Ntəfɨ kɨ kpansɨ bə nyunso lə
7
Fɛŋ, tsukɔ biɔŋ bi bə nə̀ bɔndɔ bia bə mɨ lə na buni lə miɨ kə̂ dzɛɛ kpansɨ.ª 2 Bəmanɨ, ndzɨ kɨshəntə tə kə fəə ɨ bə gbɔ ndzenɛ ntɨŋ, fi na ndzeŋe lə nyunso keŋkɛ wuhu kpansɨ, kpansɨ keŋkɛ wuhu nomo. 3 Nyunso naji lə yu nɨŋ yihi nɨŋ yi bənɨnsə kpansɨ wɨ, kpansɨ nɨŋ tɨ yihi nɨŋ yi bəkansɨ nomo wɨ. 4 Kpansɨ na chiŋfiɛhɛ buŋga bu gwɨ yihi lə, na nomo bə buŋga bwa. Na diəŋ tɨ lə nyunso na chiŋfiɛhɛ buŋga bu gwɨ yihi lə, na kpansɨ bə buŋga bwa. 5 Miɨ kə̂ mɛɛ ta ba nya yasɨ wudɔ wɨ, fiəŋkə lə bə sə sese ba bɨŋ tsa yi dzulu lɨ, fə bə nya kɨgaŋ kɨntsɨsɨ wɨ. Bə fə manɨ, bə chi gbɔ̂ɔ kɨ tɛshɛ, Satan tə kə mɔŋɔ bəŋ ndzɨ bə na kkəhə ŋkɨ gwɨ́ yɛnɨ. 6 Nna nchanyɛ mɛ nnya bəŋ ji bitɨfiə, nna nyaha bəŋ ji kɨlaŋ. 7 Ɨ sə ji yəmɨ lɨ, ŋkɨ nse lə miɨ chi kɨ ji kpansɨ sɨŋ nɨ nna nji. Bəmanɨ, miɨ chi na keŋkɛ kɨhɨ kɨnya nə Nyɔ lɨ. Miɨ wudɔ keŋkɛ kɨŋ kɨnya, wudɔ keŋkɛ ka.8 Fɛŋ, nna ntɨdi bə bənɨ bə na bambi kə dzɛɛ bəbɔlə bəkansɨ makə bənɨnsə, ntɨdi tɨ bə bəkansɨ bə bəŋku lə, lə fi na ndzeŋe bɔ lɨ lə bɔ kə̂tə bɔ bəmbɔŋ nɨ mɨ. 9 Bəmanɨ, jilə naji ɨ bɔ jikə wɨnsə gwɨ, miɨ dzê kpansɨ makə nomo bɔ bə yu tɛshɛ kɨ ji, ndzɨ fi na ndzeŋe ntɛshɛ manɨ ya yi na ji lə kɨshəntə kɨ kkpɨsə mɨ.
10 Bə bənɨ bə nə dzɛɛ bəkansɨ makə bənɨnsə, mɨ ŋkɨ ntɨdi bə bɔ lə kpansɨ kə̂ nɔŋkɔhɔ lə bɔ jɛ gwɨ bə nomo. Kɨlaŋ kɨŋ kə fɔkɔ nə mɨ lɨ, kɨ fɔ ji nə Baba lɨ. 11 Bəmanɨ, jilə yu' jɛ gwɨ bə nomo, yu bu kɨ ji yu wumbɔŋ. Ɨ yu kə kafɔ njiŋ manɨ, yu tsû nomo tsɔŋ, bɔ bə yu chi tsunɔ. Fi na ji tɨ lə nyunso kə̂ kɔŋkɔhɔ kpansɨ.
12 Bə bədɔ ba bənɨ, mɨ ntə bə bɔ lə, ɨ miɨ na ji miɨ wu kɨmbɨŋ, yu ji bə məku wuhu, məku wa jikə jimiɛ kpansɨ wu kɨmbɨŋ, jilə məku wa na se lə bɔ bə yu kɨ ji, nomo wa kə kɔŋkɔhɔ yu. Na mɨ wu na tɨdi fiŋ, na Baba kə. 13 Ɨ kpansɨ na ji bə nomo, nomo wa jikə jimiɛ miɨ wu kɨmbɨŋ, ɨ nomo wa na se lə bɔ bə yu kɨ ji, kpansɨ wa kə̂ shə yu. 14 Mɨ nchanyɛ manɨ ndzɨ ɨ nyunso wu na jimiɛhɛ miɨ wu kɨmbɨŋ, yu ji bə kpansɨ wu kɨmbɨŋ, tə Nyɔ' tsaləsɨ yu məku wuhu ntɨŋ. Kpansɨ wu na jimiɛhɛ wu kɨmbɨŋ, yu ji bə nomo wu kɨmbɨŋ, kɨjilə Nyɔ' tsaləsɨ yu nomo ntɨŋ. Ɨ kə jimiɛ manɨ, ɨ beŋ bəbɔlə jikə kɨ tsalə. Bəmanɨ, nɨ fi na ji manɨ, bɔ ba ntsaaŋ. 15 Jilə miɨ wu na jimiɛhɛ miɨ wu kɨmbɨŋ na se lə yu jɛ, bə gâ manɨ. Ɨ fi tɨchə manɨ, ɨ jikə kɨ ji dɔlɛ lɨ lə nyunso makə kpansɨ wu kɨmbɨŋ kɨ ji lə yu kətə ka kɨjimiɛ ntɨŋ. Nyɔ nə̀ bəndɨ bɨ lə kə kɨ ji budə ntɨŋ. 16 Wə wu kpansɨ, wə kkə bə la lə naji ɨ wə fə ɨ nya fɔfo? Wə wu nyunso, wə kkə tə bə la lə naji ɨ wə fə ɨ kpansa fɔfo?
Miɨ kə̂tə kwa kɨ ji nɨ Nyɔ nə̀ bɨndɨ yu yu ji
17 Fiɔŋ fi na ji na lə miɨ chi jîŋ kɨjimiɛ kɨ Baba nya yu. Yu kɨ ji nɨ Nyɔ nə̀ bɨndɨ yu yu ji. Biŋ na bitɨfiə bi nna nnya bə bənɨ bə kɨmbɨŋ'ə bidɨ bichi. 18 Jilə miɨ wudɔ wasu wu bə́ nə̀ bəndə yu ɨji bə́' sɔmbu yu dzɔ, yu kə kɨ se lə yu kɨ ji nɨ miɨ wu bə́ na bambi kə sɔmbɔhɔ yu dzɔ. Ɨ miɨ na jisu wu bə́ nə̀ bəndə yu, yu bambi dzɔ yintsu, yu kə̂ sɛhɛ lə bə́ sɔmbu yu dzɔ fɛŋ, 19 ndzɨ fa bə́ sɔmbu miɨ dzɔ makə bə́ kə sɔmbɔhɔ lɛɛ, fia na keŋkɛhɛ fiɔŋ fi fənə bə miɨ wa. Fiɔŋ fi ndzeŋe na lə miɨ gâ bilaŋ bi Nyɔ lə. 20 Miɨ chi kə̂tə kwa chi yu nə̀ ji tsa yi Nyɔ nə̀ bəndə yu. 21 Jilə bə́ nə̀ bəndɨ wə, wə ji mfia, wə kə kɨ funsə gwɨ ndzɨ ma. Bəmanɨ, jilə wə na keŋkɛ dzə yi fɔnɔ nə buŋfia ntɨŋ, wə fɔ̂ fiɔhɔ. 22 Bə kɨ kkɨ lə miɨ wu Baba nə̀ bəndə yu, yu ji mfia, nə̀ fɔ nə buŋfia ntɨŋ ɨji ndzɨ Baba. Na diəŋ nɨ miɨ wu bə́ nə̀ bəndə yu na jimiɛhɛ mfia, yu na ji fɛŋ mfia wu Klistu. 23 Bə́ nə̀ taŋ bəŋ ba sɔmbu lɨ. Bə kə kɨ ji bəŋfia bə bənɨ lə. 24 Bəma, bəŋgwɨŋ, miɨ kə̂tə bə Nyɔ dzə yi Nyɔ nə̀ bəndə yu, yu ji yi ntɨŋ.
Ntəfɨ kɨ bəkpa lə bə kɨ bəkansɨ bə bəŋku lə
25 Fɛŋ, kɨ bəkansɨ lə makə bənɨnsə bə na bambi bəkpa, Baba kə nyaha mɨ fiɔŋ fi nchanyɛ. Bəmanɨ, nna nnya kɛŋ kɨŋgɔmbiɛ nɨ miɨ wu Baba nə kwese yaa bə yu ba fə yu kɨ ji miɨ wu kɨyɛyi. 26 Ndzɨ ŋgə wu na ji fɛŋ, nna ŋgɔmbiɛ lə na buni lə miɨ kə̂tə chi yu na ji. 27 Wə wu na ji bə kpansɨ, wə kə̂ kɔŋkɔhɔ yu. Wə wu kə dzɛɛ kpansɨ, wə kə̂ nɔŋkɔhɔ lə wə dze kpansɨ. 28 Bəmanɨ, ɨ nyunso ŋəŋ lə yu dze kpansɨ bɔ bə yu kɨ ji, tə yu bubiə kə fəkə. Jilə sɔŋfa wu kansɨ' dze nyunso, kɨjilə yu kə fəkə tɨ bubiə. Bəmanɨ, bə kɨ kkɨ lə bənɨ bə na ji ntɛshɛ jiba ɨ bɔ kɨ keŋkɛ bəŋgə mbi no ntɨŋ. Nə mɨ lɨ, nna nse lə mba bəŋ nə fiɔŋ fiŋ wɨ.
29 Bəŋgwɨŋ, fiɔŋ fi nna nchanyɛ na lə tsa ya buzdulu kɨtso. Dze nə fɛŋ bɨŋ kɨ gɨntɨ, bənɨ bə na keŋkɛ bəkansɨ kɨ ji wələ bɔ na sɨŋ bə bəkansɨ, 30 bənɨ bə na dɨ kkpə kɨ ji wələ bɔ na dəhə kkpə, bənɨ bə na laŋkɨ kɨ ji wələ fiɔŋ na ndzeŋɛhɛ bɔ lɨ, bənɨ bə na taŋkɨ biɔŋ kɨ ji wələ bɔ kə keŋkɛ fiɔŋ, 31 bənɨ bə na fɨtɨ biɔŋ bi mbi no lə kɨ ji wələ bɔ na keŋkɛhɛ fiɔŋ fi fənə bə mbi no. Mɨ ntə mɛ ndzɨ mbi wu na ji no fɛŋ mɛ, yu chɛti wa buchɛnɛ.
32 Nna nse lə bə kɨ ji fiɔŋ fidɔ mfunsə sɨŋ bəŋ. Miɨ wu kə dzɛɛ kpansɨ na galɨ bufɨ buhu shɔŋ yi Baba wɨ, nɨ naji ɨ yu kɨ fɨtɨ kwa ji fiɔŋ fi Baba kɨ woko buni. 33 Miɨ wu na ji bə kpansɨ na galɨ bufɨ ɨji biɔŋ bi mbi lə wɨ, nɨ naji ɨ yu kɨ fɨtɨ kpansɨ woko buni. 34 Bufɨ buhu na ji bujɛnɛ. Na tɨ diəŋ nɨ fi kpansɨ lə makə wɛŋ wu kansɨ wu kə dzɛɛ nyunso na ji. Yu na galɨ bufɨ buhu nɨŋ yi Baba wɨ, nɨ naji ɨ yu nya yu gwɨ yihi bə shəŋ yihi chi. Kpansɨ wu na keŋkɛ nyunso na galɨ bufɨ ji biɔŋ bi mbi no lə wɨ, nɨ naji ɨ yu kɨ fɨtɨ gwɨ ndzeŋe nomo. 35 Mɨ nchanyɛ mɛ buni bwɛnɨ lɨ. Na jimiɛhɛ lə nna nlosɔ bəŋ. Nna ntɨdi lə biɔŋ kɨ gəndə diəŋ, fə miɨ nyâ gwɨ yihi chi nɨŋ yi Baba lɨ fiɔŋ fidɔ nyinchə sɨŋ yu.
36 Jilə nyunso na lɛti wɛŋ wu kansɨ, yu ŋəŋ lə fiə wuhu tsukɔ wɛŋ wu kansɨ wu yu na se wa wɨ na jimiɛhɛ diəŋ, ɨ gwɨ na shi yu kɨtso, ɨji fi ji kwa lə bɔ tɛ̂shɛ, yu fə nɨ yu na se, bɔ tɛ̂shɛ kɨ ji, ɨ fi jikə jimiɛ lə yu' fə bubiə. 37 Bəmanɨ, nyunso wu' galə yu shəŋ lə na ji ɨ yu dze kpansɨ wu yu na lɛti wa kə ɨji miɨ wudɔ kə tombɛ yu lə bɔ tɛshɛ, yu kɨki gwɨ yihi, ɨji yu' ga yu shəŋ lə naji ɨ bɔ tɛshɛ bə sɔŋfa wa kə,ª kɨjilə yu fə diəŋ. 38 Fi na ji lə, miɨ wu dzɛɛ kpansɨ wu yu nə̀ biɛ, yu' fə buni. Bəmanɨ, miɨ wu kə dzɛɛ kpansɨ' fə buni ba ya ma.ª
39 Kpansɨ ba kɨ ji kpansɨ miɨ tsa yi nomo na bambi su. Bəmanɨ, ɨ nomo kkpə lɨ, tə naji ɨ yu dze nyunso wudɔ wu yu na se, ɨ bɔ bə yu kɨ ji, fi kɨ ji kwa lə miɨ wa kɨ ji miɨ wu kɨmbɨŋ. 40 Bəmanɨ, nɨ nna ŋŋɨntɨ yɛmɨ, jilə kpansɨ wa' kətə manɨ, ɨ yu kɨ woko buni kɨtso. Nna nchanyɛ mɛ, ŋkkɨ lə nna ŋkeŋkɛ lɨ tɨ Kɨn'yɨntɨ kɨ Nyɔ lə.