Nyɔ nə̀ dzakɔ Jisɔs Klistu nə kkpə lɨ
15
Bəŋgwɨŋ, nna ntɨ lə nse bəŋ fɛŋ kɨ shɔŋ yi ndzeŋe yi nnə̀ ntədiə ya bəŋ, bə ləkə ba chiŋfi su. 2 Na shɔŋ nyi yi jiya yi fə lə bə fɔfo jilə bə' chiŋfi su ŋkɨɨŋ. Jikə jimiə manɨ, tə kɨmbɨŋ kɛnɨ nə̀ kɨ kɨlɔlɔ lə. 3 Bə kkə̂ lə nnə̀ nnya bəŋ fiɔŋ fi fiəfiə fi shaŋŋ'ə. Na tɨ fi fi bə nə̀ ləkə. Fiɔŋ fia ji lə Klistu nə̀ kkpə ndzɨ bubiə bwaha diəŋ nɨ fi na ji bubɔndɔ Kɨŋwatɨ kɨ Nyɔ lə ntɨŋ, 4 bə chi bə́ nə̀ diyɛ yu, lə kɨ ji díɔ bɨŋ tɛ, Nyɔ dzakɔ yu nə kkpə lɨ diəŋ nɨ bə́ nə̀ bɔndɔ Kɨŋwatɨ kɨ Nyɔ lə ntɨŋ, 5 bə chi yu nə̀ donchɛ gwɨ yihi bə Pita,ª yu chi donchɛ tɨ bə beŋ buhu bə faŋə bə yɔɔ ntse bəfɛ. 6 Yu donchɛ tɨ gwɨ yihi bə bənɨ bə kɨmbɨŋ'ə bɔ ji dɨ mo yasə gɨtɨŋ. Bənɨ kɨyɛŋ nə kɨntsu kɨŋ ntɨŋ bambi ba su ndɛŋ, bədɔ nə̀ kkpəyɛ. 7 Yu donchɛ tɨ gwɨ yihi bə Jɛm, yu chi donchɛ bə beŋ buhu bə faŋə bəchi. 8 Nəjiŋ wusu, yu donchɛ gwɨ yihi bə mɨ no wu bə́ nə̀ bɛyɛ tsa bambi. 9 Nna nchanyɛ mɛ ndzɨ nna nji miɨ wu ntse nə beŋ bə faŋə bə Jisɔs lə ntɨŋ. Ŋkə ŋkwətsə tɨmo wu naji lə bə́ kɨ tsɨsə mɨ lə wɛŋ wu faŋə wu Jisɔs ndzɨ nnə̀ nsesɛ gbo ntɛshɛ yi bənɨ bə kɨmbɨŋ'ə bə Nyɔ lə nəjiŋ. 10 Bəmanɨ, na nchitə yi Nyɔ chitə mɨ yi fəə lə ŋkɨ nji fiɔŋ fi nna nji fiŋ fi lɨ fɛŋ. Nchitə yi Nyɔ nə̀ chitə nyi mɨ nə̀ kə laa kɨlɔlɔ kə. Nnə̀ ntsu ba nɨŋ ya beŋ bə faŋə bə Jisɔs lə bədɔ ba bəchi. Bəmanɨ, nnə̀ nɨntəhə bə buŋga bwɛŋ. Nə̀ shəŋ yi ndzeŋe yi Nyɔ lə yi nə̀ nɨntɨ mɨ wɨ. 11 Ma kɨ ji lə nə̀ mɨ wu nə̀ tɨdi shɔŋ nyi bə bəŋ, ma kɨ ji lə nə̀ bɔ bə nə̀ tɨdi, tə na kwa fiɔŋ fimo fi bɨ bə bɔ nə̀ tɨdi, bə bɨmi bə fi.Kə ná dzakɔ lɨ tɨ nə kkpə lɨ
12 Fɛŋ nɨ kə na tɨdi lə Nyɔ nə̀ dzakɔ Klistu nə kkpə lɨ, fə la lə bəŋ bədɔ kɨ tɨdi lə bənɨ bə nə̀ kkpəyɛ naji ɨ bɔ dzakɔ nə kkpə lɨ kə? 13 Jilə na yɛyi lə bənɨ bə nə̀ kkpəyɛ naji ɨ bɔ dzakɔ nə kkpə lɨ kə, tə Klistu nə̀ kə dzakɔ tɨ nə kkpə lɨ. 14 Jilə Klistu nə̀ kə dzakɔ nə kkpə lɨ, tə fiɔŋ fi kə na tɨdi na kɨlɔlɔ, shəŋ yi bə na galɨ yu wɨ ji kɨlɔlɔ. 15 Jilə na manɨ, tə kə na lɨmi nsa yi dyɛ Nyɔ nəjiŋ, ndzɨ kə na gəndə kə tɨdi lə yu nə̀ dzakɔ Klistu nə kkpə lɨ. Jilə na yɛyi lə bənɨ bə nə̀ kkpəyɛ naji ɨ bɔ dzakɔ kə nə kkpə lɨ, tə yu nə̀ kə dzakɔ Klistu nə kkpə lɨ. 16 Jilə naji ɨ bənɨ jikə dzakɔ nə kkpə lɨ, tə Klistu nə̀ kə dzakɔ tɨ nə kkpə lɨ. 17 Jilə Klistu nə̀ kə dzakɔ nə kkpə lɨ, kɨjilə shəŋ yi bə galə Nyɔ wɨ na kɨlɔlɔ, bubiə bwɛnɨ bambi bəŋ wɨ. 18 Bəma, ɨ fi kɨ ji tɨ lə bənɨ bə nə̀ kkpəyɛ ɨji bɔ' tɛshɛ bə Klistu' la kɨlɔlɔ. 19 Jilə kə na jiŋgə lə Klistu kɨ chitə bɨ ɨji kwa nə kɨjimiɛ kɨŋ wɨ, tə kə na ji bənɨ bə naji lə bə́ kwese yaa bə bɔ ya bənɨ bəchi.
20 Bəmanɨ, kɨyɛyi kɨsu na ji lə, Nyɔ nə̀ dzakɔ Klistu nə kkpə lɨ, yu kɨ ji miɨ wu fiəfiə nə bənɨ bəchi ntɨŋ bə nə̀ kkpəyɛ. 21 Nɨ miɨ miu nə̀ fəə kkpə ba bənɨ bəchi wɨ, na tɨ diəŋ nɨ miɨ miu fəə lə bənɨ ná dzakɔ nə kkpə lɨ. 22 Fi ji lə nɨ bənɨ bəchi na kkpɨ ndzɨ bɔ na ji ŋgwe yi Adam, na tɨ diəŋ nɨ bənɨ bəchi ná dzakɔ nə kkpə lɨ ndzɨ bɔ na ji ntɛshɛ bə Klistu. 23 Bəmanɨ, bə́ ná kɨ dzakɔ miɨ tsa yihi bɨŋ. Klistu na miɨ wu fiəfiə wu nə̀ dzakɔ nə kkpə lɨ. Yu ná fichə ba lɨ, ɨ bənɨ buhu tə dzakɔ tɨ. 24 Fi ná tɨchə manɨ, ɨ mbi tə ná ka. Klistu ná jishi buŋkuŋ bə buŋga ma bubəŋ buchi bu na sakɨ fɛŋ, ɨ yu nya buŋkuŋ buhu bə Tɨɨ Nyɔ. 25 Yu wu Klistu naji lə yu kɨ sakɨ gəŋ fɔ tsa yi Nyɔ ná memɛ bənɨ buhu bə nchɛnɛ lə bəchi yu nəkoso ɨ yu tɨŋ go bɔ bɨŋ. 26 Miɨ wu nchɛnɛ wu nəjiŋ wu yu ná kanə jishɛ na kkpə. 27 Na fiɔŋ fi bə́ nə̀ bɔndɔ Kɨŋwatɨ kɨ Nyɔ lə ntɨŋ lə,
“Nyɔ' ga biɔŋ bichi yu nəkoso.”
Bəmanɨ, bə ntə lə biɔŋ bichi na ji yu nəkoso na jimiɛhɛ lə Nyɔ wu galə wa biɔŋ bichi yu nəkoso na ji tɨ yu nəkoso. 28 Ná kɨ ji tsa yi biɔŋ bichi na ji Klistu nəkoso yu sakɨ, ɨ yu wu Wɛŋ wu Nyɔ tə ga gwɨ yihi Tɨɨ nəkoso wu galə wa biɔŋ bichi yu nəkoso fə Nyɔ kɨ ji biɔŋ bichi bɨŋ, bidɨ bichi ntɨŋ.
29 Jikə jimiə lə Nyɔ ná dzakɔ lɨ bənɨ bə nə̀ kkpəyɛ, bə́ tə kɨ chɛsɛ bənɨ biɔ bə yɨ wu bənɨ bə nə̀ kkpəyɛ lə ndzɨ la? Bə́ na chɛsɛ bɔ biɔ manɨ lə mbɨ wusu kɨ ji la? 30 Kə tə kɨ galɨ gwɨ yaha ŋgə ntɨŋ tsá chi mɛ ndzɨ la? 31 Bəŋgwɨŋ, nna nji nchitə bɨŋ díɔ chi. Nna nchanyɛ biɔŋ biŋ mɛ ndzɨ nna ŋ'woko buni bə fiɔŋ fi Jisɔs Klistu Baba waha fəə bə bəŋ ɨji fi chɛti mɨ wɨ. 32 Jikə jimiə lə Nyɔ ná dzakɔ lɨ bənɨ bə nə̀ kkpəyɛ, nɨ miɨbəwəŋ ba yu kɨ chanyɛ biɔŋ, ŋgəŋ Ɛfɛsɔ, bənɨ bə na ji nɨ nyɛ́ŋ yi kpa kɨ dio bə mɨ lə mbɨ wusu kɨ ji la? Njikə galə fiɛŋ lə fi kɨ ji nɨ bə́ ba bə́ kɨ tɨdi lə, “Kə kɨ diɨ, kə mu ndzɨ wɔki kə ná kkpəyɛ lɨ?” 33 Miɨ kə̂ fukiɛ bəŋ. Bə kɨ kkɨ lə, “Ɨ miɨ wu fiə wu ndzeŋe na gəndə bə kɨntsu kɨbiə, ɨ kɨntsu ka bɨsɨ yu.” 34 Bə dɨ̂ bufɨ bwɛnɨ, bə shə̂ bubiə. Nna ŋŋɨntɨ lə bəŋ bədɔ na kkəhə Nyɔ. Nna nchanyɛ mɛ lə mfə lə bə kɨ ji bə yaa.
Gwɨ yi bənɨ ná kɨ dzakɔ bə yi nə kkpə lɨ
35 Naji ɨ miɨ wudɔ kɨ bishɛ lə fa bənɨ ná kɨ dzakɔ nə kkpə lɨ nəŋɨlɨ lɛɛ? Bɔ ná kɨ keŋkɛ ji ŋgwe yi gwɨ yi la lɛɛ? 36 Wa miɨ wu na bishɛ wa manɨ na mfidi. Yu na kkəhə lə bə́ ba bə́ tishɛ fiɔŋ fi sa ba kkpə lɨ fə fi tə məndə? 37 Gwɨ yi fiɔŋ fi bə́ ba bə́ tishɛ na yi yi ba yi mendɨ kɨ ko kə. Bə́ ba bə́ tishɛ kwa ji ŋgwe yi yi, fa na ŋgwe yi jiŋ, makə yi la, 38 Nyɔ tə nya ŋgwe ya gwɨ yi yu na se. Yu nya gwɨ́ chichi chichi bə ŋgwé ya nɨ yi na ji. 39 Biɔŋ bichi na keŋkɛhɛ gwɨ́ diəŋ. Bənɨ na keŋkɛ yibɔ gwɨ chichi, nyɛ́ŋ keŋkɛ yiyilə, munyinyi keŋkɛ yimilə, bíɔsu keŋkɛ tɨ yiyilə gwɨ́. 40 Biɔŋ bi bɔ́ na ji bə yibi gwɨ, bi sɛŋ koso ji bə yibi gwɨ. Biɔŋ bi bɔ́ na keŋkɛ kɨyunu kɨbilə, bi sɛŋ koso keŋkɛ kɨyunu kɨbilə. 41 Wɨmbɨ na keŋkɛ kɨyunu kɨwulə, fiəə keŋkɛ kɨwulə kɨyunu, mbíansɨ keŋkɛ tɨ kɨyunu kɨyilə. Mbiansɨ yidɔ bə yidɔ na keŋkɛhɛ kɨyunu diəŋ.
42 Na tɨ diəŋ nɨ gwɨ yi bənɨ ná kɨ ji tsa yi bɔ ná dzakɔ nə kkpə lɨ. Bə́ ba bə́ di miɨ gwɨ yihi fe, bəmanɨ gwɨ yi miɨ wu ná dzakɔ nə kkpə lɨ ná fɛhɛ. 43 Bə́ diyi miɨ bə gwɨ yi na jikə yinshɛ buni, yi ji buŋga sɨŋ. Bəmanɨ, yu ná dzakɔ nə kkpə lɨ bə gwɨ yi na ji buni, yi keŋkɛ buŋga. 44 Bə́ diyi miɨ gwɨ yihi ji yi miɨbəwəŋ. Bəmanɨ, yu ná dzakɔ nə kkpə lɨ bə gwɨ ji yi kɨn'yɨntɨ. Jilə gwɨ yi miɨbəwəŋ na ji lɨ, tə gwɨ yi kɨn'yɨntɨ na ji lɨ tɨ. 45 Fi na ji bubɔndɔ lə, “Adam wu fiəfiə nə̀ tsu miɨbəwəŋ wu na yɨntə.” Lə ba fɔ Adam wu nəjiŋ wɨ, yu kɨ ji yihi ji kɨn'yɨntɨ kɨ na nya bənɨ buwəŋ. 46 Miɨ ba yu jikə saa keŋkɛ gwɨ yi kɨn'yɨntɨ. Yu ba yu sa keŋkɛ ji gwɨ yi miɨbəwəŋ ba tə keŋkɛ fɛŋ yi kɨn'yɨntɨ. 47 Adam wu fiəfiə bə́ nə̀ ma yu bə bidi bi sha lə. Adam wu nəjiŋ nə̀ fɔ yihi nə bɔ́. 48 Bənɨ bə sɛŋ koso na ji nɨ miɨ wu fiəfiə wu bə́ nə̀ maa ji bə sha, bənɨ bə bɔ́ ji nɨ miɨ wu nə̀ fɔɔ nə bɔ́. 49 Nɨ kə na ji nɨ miɨ wu bə́ nə̀ maa bə sha, na tɨ nɨ kə jiba ɨ kə kɨ ji nɨ miɨ wu nə̀ fɔɔ nə bɔ́.
50 Bəŋgwɨŋ, ntə bəŋ lə naji ɨ gwɨ nyi yi na ji nyɛŋ bə ŋgwembe keŋkɛ dɨ buŋkuŋ bu Nyɔ lə ntɨŋ kə. Naji tɨ ɨ fiɔŋ fi naji ɨ fi fe keŋkɛ dɨ fiɔŋ fi na jikə fɛ ntɨŋ kə. 51 Bə wôkɔ bə wɔ ntə bəŋ fiɔŋ fi na ji bunyələ. Na bɨ bəchi bə ná kkpəyɛ kə. Bəmanɨ gwɨ́ yaha chi ná yashənɨ lɨ. 52 Bə́ ná tinti kɨmbu kɨ fəŋgbɨŋ, ɨ gwɨ́ yaha yashənɨ mɛ tsa miu nɨ miɨ ba yu miatə bə yəsɨ. Kɨmbu ná chaŋkɨ lɨ, ɨ bənɨ bə nə̀ kkpəyɛ dzakɔ nə kkpə lɨ bə gwɨ́ yi ná jikə fɛɛ, ɨ bɨ bə na bambi su tə yashənɨ. 53 Gwɨ yi naji ɨ yi fe nyi naji lə yi ná yashənɨ ba tsu ji yi na fɛhɛ. Gwɨ yi jiya yi kkpə naji lə yi yashənɨ ba tsu ji yi na kkpəhə. 54 Tsa yi gwɨ yi naji ɨ yi kkpə sə yashənɨ ba tsu ji yi na kkpəhə, yi naji ɨ yi fe yashənɨ tɨ ba tsu yi na fɛhɛ, ɨ fiɔŋ fichi tə fɔ diəŋ nɨ fi na ji bubɔndɔ Kɨŋwatɨ kɨ Nyɔ lə ntɨŋ lə,
“Bə́' ya kkpə ba buŋ buŋga buhu.
55 Ɔɔ kkpə, buŋga bwɔhɔ dzəŋ?
Ɔɔ kkpə, munyə wɔhɔ wu wə na ta bənɨ su dzəŋ?”
56 Munyə wu kkpə lə na bubiə, buŋga bu bubiə lə ji kɨlaŋ kɨ Nyɔ lə. 57 Bəmanɨ, kɨmbafə kɨ ji bə Nyɔ wu tɛshɛ bɨ bə Baba waha Jisɔs Klistu, kə kɨ yakɨ bubiə bə kkpə.
58 Bəma bəŋgwɨŋ bə na ji shəŋ yɛŋ, bə lə̂ŋ ŋkɨɨŋ. Fiɔŋ kə̂ nɨkə bəŋ. Bə kɨ nɨntɨ nɨŋ yi Baba tsá chi, bə kkɨ lə nɨŋ yi miɨ na nɨntɨ ndzɨ Baba ná laha kɨlɔlɔ.