Kə dzê tsa
10
Bəŋgwɨŋ, nna ntɨ lə bə se buni fiɔŋ fi nə̀ tɨchə bə bəchɛ bətaa baha tsa yi bɔ nə̀ gəndəə kpa. Bɔ bəchi nə̀ gəndəə kɨku nəkoso, bɔ gəŋ ba llə ŋgɔŋ məmbəŋª sha yi womo bɨŋ. 2 Chi fi nə̀ tɨchə cha ma, fi kɨ ji wələ kɨku ka bə ŋgɔŋ məmbəŋ ma ntɨŋ bə́' chɛse bɔ biɔ lə bɔ kɨ ji bənɨ bə Mose lə. 3 Bɔ bəchi nə̀ diɨ bidiəŋ ɨji bi nə̀ foto nə Nyɔ lɨ, 4 bɔ mu tɨ ŋgɔŋ ɨji mə nə̀ foto nə Nyɔ lɨ, ɨji ŋgɔŋ mə yu nə̀ fəə mɔ kɨ foto nə kɨbɔ ntɨŋ. Kɨku ka nə̀ Klistu wu nə̀ gəndəə bə bɔ. 5 Mɛfə bɔ nə̀ ŋɨntɨ biɔŋ biŋ mɛ, kɨyɛŋ kɨbɔlə nə̀ bu fəə biɔŋ bi naji lə shəŋ kɨ lo Nyɔ. Yu kkpɨshɛ ba bənɨ, biŋgundu bibɔlə kətə sɔ kpa.6 Biɔŋ bi nə̀ tɨchə biŋ bə bɔ na bitɨfiə bə bɨ lə kə kə̂ nyaha kɨgaŋ biɔŋ bibiə wɨ nɨ bɔ. 7 Kə kə kɨ tsɨsə bə bənyɔ bə kɨlɔlɔ lə nɨ bɔ bədɔ nə̀ tsɨsə. Fi na ji bubɔndɔ tsukɔ bɔ wɨ lə,
“Bənɨ nə̀ jiŋ fəkoso bɔ diə ba mu lɨ,
ba dza wə, biŋ biŋfidi finyɔ lɨ.”
8 Kə kə kɨ dzenɛ nɨ bɔ bədɔ nə̀ dzenɛ, Nyɔ fə bɔ kkpəyɛ bəntsuku mbaafiɛ ntse bətɛ (23,000) butsu ntɨŋ bumo. 9 Kə kə kɨ moŋko Baba nɨ bɔ bədɔ nə̀ mɔŋɔ, Nyɔ fə yé tumiɛ bənɨ ba bɔ kkpəyɛ. 10 Kə kə kɨ nuŋɔ nɨ bɔ bədɔ nə̀ nuŋɔ, Nyɔ faŋ Nchinda wu Kkpə, yu kkpɨshɛ bɔ.
11 Biɔŋ biŋ bichi bi nə̀ tɨchəə bɔ nə̀ bitɨfiə bənɨ lɨ. Bə́ nə̀ bɔndu ma lə bɨ bə na ji bɛŋ ji tsa yi mbi na ka bɨŋ, kə kɨ dze tsa. 12 Bəma, miɨ wu na gɔmbiɛ lə yu lɨmi wa ŋkɨɨŋ, yu dzê tsa yu tə kə gbɔɔ. 13 Mfɔ yi la yi na ba bəŋ wɨ na tɨ yi yi na ba yi kɨ ba bənɨ bədɔ wɨ. Nyɔ na ji Nyɔ wu lɨmi diɛ yihi bɨŋ, naji ɨ yu tɔkaŋ lə mfɔ ba bəŋ wɨ ya nɨ buŋga bwɛnɨ na ji kə. Ɨ mfɔ ba bəŋ wɨ, ɨ yu donchɛ tɨ dzə yi bə chɛɛ yi ntɨŋ ba ya mfɔ ya.
14 Bəma nsáŋ yɛŋ yi shəŋ'ə, mɨ ŋkɨ nnya bəŋ bitɨfiə lə bə kɨ gatɨ gwɨ nə biɔŋ bi na tsukɔ bənyɔ bə kɨlɔlɔ lə wɨ. 15 Nna nchanyɛ bə bəŋ mɛ nɨ bənɨ bə na ji bə bufɨ. Bə gɔ̂mbiɛ buni tsukɔ fiɔŋ fi nna nchanyɛ fiŋ wɨ. 16 Kə na ba kə dze bwaŋ wu kɨmbafə lə, kə nya kɨmbafə bə Nyɔ ba mu ntɛshɛ, fi kɨ ji lə kə' tɛshɛ ŋgwembe mə Klistu lə ntɨŋ. Kə gəŋ kə dze blɛ, kə gbədiə ba diə ntɛshɛ, fi kɨ ji tɨ lə kə' tɛshɛ bə Klistu gwɨ yihi ntɨŋ. 17 Nɨ blɛ na ji miu, bɨ bə na diɨ ji kɨyɛŋ, kɨjilə fi na donchɛ lə kə na ji gwɨ miu ndzɨ kə na diɨ ji blɛ miu. 18 Bə dzê mfɨkə nə bənɨ bə Isla wɨ. Miɨ chi wu na diɨ fiɔŋ fə tanyə wu bintɔfiə lə ku, yu' tɛshɛ bə Nyɔ bintɔfiɛ bia ntɨŋ. 19 Fiɔŋ fi nna nchanyɛ fiŋ na lə la? Fɛŋ na ji lə biɔŋ bi bə́ na fɨtɨ bintɔfiɛ su bə bənyɔ na keŋkɛ fiɔŋ fi fənə makə bənyɔ ba na keŋkɛ tɨ fiɔŋ fi fənə? 20 Na manɨ kə. Fiɔŋ fi nna ntɨdi na lə bintɔfiɛ bi bənɨ bə na kkəhə Nyɔ na fɨtɨ, bɔ na fɨtɨ ji bə bətsə. Bɔ na fɨtəhə ji bə Nyɔ. Mɨ ŋkɨ ntɨdi lə bə kə kɨ tɛshɛ gwɨ bə bətsə. 21 Naji ɨ bə kɨ mu kə nə bwaŋ wu Baba lə ntɨŋ, bə mu tɨ nə bwaŋ wu bətsə lə ntɨŋ. Naji ɨ bə kɨ diɨ nə kələ wu Baba lə ntɨŋ, bə diɨ tɨ nə kələ wu bətsə lə ntɨŋ kə. 22 Kə kə kɨ fɨtɨ fiɔŋ fi naji lə shəŋ yi Baba lə kɨ lo. Kə na yakəhə yu buŋga.
Miɨ kɨ fɨtɨ fiɔŋ fi naji ɨ fi chitə wəmɛni
23 Bənɨ bədɔ na tɨdi lə bɔ na keŋkɛ buŋga bu fənə fiɔŋ fichi. Bəmanɨ, bɔ kɨ kkɨ lə na fiɔŋ fichi kə fi na keŋkɛ mbɨ. Bənɨ bədɔ tɨdi lə bɔ na keŋkɛ buŋga bu fənə fiɔŋ fichi. Na fiɔŋ fichi kə fi na kosɔ miɨ. 24 Miɨ kə kɨ fɨtɨ fiɔŋ yu gɔmbiɛ kwa ji gwɨ yihi. Miɨ kɨ gɔmbiɛ tɨ kɨ wəmɛni lə. 25 Naji ɨ bə kɨ diɨ nyɛ́ŋ chi yi bə́ na taŋŋə shɨbɨŋ mbi sɨŋ lə yi fɔ nə məŋ fə shəŋ yɛnɨ jɛkə kɨ sakɨ bəŋ. 26 Nna nchanyɛ mɛ ndzɨ fi na ji bubɔndɔ Kɨŋwatɨ kɨ Nyɔ lə ntɨŋ lə,
“Na Baba wu na keŋkɛ mbi no ma biɔŋ bichi bi na ji sɔ.”
27 Ɨ miɨ wu na jimiɛhɛ miɨ wu kɨmbɨŋ dɨ bəŋ lə bə ba diə, jilə bə' bɨŋ ba gəŋ'ɨ, bə kɨ diɨ fiɔŋ fichi fi bə́ nya bəŋ mbi sɨŋ. Shəŋ kə kɨ sakɨ bəŋ ndzɨ fiɔŋ fia. 28 Bəmanɨ, ɨ miɨ wudɔ tə bə bəŋ lə bə́' fə bintɔfiɛ bə bidiəŋ bia bə bənyɔ, bə kə̂ diəhə fə miɨ wu tədiə wa bəŋ tə kɨ gɔmbiɛ lə bə fɨtɨ ba fiɔŋ fibiə, fə shəŋ jɛkə kɨ sakɨ miɨ. 29 Shəŋ yi nna ntɨdi yiŋ mɛ na yi miɨ wu sə tədiə wa bəŋ lə. Nna ntɨdiɛhɛ ji shəŋ yɛnɨ. Bəmanɨ, naji ɨ miɨ wudɔ bi lə, na ndzɨ la fi naji ɨ yu jikə kɨ fɨtɨ fiɔŋ fi yu na nse lə yu fə lə ndzɨ shəŋ na sakɨ miɨ wudɔ? 30 Jilə nna ndiɨ fiɔŋ fi nna nse, nnya kɨmbafə kɨsu bə Nyɔ, ɨ miɨ tsu kɨ sakɨ mɨ ndzɨ la? 31 Bəma, fiɔŋ fichi fi miɨ na fɨtɨ, makə fi yu na diɨ, makə yu mu, yu kɨ fɨtɨ bə dzə yi naji lə fi kɨ nya Nyɔ bubəŋ. 32 Bə kə kɨ fɨtɨ fiɔŋ fi naji ɨ fi bɨsɨ shəŋ yi bənɨ lə, ma ji Bəju, ma ji bənɨ bə na jimiɛhɛ Bəju, makə ntɛshɛ yi bənɨ bə kɨmbɨŋ'ə bə Nyɔ lə. 33 Nna ndio tɨ yɛmɨ lə ŋkɨ mfɨtɨ fiɔŋ fichi ɨji fi naji lə miɨ chi kɨ woko buni bə fi. Nna ŋgɔmbiɛhɛ ji gwɨ yəmɨ kwa kə. Nna ŋgɔmbiɛ tsukɔ bənɨ bəchi wɨ lə mfə bɔ fɔfo.