Kɨnya kɨ bə́ na nya lə bə́ chitə bənɨ bə Nyɔ lə su
16
Nna nchanyɛ fɛŋ tsukɔ kɨnya kɨ bə́ na nya lə bə́ chitə bənɨ bə Nyɔ lə su. Bə kɨ fɨtɨ diəŋ nɨ nnə̀ ntədiə lə bəntɛshɛ bə bənɨ bə kɨmbɨŋ'ə bə Galɛsha kɨ fɨtɨ. 2 Butsu bu fiəfiə biənɨ chi ntɨŋ, miɨ chi nə bəŋ ntɨŋ foso fiɔŋ ba ga lɨ. Miɨ wa dze kɨ fosɔ, yu foso nɨ Nyɔ sə nya yu fə bitsufiɛ kə kɨ ji tsa yi mba. 3 Tsa yi mfɔɔ, mbɔndu kɨŋwatɨ ba tɛshɛ bə kɨnya kɛnɨ, ɨ bənɨ bə bə' sabiɛ ba tə dze ba gəŋ bə kɨ Jɛlosalɛm. 4 Jilə fi na ji buni lə ŋgəŋ tɨ, ɨ bɨ bə bɔ gəŋ.Biɔŋ bi Pɔl nə̀ gɔmbiɛ lə yu jiwa yu fə
5 Njiwa nsa nchɛ dzə Mɛsɛdɔnia tsa yi ŋkɨ mba bəŋ'ɨ, ndzɨ nna nchɛti dzə yi nɔ. 6 Naji ɨ kə kɨ ji, ɨ kə jiŋ sɨŋsɨŋ gəŋ fɔ tsa yi kɨkumɔ kɨntaŋ chɛɛ, fə bə chitə mɨ gbəndɨ wɛŋ ntɨŋ, ntə ŋkɨ ŋgɨntɨ mɛ məŋ wu ŋgəŋə. 7 Nna nsɛhɛ lə mba bəŋ ntɨŋ fɛŋ lə bə ŋəŋ mɨ nchɛti nəwə nəwə. Nna ŋgɔmbiɛ lə mba ba biə jimiə bə bəŋ, jilə Baba' bɨŋ. 8 Bəmanɨ mbambi wa lə njiŋ sɛŋ Ɛfɛsɔ gəŋ fɔ butsu bu Kɨgbeyɛ kɨ Pɛntikɔs lə. 9 Kɨgwəŋ kɨbəŋ' gulɔ mɨ lɨ sɛŋ lə nnɨŋ nɨŋ yi Nyɔ buni, mɛfə bənɨ kɨyɛŋ na ji sɛŋ bə na ti bə mɨ ndzɨ nɨŋ ya. 10 Timɔti ba lɨ, bə ŋəŋ lə bə chiŋfi yu buni bəŋ ntɨŋ, ndzɨ yu na nɨntɨ ji nɨŋ yi Nyɔ diəŋ nɨ mɨ. 11 Miɨ kə dzɛ̂ɛ yu koso. Bə chîtə yu, yu gəndə bə budə ba tsu jiŋ tɨchə mɨ, ndzɨ bɨ bə bəŋgwɨŋ na wokɔ yu. 12 Fi na tsukɔ ŋgwɨŋ waha Apɔlɔs wɨ, nnə nji nnende yu kɨtso lə yu lɛ bəŋ jii bəŋ bə bəŋgwɨŋ baha bədɔ ba, bəmanɨ yu jikə sɛhɛ mba mɛ kpa. Tsa yi yu ná keŋkɛ dzə, ɨ yu tə ba.
Nchanyɛ yi fəŋgbɨŋ bə Kɨntsɨsɨ
13 Bə na ji lɨ, bə kɨ tɨntɨ ŋkɨ. Bə kɨ lɨmi ŋkɨɨŋ kɨmbɨŋ kɛnɨ ntɨŋ, bə ji bənɨ bə na keŋkɛ shəŋ. Bə kɨ lɨmi ŋkɨɨŋ. 14 Fiɔŋ fichi fi bə na fɨtɨ, bə kɨ fɨtɨ bə kɨnse.
15 Bə na kkɨ lə Tɛfanas bə kɨtsɔŋ kɨhɨ na bənɨ bə fiəfiə bə nə̀ fichə kɨ ji bənɨ bə Baba lə dia wu Akɛya. Bɔ' nya gwɨ yibɔ lə bɔ kɨ chitə bənɨ bə Nyɔ lə. Bəŋgwɨŋ nna nende bəŋ 16 lə bə kɨ woko bə bənɨ nɨ bɛŋ, bə kɨ woko tɨ bə bənɨ bə na nɨntɨ bɔ yəsə bə bɔ fiɔŋ'ɨ fimo. 17 Mɨ ŋkɨ ŋ'woko buni nɨ yu wu Tɛfanas bə Fɔtunatus ma Akaykus ba lə bɔ ŋəŋ mɨ. Mɨ ŋŋəŋ bɔ, fi kɨ ji wələ mɨ' ŋŋəŋ bəŋ. 18 Bɔ dɨsɨ shəŋ yɛŋ diəŋ nɨ bɔ dɨshɛ yɛnɨ. Bənɨ nɨ bɛŋ na bənɨ bə naji lə bə kɨ kuntə bɔ. 19 Bəntɛshɛ bə bənɨ bə kɨmbɨŋ'ə bə sɛŋ Ɛsha na tsɨsə bəŋ. Akwela bə Plisilia ma ntɛshɛ yi bənɨ bə kɨmbɨŋ'ə yi na jimi bɔ tsɔŋ tsɨsə ya bəŋ bə shəŋ chi yɨ wu Baba lə lɨ. 20 Bəŋgwɨŋ baha bə kɨmbɨŋ'ə bəchi' faŋ tɨ kɨnntsɨsɨ kɨbɔlə. Bə tsɨ̂sɨ miɨ chi ba kukɔ lɨ nɨ bənɨ bə Nyɔ lə. 21 Kɨŋ kɨnntsɨsɨ na mɨ Pɔl wu na bondo bə kaŋ yɛŋ. 22 Lɔŋ kɨji bə miɨ wu na sɛhɛ Baba. Butɨɨ Baba, fîchə wə bâ. 23 Baba Jisɔs dônchə bəŋ shəŋ yi ndzeŋe. 24 Kɨnse kɛŋ kɨ ji bə bəŋ bəchi nɨ kə tɛshɛ bə Jisɔs Klistu. [Fi kɨ ji ma.]ª