Daafiidi nì Beetiseeba bɔti
11
1 Dibindi tú, ŋyunti ŋun bibɔtiibi jáà kujaauee, ní ubɔti Daafiidi tú ujanjakpil Joowaab nì u-kàliŋkpilib nì Isirayeel janjaliibi kɔkɔ bí cùú já nì Amɔn yab. Bi nìn pɔ̄fì Amɔn yab, ní ki māntìi tú bi-tiŋyil Raaba kí já nì kì. Daafiidi úǹ nìn gbíntì ki kā Jeerusaleema.2 Kujoou kubɔ Daafiidi dōoǹ ki ŋūŋfì ki yíkèe, ní ki jɔ́m̀ ki tɔ́kɔǹ bi nín bɔ̀b̄ u-beecindi yilpu puee ki bíi yìiǹ. U nìn ká unimpu ubɔ yú ki fùul̀. Unimpuee nìn ŋān̄ tikpil. 3 Ní Daafiidi tú bí bàlifì kí béé un ní unimpuee sée, ní bi kíí-u yii: «An sá Eeliyaam bisal Beetiseeba, uyitiija Urii nimpuu.» 4 Daafiidi nìn tú binib cūtìi yíiń unimpuee ki cáań-u, ní u dōoǹ nì u. Unimpuee nìn fùl̄ ŋkpin ki dóò ki ŋá dikoobil nín sá puee kpalaa dee. Míǹ boonee ní u yíkìi nín kùǹ.
5 Beetiseeba gbíntì uŋmal gbanti poon. Ní u tú bi tùkū Daafiidi yii: «M cáá dipool.» 6 Niinee ubɔti Daafiidi tú bí tùkù Joowaab yii: «Yàntī uyitiija Urii ń dāan̄ kí ká-mi.» Ní Joowaab dū Urii ki tú Daafiidi cee. 7 Urii dūu bāań ubɔti Daafiidi ceeyee, ní u bālifì-u Joowaab nì bijanjaliibi pu, nì kujaau nín bíi còom̄ puee. 8 Míǹ boonee ubɔti bí Urii yii: «Nín̄ cá a-dumpu kí dòon̄ kí ŋùŋfì.» Urii nìn nyáń ubɔti dumpu ní ubɔti nyàab̄ tiwampɔkaal ki tú bí cáá tīī-u.
9 Ama Urii kaa nìn cūtì u-dumpu. U nìn gbíntì dibeecindi punyɔkɔpu ki dōoǹ, u nì ubɔti janjaliibi. 10 Kutaa wúntèe ní Daafiidi gbìl̄ yii Urii kaa fu cūtìi dōoǹ u-dumpu. Ní ubɔti yíiń-u ki bālifì-u yii: «A nyánní nsan ŋun fɔ̀kɔ̀ee ní. Ba pu ní aa fu cūtì a-dumpu?» 11 Ní Urii kíí Daafiidi yii: «Dipoondi dakaau yú tantin, ní Isirayeel yab nì Juuda yab kóò tantin. Ujanjakpil Joowaab nì u-janjaliibi dɔ̄ mpaampiin pu dijanjanaapaal pu. Ní man ń nīn cá m-dumpu kí jī kí nyɔ̀ kí dòon̄ m-nimpuu ceeee? M pūtì yii m kpá kí ŋá míǹ jaanjaan.» 12 Ní ubɔti bí Urii yii: «Too, gíti kàl̄ díǹ, foolee ḿ fu yàntī á nīn gítí.» Ní Urii gbíntì Jeerusaleem yaadal wiiŋŋu nì kutaa kun gíti wúntèe. 13 Ní Daafiidi yíiń-u ú dāan̄ u-dumpu kí jī tijin. Daafiidi nìn yāntì u nyùn̄ ndaam ki gbí. Ama Urii nyáńee ki gbíntì ubɔti janjaliibi cee ki dōoǹ, kaa cūtì u-dumpu.
14 Ku wúntì kutaafaauee, Daafiidi ŋmàn̄ Joowaab kugbɔŋu ki dūu ŋúbiǹ Urii ú cáá tīī-u. 15 Tin u nìn ŋmàn̄ kugbɔŋu gbanti poonee sèé: «Laakin dikɔ̀ndi yaa píĺ ki pɔ́ɔkèe, á dū Urii kí lìntī nyɔkɔpu. Míǹ boonee bí sútí kí wàatī-u bí kpɔ̀-u.»
Daafiidi yāntì bi kūū Batiseeba cal Urii
16 Joowaab di nìn cí kitiŋ kin bi nìn māntìi tú kí já kí fōōyee. U nìn dū Urii ki síiǹ laakin u nyí yii binannanliibi baatandambi bée. 17 Kitiŋee yab nìn nyáń ki jáń nì Joowaab nì u-yab. Bi nìn kūū Daafiidi janjaliibi biba. Bi nìn kūū uyitiija Urii mun. 18 Ní Joowaab tú ntuun cūtìi máafì Daafiidi tin jítì kujaaunee kɔkɔ. 19 U nìn tīī ntuunee mara yii: «A yaa máafì-u tin jítì kujaaunee kɔkɔ ki dóò, 20 ní ubɔti yaa fōō diŋuul ki bí-si yii: <Ba pu ní ni sútì ki pìl̄ kitiŋ tikpil ki bíi jáà ní? Naa nyí yii bi ŋūǹ kí nīn yú digundi poon pú ki tòó ki lákatí án dāá cúú-naaa? 21 Ŋma di kūū Yeerubaal jipɔɔn Abimeeleeki Teebeesi tiŋkin níb? An kaa sá unimpu ubɔɔɔ? U nìn dū kunaau ki tɔ́ an lákatì digundi boon ní ki yá ki kūū-u! Kin ba pu ní nimbi sútì ki pìl̄ digundi ní?> Ubɔti yaa lī mimmee, á kíí-u yii: <A-janjakpiliu Urii, uyitiija mun kpíì.>»
22 Ní ntuunee búntì ki bàn̄ ki dū Joowaab nín tùkūń-u pu ú dāá tùkù Daafiidee ki máafì-u. 23 U bí Daafiidi yii: «Binannanliibee nìn pɔ́ɔkiǹ-ti. Bi nyáń ki kpìlìń-ti, ama ní ti téé-bi ki cáa gūū bi-tiŋki punyɔkɔki. 24 Niinee ní bipintɔliibi yúl̀ digundi poon pú ki tòoń ki lákatí digundi ní an cúú ti-janjaliibi biba ní bi kpíì. A-janjakpiliu Urii, uyitiija mun kpíì.» 25 Ní Daafiidi bí ntuunee yii: «Á tùkù Joowaab yii: <Taa dū tibɔti nee kí páb́ a-ba. Kujaau poonee, ŋkúm kù ní kaa gàntī. Pɔ́ɔǹ kí já kí fōō kitiŋ gbanti kí kpēelikì-kì.> Á tīī-u kunyannyaau míǹ.»