Samiyeel Peepeekaa i

Samiyeel

gbɔmpeepeekaaku

Tibɔkilkaal

Unimbɔti bɔnaatiliu Samiyeel un yindi bi dūu pú kugbɔŋu nee nì kun dī-kuee di sá «bibɔsoonliibi» kansikin un lúŋkèe. Bibɔsoonliibi gbanti ní Unimbɔti nìn tìì u-nibul bí fīī-dì digìńdi yuntiŋu. Samiyeel nìn tūǹ atuun ali ní. U nìn kpèé kitiŋ pu bɔti nì nnimbɔtisan bɔti ní. U nìn túń ditundi bibɔsoonliibi yuntiŋu nì bibɔtiibi yuntiŋu kansikin (ayil 1–7). Isirayeel yab kaa ti fáatì difiil din bibɔsoonliibi dòoń ki fìil̄-bi ŋyunti ŋyuntee, ama bi là kí nīn cáá ubɔti un cáá mpɔn ki bí bi-cee baabadal ki kpèé kitiŋ pu bɔtee. Samiyeel dāa kíí ki kāaǹ ubɔti ki nóó nì samaa nín bālifì puee nì Unimbɔti nín tīī-u mara puee, nì min kamaa waa nìn là mimmee. Ubɔti un u nìn kāaǹee ní bi yíì yii Saayuul (ayil 8–10). Ama an kaa súŋkì ní Saayuul gbēeǹ kaa ti yú nì Unimbɔti deedee. An nìn yāntì ní Unimbɔti mun gbēeǹ kaa ti jòoń-u (ayil 11–15). Niinee ní Unimbɔti lēē kinaacimpɔmbiki Daafiidi. Boonee úǹ di dāa fōō Saayuul yil. Daafiidi bí Saayuul cee ki tūǹ-u ditundi, ki mántiǹ dibeecindi bítam, ní boonee ki dāa sáǹ Saayuul un nìn là kí kpɔ̀-uee. Ayil 16 kí tin sāā 30 poonee, ti kāntí Saayuul beel nín bí ki sìntī taapu ki cá ní Daafiidi pɔŋŋu bí ki wīintí ki cá puee. Kugbɔŋu nee nín kúntì puee sòoǹ nì ti Saayuul nì u-jipɔmbi nín kpíì kujaaun ŋyunti ŋun bi nì Fiiliistii yab bíi jáàyee (ayil 31).

Kugbɔŋu nee téetí-ti yii Unimbɔti baba di sá u-nibul bɔtiu tiŋman pu. Dinibul gbanti poonee, un là kí nīn cáá mpɔn ŋun sá mbaamɔn pɔŋŋuee máaǹ kí nīn sá un sīntì u-ba ki bí Unimbɔti baba pɔŋŋu taapuee.