Kɨnse na yakɨ biɔŋ bichi
13
Jilə nna ŋkkɨ tɨmo nchanyɛ díɛ yi bituŋ bichi lə ma díɛ yi bənchinda bə Nyɔ lə, nji kə keŋkɛ kɨnse bənɨ wɨ, tə nna nji nɨ ŋgu wu na fɨtɨ kwa ji kɨdzələ, makə bigɨndə bi bə́ na bu kuchɛ. 2 Jilə nna ŋkeŋkɛ buŋga bu tədiə shɔŋ yi Nyɔ, ŋkkɨ tɨ biɔŋ bichi ma bi na ji bunyələ, ɨji mɨ ŋga shəŋ Nyɔ wɨ buni yi naji ŋkɨ ŋ'woɔ dzó, bəmanɨ mɨ ŋkeŋkɛ sɨŋ kɨnse bənɨ wɨ, tə nna nji kwa fiɔŋ fi kɨlɔlɔ lə. 3 Nse lɨ tɨmo ndze biɔŋ biɛŋ bichi ba jɛ bə bənɨ ba nya tɨ gwɨ yɛmɨ lə bə́ tiŋ,ª bəmanɨ ɨji mɨ ŋkeŋkɛ sɨŋ kɨnse bənɨ wɨ, ŋkɨ nji mbɨ sɨŋ. 4 Miɨ wu na keŋkɛ kɨnse bənɨ wɨ, miɨ wa ba yu kɨ kansɨ shəŋ, yu fɨtɨ tɨ biɔŋ bi ndzeŋe bənɨ lɨ. Yu sɨŋ bə yəsɨ yiyə makə ŋkuntsu yi gulu. 5 Yu sɨŋ bə tsasɨ. Yu ba yu jikə kɨ gɔmbiɛ kwa ji gwɨ yihi. Yu lɔhɔ fɔfɔ. Yu galəhə miɨ shəŋ bɨŋ. 6 Yu wokɔhɔ buni bə fiɔŋ fibiə. Yu ba yu kɨ woko buni ji bə fiɔŋ fi kɨyɛyi lə. 7 Miɨ wu na keŋkɛ kɨnse ba yu jikə kɨ jiŋgə ŋgbɔ yi miɨ wudɔ. Yu ba yu kɨ ləkə biɔŋ bichi yu bɨmi biɔŋ bichi, yu jiŋgə kwa fiə fiɔŋ fichi wɨ, yu kunchi shəŋ bə biɔŋ bichi. 8 Kɨnse kaha. Bəmanɨ, tsa ná ba lɨ yi buŋga bu Nyɔ nə̀ nya lə bənɨ kɨ tɨdi shɔŋ yihi su ná ka, ɨ díɛ yi kəwɔkɔhɔ yi bənɨ na chanyɛ ka, ɨ kɨnya kɨ kkənə biɔŋ buni ka tɨ. 9 Bi ná ka manɨ ndzɨ kə na kkɨ biɔŋ fɛŋ kwa ji bidiadia bidiadia, kə tɨdi shɔŋ yi Nyɔ kwa bidiadia bidiadia. 10 Bəmanɨ tsa yi biɔŋ bichi ná ndzeŋɛ gəŋ tuŋ fəŋgbɨŋ, ɨ biɔŋ bi na ji bidiadia bidiadia ka. 11 Tsa yi nnə̀ nji wɛŋ wubiɨ, nnə̀ nchanyɛ nɨ wɛŋ, ŋgɔmbiɛ biɔŋ nɨ wɛŋ, ŋŋɨntɨ biɔŋ nɨ wɛŋ. Lə ntɛ fɛŋ, mɨ nshə fiə wu bubiɨlɨ lə. 12 Fɛŋ kə ŋɨntɨ ba biɔŋ diŋkidiŋki nɨ miadzɔ ntɨŋ. Bəmanɨ ná kɨ ji tsa ya wɨ, ɨ bi kɨ ji ŋgbooŋ bɨ yəsɨ. Nna ŋkkɨ biɔŋ fɛŋ bidiadia bidiadia, ná kɨ ji tsa ya wɨ, ŋkanə kkə biɔŋ bichi diəŋ nɨ Nyɔ na kkɨ kɛmɨ gəŋ tuŋ fəŋgbɨŋ. 13 Biɔŋ bitɛ bia su bi na tsɨ tsá chi. Biɔŋ biŋ na: ŋga yi shəŋ Nyɔ wɨ, njiŋgə fiə ŋka yi Nyɔ wɨ, bə kɨnse. Bəmanɨ kɨnse na fiɔŋ fi na ko ba ya biɔŋ biŋ bichi.