Bibɔtiibi Gbɔmpeepeekaaku i

Bibɔtiibi

gbɔmpeepeekaaku

Tibɔkilkaal

Ŋkilkaaminee, bibɔtiibi gbɔnti liitil nìn sá kugbɔmbaantiiu ní, ní ki nìn dī Samiyeel gbɔnti. Bi nín yākatì tigbɔn gbanti pu kɔŋkɔnneeyee, Bibɔtiibi gbɔmpeepeekaaku sòoǹ nì ti Daafiidi jipɔɔn Saloomɔn nín jíń dibeel puee nì bibɔtiibi bin dī-uee bɔti ní.

Ŋyunti ŋun Daafiidi púĺ kaa ti ŋūǹ kí kpòotī kitiŋee ní u-jipɔmbi bili kíĺ ki bíi kpákà dibeel pu (1.1–2.12). An dāa kúntèe, Saloomɔn di dāa kpántì ubɔti. U nín kpántì ubɔtee, kun u péé péé ki ŋée di sá kunimbɔtidii nì dibeecindi mātam. Ama u dāa kúntì nì iwaatooti ní kaa yúl̀ nì Unimbɔti deedee (2.13–11.43). Niinee ní Unimbɔti yāntì dibeel cúu yākatì mili: tinaakɔti tin bí ŋgan púee yab kaa kíí kí nīn gbíntìi bí Saloomɔn jipɔɔn taapu, ní ki mun lēē bíǹ bi-ba bɔtiu (12.1–14.20). Kí yòon̄ ŋyunti gbanti kí cáá sāā kii abin alaataa alee, abee ali gbanti, an dàkà yii Juuda beel nì Isirayeel beel nìn pée bí ní ki kɔ́ĺ tɔb. Bi bí míǹ ŋyunti ŋubɔee ní bi-kansikin mɔ̄ ní ŋyunti ŋubɔee ní bi jáà (14.21–22.53).

Kugbɔŋu nee baasii dàkà-ti an nín páb́ pu yii ubɔti ń nīn yú nì Unimbɔti deedee puee ní. Ubɔti yaa yú nì Unimbɔti deedeeyee, an bútí u-tiŋki ní, ama u yaa kɔ́ iwaatootin kaa ti tɔ́ Unimbɔtee, an nàantí u nì u-tiŋki ní. Unimbɔti bɔnaatiliibi tikpil nìn nyáń iyunti iba poon ki téetì bibɔtiibi gbanti Unimbɔti nín bàlifī bí ŋá puee. Bi-kansikin un sá ukpaanee di sá Eelii (Ayil 17–19, 21).