Betesda pucayojawata, Jesús jamatejemaya-exana petabusipacuenabinëtsi
5
Itsamatacabijawabelia, judíowi itsa exana fiesta Jerusalén tomarata, Jesús nalia.
2 Bajarapatomarajawalia pejonebaupa, pewënë Ovejapijibaupa, bajarapabaupa imoxoyojawata eca pecueyetsipucayo. Bajarapapucayo pewënë hebreojumeta Betesda.a Bajarapapucayo matatoyorotsia ena cinco pabobërëtobeje.
3 Nexata, bajarapabobërëtonëjawata, apocaewiriawitane pexainaewi bobena. Itsamonae bitso pitaxutotsëcënaewi. Itsamonae pejayujayunaewi. Itsamonae peperabëcuenabiwitsi. Daxita bajarapamonae ewetanubena pucayo pemenenacujirubijawa.
4 Bajarapamonae canaëjëta athëbëwetsica ángel jemata itsa runabiabica pucayojawabetsica, menenacujirubia-exanabiaba. Nexata, pemenenacujirubijawata, pajiwi copiaya runareca pucayojawabereca, pawitanecuene xaina, wecua-ajibi tsabiabitsi.b
5 Bajarapamonaeyajuwënënë bajarajota naboca treinta y ocho pawaibeje, piawitanetsanucaenë, petabusipacuenabinëtsi.
6 Itsa Jesús taeyabuata bajaraponë, yapëtaeyabuata bajayajebi piawitanenëcuene. Nexata jumaitsi bajaraponëjawabelia:
—¿Jitsipame tsaja nejamatejemajawa? —jai Jesús.
7 Nexata bajaraponë jumaitsi:
—Itsajiwi-ata apoxainaenë tanecarunaenexareca pucayojawabereca, paepatota mene nacujirubabiaba. A̱jena̱ narunabiabijitsianëreca, itsajiwi copiaya netsurunabiabareca —jai petabusipacuenabinëtsi.
8 Nexata Jesús jumaitsi bajaraponëjawabelia:
—¡Namatacore! ¡Pire nijapanayo! ¡Ponare baja! —jai.
9 Bajarapacuenia Jesús pejumaitsijawata, caecuenia jamatejema baja piawitanetsanucaenëmi. Pita baja pijapanayo. Ponaexanepana baja. Bajarapacuenia petabusipacuenabinëtsi Jesús jamatejemaya-exana judíowi penacuera-ewetsimatacabita.
10 Nexata, judíowi jumaitsi petabusipacuenabinëmitsijawabelia:
—Ajena raja sábado, wajanacuera-ewetsimatacabi. Nexata, apoxanepanae cajena necaponaponaejawa nijapanayo —jai.
11 Nexata, bajaraponë jumaitsi judíowijawabelia:
—Tanejamatejemaya-exanaenë raja nejumaitsi: «¡Nijapanayo pire! ¡Ponare baja!», nejai —jai.
12 Nexata, icatsia judíowi jumaitsi bajaraponëjawabelia:
—¿Jipatsa nexata cajumaitsi: «¡Nijapanayo pire! ¡Ponare baja!», cajai? —jaitsi.
13 Itsiata baitsi jane, bajaraponë apowënëyapëtae pawënënë jamatejemaya-exanatsi, tsipaji bitso jiwi ayaibitsaëtoxaneto jinawanapa. Nexata, Jesús baja, wecua-ajibi tsarucae bajarapamonaetuatuajëta, nawënëpaebinejewa bajaraponëjawabelia.
14 Bajaraxuacujinae, icatsia Jesús caxitajarabaxuaba bajaraponë templobota. Nexata jumaitsi bajaraponëjawabelia:
—¡Taema! Aeconoxae baja jamatejemamë. ¡Icatsia, pëtsa baja matawëjëa exaname pibisiacuene, tsipaji bitsomë tsipae! —jai.
15 Nexata, bajaraponë pona baja, petsipaebinexa judíowijawabelia. Jumaitsi:
—Jesús tsaena raja nejamatejemaya-exana —jai.
16 Bajaraxuata, judíowi taxuxuaba Jesús peliwaisicaranabijawa, pejamatejemaya-exanaponaexae piawitanewi penacuera-ewetsimatacabi.
17 Itsiata, Jesús jumecanawiata bajarapamonaejawabelia:
—Taxa Dioso raja, caematacabi canacujitsia yawenonabiaba penamatawenonaewi, bajayajawawerenacujinae, ajena pamatacabijawaberena-ata. Bajaraxuata, xanë-ata cuenejëpaeya exanabiabajë —jai Jesús.
18 Bajarapacuenia judíowi pecuenetaexae Jesús pejamatejemaya-exanaejawa piawitanewi, judíowi penacuera-ewetsimatacabita, pejumaitsixaenua: «Taxa raja Dioso», pejaixae, matatoxenetsia jamatabëbeyaxuabatsi.c
Jesús nawajunupaeba Paxa Dioso pejamatabëcuenejëpaejawa
19 Judíowi pecuene-itoyaxaetsi, Jesús jumecanawiata mapacueniaje. Jumaitsi bajarapamonaejawabelia:
—Xaniajanë pacuenia pacatsipaebijitsiatsi. Xanë, Dioso pexënatonë-ata, itsacuenejawayo apo-exanaenë ëxanë tajamatabëcueneta. Biji rajane, pacuenia taniji taxa pexanaejawa, bajarapacuenia xanë-ata exanajë.
20 Tane-asiwaxae, taxa neyapëtaeya-exanabiaba daxita pacuene exanaponapona. Tawajënaeyabelia neyapëtaeya-exanaponaena itsapinijicuenejawanë, patacatsita-exanaponaenexa ta-exanaejawanëmiwecua, ayaicuenia papecajamatabëcuenenabenajacaeya-exanaejawanënexa, xaniawaetsia paneyapëtaenexa Dioso pexënatonëcuene.
21 Pacuenia taxa icatsia asaëya-exana jiwi petëpaejawawecua piasaëjumali perajutsinexa, bajarapijinia pacuenia xanë, pexënatonë-ata, rajutajë piaitawajamatabëcuened pamonaejawabelia jitsipajë.e
22 Taxa raja aponaneconitsia-exanae tsane itsajiwi-ata. Biji rajane, xanë, pexënatonë, netocopata tananeconitsia-exanaenexa pibisiacuene pexanaewi.
23 Bajarapacuenia netocopata pexënatonëjawaberena, daxitajiwi taneyaiyataenexa pacuenia taxa-ata yaiyatane. Pajiwi aponeyaiyatae, Dioso pexënatonë, bajarapajiwi taxa-ata apoyaiyatae.
24 »Xaniajanë pacuenia pacatsipaebijitsiatsi. Pajiwi nenamuxuna-eweta tapaebiliwaisi, nejumexaniatanenua, Ponë athëbëwetsica tane-itorobinëcuenetsica, bajarapajiwi xainaena matacabi apopewerewerecaejawa. Nexata, aponaneconitsia-exanaenë tsane pibisiacuene pexanaeneconi yabara, tsipaji baja, jamatabëcuene-aitawaya-exanatsif petëpaejamatabëcuenemiwecua, juya piaitawajamatabëcuene pexainaenexa.
25 Xaniajanë pacuenia pacatsipaebijitsiatsi. Pamonae pejamatabëcuenetëpaewi Dioso pitabarata, pijamatacabi baja tocopiapatatsi tanejumetaenexa, xanë Dioso pexënatonë, tatsipaebiliwaisi. Nexata, pajiwi nesiwanajamatabëcuenecopata xanëjawaberena, xainaena matacabi apopewerewerecaejawa.
26 Pacuenia taxa pijacuata piasaëjumali pexainaenë tsaponaponae, bajarapijinia pacuenia bajarapapiasaëjumali xanë, Pexënatonë, netocopata itsamonae tarajutsinexa, pexainaenexa matacabi apopewerewerecaejawa.
27 Orijibia, taxa Dioso nerajuta Daxitajiwi Pematapijinëxaenë tanamatacaitorobisaë, tananeconitsia-exanaenexa pibisiacuene pexanaewi.
28 ¡Pëtsa pajamatabëcuenenabenajacame patacatsipaebiliwaisi yabara, tsipaji itsamatacabi nejumetaena daxita petëpaewimi-ata!
29 Nexata, pamonae pexaniacuene pexanaewi, namatacobiana pexainaenexa matacabi apopewerewerecaejawa. Pamonae pijinia pibisiacuene pexanaewi, namatacobiana naneconitsiaya pejinawanapaenexa daxitamatacabijawabelia —jai Jesús judíowijawabelia.
Xuanë yabara jiwi beyapëtane Jesús, Cristonëcuene
30 Icatsia, Jesús jumaitsi judíowijawabelia:
—Xanë tajamatabëcueneta apo-exanaenë itsacuenejawayo-ata, taxa nitorobinejewa. Nexata, itsa naneconitsia-exanaenajë pijaneconi pexainaewi, naneconitsia-exanaenajë pacuenia taxa nitoroba ta-exanaenexa. Bajaraxuata, aponaneconitsia- exanaenë tsane itaxutejema. Biji rajane, caejiwi naneconitsia-exanaponaenajë pijaneconicanacujitsia. Apo-exanaenë tsane tajacuata tanatojitsipaecuenia. Biji rajane, exanaenajë taxa tanetojitsipaecuenia.
31 Itsa xanë tajacuata nawënëliwaisipaebijitsipajë ayaijamatabëcuene taxainaejawa yabara, aliwaisimatamobinë tsipae jiwijawabelia.
32 Itsiata baja, Juan, jiwibautizabinëmi, newajunupaeba xaniawaetsia. Yapëtaniji bajaraponë tanewajunupaebijawa pexaniajaijamatabëcueneta.
33 Paxamë itsamonae pa-itorobame Juan, jiwibautizabinëmijawabelia tanewënëliwaisiyanijobinexa. Nexata, bajaraponëmi xanë taliwaisi, pexaniajaicuenia tsipaeba pane-itorobiwijawabelia.
34 Xanë aponamatawenonaenë picani itsajiwi taneliwaisiwajunupaebijawa ta-exanaejawa yabara. Saya pacanajamatabënapitsia-exanatsi xua Juan-pijinë newënëliwaisipaeba,g panejumexaniataenexa bajarapaliwaisi, taxa Dioso papecacapanepaenexa.
35 Juan-pijinë abaxë itsa ponapona mapanacuataje, papecatsipaebiliwaisi belámpara pacajamatabëcuene-itayota. Cae-epatoyo picani pasiwajamatabëcuenebarëyamë panejumetaejawata papecatsipaebiliwaisi.
36 Itsiata baitsi jane, xanë xainajë itsajawa, bitso penamatamotsijawa, xua betanewënëliwaisipaebicuenejawa, pejumaitsijawawecua Juan-pijinë. Papinijicuenejawanë taxa netocopata patacatsita-exanaenexa, bajaraxuanë pacayapëtaeya-exana baja pepacuene taxa Dioso athëbëwetsica tane-itorobinëcuene.
37 Taxa, ponë nitorobica, newënëliwaisipaebanua. Itsiata, caeto-ata papecatsipaebiliwaisi, panijamuxucujaya apopajumetaemë. Apopataemënua panija-itaxutocujaya.
38 BajaraPonë pejumeliwaisi apopacatsijamatabëjone, tsipaji apopanesiwanajamatabëcuenecopabimë xanëjawaberena, taxa athëbëwetsica tane-itorobinëtsica-ata.
39 Paxamë picani xaniawaetsia payorobabiabame Dioso pejumeliwaisibaxuto, bajarapacuenia panexainaejawanexa matacabi apopewerewerecaejawa. Itsiata, bajarapaliwaisi pacayapëtaeya-exana xanë yabara baja cajena.
40 Bajarapacuenia xanë yabara pacayapëtaeya-exanae-ata, apopajitsipaemë patanesiwanajamatabëcuenecopatsijawamë xanëjawaberena, panexainaenexa matacabi apopewerewerecaejawa.
41 »Xanë aponamatawenonaenë itsajiwi tanecuene namatamotsia-exanaenexa, Dioso tane-itorobinëtsicuenetsica, ayaicuene ta-exanaejawa yabara.
42 Bajarapacuenia apopacatojitsipaetsi patanejumaitsijawamë, tsipaji pacajamatabëcueneyapëtanetsi, apopanexainaejawa Dioso pane-asiwajamatabëcuene.
43 Xanë patsi-atanë mapanacuayabetsicaje taxa Dioso pewënëta, paxamë apopanecopiapitsimë. Itsiata, itsanë itsa patsipa pijacuata pena-itorobicuenia, papecatsipaebinexa saya bajaraponë pejamatabëcuenepijiliwaisi, xaniawaetsia pacopiapitsipame, panejumexaniataenexa.
44 Paxamë pajitsipabiabame mapanacuapijiwije pexaniacuenia papecawënëliwaisibaracuaicuaijaijawa. Bajaraxuata, apopacacuenecaëjëpae patanesiwanajamatabëcuenecopabinexamë xanëjawaberena. Biji rajane, picani bepajaitame pane-exanaenexa xua yabara pepocaenë Dioso, pacasiwajamatabëcuenebarëyajitsia.
45 ¡Pëtsa panatocanaëjëtame xanë patacaneconitsijawanexa taxa Diosojawabelia! ¡Jume baja cajena! Biji rajane, Dioso penajumecopatsiliwaisi Moisés-pijinëta pacaneconitsiana Diosojawabelia, daxita bajarapaliwaisi apopanejumecowënëtsicapanepaexae, paliwaisi picani pajamatabëcuene-ewetame, Dioso aneconijibia papecataejawanexa.
46 Itsa pepacuene pajumexaniataejitsipame paliwaisianë Moisés-pijinë yaquina, nexata xanë-ata panejumexaniataejitsipame, tsipaji cajena bajayatami tajëwelia Moisés-pijinë peyaquinaebaxutota yaquina xanë yabara.
47 Itsa paxamë apopajumexaniataemë Moisés-pijinë peyaquinaeliwaisi, ¿detsa nexata pacuenia pajumexaniataejitsipame xanë patacatsipaebiliwaisi? ¡Ajibi cajena! —jai Jesús judíowijawabelia.