Binya bi Kɨn'yɨntɨ kɨ Ntsaaŋ'ə
12
Bəŋgwɨŋ, njiwa nchanyɛ fɛŋ tsukɔ binya wɨ, bi Kɨn'yɨntɨ kɨ Nyɔ lə nya bənɨ. Nna nsɛhɛ lə bə kɨ ji kɨjuwɔ ntɨŋ. 2 Bə na kkɨ lə tsa yi bə nə̀ bambi kə kkə Nyɔ, bə́ nə̀ fukiɛ bəŋ, bə kɨ jikijiki, bə kuntə bənyɔ bə kɨlɔlɔ lə bə na jikə chanyɛ. 3 Mɨ ŋkɨ ntɨdi lə bə kkə̂ buni lə ɨ miɨ na ji bə Kɨn'yɨntɨ kɨ Nyɔ lə yu wɨ, ɨ yu jikə kɨ tɨdi lə, “Lɔŋ kwe Jisɔs.” Naji ɨ miɨ tə tɨ kə lə, “Jisɔs na Baba” ɨ jikə jimiɛ lə na Kɨn'yɨntɨ kɨ Ntsaaŋ kɨ chitə yu.4 Tsukɔ binya wɨ, bənɨ na keŋkɛ binya chichi chichi ɨji nnya yi Kɨn'yɨntɨ kɨmo bə bɔ. 5 Bənɨ na nɨntɨ nɨ́ŋ chichi chichi ntɛshɛ yi bənɨ bə kɨmbɨŋ'ə ntɨŋ, bəmanɨ Baba wubɔ ji kwa miu. 6 Dzə́ na ji chichi chichi yi bənɨ na nɨntɨ yi ntɨŋ, ə fɨtɨ kwa Nyɔ miu lə bənɨ kɨ nɨntɨ nɨ́ŋ ya chi dzə́ ya ntɨŋ. 7 Nyɔ' nya miɨ chi kɨhɨ kɨnya kɨ Kɨn'yɨntɨ kɨ Ntsaaŋ'ə lə yu kɨ nɨntɨ yu chitə kɨntsu kɨchi su. 8 Yu nya wudɔ kɨhɨ kɨnya kɨ chɛti Kɨn'yɨntɨ kɨ Ntsaaŋ wɨ, ɨji nchanyɛ yi bufɨ, kɨ wudɔ lə kɨnya ji lə yu kɨ chanyɛ nɨ miɨ wu na kkɨ biɔŋ. Kɨn'yɨntɨ kɨŋ ji kwa kɨmo. 9 Yu ba yu nya wudɔ miɨ ji kɨnya kɨ shəŋ yi yu jiwa ɨ yu kɨ galɨ Nyɔ wɨ buni, yu nya wudɔ ɨji ŋ'wəmiəsɨ yi gwɨ́. Kɨn'yɨntɨ kɨŋ ji kwa kɨmo. 10 Yu ba yu nya wudɔ miɨ kɨnya kɨ fənə biɔŋ bi kɨgəsə kɨ wɨŋə lə, yu nya wudɔ kɨnya kɨ tədiə shɔŋ yi Nyɔ, yu nya wudɔ bufɨ bu kənə kɨchichi kɨ biɔŋ bi na foto nə Kɨn'yɨntɨ kɨ Nyɔ lə lɨ, bə bi na jikə fɔkɔ nə Kɨn'yɨntɨ kɨ Nyɔ lə lɨ, yu nya wudɔ buŋga bu chanyɛ díɛ yi kəwɔkɔhɔ ntɨŋ, yu nya wudɔ mfichɛ yi biɔŋ bi miɨ wa sə chanyɛ bə bənɨ. 11 Bɔ na fɨtɨ biɔŋ biŋ bichi ə nya kwa Kɨn'yɨntɨ kɨmo buŋga bwa bə bɔ. Kɨn'yɨntɨ ka jɛti bə miɨ chi nɨ kɨ na se.
Ntɛshɛ yi bənɨ bə kɨmbɨŋ'ə na ji nɨ gwɨ yi miɨ
12 Miɨ na keŋkɛ gwɨ miuŋkpaŋ, bəmanɨ yi keŋkɛ biŋuni kɨyɛŋ. Mɛfə biŋuni bia na ji tɨmo kɨyɛŋ mɛ, bi tɛshɛ ba fə gwɨ miuŋkpaŋ, na tɨ diəŋ nɨ Klistu bə bənɨ buhu na ji. 13 Kə na ji chichi chichi, bədɔ na Bəju, bədɔ ji Bəglek, bədɔ ji bəŋfia, bədɔ jikə jimiɛ bəŋfia. Na Kɨn'yɨntɨ kɨmo ntɨŋ kɨ bə́ nə̀ tɛshɛ bɨ bəchi lə kə kɨ ji gwɨ miuŋkpaŋ. Nyɔ nə̀ ga Kɨn'yɨntɨ ka kɨmo shəŋ yaha ntɨŋ.ª
14 Gwɨ yi miɨ na jimiɛhɛ kwa kɨŋunə kɨmo. Na biŋuni kɨyɛŋ. 15 Naji gbo tə lə, “Nɨ nna njimiɛhɛ kɨbandə, kɨjilə nna njimiɛhɛ kɨŋunə kɨ gwɨ lə,” ɨ fia fiɔŋ jikə fəkə lə wu kə kɨ ji gwɨ wɨ. 16 Ɨ kɨtiu tə tɨ lə, “Nɨ nna njimiɛhɛ yəsɨ, kɨjilə nna njimiɛhɛ kɨŋunə kɨ gwɨ lə,” ɨ fia fiɔŋ jikə fəkə lə kɨ kə kɨ ji gwɨ wɨ. 17 Ɨ gwɨ yi miɨ chi na ji kwa yəsɨ, ɨ yu kɨ woko bə la? Ɨ yi na ji kwa kɨtiu, ɨ yu kɨ woko ntsɔŋfu bə la? 18 Fiɔŋ fi na ji na lə, Nyɔ nə̀ ma miɨ ba nachɛ biŋuni bi gwɨ yihi lə chichi chichi nɨ yu nə̀ se. 19 Jilə gwɨ yi miɨ na ji kwa kɨŋunə kɨmo, ɨ yi kɨ ji nəŋɨlɨ? 20 Nɨ fi na ji, biŋuni bi gwɨ lə na ji kɨyɛŋ, bəmanɨ bi na tɛshɛ bi fɨtɨ gwɨ miuŋkpaŋ. 21 Naji ɨ yəsɨ tə kə bə kɨbandə lə, “Nna nsɛhɛ wə.” Naji ɨ fo tə tɨ kə bə go lə, “Nna nsɛhɛ bəŋ.” 22 Fiɔŋ fi na tsu fi ji na lə, biŋuni bi gwɨ lə bi na yinshi bia lə bi na ji yee, naji ɨ gwɨ yi miɨ fiəŋkə bi kə. 23 Biŋuni bi gwɨ lə bi kə na dze lə na biwa, na bi bi kə na jiŋgə buni. Biŋuni bi yaa ba wu kɨ kwete bɨ bə ntseyɛ bə bənɨ na bi bi kə ba kə dze tsa ba kɨ baŋkɨ bi. 24 Biŋuni bi bənɨ na ŋɨntɨ bi wɨ, bi na jimiɛhɛ bi naji lə bə́ kɨ kɨki bi manɨ. Nyɔ nə̀ nachɛ gwɨ yi miɨ dzə yi naji ɨ bə́ kɨ kuntə biŋuni bi na ji wələ bi na ji bi kɨlɔlɔ lə. 25 Yu nə̀ fə manɨ fə kɨnjɛgwɨ kə jimiɛ gwɨ wɨ, fə kɨŋunə kɨ chitə kɨdɔ, kɨdɔ chitə kɨdɔ. 26 Jilə kɨŋunə kɨ gwɨ lə kɨdɔ na woko bulo, kɨjilə biŋuni bia bichi jibia ɨ bi kɨ woko bulo bwa. Ɨ bə́ kuntə kɨŋunə kɨ gwɨ lə kɨmo, ɨ bi bichi keŋkɛ kɨnlaŋ.
27 Tsu dia wu Klistu lə, bəŋ bəchi na ji gwɨ yihi, miɨ chi nə bəŋ ntɨŋ na ji kɨŋunə kɨ gwɨ ya lə. 28 Nyɔ' ga bənɨ lə bɔ kɨ nɨntɨ nɨ́ŋ chichi chichi ntɛshɛ yi bənɨ bə kɨmbɨŋ'ə ntɨŋ. Bə fiəfiə ji beŋ bə faŋə bə Jisɔs lə, bə na biəlɨ bɔ wɨ ji bənɨ bə na tɨdi shɔŋ yi Nyɔ, bə na biəlɨ ba wɨ ji bənɨ bə na tɨfiə bənɨ. Yu ga bədɔ kɨ ji bənɨ bə na fɨtɨ biɔŋ bi kɨgəsə kɨ wɨŋə lə, bədɔ bə na wəmiəsɨ gwɨ́, bədɔ bə na chitə bənɨ, ba ga bədɔ kɨji bə na nachɛ nɨ nɨŋ jiya ɨ yi kɨ gəndə, bədɔ ji bə na kkɨ nchanyɛ díɛ yi kəwɔkɔhɔ. 29 Na bənɨ bəchi bə na ji beŋ bə shɔŋ'ə bə Jisɔs lə kə. Na bəchi bə na tɨdi shɔŋ yi Nyɔ kə. Na bənɨ bəchi bə na tɨfiə bənɨ kə. Na tɨ bəchi bə na fɨtɨ biɔŋ bintaŋ kə. 30 Na bənɨ bəchi bə na keŋkɛ kɨnya kɨ wəmiəsɨ gwɨ́ kə. Na bəchi bə na kkɨ nchanyɛ díɛ yi kəwɔkɔhɔ kə. Na tɨ bənɨ bəchi kə bə naji ɨ bɔ kɨ fichɛ biɔŋ bi bənɨ na chanyɛ díɛ yidɔ ntɨŋ bə bənɨ. 31 Nɨ binya biŋ bichi na ji mɛ, bə kɨ se kɨtso lə bə keŋkɛ ji binya bibəŋ bi na yakɨ binya bichi. Bəmanɨ, njiwa ndonchɛ bəŋ fiɔŋ fi na yakɨ biɔŋ biŋ bichi.