Bənɨ bə Klistu lə kɨ ji diɛ miu
3
Bəŋgwɨŋ, tsa yi kə nə̀ ji, nə̀ ji ŋkɨ nchanyɛ kə bə bəŋ nɨ bənɨ bə na woko bə Kɨn'yɨntɨ kɨ Ntsaaŋ. Nnə̀ nchanyɛ bə bəŋ nɨ bənɨ bə na bambi bɔ biəlɨ ji biɔŋ bi gwɨ na se, ma bə na bambi nɨ muŋwenɛ tsukɔ Klistu wɨ. 2 Nnə̀ nya bəŋ ji mbəndɨ. Nnə̀ ŋkə nyaha bəŋ bidiəŋ bintaŋ ndzɨ bə nə̀ bambi kə tɛkɛhɛ, fɔ fɛŋ tɨmo bə kə tɛkɛhɛ. 3 Bə bambi ba bə biəlɨ ji biɔŋ bi gwɨ na se. Nɨ bə na bambi bə keŋkɛ shəŋ yi yi, bə bəŋkpanə, kɨjilə fiŋ na donchɛhɛ lə bə biəlɨ ba ji biɔŋ bi gwɨ na se? Fiŋ kə donchɛ lə bə bambi ba bə keŋkɛ fiə wu bənɨ bə sɛŋ koso lə? 4 Miɨ dze kɨ tɨdi lə, “Nna mbiəlɨ ji Pɔl,” wudɔ tɨdi lə, “Nna mbiəlɨ ji Apɔlɔs,” ɨ fiŋfi jikə kɨ donchɛ lə bə na fɨtɨ ji fiə wu bənɨ bə sɛŋ koso lə? 5 Apɔlɔs na yəŋ, Pɔl ji yəŋ? Bɨ bə yu bəchi na ji ji beŋ bə nɨŋ'ə bə Baba lə bə nə̀ fəə fə bə tə galə shəŋ yu wɨ, miɨ nɨntɨ yihi nɨŋ nɨ Baba nya yu. 6 Yɛmɨ nɨŋ nə̀ ji lə ntishɛ ŋgwe ya, yi Apɔlɔs nɨŋ ji lə yu shishə ŋgɔŋ biŋgwekɛ bia wɨ, bəmanɨ ɨji Nyɔ wu na fɨtɨ lə yi kɨ ko. 7 Kɨjilə, miɨ wu tishɛ ŋgwe ma wu shishɛ ŋgɔŋ bɨŋ na kwətsəhə fiɔŋ'ɨ. Na Nyɔ kwa wu fɨtɨ lə yi kɨ ko wu na ji fiɔŋ'ɨ. 8 Miɨ wu tishɛ bə wu shishɛ ŋgɔŋ yi bɨŋ na ji diəŋ, Nyɔ ná kwɨntɨ miɨ chi, yu biəlɨ nɨŋ yi miɨ wa. 9 Kə na ji bənɨ bə nɨŋ yi Nyɔ lə. Bə ji kə wu Nyɔ lə wa, bə ji tɨ tsɔŋ yihi. 10 Nnə̀ mma kɨchə kɨ tsɔŋ ya lə nɨ miɨ wu wɛyɛ wu na kkɨ nɨŋ yihi buni biəlɨ nchitə yi Nyɔ nə̀ chitə mɨ. Nnə̀ mma kɨchə ka manɨ, miɨ wudɔ kɨ wɛyɛ tsɔŋ ya kɨ bɨŋ. Miɨ wula wu na wɛyɛ kɨchə kɨŋ bɨŋ, yu kkə̂ chi yu na wɛyɛ cha. 11 Bə kkə̂ lə kɨchə ka kətə kwa kɨ bə́ nə̀ maa kɨŋ, ɨji Jisɔs Klistu, naji ɨ miɨ wudɔ chi maa kɨdɔ kə. 12 Bənɨ tə kɨ wɛyɛ kɨ bɨŋ bə biɔŋ chichi chichi. Miɨ wudɔ gəŋ yu dze ji ŋgusa, wudɔ dze kɨdəŋkə, wudɔ dze tá yi tɛti kpə ba kɨ wɛyɛ su. Miɨ wudɔ dze ji bitɨ, wudɔ yɔndu, wudɔ dze ndzoŋ ba kɨ wɛyɛ su. 13 Ɨ bɔ wɛyɛ tɨmo nəŋ, butsu ba bwa bu bɔ ná ŋəŋə nɨ nɨŋ yi miɨ chi na ji tsa yi nɨŋ ya' yinshɛ ŋgbooŋ Butsu bu Klistu ná ba bə boso. Boso wa ná kɨ foko nɨŋ yi miɨ chi, bə́ ŋɨntɨ nɨ yi ji. 14 Jilə fiɔŋ fi miɨ sə wɛyɛ kɨchə ka bɨŋ kə fiəhə, ɨ miɨ wa keŋkɛ bikwəntsə. 15 Fi fiə lɨ, ɨ miɨ wa lasɨ bikwəntsə bihi, bəmanɨ ɨ yu fɔfo kwa nɨ miɨ wu' chɛɛ boso ntɨŋ.Bənɨ bə Klistu lə na ji tsɔŋ yi Nyɔ
16 Bə na kkəhə lə bə na ji tsɔŋ yi bintɔfiɛ yi Nyɔ, Kɨn'yɨntɨ kɨ yu wu Nyɔ lə ji bəŋ ntɨŋ? 17 Ɨ miɨ bɨsɨ tsɔŋ ya, ɨ Nyɔ bɨsɨ miɨ wa, ndzɨ na tsɔŋ yi Nyɔ yi ntsaaŋ, ə ji bəŋ tsɔŋ ya.
18 Miɨ kə̂ fukiɛ gwɨ yihi. Ɨ miɨ wudɔ nə bəŋ ntɨŋ na gɔmbiɛ lə yu na fɨŋfə lɨ mbi no ntɨŋ, yu tsu mfidi fə yu fɨŋfə. 19 Mɨ nchanyɛ mɛ ndzɨ biɔŋ bi bənɨ bə sɛŋ koso na ŋɨntɨ lə na bufɨ, na bi Nyɔ na ŋɨntɨ bi ji buŋfidi yu lɨ. Na fi fi bə́ nə̀ bɔndɔ lə,
“Nyɔ na dze kwa ji bufɨ bu bənɨ bə na fɨŋfə lə
yu kwete bɔ su.”
20 Fi ji tɨ bubɔndɔ lə,
“Baba na kkɨ lɨ lə biɔŋ bi bənɨ bəfɨ na gɔmbiɛ
ji kwa bi kɨlɔlɔ lə.”