Bə́ fôso miɨ wu ndzenɛ nə bənɨ bə Klistu lə ntɨŋ
5
Shɔŋ nə fɔ mɨ wɨ yɛyi lə fiə wu ndzenɛ lə wa bəŋ ntɨŋ, ɨji bənɨ bə na kkəhə Nyɔ tɨmo naji ɨ bɔ kɨ ji bə ŋgwe yi ya ndzenɛ kə. Fi na ji lə miɨ wudɔ nə bəŋ ntɨŋ na me bə kpansɨ tɨɨ. 2 Ɨ bə ŋəŋ ŋgwe yi kɨŋ kɨnyənə mɛ, bə jikə kɨ dɨ budənə, bə kɨ dze ji gwɨ? Bə naji lə bə fôso ŋgwe yi wa miɨ wu mɔŋɔ fia fiɔŋ nə bəŋ ntɨŋ.3 Mɛfə nna nsɨŋ fə bəŋ ku, mɨ ŋ'wa bə bəŋ kɨn'yɨntɨ ntɨŋ. Mɨ ŋkəmbɨ nsa tsukɔ miɨ wu mɔŋɔ ŋgwe yi fia fiɔŋ wɨ wələ nna nji fə bəŋ ku. 4 Yɨ wu Baba waha Jisɔs lə lɨ, tsa yi bə' jimiɛ kɨjimiɛ, nji bə bəŋ kɨn'yɨntɨ ntɨŋ, buŋga bu Baba Jisɔs lə ji tɨ mɨ, 5 bə dze miɨ wa ba nya Satan kaŋ, yu jishi gwɨ yi miɨ wa, fə kɨn'yɨntɨ kɨhɨ ná fɔɔfo butsu bu Baba ná fichə ba lɨ.
6 Bə na dze gwɨ mɛ fi jikə ndzeŋkɛhɛ. Bə na kkəhə lə bə́ ba bə́ dze dzé mɛ tsəsɨ ba funchə di ntɨŋ, yi fə di wa wuchi kundu? 7 Bə fôso dzé yi na ji fiə wuko nə bəŋ ntɨŋ, fə bə kɨ ji bənɨ bəfa nɨ di wu bə́ kə galə dzé sɔ, ɨji nɨ bə na ji. Bə na kkɨ lɨ buni lə Klistu na wɛŋ wu Shiŋ wu Nyɔ nə̀ fəə bintɔfiɛ su bɨ lɨ diəŋ nɨ wɛŋ wu shiŋ wu bə́ ba wa bə́ yembe tsa yi Kɨgbeyɛ kɨ Nchɛnəbɨŋ'ə. 8 Bəma, kə kɨ ji nɨ bənɨ bə na diɨ Kɨgbeyɛ kɨ Nchɛnəbɨŋ'ə ji bə blɛ wu bə́ kə galə dzé sɔ wu na ji shəŋ yi ntsaaŋ bə kɨyɛyi. Kə kə kɨ ji nɨ bənɨ bə na diɨ kɨgbeyɛ kɨŋ ɨji bə blɛ wuko wu bə́ sə galə dzé sɔ wu na ji fiə wubiə bə bifənə bibiə.
9 Kɨŋwatɨ kɨ nnə̀ mbɔndɔ ka bə bəŋ, nnə̀ mbɔndu lə bə kə̂ tɛshɛ gwɨ bə bənɨ bə ndzenɛ lə. 10 Nnə̀ nchanyɛhɛ kɨ bənɨ bə mbi no lə bə na dzenɛ, makə bə na yɨtɨ yəsɨ bə biɔŋ, makə bəchəŋku, makə bə na tsɨsə bə bənyɔ bə kɨlɔlɔ lə. Jilə na jimə ba bənɨ, tə bə naji lə bə fɔ nə mbi no ntɨŋ. 11 Nnə̀ nchanyɛ ji lə bə kə̂ tɛshɛ gwɨ bə miɨ wu na tɨdi lə yu na ji ŋgwɨŋ waha Klistu ntɨŋ, yu tsu yu dzenɛ, makə yu yɨtɨ yəsɨ bə biɔŋ, makə yu kuntə bənyɔ bə kɨlɔlɔ lə, makə yu suŋku bənɨ, makə miɨ wu na mu yu chinchi, makə yu yɨ. Miɨ kə̂ mɔŋkɔ lə yu diə bə ŋgwe yi wa miɨ. 12 Na dɨ waha kə wu naji lə kə kɨ sakɨ bənɨ bə na jimiɛhɛ ntɛshɛ yi bənɨ bə kɨmbɨŋ'ə ntɨŋ. Bənɨ bə naji ɨ kə kɨ sakɨ na bə na ji kɨntsu kaha ntɨŋ. 13 Na Nyɔ wu ná saa bənɨ bə na jimiɛhɛ kɨntsu kɨŋ ntɨŋ. Kɨŋwatɨ kɨ Nyɔ lə na tɨdi lə,
“Bə fôso miɨ wu na ji bə fiə wubiə nə bəŋ ntɨŋ.”