Nɨ naji lə miɨ kɨ ji tsa yi yu na tsɨsə
11
Bə kɨ biəlɨ fiə wɛmɨ diəŋ nɨ nna mbiəlɨ wu Klistu lə.2 Nna nsɛnti bəŋ nɨ bə na gɔmbiə mɨ fiɔŋ fichi ntɨŋ, bə biəlɨ bitɨfiə diəŋ nɨ nnə̀ ntɨfiə bəŋ. 3 Bəmanɨ, nna nse lə bə kkə̂ buni lə fo wu nyunso chi lə na Klistu, fo wu kpansɨ lə na nomo, fo wu Klistu lə na Nyɔ. 4 Nyunso wula wu na tsɨsə makə yu tɨdi shɔŋ yi Nyɔ ɨji yu' kusə fo wuhu, yu na nya yaa bə Klistu. 5 Bəmanɨ, kpansɨ wula wu na tsɨsə makə yu tɨdi shɔŋ yi Nyɔ ɨji yu kə kusə fo wuhu, yu na nya nomo yaa. Kɨchichi kɨ ŋgwe yi wa kpansɨ lə bə wu sə kəə yu na sɨŋ. 6 Ɨ yu ŋəŋ lə yu kusəhə fo wuhu, yu kə̂ yu yihi. Bəmanɨ, nɨ fi na ji yaa bə kpansɨ bə ŋkə yu yihi, fi kɨ ndzeŋe lə yu kûsə fo wusu. 7 Nyunso na jimiɛhɛ lə yu kusə fo wuhu tsa yi yu na tsɨsə ndzɨ yu na boto Nyɔ, yu ji kɨyunu kɨ Nyɔ lə. Bəmanɨ, kpansɨ na ji kɨyunu kɨ nomo lə. 8 Nə̀ nyunso wu nə̀ fɔɔ nə kpansɨ wɨ kə, nə̀ kpansɨ wu nə̀ fɔɔ nə nyunso wɨ. 9 Nyɔ nə̀ kə fəkə nyunso ndzɨ kpansɨ. Yu nə̀ fə ji kpansɨ ndzɨ nyunso. 10 Na ndzɨ fiŋ bə ndzɨ bənchinda bə Nyɔ lə fi kpansɨ naji lə yu kɨ ji bə fiɔŋ yu fi, fi na donchɛ buŋga buhu. 11 Mɛfə fi na ji manɨ bə bɨ bə na ji ntɛshɛ bə Baba, kpansɨ na jimiɛhɛ nə yu kaŋ, nyunso jikə jimiɛ tɨ nə yu kaŋ. 12 Fi na ji manɨ ndzɨ nɨ kpansɨ nə̀ fɔɔ nə nyunso wɨ, fɛŋ nyunso kɨ ji mbɛyɛ yi kpansɨ. Fiɔŋ fichi na foto nə Nyɔ wɨ. 13 Bə jîŋgə sɔ ntɨŋ bə ŋəŋ lə fi na ji buni lə kpansɨ kɨ tsɨsə Nyɔ ɨji yu kə kusə fo wuhu lə? 14 Chi bə na ŋɨntɨ nɨ biɔŋ bi mbi lə ji, bə na kkɨ lə, ɨ nyunso na ji bə yu yi dəŋfɨ, ɨ kɨ ji yaa bə yu. 15 Bəmanɨ, bə kpansɨ bə ŋkeŋkɛ yu yi dəŋfɨ na sɔŋ yu lɨ. Nyɔ nə̀ nya kpansɨ yu yi dəŋfɨ lə yi kɨ fuku fo wuhu. 16 Jilə miɨ wasu wu na se lə yu yimbiɛ fiɔŋ fiŋ, yu kɨ kkɨ lə bɨ makə bəntɛshɛ bə bənɨ bə Nyɔ lə na keŋkɛhɛ dzə yidɔ yi fənə biɔŋ yi ntɨŋ.
Bitɨfiə tsukɔ bidiəŋ bi Nyɔ lə wɨ
17 Bəmanɨ, fiɔŋ fidɔ fiasu fi nna nse lə nnya bəŋ bitɨfiə fi wɨ, ɨji fi bə na fɨtɨ njikə sɛŋkɛhɛ bəŋ ndzɨ fi. Bə na ba bə jiŋ ntɛshɛ, kɨ ji kwa fiɔŋ fibiə fi na foto nə bəŋ ntɨŋ ba ya fi ndzeŋe. 18 Fiɔŋ fi nna nse lə nsa ntə na lə, nna ŋ'woko lə bə na ba bə tɛshɛ nɨ bənɨ bə kɨmbɨŋ'ə, bə kɨ ji bə kɨnjɛgwɨ. Ŋkɨ ŋŋɨntɨ wələ naji kɨ ji yɛyi. 19 Kɨmasə na sɨŋ, kɨchichi naji lə kɨ kɨ ji bəŋ ntɨŋ fə bə́ kkə bənɨ bə diəŋ nə bəŋ ntɨŋ. 20 Nna ŋŋɨntɨ lə bə na ba bə ba ntɛshɛ lɨ lə bə diə bidiəŋ bi Baba lə, bə jikə diəhə ji bi. 21 Nna nchanyɛ mɛ ndzɨ tsa yi bə na diɨ, miɨ gəŋ yu saŋkɔ bə ndiə bihi bidiəŋ, bədɔ kətə bə dzɔŋ, bədɔ mu bɔ chinchi. 22 Na la manɨ? Bə na sɨŋ bə tsɔ́ŋ yi naji lə bə kɨ diɨ bə mu yi ntɨŋ? Maa bə na se lə bə dze ntɛshɛ yi bənɨ bə kɨmbɨŋ'ə bə Nyɔ lə koso, bə dze tɨ bənɨ bə fiəŋkə koso lə? Naji ntə bə bəŋ lə la? Naji ŋkɨ nsɛnti bəŋ? Na manɨ kə, naji nsɛŋ bəŋ kə. 23 Nnə̀ ntɨfiə bəŋ ji fiɔŋ fi Baba nə̀ tɨfiə mɨ, lə nə̀ ji bbutsu, butsu bu bə́ nə̀ji lə bə́ taŋŋə Baba waha Jisɔs, yu dze blɛ, 24 yu nya kɨmbafə bə Nyɔ ba gbə lɨ, tə lə, “Blɛ no na gwɨ yɛŋ yi nna nya ndzɨ bəŋ. Bə kɨ fɨtɨ fiŋ bə ŋgɔmbiɛ mɨ.” 25 Lə bɔ diə kanə lɨ, yu dze bwaŋ ba fə tɨ diəŋ nɨ yu sə saa fə lɨ, yu tə lə, “Bwaŋ wuŋ na nchínə yifa yi Nyɔ diə bə ŋgwembe mɛŋŋ. Bə kɨ fɨtɨ fiŋ tsá chi bə mu bə gɔmbiɛ mɨ.” 26 Fi na ji lə tsá chi yi bə na diɨ blɛ no bə mu bwaŋ wuŋ, bə na tɨdi ji kɨ kkpə yi Baba lə gəŋ fɔ tsa yi yu ná ba. 27 Bəma, miɨ wula wu na diɨ blɛ no makə yu mu bwaŋ wu Baba lə wusu, ɨ jikə jimiə nə dzə yi ndzeŋe ntɨŋ, tə miɨ wa fə bubiə ndzɨ yu kə kuntə gwɨ yi Baba bə ŋgwembe mə Baba lə. 28 Miɨ dze kɨ diɨ blɛ no, yu mu bwaŋ wuŋ, yu sa sa gwɨ yihi buni tə kɨ fɨtɨ manɨ, 29 ndzɨ ɨ miɨ na diɨ blɛ no, yu mu bwaŋ wuŋ, yu jikə kkə fiɔŋ fi gwɨ yi Baba na ji fi lɨ, tə miɨ wa na diɨ yu mu manɨ, yu galɨ ji gwɨ yihi ŋgə ntɨŋ. 30 Fia na fiɔŋ fi bənɨ kɨyɛŋ nə bəŋ ntɨŋ na ji gwɨ wəəə, bədɔ gwente, ɨ ji kɨyɛŋ' kkpəyɛ. 31 Bəmanɨ, jilə kə' sa gwɨ́ yaha buni tə kɨ diɨ kə mu, ɨ Baba jikə sakəhə bɨ. 32 Ɨ Baba sa bɨ, tə yu na lɨmə bɨ fə yu jɛkə tɛshɛ bɨ bə bənɨ bə mbi no ntɨŋ lə kə' gbɔ nsa. 33 Bəŋgwɨŋ, fi na ji lə, tsa yi bə sə tɛshɛ lə bə diə bidiəŋ bi Baba lə, bə wokɔ miɨ chi ba. 34 Ɨ dzɔŋ na wo miɨ, miɨ wa diə yu tsɔŋ tə kɨ ba, yu tə kə ba ba fə ji fiɔŋ fi naji ɨ fi ga nsa yu fi. Tsukɔ biɔŋ bidɔ bia wɨ, nná nnya bəŋ bitɨfiə ji tsa yi nná mba.