Yidɔ nchanyɛ kɨ binya bi Kɨn'yɨntɨ kɨ Ntsaaŋ'ə
14
Bə kɨ galɨ kɨnse fiə nə biɔŋ bichi lɨ, bə keŋkɛ kɨgaŋ bə kɨnya kɨ Kɨn'yɨntɨ kɨ Ntsaaŋ na nya bənɨ, yasə bichi, kɨnya kɨ tədiə shɔŋ yi Nyɔ. 2 Jilə miɨ na chanyɛ díɛ yi kəwɔkɔhɔ, kɨjilə yu na chanyɛhɛ ji bə bənɨ kə, tə yu na chanyɛ ji bə Nyɔ, ndzɨ miɨ wudɔ na wokɔhɔ fiɔŋ fi yu na chanyɛ. Yu na chanyɛ ji biɔŋ bi na ji buŋga bu Kɨn'yɨntɨ kɨ Ntsaaŋ'ə ntɨŋ bi na ji bunyələ. 3 Bəmanɨ, miɨ wu na tɨfiə shɔŋ yi Nyɔ ba yu kɨ chanyɛ ji bə bənɨ, yu fɨtɨ bənɨ ko kɨmbɨŋ ntɨŋ, yu kosɔ shəŋ yibɔlə, yu fɨtɨ shəŋ yi bənɨ lə dɨ. 4 Miɨ wu na chanyɛ díɛ yi kəwɔkɔhɔ ba yu kɨ chitə ji gwɨ yihi kwa. Bəmanɨ, miɨ wu tɨfiə shɔŋ yi Nyɔ, ba yu kɨ chitə ji ntɛshɛ yi bənɨ bə kɨmbɨŋ'ə chi. 5 Mɨ ŋkɨ nse lə bəŋ bəchi kɨ chanyɛ díɛ yi kəwɔkɔhɔ. Bəmanɨ, fiɔŋ fi nna nse ya lɨ na lə bə kɨ tɨdi bənɨ ji shɔŋ yi Nyɔ. Miɨ wu na tɨdi shɔŋ yi Nyɔ na yakɨ miɨ wu na chanyɛ díɛ yi kəwɔkɔhɔ, fiəŋkə lə miɨ wudɔ' fichɛ díɛ ya fə ntɛshɛ yi bənɨ bə kɨmbɨŋ'ə wɔɔ buni lə fi chitə bɔ.6 Bəŋgwɨŋ, ndza fɛŋ ba ba bəŋ ntɨŋ, kɨ nchanyɛ díɛ yi kəwɔkɔhɔ, ɨ fiɔŋ fia chitə bəŋ bə la? Fiɔŋ fi naji ɨ fi chitə bəŋ na kwa tsa yi mɨ mba bə fiɔŋ fifa fi Nyɔ' donchɛ mɨ, makə fiɔŋ fidɔ fi yu gɔmbiə lə mfə bə kkə, makə shɔŋ yihi yidɔ lə ntə bəŋ, makə fiɔŋ fidɔ lə ntɨfiə bəŋ. 7 Na tɨ diəŋ bə biɔŋ bi na sɨŋ bə kɨn'yɨntɨ, nɨ finshiŋ makə chiŋ. Jilə bə́ na tintiɛhɛ makə bə́ kuchi bi dzə́ yi diəŋ ntɨŋ, ɨ miɨ fə nəŋ tə kkə fiɔŋ fi bi na chanyɛ? 8 Ɨ miɨ dza lə yu tiŋ kɨmbu kɨ dzoŋ'ə, yu jikə tiŋkɛhɛ dzə yi diəŋ ntɨŋ, ɨ bənɨ fə nəŋ tə fə gwɨ yi dzoŋ? 9 Na tɨ diəŋ lə, ɨ bə na chanyɛ díɛ yi kəwɔkɔhɔ, ɨ bə́ fə nəŋ tə kkə fiɔŋ fi bə na chanyɛ? Ɨ fi jikə jimiɛ lə nchanyɛ yɛnɨ layɛ fiəfɨ ntɨŋ? 10 Na fiɔŋ fi masə kə lə díɛ yi kú lə na ji sɛŋ mbi ntɨŋ kɨyɛŋ chichi chichi. Yidɔ na sɨŋ su yi bə́ na kkəhə kɨnyi kɨsu. 11 Bəmanɨ, ɨ miɨ na chanyɛ bə mɨ díɛ yi nna njikə wɔkɔhɔ ntɨŋ, ŋkɨ nji miɨ kɨtuŋ yu lɨ, yu ji tɨ miɨ kɨtuŋ mɨ lɨ. 12 Bəma, nɨ bə na gɔmbiə lə buŋga bu Kɨn'yɨntɨ kɨ Ntsaaŋ'ə kɨ yinshi bəŋ ntɨŋ, bə dîɔnɔ kɨtso lə bə kêŋkɛ ji kɨnya kɨ na fɨtɨ ka lə ntɛshɛ yi bənɨ bə kɨmbɨŋ'ə kɨ ko.
13 Fi na ji lə, ɨ miɨ na chanyɛ díɛ yi kəwɔkɔhɔ, yu kɨ tsɨsə lə Kɨn'yɨntɨ kɨ Nyɔ lə nya yu bufɨ bu fichɛ fiɔŋ fi yu chanyɛ bə bənɨ. 14 Jilə nna ntsɨsə díɛ yi kəwɔkɔhɔ ntɨŋ, kɨjilə na bɨ bə kɨn'yɨntɨ kəmɨ bə na tsɨsə, bəmanɨ njikə tsɨsə bə bufɨ bwɛŋ. 15 Nɨ fi na ji manɨ, njiwa mfə nəŋ? Njiwa ŋkɨ ntsɨsə kɨn'yɨntɨ kəmɨ ntɨŋ, ntsɨsə tɨ bə bufɨ bwɛŋ, ntɨtɨ bə kɨn'yɨntɨ kəmɨ, ntɨtɨ tɨ bə bufɨ bwɛŋ. 16 Fiəŋkə manɨ, ɨ wə dze kɨ tsɨsə Nyɔ nə kɨn'yɨntɨ kɔhɔ ntɨŋ, ɨ miɨ wudɔ wu na ji mɨ yu woko, ɨ yu fə nəŋ tə bɨŋ lə, “Fi kɨ ji ma” tsukɔ kɨmbafə kɔhɔ kɨ wə sə nya wɨ, yu jikə wɔkɔhɔ díɛ yi wə sə chanyɛ? 17 Ɨ wə nya kɨmbafə bə Nyɔ buni nɨ la, kɨjilə naji ɨ fi chitə miɨ wudɔ wa kə. 18 Mɨ mbafə Nyɔ lə nna nchanyɛ díɛ yi kəwɔkɔhɔ ba ya bəŋ bəchi. 19 Bəmanɨ, mɛfə nna nchanyɛ manɨ, tsa yi nna nji ntɛshɛ yi bənɨ bə kɨmbɨŋ'ə ntɨŋ, ŋkɨ nse lə nchanyɛ kwa díɛ yi bufɨ lə shɨŋ, fə ntɨfiə bənɨ bədɔ, ba ya nɨ naji lə nchanyɛ díɛ bəntsuku yɔɔ (10,000) bɔ jikə kkə yi.
20 Bəŋgwɨŋ, bə kə kɨ ji bə biŋgɔmbiɛ bi beŋ'ə. Tsukɔ bubiə wɨ, bə kɨ ji nɨ muŋwenɛ mu na kkəhə fiɔŋ. Bəmanɨ, bə kɨ gɔmbiɛ nɨ bəntaŋ. 21 Fi na ji bubɔndɔ kɨŋwatɨ kɨ bilaŋ'ə ntɨŋ lə,
“Mɨ Baba Nyɔ, njiwa mfaŋ bituŋ bi chanyɛ bə bənɨ bɛŋ mɨ lɨ
díɛ ntɨŋ yi na jikə jimiɛ yibɔlə,
díɛ yi bɔ na jikə wɔkɔhɔ,
Bəmanɨ, naji ɨ fiɔŋ fiŋ fə tɨmo kə lə bənɨ bɛŋ wɔ mɨ.”
22 Fi kɨ ji lə, nchanyɛ yi díɛ yi kəwɔkɔhɔ, na donchɛ buŋga bu Nyɔ lə bə bənɨ bə na jimiɛhɛ bə kɨmbɨŋ. Yi na donchɛhɛ bə bənɨ bə kɨmbɨŋ'ə. Bəmanɨ, kɨnya kɨ tədiə shɔŋ yi Nyɔ na donchɛ buŋga bu Nyɔ lə bə bənɨ bə kɨmbɨŋ'ə, jikə jimiɛhɛ bə bə na jimiɛhɛ bə kɨmbɨŋ'ə. 23 Bəma, jilə ntɛshɛ yi bənɨ bə kɨmbɨŋ'ə bəchi tɛshɛ lɨ, miɨ chi gbɔ kɨ chanyɛ ji díɛ yi kəwɔkɔhɔ, bənɨ bəwa makə bənɨ bə na jimiɛhɛ bə kɨmbɨŋ be ba wɔ nɨ bə na chanyɛ, ɨ bɔ jikə gɔmbiɛ lə bə na yuŋfə lɨ? 24 Bəmanɨ, jilə miɨ chi na tɨdi ji shɔŋ yi Nyɔ, miɨ wuwa makə wu na jimiɛhɛ miɨ wu kɨmbɨŋ be mɨ, ɨ fiɔŋ fi bəŋ bəchi na chanyɛ fə ɨ yu kkə lə yu na ji miɨ wubiə, ɨ fi kɨ sakɨ yu yu shəŋ 25 ɨ biɔŋ bi na nyələ yu shəŋ yinshi ŋgbooŋ. Bəma, ɨ yu tə tuŋ nu koso ba nya bubəŋ bu kɨtso lə bə Nyɔ ba tə lə, “Yɛyi lɨ, Nyɔ na ji bəŋ ntɨŋ.”
Nɨ naji ɨ ntɛshɛ yi bənɨ bə kɨmbɨŋ'ə kɨ tsɨsə, yi fɨtɨ biɔŋ diəŋ
26 Bəŋgwɨŋ, fiɔŋ fichi fi mɨ nchanyɛ na lə la? Fi na ji lə, tsa yi bə ba ntɛshɛ, miɨ wu na keŋkɛ yɨmbɨ yi tənə, yu tə̂, wu na ji lə yu tɨfiə, yu tɨ̂fiə, wu na keŋkɛ fiɔŋ fi Nyɔ' donchɛ yu, yu tə̂ shɔŋ ya, wu na kkɨ nchanyɛ díɛ yi kəwɔkɔhɔ ntɨŋ, yu chanyɛ, wu na kkɨ mfichə díɛ ya lə bənɨ wɔ, yu fîchə. Bə kɨ fɨtɨ biɔŋ bichi dzə yi naji ɨ yi chitə ntɛshɛ yi bənɨ bə kɨmbɨŋ'ə. 27 Jilə bənɨ na ji su bə na chanyɛ díɛ yi kəwɔkɔhɔ, bɔ kɨ ji kwa bəfɛ makə bətɛ. Ɨ bɔ na chanyɛ lɨ, bɔ kɨ chanyɛ miu miu, wudɔ fichə fiɔŋ fi bɔ na chanyɛ fia bə bənɨ. 28 Ɨ miɨ na sɨŋ su wu na kkɨ mfichɛ fiɔŋ fi bɔ na chanyɛ, bɔ kɨ ji kɨtɔ ntɛshɛ yi bənɨ bə kɨmbɨŋ'ə ntɨŋ, miɨ chanyɛ kwa yu shəŋ bə gwɨ yihi bɔ bə Nyɔ. 29 Jilə bənɨ bə na tɨdi shɔŋ yi Nyɔ na ji su, bəfɛ makə bətɛ kɨ chanyɛ bə bənɨ. Tsa yi bɔ na chanyɛ, bədɔ kɨ fɨkə fiɔŋ fi bɔ na chanyɛ fia buni. 30 Ɨjilə Nyɔ' donchɛ fiɔŋ bə miɨ wudɔ wu sə jimiɛ mɨ, miɨ wu na chanyɛ wa də mɔɔŋ ba nya dzə bə wa miɨ yu chanyɛ. 31 Bə kɨ kkɨ lə bəŋ bəchi naji ɨ bə tə shɔŋ yi Nyɔ. Bə dze kɨ tɨdi, bə kɨ tɨdi miu miu, fə bənɨ bəchi fɨyə biɔŋ nə bəŋ'ɨ, ɨ bə chi kosɔ shəŋ yibɔlə bəchi. 32 Bənɨ bə Nyɔ nya kɨbɔlə kɨnya ji ntə yi shɔŋ yihi, bɔ na keŋkɛ buŋga kɨnya kɨsu bɨŋ, 33 ndzɨ Nyɔ na jimiɛhɛ Nyɔ wu tsaŋkɨ, Nyɔ na ji Nyɔ wu budə.
Nɨ fi na ji, bəntɛshɛ bə bənɨ bə Nyɔ lə bə kɨmbɨŋ'ə ntɨŋ bichi, 34 tsa yi bəkansɨ na ji ntɛshɛ yi bənɨ bə kɨmbɨŋ'ə ntɨŋ, bɔ kɨ ji mɔɔŋ. Bə́ kə̂ nyaha bɔ buŋga bu chanyɛ kə. Bɔ naji lə bɔ wɔ nə bənɨnsə lɨ, ɨji nɨ kɨlaŋ na tɨdi. 35 Ɨjilə fiɔŋ fia su fi bɔ na se lə bɔ kkə, bɔ bi bə bənɨnsə bəbɔlə tsa yi bɔ sə kwə tsɔŋ, ndzɨ na yaa lə kpansɨ kɨ chanyɛ ntɛshɛ yi bənɨ bə kɨmbɨŋ'ə ntɨŋ. 36 Diɛ yi Nyɔ nyi nə gbɔ bəŋ bɨŋ? Maa nə̀ bəŋ kwa bə diɛ ya nə̀ ba fɔ bəŋ wɨ lə? 37 Miɨ wu na gɔmbiɛ lə yu na ji miɨ wu na tɨdi shɔŋ yi Nyɔ, makə wu na kkɨ lə Nyɔ' nya yu kɨnya kɨhɨ kɨ Kɨn'yɨntɨ kɨ Ntsaaŋ'ə, yu naji lə yu bɨ̂ŋ lə fiɔŋ fi mɨ mbɔndɔ fiŋ bə bəŋ na ntə yi Baba lə mbɔndu. 38 Ɨ miɨ kə bɨmiə fi, bə́ kə̂ bɨmiə tɨ yu.