Shɔŋ yi bə́ nə̀ bandə Klistu kɨtɨ kɨ ŋ'wa lə wɨ
2
Bəŋgwɨŋ, bə sê tsa yi nnə̀ mba ya bəŋ'ɨ lə ntɨfiə bəŋ shɔŋ yi Nyɔ yi nə̀ ji bunyələ. Nnə̀ ŋkə mbaha fiɛŋ kɨ tɨfiə bə díɛ yi ndzəŋgə makə bə bufɨ bwɛŋ, 2 ndzɨ tsa yi nnə̀ nji bə bəŋ nnə̀ ŋga lə naji ŋga bufɨ fiɔŋ fidɔ wɨ kə yasə lə ŋkɨ ntɨfiə kwa ji kɨ Jisɔs Klistu lə, ntɨfiə tɨ nɨ bə́ nə̀ bandə yu kɨtɨ kɨ ŋ'wa lə wɨ. 3 Nɨ nnə̀ nji bə bəŋ, nnə̀ nji yee, nji bə nyiŋ, njakɨ kɨtso. 4 Tsa yi nnə̀ nchanyɛɛ ntɨfiə bəŋ shɔŋ yi ndzeŋe nyi, nnə̀ ŋkə nchanyɛ ji bə díɛ yi bufɨ lə makə yi ndzəŋgə. Nnə̀ nchanyɛ ɨji nə buŋga bu Kɨn'yɨntɨ kɨ Nyɔ lə ntɨŋ. 5 Nnə̀ mfɨtɨ manɨ fə bə jɛkə galɨ shəŋ bufɨ bu miɨbəwəŋ'ə wɨ. Nnə̀ nchanyɛ ma ji lə bə gâ bufɨ ji buŋga bu Nyɔ lə wɨ.Bufɨ bu Nyɔ lə
6 Bənɨ bə na lɨmi ŋkɨɨŋ Nyɔ wɨ, kə na chanyɛ bufɨ. Bufɨ buŋ jikə jimiɛ bu sɛŋ koso makə bu miɨ wudɔ lə wu na sakɨ sɛŋ koso. Buŋga bubɔlə ná ka kɨlɔlɔ. 7 Bufɨ bu Nyɔ lə bubəŋ bu kə na tɨfiə buŋ na fiɔŋ fi nə̀ sa fi ji bunyələ, bənɨ jikə kkə. Bufɨ bwa nə̀ Nyɔ wu nə̀ fəə bu mbi bambi kə bɛyɛ, lə yu ná fəə kə kɨ ji bubəŋ buhu ntɨŋ. 8 Miɨ wudɔ nə ŋgwe yi bənɨ bə na sakɨ tsa nyi ntɨŋ nə̀ kkəhə kɨ bufɨ buŋ'ə, ndzɨ tə nə̀ ji lə bɔ kɨ kkɨ, bə́ tə nə̀ jikə bandəhə Baba wu bubəŋ kɨtɨ kɨ ŋ'wa lə wɨ. 9 Bəmanɨ, nə bɨ lɨ, fi nə̀ ji bubɔndɔ lə,
“Biɔŋ bi yəsɨ kə saa ŋəŋ'ɨ,
bitiu kə saa wɔ lɨ,
miɨ kə saa tɨ gɔmbiɛ lɨ,
na bi bi Nyɔ nə̀ galə bənɨ lɨ bə na laŋkɨ yu.”
10 Nyɔ' fə Kɨn'yɨntɨ kɨhɨ donchɛ biɔŋ biŋ bə bɨ. Kɨn'yɨntɨ kɨ Nyɔ lə na ba kɨ fushi biɔŋ bichi, kɨ ba kɨ fushi ma biɔŋ bi Nyɔ lə bi ji bunyələ, 11 ndzɨ naji ɨ miɨ wudɔ kkə fiɔŋ fi miɨ wudɔ na gɔmbiɛ nə yu shəŋ kə, yasə kɨn'yɨntɨ kɨ miɨ wa lə kɨ na ji yu wɨ. Na tɨ diəŋ nɨ naji ɨ miɨ kkə fiɔŋ fi Nyɔ na gɔmbiɛ kə, fiəŋkə Kɨn'yɨntɨ kɨ Nyɔ lə. 12 Kɨn'yɨntɨ kɨ Nyɔ nə̀ nya kɨŋ bɨ na kɨ mbi no lə kə. Kɨn'yɨntɨ kɨŋ nə̀ fɔ nə Nyɔ lɨ, fə kə kɨ kkɨ binya bichi bi Nyɔ nya bɨ kɨlɔlɔ.
13 Kə na tɨfiə biɔŋ biŋ ɨjikə jimiə bə díɛ yi bə́ na tɨfiə bə bufɨ bu miɨbəwəŋ'ə. Kə na tɨfiə ji bə díɛ yi Kɨn'yɨntɨ kɨ Ntsaaŋ tɨfiə bɨ, kə wɔlɔsɨ biɔŋ bi kɨyɛyi lə bi Kɨn'yɨntɨ kɨ Nyɔ lə bə bənɨ bə na ji bə Kɨn'yɨntɨ kɨ Nyɔ lə. 14 Miɨ wu na sɨŋ bə Kɨn'yɨntɨ kɨ Nyɔ lə yu wɨ naji ɨ yu ləkə biɔŋ bi Kɨn'yɨntɨ kɨ Nyɔ lə kə. Yu ba yu kɨ ŋɨntɨ yihi lə na biɔŋ bi buŋfidi lə. Naji ɨ yu kkə nɨ bi na ji kə, ndzɨ na biɔŋ bi na ji mfə yi Kɨn'yɨntɨ kɨ Nyɔ lə kwa lə miɨ kkə. 15 Bəmanɨ, miɨ wu Kɨn'yɨntɨ kɨ Nyɔ lə na ji yu wɨ, naji ɨ yu chənə biɔŋ bichi buni ba kkə kɨnyi kɨsu, miɨ na sɨŋ su wu naji ɨ yu chənə wa miɨ. 16 Fi na ji bubɔndɔ lə,
“Miɨ na sɨŋ su wu na kkɨ fiɔŋ fi Baba na gɔmbiɛ
fə ná fɔɔ lə yu tɨfiə yu.”
Bəmanɨ, kə na ji bə biŋgɔmbiɛ ɨji bi Klistu na ji bə bi.