Samiyeel Liliiti 23

Daafiidi bɔjoolkaati

1 Daafiidi bɔjoolkaati sɔ̀.

Jeesee jipɔɔn Daafiidi bɔti,

un ní Unimbɔti yōoǹ yilpuee bɔti sèé.

Jaakɔb Nimbɔtiu lēē-u ú nīn sá ubɔti,

Isirayeel yab laŋgaamɔntiu.

2 Ti-Dindaan Fam dī m-pu ki sòon̄,

u-nyɔɔbundi kā m-nyɔkɔn.

3 Isirayeel Nimbɔtiu sòon̄,

Isirayeel taŋkpanaakooku bí-mi yii:

«Ubɔti un di ŋúb́ binib deedee,

ki cáá Unimbɔti faaŋku ki kpòotī-bee

4 bí kii ntaafaawìiń nín nyēē pu ki wāĺ bɔ́iii

kutaa kun pu atagban kpée ní.

Utaa yaa nìn̄ boonee, ŋu-tuntuŋku

yàntī kumɔsɔŋu nyēē.»

5 Míǹ ní Unimbɔti ŋá m-dicaŋku,

di sá u pōoǹ-mi ipoon kí nīn pée cáa cá jaanjaan,

ní ki síiǹ marab bin làá nīn wúń ipoon gbanti puee.

U tīī-mi dijajil ijaan kɔkɔ pu,

ní ki ŋá tin kɔkɔ m lèe ki tīī-mi.

6 Ama bin kɔkɔ kaa bí tibanee

bí kii ikuŋkum in bi féeńee ní.

Baa cútí-i mɔ̀b.

7 Un yaa là kí gbēē-iee, see udaan ń dū kikpaŋ

àá ndɔ kí kùl̄-i kí tūū ŋŋmi dibɔbilin niin.

Daafiidi baatandambi

(Kpèè 1 Kroo, 11.10-47)

8 Daafiidi janjaliibi bin sá bibaatandambee yiŋŋi sèé.

Yooseeb-Baseebeeti uakimoonja nìn kútì bijanjakpilib bin nìn cí ubɔtee pu. Úǹ di nìn kūū binib alaataa anii kujabambaantiiu poon.

9 Úǹ boonee Doodoo jipɔɔn Eelasaar di nìn pá. U-naanja nìn sá Ayooya tiŋkin ní. U nìn bí bibaatandambi bita bin nìn nóó Daafiidi bi cūtìi jáń nì Fiiliistii yab kujaau kubɔ poonee. Bíǹ nìn kpáfì kí já kujaau ní Isirayeel yab sáǹ. 10 Ama Eelasaar nìn yúl̀ ki cíitì-bi, ki kūū Fiiliistii yab, áli u-ŋal dūu mɔ́ɔb́ ki nákáǹ dijigbandi. Ti-Dindaan nìn yāntì Isirayeel yab ká dijajikpaandi ŋwiin gbanti. Bijanjaliibi dāa fātìi gítìń Eelasaar ceeyee, an sá bí fūkul̀ anikpil wanti ní.

11 U mun boonee, Agee jipɔɔn Sama di pá. U nìn sá Arari tiŋkin. Fiiliistii yab nìn kóoǹ ki kpáfì Leeyii tiŋkin. Lantiiyi kpaabu bubɔ nìn bí niin, ní Isirayeel yab fāŋkì ki sáǹ. 12 Ama Sama úǹ nìn gbíntì bukpaayee kansikin, ki jáń ki pɔ́ɔkiǹ-bi ki fōō-bu. Míǹ ní ti-Dindaan nìn dī ki tīī Isirayeel yab dijajikpaandi.

13 Kuceeu yuntiŋuee, bijanjakpilib bin cí ubɔtee bita nìn cūtìi ká Daafiidi Adulaam taŋkpalɔkɔlin. Di sá yii Fiiliistii janjakitil diba nìn cūtìi gāā bi-janjanaapaal Reefayiim tantakalin^a. 14 Daafiidi nìn bí laakin u sáǹ ki bál̀ee, ní Fiiliistii yab fōō Beetileem ki kā niin. 15 Ní kpɔkɔsi ubɔ cúú Daafiidi ní u bí yii: «Ŋma di làá cùú cáań-mi lɔkɔ un bí Beetileem punyɔkɔki caŋinee nyim ḿ nyɔ̀ dee?» 16 Niinee bijanjaliibi bitee kɔ́ Fiiliistii yab janjanaapaalin, ki lúnní nnyim lɔkɔ un dɔ̄ Beetileem punyɔkɔki caŋinee ki cáań ki tīī Daafiidi. Ama u nìn yíì kaa nyùn̄-mì. U nìn dū-mi ki fá ti-Dindaan un máaǹ-mee ní. 17 Ní u bí yii: «Ti-Dindaan ń cúú-mi ḿ taa nyɔ̀ nnyim nee! Mi sá-mi kii binib bin kaa mɔ́tì bi-ba pu ki cūtìi nyàabìń-mèe fatikuu ní.» Ní u yíì kaa nyùn̄-mì.

Bibaatandambi bitee nín nìn túń dituŋkpaandi diŋyee dee.

18 Joowaab un na bi yíì Seeruyee naal Abisayi nìn kútì bijanjamɔntiibi bin nìn cí ubɔtee pu. Úǹ di nìn dū u-kpaŋki ki kūū binib alaataa ata kujaaun. An puee, u nìn nyáń diyindi kii <bibaatandambi bitee kitilee> ní. 19 Áli gba u ká jilma ki jítiǹ bitee ní ki kpántì bi-kpiliu. Ama nì míǹ kɔkɔee, waa kɔ́ bitee kitil poon.

20 Yooyadaa, ukabiseelja jipɔɔn Beenayawuu nìn sá ubaatandaan ubɔ naantiiu ní. Úǹ di nìn kūū bibaatandambi bili Moowaab tiŋkin. Ŋwiin ŋubɔ ntaayim bíi lítí ní u kɔ́ dinyimbɔbilin ki kūū gbikinti nsɔnsɔm yuntiŋu gbantin. U nìn túń atuŋkpaan kujaaun. 21 Úǹ di nìn tí kūū ueejipitija ubɔ. Kijapaayee nìn yáà unil. U nìn ŋúb́ kikpaŋ, ní úǹ ŋúb́ ndɔ ki nín cá u-cee, ki bàn̄ ki fōō u-kpaŋki ki gíiǹ ki sāā ki kūū-u. 22 Atuŋkpaan ŋin Yooyadaa jipɔɔn ŋá kujaaunee dee. An puee u nyáń diyindi kii bibaatandambi bitee kitilee. 23 Áli gba u nìn ká jilma ki jítiǹ bibaatandambi mmuŋku nì saalaayee. Ama nì míǹ kɔkɔee, waa kɔ́ bitee kitil poon. An puee Daafiidi yōoǹ-u u kíǹ ki cí úǹ ubɔti.

24 Dikitil mmuŋku nì saalaayee poonee, bin mun nìn gíti bée sèé: Joowaab naal Asayeel, nì Doodoo un sá Beetileemee jipɔɔn Eelanan, 25 nì Sama nì Eelka, bíǹ liitil sá Aroodi tiŋkin, 26 nì Eeleesi un sá Peeleeti tiŋkinee nì Ikeesi un sá Teekoowa tiŋkinee jipɔɔn Iira, 27 nì Abiyeeseer un sá Anatooti tiŋkinee, nì Meebunaayi un sá Usa tiŋkinee, 28 nì Salmɔn un sá Ayooya tiŋkinee, nì Marayii, un sá Neetoofa tiŋkinee, 29 nì Baana un sá Neetoofa tiŋkinee jipɔɔn Eeleebi, nì Riibayi un sá Giibeeya, Beenjameen tiŋkinee jipɔɔn Itaayii, 30 nì Beenayawuu un sá Piratɔn tiŋkinee, nì Adaayi un sá Gaasi bùmbiyaamu tiŋkinee, 31 nì Abiyalbɔn un sá Beeti-Arabaa tiŋkinee, nì Asimafeeti un sá Bawuriim tiŋkinee, 32 nì Eeliyaab un sá Saalbɔn tiŋkinee, nì Yaaseen jipɔmbi ubɔ un bi yíì Joonataŋyee, 33 nì Sama un sá Arari tiŋkinee, nì Saraari un sá Arari tiŋkinee jipɔɔn Ayiiyaam, 34 nì Akasibaayi jipɔɔn Eeliifeeleeti, u-naanja sá umaakaja, nì Ayiitoofeel un sá Giilɔn tiŋkinee jipɔɔn Eeliyam, 35 nì Eesirayii un sá Kaarmeel tiŋkinee nì Paarayii un sá Araab tiŋkinee, 36 nì Naatan un sá Sooba tiŋkinee jipɔɔn Igaal, nì Banii un sá Gaadi naakookunee, 37 nì Seeleeki un sá Amɔn tiŋkinee, nì Narayii un sá Beerooti tiŋkinee. Úǹ di nìn tūntí Seeruya jipɔɔn Joowaab janjawanti, 38 nì Iira nì Gaareeb bin sá Yeeteer tiŋkinee, 39 nì Uurii un sá Itii tiŋkinee. Bi-kɔkɔ nìn kpáfì binib mmuŋku nì saalaa nì biluli ní.