Bənɨ bə Klistu lə kə kɨ dze gwɨ
4
Fi na ji lə bənɨ kɨ ŋɨntɨ bɨ nɨ beŋ bə nɨŋ'ə bə Klistu lə bə Nyɔ nya shɔŋ yihi bɔ kaŋ yi nə̀ ji bunyələ. 2 Fi kɨ ji lə, miɨ wu bə́ nya nɨŋ yu kaŋ naji lə yu kɨ fɨtɨ nɨ miɨ wuhu wubəŋ na tɨdi. 3 Nə mɨ lɨ, bəŋ lɛ, makə tsɔŋ yidɔ yi nsa yi na ji lə na miɨbəwəŋ wu na sakɨ, nna ŋɨntəhə lə na fiɔŋ. Nna nsakəhə tɨmo gwɨ yɛŋ. 4 Fiɔŋ na sɨŋ shəŋ yɛmɨ ntɨŋ fi na sakɨ mɨ. Bəmanɨ, fia na donchɛhɛ lə nna nji ntsaaŋ. Na kwa Baba wu ná saa mɨ. 5 Bəma, bə kə kɨ kəmbiɛ bənsa tsa yisu bambi kə kwətsə. Bə wôkɔ Baba ba. Na yu wu ná fosɔ biɔŋ bi bə́' nyələ kɨjuwɔ ntɨŋ ŋgbooŋ, ɨ yu shafiɛ biɔŋ bi bənɨ na ji bə bi bɔ shəŋ. Bəma, ɨ Nyɔ sɛŋ miɨ chi wu naji lə yu sɛŋ.6 Bəŋgwɨŋ, biɔŋ bi nna nchanyɛ biŋ tsukɔ bɨ bə Apɔlɔs wɨ na lə fi chitə bəŋ, fə bə fɨyə nə bɨ lɨ bə mfə yi biɔŋ bə biəlɨ kwa ji fiɔŋ fi na ji bubɔndɔ. Bəma, ɨ bə tsukə kɨ dze gwɨ, bə dze miɨ wudɔ koso. 7 Na yəŋ wu fəə lə wə kɨ ji chichi nə miɨ wudɔ wɨ? Na la fi wə na ji bə fi, fi na ji lə bə́ kə nyaha wə fi bunyanə? Nɨ fi na ji manɨ, fə la lə wə kɨ dze gwɨ wələ bə́ kə nyaha wə fiɔŋ fia bunyanə? 8 Bə na dze lə bə keŋkɛ ba fiɔŋ fichi fi bə na se, bə ji fɛŋ bənɨ bəbəŋ, lə mɛfə kə na sɨŋ, bə' tsu bəŋkuŋ? Bə tə kɨ ji la bəŋkuŋ fə kə wɔbɔ bəŋ nəjiŋ kɨ sakɨ bəchi. 9 Nna ŋŋɨntɨ lə Nyɔ tsu ba ga bɨ bə na ji beŋ bə shɔŋ'ə bə Jisɔs lə kə kɨ ji nəjiŋ. Kə na ji nɨ bənɨ bə bə́ na gɨntɨ lə bə́ kkpɨshɛ bɔ ŋgbooŋ. Kə' tsu fiɔŋ fi bənɨ na doŋko yəsɨ su mbi no ntɨŋ, bənchinda bə Nyɔ lə doŋko tɨ. 10 Kə' tsu bəŋfidi ndzɨ Klistu, bəmanɨ bə na ji bənɨ bə Klistu lə bə na fɨŋfə. Kə na ji bən'yelɛ, bə ji bəntɛgwɨ. Bənɨ kuntə bəŋ, bɔ dze bɨ koso. 11 Nə mbɛyɛ bɨŋ ba fɔ fɛŋ, kə na ji bə dzɔŋ, ŋgɔ wɨntɨ bɨ, kə doŋko ji bindzu binshakiɛ, bənɨ funsu bɨ, kə fiəŋkə dɨ wu menɛ. 12 Kə diɔnɔ, kə nɨntɨ bə kaŋ yaha fə kə tə diə. Tsa yi bənɨ na suŋku bɨ, kə kɨ nya bɔ ji budə. Bɔ sesɛ gbo bɨ nəjiŋ, kə kansɨ kwa shəŋ. 13 Bɔ chanyɛ díɛ yibiə bə bɨ, kə chisə bɔ ji yidə. Sɨŋ sɨŋ ba tuŋ ndɛŋ, kə na ji nɨ biɔŋ bi bə́' tɔfɔ, kə' tsu biɔŋ biŋfekiɛ mbi no ntɨŋ.
14 Nna mbondɔhɔ biɔŋ biŋ bə bəŋ mɛ lə nna nse lə yaa kɨ kwete bəŋ. Nna nnya bəŋ bitɨfiə nɨ beŋ bɛmɨ bə na ji shəŋ yɛŋ. 15 Ɨ bə na keŋkɛ tɨmo bənɨ kɨyɛŋ bə na tɨfiə bəŋ tsukɔ Klistu wɨ, ɨ fi jikə jimiɛ lə bə na ji bə bəchaa kɨyɛŋ. Mɨ ntsu chaa wɛnɨ, ndzɨ nə̀ mɨ wu nə̀ fəə lə bə tɛ̂shɛ bə Jisɔs Klistu tsa yi nnə̀ ntədiə shɔŋ yihi yi ndzeŋe bə bəŋ. 16 Bəma, nna nnende lə bə kɨ biəlɨ dzə́ yɛmɨ. 17 Na fiɔŋ fi nə̀ fəə lə mfaŋ Timɔti wɛnɛ wu shəŋ bəŋ'ɨ, wu na ji bə kɨmbɨŋ Baba ntɨŋ. Yu jiwa yu ba se bəŋ kɨ fiə wɛmɨ lə Klistu ntɨŋ, ɨji wu wu nna ŋgəndə ntɨfiə bəntɛshɛ bə bənɨ bə kɨmbɨŋ'ə bəchi, bidɨ bichi ntɨŋ. 18 Bənɨ bədɔ nə bəŋ ntɨŋ' gbɔ kɨ dze gwɨ ndzɨ bɔ na gɔmbiɛ lə na ji nchi ba bəŋ ntɨŋ kə. 19 Bəmanɨ, ɨ Baba bɨŋ'ɨ, tsa tsəsɨ nchi mba bəŋ wɨ. Tsa yi mba, ntə ŋəŋ lə bənɨ bə na dze ba gwɨ na kɨtɨ kwa ji bifuŋ maa bɔ na ji bə ŋgwe yi buŋga bula, 20 ndzɨ buŋkuŋ bu Nyɔ lə na jimiɛhɛ fiɔŋ fi kənə bifuŋ kə. Na fiɔŋ fi buŋga buhu lə. 21 Bə na se lə mba nəŋ? Bə na se lə mba bə fitɨ maa bə shəŋ yi kɨnse lə bə budə lə?