Buŋga bu wɛŋ wu faŋə wu Jisɔs na keŋkɛ
9
Naji njikə kɨ fɨtɨ fiɔŋ fi nna nse? Nna njimiɛhɛ wɛŋ wu faŋə wu Jisɔs? Nnə̀ ŋkə ŋəŋkəhə Baba waha Jisɔs wɨ? Bə na ji bənɨ bə Baba lə ndzɨ nɨŋ yi mɨ nɨŋə yu lɨ. 2 Jilə bənɨ bədɔ na yimbiɛ lə nna njimiɛhɛ wɛŋ wu faŋə wu Jisɔs, yɛyi lɨ, ɨ bə jikə kɨ yimbiɛ tɨ. Bə na ji ntseyɛ yi na donchɛ yɛyi lə nna nji wɛŋ wu faŋə wu Baba Jisɔs.3 Nna nchanyɛ fiŋ ntambi ji gwɨ yɛmɨ bə bənɨ bə na chinchi kɨnyi kɛmɨ. 4 Kə na sɨŋ bə buŋga bu naji lə kə kɨdiɨ kə mu ndzɨ nɨŋ nyi? 5 Kə na sɨŋ tɨ bə buŋga bu naji ɨ kə kɨ gəndə bə baha bəkansɨ bə na ji bənɨ bə kɨmbɨŋ'ə, diəŋ nɨ beŋ bə faŋə bə Jisɔs lə bədɔ, ma bəjimə Baba Jisɔs bə Sɛfas? 6 Maa na kwa mɨ bə Banabas bə naji lə kə nɨŋ bə kaŋ yaha tə diə lɨ lə? 7 Na miɨ wu kɨtsa wu la wu na nɨntɨ, ɨji tɨ yu wu na sombo gwɨ yihi? Ɨ miɨ nɨŋ kə wu muntaŋ'ə, ɨ yu jikə kɨ diɨ muntaŋ mu na foto nɔ nə kə? Ɨ miɨ na kɨki nyɛ́ŋ, ɨ yu jikə kɨ chɛnti mbəndɨ yisu yu mu?
8 Nna nchanyɛ biɔŋ biŋ nə biŋgɔmbiɛ bi miɨbəwəŋ'ə ntɨŋ? Ntɨlə bi na ji tɨ bubɔndɔ bilaŋ bi Nyɔ lə ntɨŋ. 9 Fi na ji bubɔndɔ Kɨŋwatɨ kɨ Mose lə kɨ Bilaŋ'ə ntɨŋ lə,
“Ɨ miɨ dze nyɛŋ lə yi gəŋ fishi jiŋ,
yu kə̂ baŋkəhə bifuŋ bi nyɛŋ ya lə.”
Bə na gɔmbiɛ lə Nyɔ nə̀ chanyɛ manɨ ɨji tsukɔ nyɛ́ŋ wɨ? 10 Yu nə̀ chanyɛ ji tsukɔ bɨ wɨ, bə́ nə̀ bɔndu bə bɨ, ndzɨ miɨ wu na nɨntɨ kə makə wu na gbete, yu na nɨntɨ yu kkɨ lə yu jiwa ɨ yu keŋkɛ fiɔŋ nə kə wa ntɨŋ. 11 Jilə kə' tishɛ ŋgwe yi kɨn'yɨntɨ bəŋ shəŋ, ɨ fi kɨ ji bukɔ kɨtso bɨ lɨ bə ŋkeŋkɛ yi biɔŋ bi sɛŋ sha bɨŋ nə bəŋ'ɨ? 12 Jilə bənɨ bədɔ na keŋkɛ buŋga bu tədiə lə bə kɨ nya bɔ biɔŋ, ɨ kə jikə kəŋkɛ buŋga busu ya bɔ?
Pɔl nə̀ kə dzɛɛ buŋga buhu nɨ wɛŋ wu faŋə wu Jisɔs lə yu kɨ ləkə biɔŋ nə bənɨ lɨ
Bəmanɨ, kə kə̂ dzɛɛ buŋ buŋga kə. Kə na kansɨ shəŋ bə fiɔŋ fichi, lə kə kə̂ fəkə fiɔŋ fidɔ fi naji lə fi baŋ lə shɔŋ yi ndzeŋe yi na tsukɔ nyi Klistu wɨ kə̂ gəŋkə fiə. 13 Bə na kkəhə lə bənɨ bə na nɨntɨ tsɔŋ yi bintɔfiɛ ntɨŋ, bidiəŋ bibɔlə ba bi kɨ foto ji nə mɨ, bənɨ bə na nɨntɨ bə tanyə wu bintɔfiɛ lə bɨkə tɨ ji biɔŋ bi bə́ ba bə bi mɨ? 14 Na diəŋ nɨ Baba nə̀ tədiə lə bənɨ bə na tɨdi shɔŋ yi ndzeŋe naji lə bɔ kɨ keŋkɛ kɨjimiɛ kɨbɔlə nə nu.
15 Mɛfə fi na ji manɨ, ŋkə ndzɛɛ buŋ buŋga kə, ŋkə mbɔndɔhɔ mɛ lə fə bə gbɔɔ kɨ fɨtɨ fidɔ bə mɨ. Jilə miɨ wudɔ tə lə gulu wu nna ŋkuntsɔ wuŋ ndzɨ diɛ yi Nyɔ yi nna ntɨdi kɨlɔlɔ lɨ, na ndzɨ nna nləkə biɔŋ nə bəŋ'ɨ, ɨ ndzeŋ lə ŋkkpə bukpənə. 16 Nna njimiɛhɛ lə ŋkɨ ŋkuntsɔ gulu lə ntɨdi wa shɔŋ yi ndzeŋe yi na tsukɔ Jisɔs Klistu wɨ. Ə fə Nyɔ lə nna nji lə ŋkɨ ntɨdi. Nnɨŋŋ lə ntɨdiɛhɛ, ɨ Nyɔ li ŋgə mɨ fi. 17 Jilə nna nnɨntɨ nɨŋ nyi nə kɨnse kɛmɨ ntɨŋ, ŋkeŋkɛ bikwəntsə. Bəmanɨ, jilə nna nɨntəhə bə kɨnse kɛmɨ, kɨjilə nna nɨntɨ kwa ji nɨŋ yi Nyɔ nə̀ galə mɨ kaŋ. 18 Bəma, ŋgwe yi mbɨ wu naji ŋkeŋkɛ ndzɨ nɨŋ nyi na la? Yɛmɨ na kwa lə ŋkɨ ntɨdi shɔŋ yi ndzeŋe kɨlɔlɔ lɨ, ŋ'wokɔ sɨŋ lə bə́ kɨ sombo mɨ ndzɨ ntə yi shɔŋ nyi. 19 Bə kɨ kkɨ lə nna njimiɛhɛ miɨ wudɔ nəkoso. Bəmanɨ, mɨ nchi gwɨ yɛmɨ lə ŋkɨ nji mfia wu bənɨ bəchi, fə ŋkpa bɔ kɨyɛŋ ɨ bɔ kɨ ji bənɨ bə Klistu lə. 20 Tsa yi nna nji bə Bəju, ŋkɨ mfɨtɨ nɨ bɔ ba bɔ kɨ fɨtɨ, fə ŋkpa bɔ, bɔ tsu bənɨ bə Klistu lə. Tsa yi nna nji bə bənɨ bə na biəlɨ bilaŋ bi Mose lə, ŋkɨ mfɨtɨ diəŋ nɨ bɔ fə ŋkpa bənɨ nə bɔ ntɨŋ mɛfə nna njimiɛhɛ bilaŋ nəkoso. 21 Tsa yi nna nji bə bənɨ bə na sɨŋ ba bilaŋ nəkoso, ŋkɨ mfɨtɨ nɨ miɨ wu na jimiɛhɛ bilaŋ nəkoso, mfɨtɨ mɛni fə ŋkpa tɨ bənɨ ba, ɨ bɔ kɨ ji bə Klistu. Fi na jimiɛhɛ lə nna nsɨŋ bilaŋ bi Nyɔ lə nəkoso, nna nji kɨlaŋ kɨ Klistu lə nəkoso. 22 Tsa yi nna nji bə bənɨ bə na ji yee kɨmbɨŋ ntɨŋ, ntsu tɨ nɨ bɔ fə ŋkpa tɨ bɔ. Mɨ ntsu fiɔŋ fichi bənɨ bəchi lɨ, fə mfəə mɛ la fi naji mfə ɨ bədɔ nə bɔ ntɨŋ fɔfo. 23 Nna mfɨtɨ biɔŋ biŋ bichi mɛ ndzɨ shɔŋ yi ndzeŋe yi na tsukɔ Klistu wɨ, fə ŋkeŋkɛ budə bu shɔŋ ya na nya bənɨ.
24 Bə na kkəhə lə tsa yi bə lətə kɨlɨtɨ bənɨ kɨyɛŋ ba bɔ lətə, kɨji kwa miɨ miu wu yaa wu ba yu keŋkɛ bikwəntsə? Bəma, bəŋ bə bəŋ'ə kɨ lətə tɨ dzə yi naji ɨ bə keŋkɛ bikwəntsə yi ntɨŋ. 25 Bənɨ bə mfanshɛnɨ lə bəchi, mɛ ɨji mfanshɛnɨ yi kɨlɨtɨ lə, makə ŋgwe yi mfanshɛnɨ yi la, bɔ ba bɔ kɨ fɨyə buni. Bɔ ba bɔ kɨ fɨyə manɨ fə bɔ keŋkɛ bikwəntsə, bikwəntsə biŋ jikə jimiɛ bi na tsɨ butsənə. Bəmanɨ, biaha bikwəntsə na bi na tsɨ butsənə. 26 Nna nlətə kɛmɨ kɨlɨtɨ ŋgɨntɨ nyɨlɨlɨ dɨ wu bə́ na kwete. Nna njimiɛhɛ nɨ miɨ wu muŋkwəŋ wu ba yu kɨ liyɛ kwa muŋkwəŋ woto. 27 Nna mbumbu gwɨ yɛmɨ, ndio lə yi kɨ biəlɨ ji fiɔŋ fi diəŋ, fə njɛ kə kɨ tɨdi diɛ yi Nyɔ bə bənɨ bədɔ, ɨ Nyɔ ná nɨŋŋə lə ŋkə ŋkwətsə.