Miɨ wu kɨmbɨŋ kə̂ gəŋkə ba sɔmɔ wudɔ bə bənɨ bə na jimiɛhɛ bə kɨmbɨŋ'ə
6
Fi na jimiɛhɛ diəŋ lə jilə miɨ nə bəŋ ntɨŋ na keŋkɛ fiɔŋ bə wəmɛni, yu shə ŋgəŋ ba sɔmɔ yu bənɨ bə Nyɔ lə nəfiə, yu tsu ba gəŋ nya nsa ya ji bə bənɨ bə na kkəhə Nyɔ. 2 Bə na kkəhə lə bənɨ bə Nyɔ lə ná sakɨ mbi no chi? Nɨ fi na ji lə na bəŋ bə ná saa bɔ, kɨjilə naji ɨ bə jikə sakəhə biɔŋ bintse bəŋ ntɨŋ? 3 Bə na kkəhə lə kə ná sakɨ bənchinda bə Nyɔ lə? Jilə na manɨ, tə naji ɨ bə kkə nsa biɔŋ bi na tɨchə kɨjimiɛ kɨ fɛŋ'ə ntɨŋ buni. 4 Biɔŋ nɨ bia dze kɨ tɨchə, ɨ bə gəndə nəŋ ba tə kɨ dze bə gɨntɨ bə bi ji bənɨ bə na keŋkɛhɛ tɨmo dɨ tsəsɨ ntɛshɛ yi bənɨ bə kɨmbɨŋ'ə ntɨŋ? 5 Yaa bə bəŋ. Kɨjilə miɨ na sɨŋ su bəŋ ntɨŋ wu na ji bə bufɨ bu kəmbə nsa yi miɨ bə wəmɛni? 6 Miɨ gəŋ yu tsu ba dze wəmɛni ba gəŋ sɔmɔ ji bə bənɨ bə na jimiɛhɛ bə kɨmbɨŋ'ə. 7 Dzenəfə bə na ji cha bə bənsa bəŋ ntɨŋ tə bə' gbɔ. Naji ɨ bə jikə galə ma lə kɨ ji ji bənɨ bədɔ bə kɨ fɨtɨ biɔŋ bibiə bə bəŋ? Naji tɨ ɨ bə jikə galə ma lə kɨ ji ji bənɨ bədɔ bə kɨ fukiɛ bəŋ? 8 Bəmanɨ, na bəŋ kɨbɛɛ bə tsɔ kɨ fɨtɨ biɔŋ bibiə bichi, bə ji tɨ bə biŋfukiɛ, bə fɨtɨ biŋ biɔŋ bə bəwəma. 9 Bə na kkəhə lə bənɨ bə na fɨtɨ biɔŋ bibiə ná keŋkɛhɛ dɨ buŋkuŋ bu Nyɔ lə ntɨŋ? Bə kə kɨ fukiɛ gwɨ́ yənɨ. Bənɨ bə na dzenɛ, makə bə na tsɨsə bənyɔ bə kɨlɔlɔ lə, makə bə na dzenɛ bə bəkansɨ bə bənɨ bədɔ lə, makə bənɨnsə bə na dzenɛ bə gwɨ́ yibɔlə, 10 makə bənɨ bə buyi lə, makə bənɨ bə na yɨtɨ yəsɨ bə biɔŋ, makə bənɨ bə na mu bɔ chinchi, makə bənɨ bə na suŋku bədɔ, makə bəchəŋku, bɛŋ bənɨ ná keŋkɛhɛ dɨ buŋkuŋ bu Nyɔ lə ntɨŋ. 11 Biɔŋ biŋ na bi bəŋ bədɔ nə̀ fɨtɨ fiəfiə. Bəmanɨ, Nyɔ wwɔ bəŋ ba tsaləsɨ bəŋ, bə kɨ ji diəŋ yu yəsɨ. Yu nə̀ fə biɔŋ biŋ bə yɨ wu Baba Jisɔs Klistu lə bə wu Kɨn'yɨntɨ kɨ yu wu Nyɔ waha lə.Fiɔŋ fi naji lə miɨ kɨ fɨtɨ bə gwɨ yihi
12 Naji ɨ miɨ tə lə yu na keŋkɛ buŋga bu fənə fiɔŋ fichi fi yu na se. Bəmanɨ, ŋkɨ ntɨdi lə na fiɔŋ fichi fi naji ɨ fi chitə miɨ kə. Naji ɨ miɨ tə lə yu na keŋkɛ buŋga bu fənə fiɔŋ fichi fi yu na se. Bəmanɨ mɨ ntə lə, naji ɨ fiɔŋ fidɔ chi mɨ lə ŋkɨ nji mfia wu fi kə. 13 Naji ɨ miɨ wudɔ tə tɨ lə, “Bidiəŋ na ji ndzɨ tɔ, tɔ ji ndzɨ bidiəŋ.” Bəmanɨ bə kkə̂ lə Nyɔ ná jishi lɨ bi bichi. Gwɨ yi miɨ na jimiɛhɛ lə miɨ wa kɨ dzenɛ bə yi. Gwɨ yi miɨ na ji ji lə yu kɨ nɨntɨ bə yi Baba lɨ, ɨji Baba wu na keŋkɛ gwɨ ya. 14 Nɨ Nyɔ nə̀ dzakɔ Baba waha nə kkpə lɨ, na diəŋ nɨ yu jiwa ɨ yu foso bɨ nə kkpə lɨ bə buŋga buhu bwa. 15 Bə na kkəhə lə gwɨ́ yɛnɨ na biŋuni bi gwɨ yi Klistu lə? Naji ɨ miɨ fə nəŋ tə dze biŋuni bi gwɨ yi Klistu lə ba gəŋ tɛshɛ bə kpansɨ wu ndzenɛ? Naji ɨ fi kɨ ji manɨ kə. 16 Bə na kkəhə lə ɨ miɨ tɛshɛ gwɨ yihi bə kpansɨ wu ndzenɛ tə bɔ bə yu na ji gwɨ miu? Na fi fi bə́ nə̀ bɔndɔ lə, “Tsa yi kpansɨ bə nyunso' tɛshɛ, tə bɔ bə yu' tsu miɨ miu.” 17 Bəmanɨ, miɨ wu na ji ntɛshɛ bə Baba, yu na ji bɔ bə yu fiɔŋɨ fimo kɨn'yɨntɨ ntɨŋ. 18 Bə lə̂tə nə fiə wu ndzenɛ lə wɨ. Biɔŋ bibiə yɨla bi miɨ na fɨtɨ, yu na fɨtəhə bi ji bə gwɨ yihi. Bəmanɨ, miɨ wu ndzenɛ na fɨtɨ bubiə ji bə gwɨ yihi. 19 Bə na kkəhə lə gwɨ yɛnɨ na tsɔŋ yi Kɨn'yɨntɨ kɨ Ntsaaŋ na me sɔ? Na bəŋ bə na keŋkɛ gwɨ́ yənɨ kə. 20 Bə́ nə̀ taŋ bəŋ ba sɔmbu lɨ. Bəma, bə kûntə Nyɔ bə gwɨ́ yənɨ.