Samiyeel Liliiti 10

Bi kɔ́ǹ Daafiidi kàliŋkpilib icoo

(1 Kroo 19.1-5)

1 Míǹ boonee ní Amɔn yab bɔtiu kpíì, ní u-jipɔɔn Anuun fōō u-yil ki kāl̀ dibeel. 2 Niinee Daafiidi bí yii: «M làá ŋá Naasi jipɔɔn Anuun tiŋan kii u-baa nín nìn ŋá-mi tiŋan puee.» Ní Daafiidi lēē u-kàliŋkpilib ki tú bí cùú jāam̀-u u-baa kpool. Bikàliŋkpilib bin Daafiidi nìn túee nìn dūu bàn̄ Amɔn yab tiŋkin. 3 Amɔn yab bɔtibiliŋ bí bi-kpiliu ubɔti Anuun yii: «A dàkafī yii Daafiidi là kí tīī a-baa jilmee pu ní u túnní binib bí dāá jāam̀-si u-kpoolaaa? An kaa sá bí cɔ̄ŋkì kitiŋ kí béé ki-filiŋfeetii kí dāá já kí fōō-kì dalba pu ní bi dɔ́mińaaa?» 4 Niinee ní Anuun yāntì bi cúú Daafiidi kàliŋkpilib, ki kōol̀ bi-nyimpuliŋ dijandi, ki gíí bi-bɔkutiŋ ki ŋāatì bi-kpiliŋ pu, ní ki gíiǹ-bi ki líì. 5 Daafiidi nìn gbìl̄ tin jítèe. Niinee ní u lēē binib bí cùú tūŋkì u-kàliŋkpilibee, di sá yii bi nìn kɔ́ǹ-bi icoo tikpil. Ní ubɔti bí bí tùkù-bi yii: «Ní kàl̄maan Jeeriikoo ni-nyimpuliŋ ń túkú, boonee ní nīn nín kùnní.»

Daafiidi jáń nì Amɔn yab nì Siirii yab

(Kpèè 1 Kroo 19.6-19)

6 Amɔn yab nín béè yii bi kɔ́ Daafiidi poon ki lēē baadakamee ní bi nyàab̄ binib ki tú Siirii yab bin kóò Beeti-Reeyoob nì Soobayee cee ki pàn̄ bijanjaliibi kutukub mmuŋku, ki pàn̄ ubɔti Maaka janjaliibi kutuku, ní ki pàn̄ Toob yab janjaliibi kutukub saalaa nì bili. 7 Daafiidi gbìl̄ mimmee ní ki dū Joowaab nì bijanjaliibi bin kɔkɔ cáá dibaatandee ki tú bí cùú já nì bi. 8 Amɔn yab nìn nyáń ki yúl̀ mpɔ̀n pu kitiŋ punyɔkɔki caŋin ki cí kí já. Ní Siirii yab bin kóò Sooba nì Beeti-Reeyoobee nì Toob yab nì Maaka yab náká náká tisatin. 9 Joowaab dáań ki ká yii an sá anikiti ali ní u làá jáǹ, diba bí nyɔkɔpu diba bí boon pú. Niinee ní u lútì Isirayeel janjaliibi kansikin bimɔntiibi ní ki dū-bi ki yóoǹ ki bíitì Siirii yab. 10 Ní ki dū bin kíǹee ki ŋúbiǹ u-nabiki Abisayi, ki bíitiǹ Amɔn yab. 11 Joowaab tùkū u-nabiki yii: «Siirii yab yaa bíi pɔ́ɔkíǹ-mee, á dāá tíkiń-mi. M yaa tí ká yii Amɔn yab bíi pɔ́ɔkíǹ-see, ma mun làá dāan̄ kí tíkiń-si. 12 Dàkà dibaatandi, tí dàkà dibaatandi kí fīī ti-nibul nì ti-Nimbɔtiu timmu. Ti-Dindaan ń ŋá min u lèe.» 13 Niinee Joowaab nì u-janjaliibi nín cá kí já nì Siirii yab, ní bíǹ sáǹ-bi. 14 Amɔn yab nín ká yii Siirii yab sáǹee, ní bi mun sáǹ Abisayi, ki kɔ́ kitiŋin. Niinee Joowaab gbēeǹ kaa ti bíi jì Amɔn yab, ní ki nín fàtī Jeerusaleem.

15 Siirii yab nín ká yii Isirayeel yab pɔ́ɔkiǹ-bee, ní bi kóoǹ bi-janjaliibi kɔkɔ ki kpáfì. 16 Ubɔti Adadeeseer tú binib Siirii yab bin kóò Eefiraati mɔɔl lapu puee cee, ní bíǹ yíkìń ki dūu bāań Eelam. Adadeeseer janjakpiliu Soobaaki di nìn līī bi-nyɔkɔpu. 17 Ní bi tùkū Daafiidi an bɔti, ní u kóoǹ Isirayeel yab janjaliibi kɔkɔ ki kpáfì, ní bi nín cá ki dūtì Jɔɔdan buŋŋu ki dūu bàn̄ Eelaam. Siirii yab nìn yúl̀ mpɔ̀n pu ki tātìi gbāaǹ dikɔmbool pu kí já nì Daafiidi. 18 Ama Isirayeel yab jáń ki pɔ́ɔkiǹ-bi, ní bi sáǹ. Daafiidi yab nìn kūū itaamu in dátí janjatɔrɔkubee alaataa aluli, ní ki kūū bitanjakaliibi kutukub imuŋku ili. Bi nìn tīī Siirii yab janjakpiliu Soobaaki tiweendi, ní u kpíì niin. 19 Bibɔtiibi bin kɔkɔ nìn bí Adadeeseer taapuee nìn ká yii Isirayeel yab jáń ki pɔ́ɔkiǹ-bi. Niinee ní bi nì Isirayeel yab sòon̄ ki gbìlīǹ tɔb ŋgbansɔŋfi ń nīn bí bi-kansikin, ní ki sīntì bi-ba taapu ki tīī-bi. Kí yòon̄ ŋyunti gbantee, Siirii yab kíǹ ki fàŋkí kí jòò Amɔn yab.