Kɨŋwatɨ kɨ fiəfiə kɨ Pɔl nə̀ bɔndɔ bə ntɛshɛ yi Kɔlɛn
Kɔlɛn
1
Na mɨ Pɔl, wu Nyɔ nə̀ bəndə nə kɨnse kɨhɨ ntɨŋ, ŋkɨ nji wɛŋ wu faŋə wu Jisɔs Klistu. Nna nji bɨ bə Sɔstɛnes ŋgwɨŋ waha. 2 Kɨŋwatɨ kɨŋ na gɨntɨ bə ntɛshɛ yi bənɨ bə Nyɔ lə yi Kɔlɛn bə yu nə̀ tsaləsɨ bɔ Jisɔs Klistu ntɨŋ. Nyɔ nə̀ bəndɨ bəŋ bə kɨ ji bənɨ buhu, nɨ bənɨ bəchi bə na bɨndɨ yɨ wu Baba Jisɔs Klistu lə shi lɨ chi. Yu na ji Baba wubɔ yu ji tɨ waha. 3 Taa waha Nyɔ bə Baba Jisɔs Klistu dônchɛ bəŋ shəŋ yi ndzeŋe ba nyâ bəŋ budə.Pɔl nya kɨmbafə nɨ Nyɔ nya budə bə bənɨ bə Kɔlɛn
4 Nna mba ŋkɨ nnya kɨmbafə bə Nyɔ tsá chi ndzɨ bəŋ, ndzɨ yu donchə bəŋ shəŋ yihi yi ndzeŋe, nɨ bə na ji Jisɔs Klistu ntɨŋ. 5 Nɨ fi na ji manɨ, Nyɔ nə̀ nya bəŋ bubəŋ dzə́ ntɨŋ chi, bə kkɨ biɔŋ bichi, bə kkɨ tɨ nchanyɛ biɔŋ bichi buni. 6 Shɔŋ yi na tsukɔ Klistu wɨ yinshi gwɨ bəŋ ntɨŋ ŋkɨɨŋ. 7 Kɨjilə bə na fiəŋkəhə kɨnya kɨ Nyɔ lə kɨdɔ fɛŋ, nɨ bə na wokɔ tsa yi Baba waha Jisɔs Klistu ná fichə ba lɨ lə bə ŋəŋ yu wɨ. 8 Yu wu Baba waha Jisɔs Klistu jiwa yu fə ɨ bə kɨ lɨmi ŋkɨɨŋ tuŋ fəŋgbɨŋ, ɨ bə jikə keŋkɛ tɨmo ŋgbɔ butsu buhu bwa ntɨŋ. 9 Nyɔ na ji Nyɔ wu lɨmi diɛ yihi bɨŋ. Na yu wu nə̀ bəndə bəŋ bə kɨ ji fiɔŋ'ɨ fimo bə wene Jisɔs Klistu wu na ji Baba waha.
Kɨnjɛgwɨ ntɛshɛ yi bənɨ bə kɨmbɨŋ'ə ntɨŋ
10 Bəŋgwɨŋ, nna nnende bəŋ yɨ wu Baba waha Jisɔs Klistu lə lɨ lə bəŋ bəchi bə tɛ̂shɛ kɨ ji bifuŋ bimo. Kɨnjɛgwɨ kə kɨ ji bəŋ ntɨŋ. Bə kɨ ji fiɔŋ fimo, bə keŋkɛ kɨŋgɔmbiɛ kɨmo, bə nɨntɨ fiɔŋ'ɨ fimo. 11 Bəŋgwɨŋ, nna ntɨdi mɛ ndzɨ bənɨ bə Klɔy tsɔŋ' tə bə mɨ lə bə na ji bə bəŋkpanə. 12 Fiɔŋ fi nna ntɨdi na lə, miɨ na ba yu jiji yu kɨ tɨdi lə yu na biəlɨ fihi ji Pɔl, wudɔ tɨdi lə yu na biəlɨ ji Apɔlɔs, wudɔ lə yu na biəlɨ ji Sɛfas,ª miɨ wudɔ lə yu na biəlɨ fihi ji Klistu. 13 Kɨjilə Klistu na ji bujɛnɛ? Na Pɔl wu bə́ nə̀ bandə yu kɨtɨ kɨ ŋ'wa lə wɨ ndzɨ bəŋ? Maa lə bə́ nə̀ chɛse bəŋ biɔ bə yɨ wu Pɔl lə lə? 14 Mɨ mbafə Nyɔ lə nnə̀ ŋkə nchɛsɛ miɨ wudɔ nə bəŋ ntɨŋ biɔ fiəŋkə kwa Klipus bə Gayɔs, 15 ndzɨ miɨ kə kɨ tɨdi lə bə́ nə̀ chɛse yu biɔ bə yɨ wɛŋ. 16 Ɨŋhɨŋŋ, nnə̀ nchɛse tɨ Tɛfanas biɔ bə bənɨ bə yu tsɔŋ. Fiəŋkə manɨ, ŋkə ntsɔhɔ ŋkkə miɨ wudɔ wu nnə̀ nchɛsɛ yu biɔ 17 Bə kɨ kkɨ lə Klistu nə̀ kə faŋkəhə mɨ lə mba ŋkɨ nchɛsɛ bənɨ biɔ. Yu nə̀ faŋ lə mba ŋkɨ ntɨdi ji shɔŋ yihi yi ndzeŋe. Nna ntɨdiɛhɛ bə díɛ yi bufɨ bu miɨbəwəŋ'ə kə, fə fi jikə kɨ ji lə buŋga bu kkpə lə bu Klistu nə̀ kkpə kɨtɨ kɨ ŋ'wa lə wɨ' tsu fiɔŋ fi kɨlɔlɔ lə.
Klistu na ji buŋga bə bufɨ bu Nyɔ lə
18 Fi na ji lə shɔŋ nyi lə Klistu nə̀ kkpə kɨtɨ kɨ ŋ'wa lə wɨ na buŋfidi bə bənɨ bə na la bɔ gɨntɨ. Bəmanɨ, bə bɨ bə yu na fɨtɨ kə foto fo nə ŋgə kaŋ, shɔŋ nyi na buŋga bu Nyɔ lə. 19 Fi na ji bubɔndɔ lə,
“Njiwa nshiŋkiɛ bufɨ bu bənɨ bə na donchɛ bufɨ lə,
ntsaŋ biŋgɔmbiɛ bi bənɨ bə na fɨŋfə lə.”
20 Nɨ fi na ji manɨ, bənɨ bə bufɨ lə dzəŋ fɛŋ? Bənɨ bə na tɨfiə bilaŋ bi Nyɔ lə dzəŋ? Bənɨ bə yímbiɛ lə tsa nyi bɨŋ dzəŋ? Nyɔ kə donchɛ lə bufɨ bu sɛŋ koso na buŋfidi? 21 Na fiɔŋ fi Nyɔ wu na kkɨ biɔŋ bichi buni nə̀ fəə lə naji ɨ bənɨ bə mbi no ntɨŋ kkə yu bə bubɔlə bufɨ kə. Yu nə̀ chiŋ yihi lə yu fə bənɨ fɔfo ɨji bə bɨmiə bə shɔŋ yi kə na tɨfiə nyi bənɨ ŋɨntɨ lə na buŋfidi. 22 Bəju na se lə bɔ ŋəŋ fiɔŋ fi na donchɛ buŋga bu Nyɔ lə fə bɔ tə bɨmiə, Bəglek noŋko bufɨ bu fiɔŋ'ə fə bɔ tə bɨmiə. 23 Bəmanɨ, kə na tɨfiə fiaha chi bə́ nə̀ bandə Klistu kɨtɨ kɨ ŋ'wa lə wɨ, fiɔŋ fia funsu Bəju. Bənɨ bə na jimiɛhɛ Bəju ŋɨntɨ lə na buŋfidi. 24 Bəmanɨ, bə bənɨ bə Nyɔ bəndə, se lɨ kɨ ji Bəju makə Bəglek, shɔŋ yi Klistu nyi na buŋga bu Nyɔ lə bə bufɨ bu Nyɔ lə bubəŋ. 25 Fi na ji manɨ ndzɨ fiɔŋ fi na yinshi chi buŋfidi bu Nyɔ lə na ji ji bufɨ bu na yakɨ bu miɨbəwəŋ'ə buchi. Fiɔŋ fi na yinshi lə na bun'yanə bu Nyɔ lə na ji ji buŋga bu na yakɨ bu miɨbəwəŋ'ə buchi.
26 Bəŋgwɨŋ, bə gɔ̂mbiɛ nɨ bə nə̀ ji tsa yi Nyɔ nə̀ bəndə bəŋ. Kɨyɛŋ kɛnɨ nə̀ jimiɛhɛ bəfɨ nɨ bənɨ bə sɛŋ koso na gɔmbiə. Kɨyɛŋ kɛnɨ nə̀ jimiɛhɛ bənɨ bəbəŋ. Kɨyɛŋ kɛnɨ nə̀ kə fɔkɔ nə ku yi bənɨ bəbəŋ'ə ntɨŋ. 27 Bəmanɨ, Nyɔ sa biɔŋ bi buŋfidi lə nə sɛŋ koso ba fə lə yaa kwe bəfɨ, yu sa biɔŋ bi yee nə sɛŋ koso ba fə lə yaa kwe bəŋga. 28 Nyɔ nə̀ sa biɔŋ bi bənɨ na dze bi koso mbi no ntɨŋ, bə biɔŋ bi bənɨ na nyənə, yu sa biɔŋ bi na jimiɛhɛ biɔŋ tɨmo, bə mfə lə biɔŋ bi bənɨ na sɛnti, bi tsû bi kɨlɔlɔ lə. 29 Yu nə̀ fə manɨ fə miɨbəwəŋ jɛkə kɨ kuntsɔ gulu yu yəsɨ. 30 Na yu Nyɔ wu nə̀ galə bəŋ Jisɔs Klistu ntɨŋ. Yu fə Klistu kɨ ji dzə yi bufɨ bubəŋ bɨ lɨ, yu fə tɨ Klistu ga bɨ diəŋ yu yəsɨ, yu tsaləsɨ bɨ, yu foso bɨ nə ŋgə ntɨŋ. 31 Fi kɨ ji fɛŋ nɨ fi na ji bubɔndɔ lə,
“Ɨ miɨ na kuntsɔ gulu, yu kɨ kuntsɔ ji nə fiɔŋ wɨ fi na ji mfə yi Baba fi.”