Jesús rajuta pexaejawa cinco mil ponëbejejawabelia
6
Bajarapaliwaisi penajumeweretsicujinae, Jesús, pijajiwi yajawa, nicaba Galilea pucaxaneto itsapanabelia. Bajarapapuca itsawënë Tiberias.
2 Nexata, jiwi ayaibitsaëtoxaneto Jesús pënaponatsi, tsipaji cuenetanetsi Dioso pesaëta ayaicuene pexanaponaejawa, piawitanewi-ata pejamatejemaya-exanaponaejawa.
3 Nexata, Jesús junaya petsutojumabetsia. Bajarajotatsia, ecaya pijajiwi yajawa.
4 Bajarapamatacabijawa pijinia bitso baja imoxoyo pewajënae pejonejawanexa Pascuafiesta.
5 Itsa Jesús tane jiwibitsaëtoxaneto matatoyorotsia pecujibijawarenatsi, jumaitsi Felipejawabelia:
—¿Detsa belia comuatsianatsi mapabitsaëtoxaneto pexaejawa wajarajutsinexaje? —jai.
6 Bajarapacuenia Jesús jumaitsi jamatabëcuene-ëjëbiaya. Yapëtane picani xua exanaejitsia.
7 Nexata, Felipe jumaitsi Jesús-jawabelia:
—Doscientos denariocueniaa comuatsi-atatsi tsipae pan, apoyacaëjëpaetsi tsipae pexaenexa daxita mapajiwibitsaëtoxanetoje —jai.
8 Itsanë Jesús pijajiwitonë, Andrés, Simón Pedro pejuyapijinë, jumaitsi Jesús-jawabelia:
9 —Majotaje napatajopa pejewaxinëyo. Bajaraponëyo caponapona cinco papan-bëbeje, cebadabenota pexanaepan-bëanë, anijadujuainëyobeje yajawa. Itsiata, bajaraxuaxi apocaëjëpae tsipae wajarajutsinexa mapajiwibitsaëtoxanetoje —jai Andrés.
10 Nexata Jesús jumaitsi pijajiwijawabelia:
—¡Daxita bajarapamonae pa-enaeya-exanare! —jai.
Nexata, Jesús pijajiwi itoroba bajarapamonae pe-enaeya-enaenexa ponajumawereca. Bajarapajiwibitsaëtoxaneto bejamatabëcuene cinco mil meta ponëbeje.
11 Nexata, Jesús pita bajarapacinco papan-bëyobeje. Bajaraxuacujinae, pexaniajamatabëcuene rajuta Diosojawabelia bajarapapan-bëxi yabara. Xuacujinae, tsanaeya-exana pijajiwi jiwijawabelia. Bajara-icatsia pacuenia, pexaniajamatabëcuene rajuta Diosojawabelia dujuainëyobeje yabara. Xuacujinae, tsanaeya-exana pijajiwi jiwijawabelia. Daxita bajarapamonae xaniawaetsia xane.
12 Itsa baja bajarapamonae penia, Jesús jumaitsi pijajiwijawabelia:
—¡Pacaetuare baja peyajuwënëcopabenaejawanë, penaxuabenaeyaniwa! —jai.
13 Bajarapamonae caetuata cinco papan-bëmibeje peyajuwënëcopabijawanë. Doce xuabeje wënëba beyoxobocuenia pecuejawanë.
14 Nexata, bajarapajiwibitsaëtoxaneto, itsa tane Jesús bajarapapinijicuene Dioso pesaëta pexanaejawa, najumaitsi Jesús yabara:
—¡PaDiosojumepaebinë, profeta, copia-ewetawanapatsi pepatsijawanexatsica, bajarajane maponëje! —najai Jesús yabara.
15 Itsiata, Jesús wecuapona, pejamatabëcueneyapëtaexae pacuenia siwanajamatabëxainatsi bajarapamonae, pesaëta pexanaenexatsi picani pepopeyanacua-ewetsinënexa. Pewecuaponaecujinae, caenë najetaruca pinijitsutonëjawa.
Jesús najetaruca mene-itaboxoya
16 Itsa baja merawi, Jesús pijajiwi puca-itapayabereca pona, pewetsinexa.
17 Itsiata, Jesús abaxë pecuenenajematsixae, itsa baja ajena merawitsia Jesús pijajiwi runareca jera-ënëabereca, penicabinexalia Capernaúm tomarabelia.
18 Pucaxanetotuatuajëtalia pepuanajetarubenae, pewajënaewerena najetaruca ayaijowiboxaneto pebubujaijawa. Nexata, malataca bitso ayai.
19 Bajarapamonae pepuanajetarubenaelia bajarapawëpawecua bejamatabëcuene cinco, itsa jume, seis pakilómetrobeje, bajarapamonae tane Jesús penajetarucaejawarena mene-itaboxoya. BajaraPonë itsa imoxoyotanajetarucarena barcojawaberena, nexata bajarapamonae cujunawatsi.
20 Nexata, Jesús jumaitsi pijajiwijawabelia:
—¡Xanë raja najetarucajë! ¡Pëtsa panecujunawame! —jai.
21 Nexata, jamatabëcuenebarëyaya copiapitatsi. Jesús baja nexata nonorena jera-ënëaberena. Caecuenia baja Jesús, pijajiwi yajawa, pata Capernaúm tomarawëpajawabelia.
Jesús nawajunupaeba pitawapan-nëcuenia
22 Merawiapitsijawata matapania yapëtane pamonae nacopabalia puca itsapanatalia, Jesús apopenaponaejawa pijajiwi pepëta. Saya tane ëJesús pijajiwi penicabijawa itsapanabelia. Bajarapamonae yanicabalia caemota, pajera boca jerapanabota. Bajaraxuata, penacopabiwi jamatabëcuenejumaitsi: «Jesús abaxë majota nacopatanucaje», jamatabëcuenejai.
23 Bajarapaepatota, Tiberias tomarawerena, itsamonae jeranëta yaparena. Yaëba-othopa imoxoyojawata, itsajota caniwipitsijawata, Jesús pexaejawa rajuta jiwi ayaibitsaëtoxanetojawabelia, pexaniajamatabëcuene perajutsicujinae Diosojawabelia.
24 Bajarapamonae itsa yapëtane Jesús pijajiwi pebarë-ajibitsarucaejawa bajarajota, nexata pamonae Tiberias tomarawerena pamonëta yapata, juya bajarapamonëjawabereca runareca, penicabinexalia Capernaúm tomarabelia, Jesús pepëjaitsinexa.
25 Nexata, pecaxitajarabicujinaetsi Capernaúm tomarata, bajarapamonae jumaitsi Jesús-jawabelia:
—Necujarubinë, ¿detsa pacujinae patame baja maberenaje, puca-itsapanaberena? —jai.
26 Nexata, Jesús jumaitsi bajarapamonaejawabelia:
—Xaniajanë pacuenia pacatsipaebijitsiatsi. Paxamë panejaitame, tsipaji xaniawaetsia pexaejawa paxaneme xanëjawata. Apopanejaitsimë panenatoyapëtaexae pajamatabëcuene yabara pacatsi-exanatsi bajarapapinijicuenejawanë Dioso pesaëta. Bajaraxuanë patae-atamë, tsiteca pacuene-aebame Dioso tane-itorobinëtsicacuene.
27 ¡Pëtsa pasiwanacuenebame ëpewerewerecaepexaejawa yabara! ¡Biji rajane, pasiwanacuenebare apopewerewerecaepexaejawa, panexainaenexa matacabi apopewerewerecaejawa! Xanë, Daxitajiwi Pematapijinënë, pacarajutsianatsi bajarapawiria pexaejawa, tsipaji caenënë Taxa Dioso netocopata bajarapacuenia ta-exanaenexa jiwijawabelia —jai Jesús bajarapamonaejawabelia.
28 Nexata, bajarapamonae jumaitsi Jesús-jawabelia:
—¿Detsa nexata xua bepa-exanajë Dioso pejitsipaecuene? —jai.
29 Nexata, Jesús jumaitsi bajarapamonaejawabelia:
—Mara pacuene Dioso jitsipa pane-exanaenexaje. ¡Panejumexaniataema xanë Dioso tane-itorobinëcuenetsica! —jai.
30 Nexata, icatsia bajarapamonae jumaitsi Jesús-jawabelia:
—Dioso peca-itorobinëcuenetsica patacajumexaniataenexa, ¿detsa papinijicuene, Dioso pesaëta nexanaejawa, panetsita-exanaename?
31 Dioso pejumeliwaisibaxuto nacayapëtaeya-exana, pacuenia wajasalinaiwimi bajayata baxaewanapa maná petusatonacuata. Bajaraxua yabara Dioso pejumeliwaisibaxutota jumaitsi mapacueniaje: «Bajarapamonae rajutabiabatsi athëbëpijipan pexaenexa», jai Dioso pejumeliwaisibaxutota wajasalinaiwimi yabara —jai bajarapamonae Jesús-jawabelia.
32 Jesús nexata bajarapamonaejawabelia jumaitsi:
—Xaniajanë pacuenia pacatsipaebijitsiatsi. Moisés-pijinë petusatonacuata wajasalinaiwimi aporajutsi athëbëpijipan. Biji rajane, taxa Dioso bajarapapan rajutabiaba pexaejawanexa. Nexata, pijinia aeconoxae paxamë-ata Dioso pacarajutsiana pepacuene pexaniajaipan, athëbëpijijawa.
33 Bajarapa-athëbëpijipan raja, Ponë athëbëwetsica pepatsinë. BajaraPonë mapanacuapijiwijawabeliaje rajutsiana matacabi apopewerewerecaejawa —nayabarajai Jesús pijacuata.
34 Nexata, bajarapamonae apopejumeyapëtaexae, jumaitsi:
—Tajatuxanenë, bajarapapan panerajutaponaename caematacabi canacujitsia —jai.
35 Nexata, Jesús jumaitsi bajarapamonaejawabelia:
—Papan jiwi rajutsianatsi matacabi apopewerewerecaejawa, xanë rabaja bajarapapannë. Nexata, pajiwi patsiana xanëjawaberena, apopiajani cajena tsaneb pejamatabë-ëthëtota. Pajiwi xanëjawaberena nesiwanajamatabëcuenecopata, mera apojitsipae tsane.
36 Paxamë patae-atamë Dioso pesaëta pinijicuene ta-exanaejawa, itsiata panecuene-aebame.
37 Daxita pamonae taxa tanerajutsiwi, patsiana xanëjawaberena. Pajiwi patsiana xanëjawaberena, aponawecua-itawetsinë tsane.
38 Xanë apopatsinëtsica athëbëwetsica ta-exanaenexa ëtajamatabëcujirupijijawa. Biji rajane, patsicajë, ta-exanaenexa tane-itorobinëtsica pejitsipaecuenia.
39 Mara pacuene Taxa Dioso jitsipa tato-exanaenexaje. Apojitsipae cajena tatoxuabijawa caejiwi-ata tanerajutsiwiyajuwënëwi. Biji rajane, jitsipa ta-asaëya-exanaejawa daxita bajarapamonae, nacua pecopiarucaematacabita, pamatacabi tocanaëjëtsianajë jiwi pijaneconi pexainaewi.
40 Taxa Dioso, Ponë nitorobica, bitso baja cajena jitsipa, jiwi pexainaejawa matacabi apopewerewerecaejawa, daxita pamonae tanetaewi Dioso pexënato, nesiwanajamatabëcuenecopabanua xanëjawaberena. Bajarapamonae petëpaejawamiwecua icatsia asaëya-exanaenajë, nacua pecopiarucaematacabita —jai Jesús bajarapamonaejawabelia.
41 Jesús pijacuata penayabarajumaitsixae: «Xanë rabaja athëbëwetsica tapatsipan», pejaixae, judíowi cuenebaracuaicuaijaitsi pepënëwelia.
42 Nexata najumaitsi:
—Mara ponëje Jesús, Josépijinë pexënato. Waxaitsi baja cajena yapëtanetsi paxapijinë, pena-ata. Bajaraxuata picani, apoxanepanae pejumaitsijawa: «Athëbëwetsica tapatsinë», pejaijawa —najai Jesús yabara.
43 Nexata, Jesús jumaitsi bajarapamonaejawabelia:
—¡Pacopabare baja jamatabëcuenenawëxaniabiaya patanebaracuaicuaijaijawamë!
44 Itsajiwi-ata apocaëjëpaetsi pijacuata pepatsijawa xanëjawaberena, taxa Dioso, tane-itorobinëtsica, itsa apojitsipaeya-exanaetsi tanesiwanajamatabëcuenecopatsinexa. Matapania pajiwi taxa Dioso cuenecaëjëpaeya-exanatsi, nesiwanajamatabëcuenecopatsiana xanëjawaberena. Bajarapajiwi asaëya-exanaenajë petëpaejawamiwecua, nacua pecopiarucaematacabi.
45 Bajayata, Diosojumepaebiwimi peyaquinaeliwaisi jumaitsi mapacueniaje: «Dioso cajena cujarubiana daxitajiwi pexaniajailiwaisi», jai. Nexata, pajiwi namuxuna-eweta taxa xua cujarubatsi, yapëtaenanua pecujarubiliwaisitsi, bajarapajiwi xanë-ata nesiwanajamatabëcuenecopatsiana.
46 »Itsajiwi-ata cajena taxa apotae. Xanë raja, caenënë, taxa Dioso taniji, tsipaji bajarawetsica tapatsinë.
47 Xaniajanë pacuenia pacatsipaebijitsiatsi. Pajiwi nesiwanajamatabëcuenecopatsiana xanëjawaberena, xainaena matacabi apopewerewerecaejawa.
48 Xanë rabaja pitawapan-nënë. Nexata, xanë tajamatabëcueneta, jiwi xainaena matacabi apopewerewerecaejawa.
49 Bajayata, panijasalinaiwimi xaewanapa picani maná petusatonacuata. Itsiata baitsi jane, bajayajebi xaewanapae-ata, belia baja tëpa bajarapamonae.
50 Biji rajane, xanë pacatsipaebatsi athëbëwetsica pepatsipan yabara. Nexata, pajiwi xaena bajarapapan, pepacuene apotëpae tsane.
51 Xanë, athëbëwetsica tapatsinë, bajarapapitawapan-nënë. Nexata, pajiwi xaena bajarapapan, xainaena matacabi apopewerewerecaejawa. Papan yabarajumaitsinë, tawito rabaja. Nawirajutsianajë,c daxitanacuapijiwi pexainaenexa matacabi apopewerewerecaejawa —nayabarajai Jesús judíowijawabelia.
52 Nexata, judíowi najume-anaenota ëpamonae bajarapacuenia Jesús pejumaitsijawa yabara. Najumaitsi bajarapamonae:
—¿Detsa pacuenia maponë nacanawirajutsipa wajawixaenexaje? Acuenebi raja wajawixaenexa —najai.
53 Jesús nexata jumaitsi judíowijawabelia:
—Xaniajanë pacuenia pacatsipaebijitsiatsi. Xanë, Daxitajiwi Pematapijinënë, itsa paxamë apopanewixaemë tsane, apopanejana-apaemënua tsane, nexata matacabi apopewerewerecaejawa, apopaxainaemë tsane.
54 Pajiwi xaena tawito, apaenanua tajana, xainaena matacabi apopewerewerecaejawa. Nexata, bajarapajiwi icatsia asaëya-exanaenajë petëpaejawamiwecua, nacua pecopiarucaematacabi.
55 Tawito rabaja cajena pepopexaniajai pexaejawa. Tajana-ata rabaja pijinia pepopexaniajai piapaera.
56 Nexata, pajiwi newixaena, nejana-apaenanua, bajarapajiwi yajawaponaponaenajë. Bajarapijinia pacuenia, neyajawaponaponaena.
57 Taxa, Ponë nitorobica, piasaëjumali pexainaponaponaenë. Nexata, bajaraPonë pejamatabëcueneta, xanë-ata daxitamatacabijawabelianexa asaënë tsaponaponae. Nexata, pajiwi newixaena, bajarapajiwi pijinia tajamatabëcueneta asaë tsaponaponae tsane daxitamatacabijawabelianexa.
58 Xanë, athëbëwetsica betapatsipannë, xua yabara baja pacatsipaebatsi, apocuenejëpaenë papan bajayata panijasalinaiwimi xaewanapa. Bajarapapanmi bajayajebi xaewanapae-ata, bajarapamonaemi itsiata tëpapona. Biji rajane, pajiwi xanë tawito xaena, ponaponaena daxitamatacabijawabelianexa —jai Jesús judíowijawabelia.
59 Bajarapacuenia Jesús jumaitsi judíowijawabelia, liwaisi petsipaebijawata Capernaúm tomarata, judíowi pijasinagogabota.d
Paliwaisi rajutsijitsia matacabi apopewerewerecaejawa
60 Jesús penayabarajumaitsijawa pijacuata, ayaibitsaëto, pepënajinawanapaewitsi, pejumetaecujinaetsi bajarapamonae najumaitsi:
—Piayapëbejeliwaisi cajena nacacujaruba waja-exanaenexa. ¿Jipatsa caëjëpatsi pexanaejawa bajarapacuene? ¡Ajibi cajena! —najai ëpamonae.
61 Jesús pejamatabëcueneyapëtaexae pebaracuaicuaijaijawatsi, nexata yanijoba bajarapamonaejawabelia. Jumaitsi:
—¿Apobepexaniajailiwaisi tsaja pajumetaneme? ¿Pataneca-amuxujitsibimë patacatsipaebiliwaisi?
62 ¿Paxamë detsa pajamatabëcuene-itsimë tsipae itsa panetaejitsipame, xanë, Daxitajiwi Pematapijinënë, tatsiajawa athëbëabetsia, taponaponaenacuamijawabetsia? ¿Matapania meta panejumexaniataejitsipame patacatsipaebiliwaisi?
63 Caenë rabaja, Espíritu Santo, piaitawajamatabëcuene perajutsinë. Jiwi cajena apocaëjëpaetsi, pesaëta pexainaenexa bajarapajamatabëcuene. Espíritu Santo paliwaisi nejamatabëcuenecaëjëpaeya-exana patacatsipaebinexa, bajarapaliwaisi pejamatabëcueneta, paxainame pitawajamatabëcuene.
64 Itsiata baitsi jane, paxamëyajuwënëwi abaxë apojumexaniatae bajarapaliwaisi —jai Jesús.
(Bajarapacuenia jumaitsi,e tsipaji tajëwelia petaxuxuabijawata Dioso pijacuene penacuenebijawa, Jesús jamatabëcueneyapëtane baja pamonae apopejumexaniataewinexatsi, ponë pijinia canajetsijitsiatsi pijawajabitsaë pecobeyabelia.)
65 Bajaraxuata, Jesús orijibia itsaliwaisi jumaitsi pepënaponaewitsijawabelia:
—Apopatanejumexaniataejawamë yabara pacajumaitsitsi picani: «Itsajiwi-ata raja apocaëjëpaetsi pijacuata xanëjawaberena tanesiwanajamatabëcuenecopatsinexa. Matapania taxa Dioso, tane-itorobinëtsica, itsa caëjëpaeya-exanaenatsi, nesiwanajamatabëcuenecopatsiana», pacajaitsi baja cajena —jai Jesús.
66 Bajarajota nexata, ayaibitsaëto Jesús pepënaponaewitsi wepënawiabatsi. Pematatsënëa baja apopënaponaetsi.
67 Jesús bajarapacuene petaejawata, yanijoba doce ponëbeje pijajiwijawabelia. Jumaitsi:
—¿Paxamë-ata tsabaja panajamatabënawiabame? —jai.
68 Nexata, Simón Pedro jumaitsi Jesús-jawabelia:
—Tajatuxanenë, itsa panawiabajë, ¿jipatsa nexata, xamëwecua papënaponaejitsipajë? Xamë rabaja paliwaisi xainame, panerajuta matacabi apopewerewerecaejawa pataxainaenexa.
69 Paxanë rabaja pacajumexaniatanetsi patanetsipaebiliwaisimë. Pacayapëtanetsinua baja cajena Cristocuenemë, pexënatomë, Dioso, piasaëtsaponaponaenë daxitamatacabijawabelianexa —jai Simón Pedro.
70 Jesús nexata jumaitsi pijajiwijawabelia:
—Xanë rabaja paca-itapetatsi doce paponëmëbeje. Itsiata baitsi jane, paxamëyajuwënënë, itsanë, dowathi pijajiwitonë baja cajena tsaponaponae —jai Jesús.
71 Jesús bajarapacuenia jumaitsi Judas yabara, Simón Iscariote pexënato. Judas, doce ponëbejeyajuwënënë-ata Jesús pijajiwijawata, canajetsijitsia Jesús, pijawajabitsaë pecobeyabelia.