Samiyeel Liliiti 24

Daafiidi yāntì bi kàan̄ Isirayeel yab

(Kpèè 1 Kroo 21.1-6)

1 Ti-Dindaan fātìi tí fōō Isirayeel yab pu diŋuul, ní ki lūkutì Daafiidi ń ŋá tin baa lèe. U bí-u yii: «Cùú kàaǹ Isirayeel nì Juuda nib.» 2 Ubɔti bí ujanjakpil Joowaab un bí u-ceeyee yii: «Á yìiǹ Isirayeel naakɔti kɔkɔn, kí yòon̄ Daani ŋgiil pú kí cáá sāā Beerseeba ŋgan pú kí kàaǹ binib kɔkɔ ḿ béé bi-wíiŋŋu nyɔkɔm.» 3 Ní Joowaab kíí-u yii: «Ti-Dindaan a-Nimbɔtiu ń yàntī dinibul ń bùtī míǹ dilaataal pu, sii ti-baa ubɔti ń ká nì a-nimbiliŋ! Kin ba pu ní ti-baa ubɔti nyàab̀ kí kàaǹ binib ní?»

4 Nì míǹ kɔkɔee ubɔti nín pée tīī Joowaab nì bijanjakpilib mara uŋyee, míǹ ní u pée ŋúb́. Niinee ní bíǹ kíĺ nsan kí cùú kàaǹ Isirayeel nib. 5 Bi nìn dūtì Jɔɔdan buŋŋu, ní ki kíĺ ki bíi kàaǹ Arooweer tiŋkin yab nì kitiŋ kin bí ditantakalinee yab. Bi cōom̀ ki jítì Gaadi ki nìkī kí nīn cá Yaseer. 6 Bi kɔ́ Galaadi tiŋkin ní ki nín cá Itii yab tiŋkin Seedeesi. Bi nìkī ki nín cá Daani-Yaan tiŋkin nì ntimu mun māntìi tú-kèe. Míǹ boonee ní bi kàan̄ Siidɔn yab. 7 Ní bi nìkī ki nín cá Tiir tiŋki kin bi máń digundi ki māntìi túee poon, nì Eefi nì Kaana yab timmun. Bi yíkì niinee ní ki nín cá Juuda yab tiŋki kin bí Neegeeb bi yíì Beerseebee. 8 Bi dū iŋmal iwa nì iwiin mmuŋku ní ki yìin̄ Isirayeel nì Juuda tiŋki kɔkɔn ki kàan̄ binib, ní ki fātìi gítìń Jeerusaleem. 9 Joowaab cáá binib bin bi kàan̄ee wíiŋŋu nyɔkɔm ki tīī ubɔti: Isirayeel yab bin nìn ŋmāntì kí cù kujaauee nìn nyáń kutukub alaataa anii, ní Juuda yab nyáń binib kutukub alaataa aŋmoo.

Unimbɔti dáaĺ Daafiidi tafal u-yìntitam pu

(Kpèè 1 Kroo 21.7-17)

10 Daafiidi nín kàan̄ binib míǹ ki dóòyee ní u-pɔbil bíi máfí. Ní u bí ti-Dindaan yii: «M ŋá ikpitikpaan. M-Dindaan, dūú pɔ̄-mi. M ŋá kii m sá uwaatee ní!» 11 Kutaa wúntì Daafiidi fīntì kutaafaauee, ti-Dindaan sòon̄ nì u-bɔnaatiliu Gaadi un sá Daafiidi saŋkiliuee yii: 12 «Cùú ká Daafiidi kí tùkù-u yii: <M làá dū ditafadaaldi mita pu kí bíĺ-si, din a yaa lēēyee, díǹ ní m làá dūú dáaĺ a-tafal.>»

13 Ní Gaadi cūtì Daafiidi cee ki dū tibɔtee ki tùkū-u, ní ki bí-u yii: «A là ŋkùm ń jēetí a-tiŋki pu abin alulaaa, a-nannanliibi ń sāǹ kí jà-si iŋmal itaaa, bìlbil kúm ń jēetí kitiŋ kɔkɔ pu iwiin ita? Dàkafì kí tùkù-mi tin m làá tin tùkù un túnní-mee.» 14 Ní Daafiidi bí Gaadi yii: «M bí kunimbaakpaaŋŋu poon ní... Ama an sɔ́ ḿ kɔ́ ti-Dindaan ŋaan ki jítiǹ ḿ kɔ́ unil ŋaan, di sá yii ti-Dindaan úǹ poon mɔ̄ ní.»

15 Ní ti-Dindaan dū bìlbil kúm ki tɔ́ Isirayeel yab pu, kí yòon̄ kutaafaau gbanti kí cáá sāā ŋwiin ŋun u yóoǹee. Binib bin kpíì dinibul kansikin kí yòon̄ Daani ŋgiil pú kí cáá sāā Beerseeba ŋgan púee nìn sá binib kutukub imuŋku ita nì saalaa ní. 16 Ŋyunti ŋun ntuun bàà tāntì ŋu-ŋal ki túĺ Jeerusaleem tiŋki kí nàan̄-kèe, ní ti-Dindaan kpántì u-landɔkɔŋu ní ki bí ntuun ŋun bíi kù binibee yii: «An ŋmāntèe, gbèen̄ee.»

Ŋyunti gbantee ti-Dindaan tuuŋŋu nìn yú ujeebusja Araafina bileegbanaapaal caŋin. 17 Daafiidi nín ká ntuun bíi kù binib mimmee ní u bí ti-Dindaan yii: «Man di ŋá ikpiti, man di yīntì, m-nibul mun ŋá ba? An sá man nì m-dicaŋku tafal ní á dáaĺ.»

Daafiidi máń ti-Dindaan nsaraafan

(Kpèè 1 Kroo 21.18-26)

18 Ŋwiin gbanti mbaanti ní Gaadi cūtìi ká Daafiidi ní ki bí-u yii: «Jɔ̄m̀ ujeebusja Araafina bileegbanaapaal pu kí mā ti-Dindaan nsaraafan.» 19 Ní Daafiidi nín jɔ́ḿ kii ti-Dindaan nín dī Gaadi pu ki tīī mara puee. 20 Araafina kpēēyee ki ká Daafiidi nì u-kàliŋkpilib dòoń u-cee. Ní u nyáń ki túŋkì-bi ní ki tātìi dōoǹ dicincibil ubɔti nimbiin. 21 Ní ki bālifì yii: «Ba pu ní sii ti-baa ubɔti dòoń man a-tɔntɔnliu cee ní?» Ní Daafiidi kíí-u yii: «M dɔ́miń kí dā a-bileegbanaapaal kí mā m-Dindaan nsaraafan ní. Ti yaa ŋá mimmee, bìlbil kúm min bíi kù samaa nee làá gbèen̄.» 22 Ní Araafina bí Daafiidi yii: «Ti-baa ubɔti ń yòon̄ tin kɔkɔ fáatì-uee kí dūú ŋá saraabi. Kpèè inaa sèé á dūú ŋá saraawɔkaa. Tɔrɔku dɔkpalkaai mun sèé á dūú kpāā ŋŋmi kí wà saraabi. 23 M dū tikɔkɔ ki tīī-si! Ti-Dindaan a-Nimbɔtiu ń fōō a-saraabi.» 24 Ama ní ubɔti bí-u yii: «Aayee, m làá dā a-bileegbanaapaal ní kí pà-si kunimbiŋmiiu nín sá puee. Maa là kí dū faalaa wanti kí ŋá saraawɔkaa kí tīī m-Dindaan m-Nimbɔtiu.»

Ní Daafiidi pàn̄-u animbil jitɔmbi imuŋku ili nì saalaa dibileegbanaapaal nì inaa pu. 25 Niin ní Daafiidi máń ti-Dindaan nsaraafan, ní ki ŋá bisaraawɔkaabi nì mpèé saraabi. Niinee ní ti-Dindaan súń kitiŋee saai, ní bìlbil kúm min jéetì Isirayeel tiŋki puee gbēeǹ.