔn mɛ. É gɔ ze alɔ étɔn dǒ aga mɔ doná ye. 51 Kín Jesu do nɔ dǒná ye, é klan sɔ́n ye de, Mawu mɔ zǐ i nya olɔ́nmɛ. 52 Yě litakún-awán ní i mɔ lɛkɔwa Jeluzalɛmu toxomɛ kpódǒ ayájijɛ ɖaxó kpó. 53 Ye nɔ́ osín Mawu tɔn mɛ ló ojlɛ̌kpókpó mɛ mɔ́ kpá gigo ná Mawu.