Shɔŋ tsukɔ biɔŋ bi diənə wɨ bi bə́ fəə bintɔfiɛ bə bənyɔ
8
Njiwa nchanyɛ fɛŋ kɨ bidiəŋ bi bənɨ na fɨtɨ bintɔfiɛ su bə bənyɔ. Na yɛyi nɨ bɔ na tɨdi lə bɨ bəchi na keŋkɛ bufɨ. Buŋ bufɨ naji ɨ bu fə miɨ kɨ dze gwɨ. Bəmanɨ kɨnse na kosɔ bukosɔ. 2 Ɨ miɨ dze kɨ gɔmbiɛ lə yu na kkɨ biɔŋ, yu kɨ kkɨ lə yu bambi wa kə kkə nɨ yu naji lə yu kkə. 3 Bəmanɨ, ɨ miɨ na laŋkɨ Nyɔ, ɨ Nyɔ kɨ kkɨ yu.4 Bə fɛŋ, tsukɔ ndiə yi bidiəŋ bi bə́ fəə bintɔfiɛ su bə bənyɔ, kə na kkɨ lɨ lə bənyɔ bɛŋ na fiɔŋ fidɔ kə. Nyɔ na ji kwa miu, wudɔ su sɨŋ. 5 Bənɨ bədɔ na dze lə bənyɔ bədɔ ba su bɔ́ makə sɛŋ koso. Na yɛyi lə bənɨ na dze lə bənyɔ na ji kɨyɛŋ, bəbaba ji tɨ kɨyɛŋ. 6 Mɛfə bə na dze manɨ, nə bɨ lɨ Nyɔ na ji kwa miu, ɨji yu wu na ji Taa waha wu nə̀ fəə biɔŋ bichi, kə na ji yu lɨ. Baba ji kwa miu ɨji Jisɔs Klistu. Na yu wu bə́ nə̀ fəə biɔŋ bichi bi chɛ yu kaŋ, kə na keŋkɛ tɨ buwəŋ ndzɨ yu.
7 Fiŋ na fiɔŋ fi na ji lə na miɨ chi nə bɨ ntɨŋ wu na kkɨ fi kə. Bənɨ bədɔ bə nə̀ kpɔtɔ bə bənyɔ ba fɔ fɛŋ, na diɨ ŋgwe yi bia bidiəŋ, bɔ kɨ gɔmbiɛ kwa lə bɔ bambi ba bɔ diɨ ji biɔŋ bi bə́ fəə bintɔfiɛ su bə bənyɔ ba. Shəŋ yibɔlə yi yee gəŋ yi kɨ sakɨ bɔ lə bidiəŋ bia' bɨsɨ bɔ. 8 Naji ɨ bidiəŋ fə kə lə kə kɨ ji chichi Nyɔ yəsɨ. Ɨ kə jikə diəhə tə kə kə lasə fiɔŋ fidɔ. Kə diə lɨ, tə kə kə fəkə tɨ mbɨ wudɔ. 9 Bəmanɨ fiɔŋ fi na ji na kwa lə, bəŋ bə na kkɨ ba biɔŋ biŋ, bə kɨ dze tsa miɨ kə̂ dzaha ba dze buŋga bu yu na ji bə bu bu fənə fiɔŋ fi yu na se su ba fə ji fiɔŋ fi naji ɨ wəmɛni wu na ji yee gbɔ ji bugbɔnɔ. 10 Ɨ jimə wa miɨ wu shəŋ yihi na ji yee ŋəŋ wə wu na kkɨ biɔŋ, wə diɨ dɨ wu bə́ na fɨtɨ bintɔfiɛ bə bənyɔ, ɨ yu wu yu jikə kɨ se tɨ lə yu dîə bidiəŋ bi bə́ fəə bintɔfiɛ su bə bənyɔ? 11 Ɨ yu fə manɨ, ɨ fi kɨ ji lə wə wu na kkɨ wa biɔŋ, wə' bɨsɨ wəma wu na ji no yee, wu Klistu nə̀ kkpə ndzɨ yu. 12 Ɨ fiɔŋ fi wə' fəə fiŋ kɨ ji bubiə, ɨ fi bɨsɨ shəŋ yi wəma lə, wu na ji wa yee, ɨ kɨ ji lə wə fə bubiə bwa ji bə Klistu. 13 Bəma, jilə fiɔŋ fi nna ndiɨ na fɨtɨ lə ŋgwɨŋ gbɔ bubiə ntɨŋ, njikə tsɔhɔ bukɔ nyɛŋ wɨ ndzɨ yu tə kə gbɔɔ.